Ko Sākeasi ʻi he Funga Sukaminó, tā ʻe James Tissot

15–21 Mē

Mātiu 21–23; Maʻake 11; Luke 19–20; Sione 12

“Vakai, ʻOku Haʻu Ho Tuʻí”

Kimuʻa peá ke lau ʻa e ngaahi fakakaukau ʻi he lēsoni ko ʻení, lau ʻa e Mātiu 21–23; Maʻake 11; Luke 19–20; mo e Sione 12. Hiki e ngaahi fakakaukau te ke lava ʻo vahevahe mo ho fāmilí pe kalasi faka-Siasí.

Lekooti e Ngaahi Ongo ʻOkú ke Maʻú

Naʻe hālofia ʻa e Fakamoʻuí hili ʻEne fononga mei Pētani ki Selusalemá, pea naʻe hangē mai ʻa e fuʻu ʻakau ko e fikí ko ha meʻa ʻe maʻu mei ai ha meʻatokoní. Ka ʻi he ofi atu ʻa Sīsū ki he fuʻu ʻakaú, naʻá Ne vakai naʻe ʻikai fua ia (vakai Mātiu 21:17–20; Maʻake 11:12–14, 20). Naʻe hangē ʻa e fuʻu fikí ko e kau taki fakalotu mālualoi ʻi Selusalemá: naʻe ʻikai ha tupulaki fakalaumālie ʻi heʻenau ngaahi akonaki taʻeʻuhingá mo e māʻoniʻoni fakangalingalí. Naʻe hā ʻo hangē naʻe tauhi ʻe he kau tangata tohí mo e kau Fālesí ʻa e ngaahi fekaú, ka naʻe ʻikai ke nau tauhi ʻa e ongo fekau mahuʻinga tahá: ke ʻofa ki he ʻOtuá mo ʻofa ki ho kaungāʻapí ʻo hangē pē ko koé (vakai Mātiu 22:34–40; 23:23).

ʻI he tafaʻaki ʻe tahá, naʻe kamata ke fakatokangaʻi ʻe he kakai tokolahi ʻa e lelei ʻi he ngaahi akonaki ʻa Sīsuú. ʻI he taimi naʻá Ne aʻu ai ki Selusalemá, naʻa nau talitali lelei Ia mo fola ha ʻū lauʻi ʻakau ʻi Hono halá, pea naʻa nau fiefia ʻi he faifai pea fakahoko ʻa e kikite ʻi he kuonga muʻá naʻe pehē, “ʻOku haʻu ho Tuʻí” (Sakalaia 9:9). ʻI hoʻo laukonga ʻi he uike ní, fakakaukau ki he ngaahi fua ʻo e akonaki ʻa e Fakamoʻuí mo ʻEne feilaulau fakalelei ʻi hoʻo moʻuí mo e founga te ke lava ai ʻo fakatupu “mei ai ʻa e fua lahí” (Sione 12:24).

Ngaahi Fakakaukau ki Hono Ako Fakataautaha ʻo e Folofolá

Luke 19:1–10

ʻOku ʻikai fakamaauʻi ʻe he ʻEikí ʻa e fōtunga ʻoku hā ki tuʻá, ka ko e ngaahi holi ʻo e lotó.

ʻI he kuonga ʻo Sīsuú, naʻe mahalo ʻe he niʻihi tokolahi naʻe taʻefaitotonu mo kaihaʻa ʻa e kau tānaki tukuhaú mei he kakaí. Ko ia, koeʻuhí naʻe hoko ʻa Sakeasi ko e tangata tānaki tukuhau pulé pea koloaʻia, naʻe lahi ange ʻa e mahalo kovi kiate iá. Ka naʻe ʻafioʻi ʻe Sīsū ʻa e loto ʻo Sakeasí. Ko e hā ʻoku fakahā mai ʻi he Luke 19:1–10 kau ki he loto ʻo Sakeasí? Te ke lava ʻo fakaʻilongaʻi ʻa e ngaahi lea ʻi he ngaahi veesi ko ʻení ʻokú ne fakamatalaʻi ʻa e meʻa naʻe fai ʻe Sakeasi ke fakahaaʻi ʻene līʻoa ki he Fakamoʻuí. Ko e hā ʻa e ngaahi holi ʻo ho lotó? Ko e hā ʻokú ke fai ke fekumi ki he Fakamoʻuí, ʻo hangē ko ia ne fai ʻe Sakeasí?

Vakai foki Tokāteline mo e Ngaahi Fuakava 137:9.

Mātiu 23; Luke 20:45–47

Ko e fakamalaʻiaʻi ʻe Sīsū ʻa e mālualoí.

ʻOku fakatupu ʻe he fengāueʻaki ʻa e Fakamoʻuí mo e kau tangata tohí mo e kau Fālesí ha fakafehoanaki mālie ki heʻene feohi mo Sakeasí. Hangē ko ia ne fakamatalaʻi ʻe Palesiteni Tieta F. ʻUkitofá, “Naʻe valokiʻi māʻoniʻoni [ʻe Sīsū] e kau tangata tohí, kau Fālesí mo e kau Sātusi mālualoí—ʻa kinautolu ne feinga ke ʻasi ngali māʻoniʻoni ke maʻu e fakamālō, tākiekina, mo e koloa ʻo e māmaní, lolotonga ʻenau fakamamahiʻi e kakai naʻe totonu ke nau tāpuekiná” (“Ko e Fakamātoato Moʻoní,” Liahona, Mē 2015, 81).

ʻI he Mātiu 23, naʻe fakaʻaongaʻi ʻe he Fakamoʻuí ha ngaahi lea fakatātā ke fakamatalaʻi ʻaki ʻa e mālualoí. Fakakaukau ke fakaʻilongaʻi pe hiki e ngaahi lea fakatātā ko ʻení pea fakatokangaʻi ʻa e meʻa ʻoku nau akoʻi fekauʻaki mo e mālualoí. Ko e hā e faikehekehe ʻo e mālualoí mo e ngaahi vaivai fakaetangata ʻoku tau fehangahangai mo ia ʻi heʻetau feinga ke moʻui ʻaki e ongoongoleleí? Ko e hā ʻoku ueʻi fakalaumālie koe ke ke faí koeʻuhí ko e ngaahi akonaki ʻa e Fakamoʻuí?

 

Mātiu 21:1–11; Maʻake 11:1–11; Luke 19:29–44; Sione 12:1–8, 12–16

Ko Sīsū Kalaisi ʻa hoku Tuʻí.

ʻI he aʻu ʻa Sīsū ki Selusalema ʻi ha ngaahi ʻaho siʻi pē kimuʻa peá Ne fakahoko ʻEne Fakaleleí, naʻe fakahaaʻi ʻe kinautolu naʻa nau ʻiloʻi Ia ko honau Tuʻí ʻa ʻenau mateakí ʻaki hono tākai Iá, ʻo fola ha vala mo ha ngaahi vaʻa paame ʻi Hono hala ki Selusalemá, mo kalanga fakafetaʻi. Fakakaukau ki he founga ʻe lava ai e ngaahi maʻuʻanga tokoni ko ʻení ʻo fakamālohia ange hoʻo mahino ki he ngaahi meʻa ko ʻeni naʻe hokó, ʻa ia naʻe kamata ʻi he uike fakaʻosi ʻo e moʻui ʻa e Fakamoʻuí.

• Ko ha sīpinga ki hono tākai ha tuʻi ʻi he kuonga muʻá: 2 Ngaahi Tuʻi 9:1–6, 13

• Ko ha kikite ʻi he kuonga muʻá ki he hū ikuná: Sakalaia 9:9

• Ko e ʻuhinga ʻo e foʻi lea hōsana: “Hōsaná” ʻi he Fakahinohino ki he Ngaahi Folofolá (scriptures.ChurchofJesusChrist.org)

• Ngaahi kikite ki he founga ʻe toe hāʻele mai ai ʻa e Fakamoʻuí: Fakahā 7:9–12

Te ke fakaʻapaʻapa mo tali fēfē ʻa e Fakamoʻuí ko ho ʻEiki mo e Tuʻí?

Vakai foki ʻa Gerrit W. Gong, “Hosana mo Haleluʻia—Ko e Sīsū Kalaisi Moʻuí: Ko e ʻElito ʻo e Fakafoki Mai e Ongoongoleleí mo e Toetuʻú,” Liahona, Mē 2020, 52–55; “Ko e Hū Ikuna ʻa e ʻEikí ki Selusalemá” (vitiō), ChurchofJesusChrist.org.

Mātiu 22:34–40

Ko e ongo fekau lalahi ʻe uá ke ʻofa ki he ʻOtuá mo e ʻofa ki he niʻihi kehé ʻo hangē pē ko aú.

Ka faifai angé ʻokú ke ongoʻi lōmekina lolotonga hoʻo feinga ke muimui kia Sīsū Kalaisí, ʻe ala tokoni ʻa e folofola ʻa e Fakamoʻuí ki he loeá ʻi he Mātiu 22 ke ke fakafaingofuaʻi mo fakatefito hoʻo tokanga ki ho tuʻunga fakaākongá. Ko ha founga ʻeni ʻe taha ki hono fai ʻení: Lisi ha niʻihi ʻo e ngaahi fekau ʻa e ʻEikí. ʻOku fehokotaki fēfē ʻa e meʻa kotoa ʻi hoʻo lisí mo e ongo fekau lalahi ʻe uá? ʻE tokoni fēfē hoʻo tokanga taha ki he ongo fekau lalahi ʻe uá ke ke tauhi ai e ngaahi fekau kehé?

Ngaahi Fakakaukau ki Hono Ako Fakafāmili ʻo e Folofolá mo e Efiafi ʻi ʻApí

Mātiu 21:12–14.ʻOku fakahaaʻi fēfē ʻe he ngaahi lea mo e ngāue ʻa Sīsū ʻi he Mātiu 21:12–14 ʻa e meʻa naʻá Ne ongoʻi fekauʻaki mo e temipalé? ʻOku tau fakahaaʻi fēfē ʻetau ongo fekauʻaki mo e temipalé? Ko e hā te tau lava ʻo “kapusi ki tuʻa” (veesi 12) mei heʻetau moʻuí ke ngaohi hotau ʻapí ke hangē ko e temipalé? Fakakaukau ke hivaʻi fakataha ha foʻi hiva fekauʻaki mo e temipalé, hangē ko e “Fie Siofia ha Temipale” (Tohi Hiva ʻa e Fānaú, 99).

Mātiu 21:28–32.Ko e hā ha ngaahi lesoni mei he talanoa fakatātā ki he tangata mo hono ongo fohá ʻe ala tokoni ki ho fāmilí? Hangē ko ʻení, te ke lava ʻo fakaʻaongaʻi ʻa e talanoá ke aleaʻi ʻa e mahuʻinga ʻo e talangofuá mo e fakatomala moʻoní. Mahalo naʻa lava ho fāmilí ke nau faʻu ha talanoa ke fakatulamaʻi ʻa e talanoa fakatātaá pea taufetongi ʻi hono fakatātaaʻi e ngaahi konga kehekehé.

Mātiu 22:15–22; Luke 20:21–26.Mahalo ʻe fiefia e fānaú ke ngaohi ha koini loi ʻoku ʻi ai e “mata … mo e tohi” ʻo Sīsuú. Te nau lava ʻo hiki ʻi he tafaʻaki ʻe taha ʻo e ngaahi koiní ha niʻihi ʻo e “ngaahi meʻa ʻa e ʻOtuá” (Mātiu 22:21) te tau lava ʻo foaki kiate Iá. Te mou ala talanoaʻi foki ki hono ʻuhinga hono ʻai e “mata … mo e tohi” ʻa e Fakamoʻuí kiate kitautolú (Mātiu 22:20; vakai foki Mōsaia 5:8; ʻAlamā 5:14).

Sione 12:1–8.Naʻe fakahaaʻi fēfē ʻe Mele ʻene ʻofa ki he Fakamoʻuí? ʻOku tau fakahaaʻi fēfē ʻetau ʻofa kiate Iá?

Ko Hono Fufulu e Toʻukupu Kelekele ʻo Sīsuú, tā ʻe Brian Call

Sione 12:42–43.Ko e hā ha ngaahi nunuʻa fakasōsiale ʻokú ne faʻa taʻofi kitautolu mei heʻetau fakahaaʻi pe taukapoʻi ʻetau tui kia Kalaisí? Ki ha ngaahi sīpinga ʻo ha niʻihi naʻe ʻikai ke nau tukulolo ki he tākiekina fakasōsialé, vakai, Taniela 1:3–20; 3; 6; Sione 7:45–53; 9:1–38; mo Mōsaia 17:1–4. ʻE founga fēfē haʻatau fakahaaʻi ʻetau fakaʻapaʻapa ki he niʻihi kehé ʻi heʻenau fakahaaʻi pe taukapoʻi ʻenau tui fakalotú?

Ke maʻu ha ngaahi fakakaukau lahi ange ki hono akoʻi ʻo e fānaú, vakai ki he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Palaimelí.

Himi ʻoku fokotuʻu atú: “Fiefia, ko e ʻEiki ko e Tuʻi!,” Ngaahi Himí, fika 31.

Ko Hono Fakatupulaki ʻo ʻEtau Founga Akoʻí

Fakaʻaongaʻi e ngaahi fakatātaá ke fakakau mai ai e kau mēmipa ʻo e fāmilí. “ʻOku ʻi he Tohi Fakatātā ʻo e Ongoongoleleí pea mo e Gospel Media Library ʻi he ChurchofJesusChrist.org ha ngaahi ʻīmisi mo ha ngaahi vitiō ʻe ala tokoni ki [homou fāmilí] ke nau fakakaukauloto ki he ngaahi fakakaukaú pe meʻa ne hokó” (Ko e Faiako ʻi he Founga ʻa e Fakamoʻuí, 22).

Hū Ikuná, tā ʻe Walter Rane