“5–11 Sune. Sione 14–17: ‘Mou Nofo Maʻu ʻi Heʻeku ʻOfá,’” Haʻu, ʻo Muimui ʻIate Au—Maʻá e Palaimelí: Fuakava Foʻoú 2023 (2022)
“5–11 Sune. Sione 14–17,” Haʻu, ʻo Muimui ʻIate Au—Maʻá e Palaimelí: 2023
Ko e ʻOhomohe Fakaʻosí, tā fakatātaaʻi ʻe William Henry Margetson
5–11 Sune
Sione 14–17
“Mou Nofo Maʻu ʻi Heʻeku ʻOfá”
Lotua ke ʻiloʻi e ngaahi fiemaʻu e fānau ʻokú ke akoʻí lolotonga hoʻo lau ʻa e Sione 14–17. ʻE lava ke tokoni ʻa e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke poupouʻi hoʻo akó, pea ʻe lava ke ʻoatu ʻe he fokotuʻutuʻu ko ʻení ha ngaahi fakakaukau fekauʻaki mo e founga ke akoʻi ʻaki ʻa e fānau ʻi hoʻo kalasí.
Fakaafeʻi e Feʻinasiʻakí
Ke tokoniʻi e fānaú ke nau vahevahe ʻa e meʻa ʻoku nau ako ʻi ʻapí, tuku ki he fānau takitaha ke nau taufetongi ʻi hono pukepuke ha foʻi haati pepa pea vahevahe ha meʻa ʻokú ne fai ke fakahaaʻi ʻaki ʻene ʻofa ki he niʻihi kehé.
Akoʻi e Tokāteliné: Fānau Iiki Angé
ʻOku ou fakahaaʻi ʻeku ʻofa kia Sīsū Kalaisí ʻaki hono tauhi ʻEne ngaahi fekaú.
Tokoni ke mahino ki he fānaú te nau lava ʻo fakahaaʻi ki he Fakamoʻuí ʻoku nau ʻofa ʻiate Ia ʻaki ʻenau tauhi ʻEne ngaahi fekaú.
Ngaahi ʻEkitivitī ʻe Ala Fakahokó
-
Tokoniʻi e fānaú ke nau ako maʻuloto e Sione 14:15. Kole ange ke nau lea ʻaki ʻa e “Kapau ʻoku mou ʻofa kiate au” ʻi he taimi te ke puke hake ai ha foʻi haati pepa. Kole ange ke nau lea ʻaki ʻa e “Fai ʻeku ngaahi fekaú” ʻi he taimi te ke puke hake ai ʻa e folofolá.
-
Tokoniʻi e fānaú ke nau fakakaukau ki ha niʻihi ʻo e ngaahi fekau ʻa Sīsuú. Fakaafeʻi ke nau fokotuʻu mai ha ngaahi founga te nau lava ai ʻo tauhi e fekau takitaha. Fakamoʻoni ange ʻoku fakahaaʻi ʻe heʻetau fai ʻa e ngaahi meʻá ni ʻa ʻetau ʻofa kia Sīsū Kalaisí.
-
Hivaʻi fakataha ha foʻi hiva fekauʻaki mo e ngaahi fekaú, hangē ko e “Tauhi e Ngaahi Fekaú” (Tohi Hiva ʻa e Fānaú, 195–96).
-
Fakahoko mo e fānaú ʻa e foʻi vaʻinga ʻi he peesi ʻekitivitī ʻo e uike ní.
Sione 14:26–27; 15:26; 16:13–14
ʻOku tokoniʻi au ʻe he Laumālie Māʻoniʻoní.
Naʻe akoʻi ʻe Sīsū ki Heʻene kau ākongá ha ngaahi moʻoni mahuʻinga fekauʻaki mo e Laumālie Māʻoniʻoní. Fakakaukau ki he founga ʻe lava ke faitāpuekina ai ʻe he ngaahi moʻoni ko ʻení ʻa e fānau ʻokú ke akoʻí.
Ngaahi ʻEkitivitī ʻe Ala Fakahokó
-
Fakaʻaliʻali e fakatātā Ko e ʻOhomohe Fakaʻosí (Tohi Fakatātā ʻo e Ongongoleleí, fika 54). Fakamatalaʻi ange ki he fānaú naʻe lolotonga e ʻOhomohe Fakaʻosí, ne akoʻi ai ʻe Sīsū ki Heʻene kau ākongá fekauʻaki mo e Laumālie Māʻoniʻoní. Vahevahe ha ngaahi moʻoni ʻe niʻihi naʻá Ne akoʻi ʻi he Sione 14:26–27; 15:26; 16:13–14.
ʻĪmisitalanoa ʻa Sīsū ki he kau ākongáKo e ʻOhomohe Fakaʻosí, tā ʻa Clark Kelley Price
-
Vahevahe haʻo aʻusia ki ha taimi naʻe fakafiemālieʻi, tataki, pe tokoniʻi ai koe ʻe he Laumālie Māʻoniʻoní ke ke ʻiloʻi ʻa e moʻoní. Fakamoʻoni ange ʻe lava ke tokoniʻi ʻe he Laumālie Māʻoniʻoní ʻa e fānaú ʻi ha ngaahi founga tatau.
-
Hivaʻi fakataha mo e fānaú ha foʻi hiva fekauʻaki mo e Laumālie Māʻoniʻoní, hangē ko e “Ko e Laumālie Māʻoniʻoní” (Tohi Hiva ʻa e Fānaú, 56). Fakaafeʻi ke nau fakafanongo ki he ngaahi meʻa ʻoku lave ki ai ʻa e hivá, ʻa ia ʻoku fai ʻe he Laumālie Māʻoniʻoní.
Te u lava ʻo ʻilo ki he Tamai Hēvaní mo Sīsū Kalaisi.
Naʻe akoʻi ʻe Sīsū Kalaisi ko e “moʻui taʻengatá” ko hono ʻiloʻi ia ʻa e “ʻOtua moʻoni pē tahá, mo Sīsū Kalaisi.” ʻI he fakaʻau ke ʻiloʻi ʻe he fānau ʻokú ke akoʻí ʻa Kinauá, te nau maʻu ai ha mālohi fakalaumālie te ne tāpuekina kinautolu ʻi heʻenau moʻuí pea tokoni ke nau aʻusia ʻa e moʻui taʻengatá.
Ngaahi ʻEkitivitī ʻe Ala Fakahokó
-
Lau ʻa e Sione 17:3, pea kole ki he fānaú ke nau fakafanongo ki he meʻa ʻoku finangalo ʻa Sīsū ke tau ʻiloʻí. Fakaʻaliʻali ha ʻū fakatātā ʻokú ne fakafofongaʻi e ngaahi founga te tau lava ai ʻo ʻiloʻi e Tamai Hēvaní mo Sīsū Kalaisí, hangē ko ha ʻū fakatātā ʻo e folofolá, ko ha fāmili ʻoku nau ako fakataha, mo ha taha ʻokú ne tokoniʻi ha tokotaha kehe. Fakafoʻohifo ʻa e ʻū fakatātaá, pea fakaafeʻi ʻa e fānaú ke nau taufetongi ʻi hono fulihi kinautolú pea fakamatalaʻi e meʻa ʻoku ʻi he fakatātaá. ʻOku tokoni fēfē nai ʻa e ngaahi meʻá ni ke tau ʻiloʻi ʻa e Tamai Hēvaní mo Sīsuú?
-
Talanoa mo e fānaú kau ki ha ngaahi meʻa ʻoku nau fai ke nau ʻiloʻi lelei ange ai honau ngaahi kaungāmeʻá. ʻE founga fēfē haʻatau ʻiloʻi lelei ange ʻa e Tamai Hēvaní mo Sīsū Kalaisi? Vahevahe ha ngaahi founga kuó ke fakahoko ai ʻeni.
Akoʻi e Tokāteliné: Fānau Lalahi Angé
ʻOku ou fakahaaʻi ʻeku ʻofa kia Sīsū Kalaisí ʻaki hono tauhi ʻEne ngaahi fekaú.
ʻI hoʻo lau e ngaahi konga ko ʻení ʻi hoʻo ako fakatāutahá, fakakaukau ki he fānau ʻokú ke akoʻí. ʻE tāpuekina fēfē nai kinautolu ʻi he taimi ʻoku mahino ai ko ʻenau talangofua ki he Fakamoʻuí ko ha fakaʻilonga ia ʻo ʻenau ʻofa kiate Iá?
Ngaahi ʻEkitivitī ʻe Ala Fakahokó
-
Fakaafeʻi ʻa e fānaú ke nau vahevahe ʻa e ngaahi founga naʻe fakahaaʻi ai ʻe Sīsū ʻEne talangofua ki he Tamai Hēvaní. Fakaʻaliʻali ha ʻū fakatātā mei he moʻui ʻa e Fakamoʻuí ke tokoni kiate kinautolu (vakai, Tohi Fakatātā ʻo e Ongoongoleleí, fika 34–35, 56–57). Kole ki he fānaú ke nau talanoa ki ha ngaahi taimi ne nau talangofua ai ki he Tamai Hēvaní.
-
Fakaafeʻi ha tokotaha ke lau e Sione 14:15. Tuku ki he fānaú ke nau taufetongi ʻi hono tā ha ʻū fakatātā ʻokú ne fakafofongaʻi ha tokotaha ʻokú ne tauhi ha fekau, lolotonga iá ʻe mateʻi ʻe he toenga ʻo e fānaú e meʻa ʻokú ne taá. Ki ha sīpinga ʻo e ngaahi fekaú, vakai ki he tohitufa Ki Hono Fakamālohia ʻo e Toʻu Tupú (2022). ʻOku fakahaaʻi fēfē ʻe hono tauhi ʻo e ngaahi fekau ko ʻení ʻoku tau ʻofa ʻi he Fakamoʻuí?
ʻOku tataki, fakanonga, mo fakamoʻoniʻi ʻe he Laumālie Māʻoniʻoní e moʻoní.
Kuo maʻu nai ʻe he fānau ʻokú ke akoʻí ʻa e meʻafoaki ʻo e Laumālie Māʻoniʻoní? Ko e hā ʻoku nau ʻilo fekauʻaki mo e founga ʻe lava ke tokoniʻi ai kinautolu ʻe he Laumālie Māʻoniʻoní? Fakakaukau ki he founga te ke tokoni ai ke mahino lelei ange kiate kinautolu ʻa e ngaahi fatongia ʻo e Laumālie Māʻoniʻoní.
Ngaahi ʻEkitivitī ʻe Ala Fakahokó
-
ʻOange ki he fānaú e ngaahi veesi ko ʻení ke nau lau tautau toko ua: Sione 14:26; 15:26; mo e 16:13. Kole ange ke nau kumi e ngaahi lea ʻokú ne akoʻi ange kiate kinautolu e meʻa ʻoku fai ʻe he Laumālie Māʻoniʻoní. Hiki e ngaahi foʻi leá ʻi he palakipoé.
-
Vahevahe ha aʻusia ki ha taimi ne tataki ai koe, fakanonga koe, fakatokanga atu kiate koe, mo fakamoʻoniʻi ai ʻe he Laumālie Māʻoniʻoní kiate koe ʻa e moʻoní. Fakaafeʻi ʻa e fānaú ke vahevahe ha ngaahi meʻa kuo nau aʻusia. Ne nau fakatokangaʻi fēfē ʻa e tākiekina e Laumālie Māʻoniʻoní?
-
Fakaafeʻi e fānaú takitaha ke tā honau fofongá ʻi ha kato pepa. Huluʻi ha kasa ki he loto kato takitaha, ko hono fakafofongaʻi e Laumālie Māʻoniʻoní. Tuku leva ha ngaahi meʻa ki he kató ke taʻofi e māmá, hangē ko ha kongokonga tupenu, ke akoʻi ange ʻoku lava ʻe heʻetau ngaahi fili halá ʻo fakangatangata e tākiekina ʻo e Laumālie Māʻoniʻoní ʻi heʻetau moʻuí. Tuku ki he fānaú ke toʻo e sikāfí pe kongokonga tupenú mei heʻenau ʻū kató ke fakafofongaʻi ʻaki e fakatomalá.
ʻOku finangalo e Tamai Hēvaní mo Sīsū ke u ʻiloʻi Kinaua.
Te ke faitāpuekina e moʻui ʻo e fānaú ʻo taʻengata ʻaki hono tokoniʻi kinautolu ke nau ʻiloʻi lelei ange ʻa e Tamai Hēvaní mo Sīsū Kalaisi.
Ngaahi ʻEkitivitī ʻe Ala Fakahokó
-
Fakaʻaliʻali ha fuʻu ʻakau (pe ko ha fakatātā ʻo ha fuʻu ʻakau) lolotonga iá ʻoku taufetongi e fānaú hono lau e Sione 15:1–9. ʻOku faitatau fēfē nai ʻa Sīsū mo ha vaine? ʻOku tau faitatau fēfē nai mo ha ngaahi vaʻá? Ko e hā te tau lava ʻo fai ke tau “nofo,” pe ofi ki he Fakamoʻuí?
-
Lau leʻolahi e Sione 17:3. Fehuʻi ki he fānaú pe ko e hā ʻoku nau fai ke nau ʻiloʻi ai e Tamai Hēvaní mo Sīsū Kalaisí. Vahevahe e founga ʻokú ke fai ke ke ʻiloʻi ai Kinauá.
Poupouʻi e Ako ʻi ʻApí
Poupouʻi ʻa e fānaú ke nau vahevahe mo honau ngaahi fāmilí ha foʻi hiva ne nau toki ako ʻi he kalasí pe ʻi he taimi hivá.
Fakatupulaki ʻEtau Founga Akoʻí
Fakafeʻungaʻi e ngaahi ʻekitivitií. Kapau ʻokú ke akoʻi e fānau iiki angé, te ke lava ʻo maʻu ha ngaahi fakakaukau lahi ange ʻa ia te ke lava ʻo liliu ke feʻunga mo hoʻo kalasí ʻi he konga ko ʻeni ʻo e fokotuʻutuʻu maʻá e fānau lalahi angé. ʻI he taimi tatau pē, ʻe lava ʻo liliu e ngaahi ʻekitivitī maʻá e fānau iiki angé ke feʻunga ke akoʻi ʻaki e fānau lalahi angé.