“22–28 Mē. Siosefa Sāmita—Mātiu 1; Mātiu 24–25; Maʻake 12–13; Luke 21: ‘[ʻE] Haʻu ʻa e Foha ʻo e Tangatá,’” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: Fuakava Foʻoú 2023 (2022)
“22–28 Mē. Siosefa Sāmita—Mātiu 1; Mātiu 24–25; Maʻake 12–13; Luke 21,” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: 2023
Ko e Hāʻele ʻAngaua Maí, tā ʻe Harry Anderson
22–28 Mē
Siosefa Sāmita—Mātiu 1; Mātiu 24–25; Maʻake 12–13; Luke 21
“[ʻE] Haʻu ʻa e Foha ʻo e Tangatá”
ʻI hoʻo lau ʻa e Siosefa Sāmita—Mātiu 1; Mātiu 24–25; Maʻake 12–13; mo e Luke 21, mahalo te ke fehuʻi, “Ko e hā ʻa e ngaahi pōpoaki ʻoku ʻomi ʻe he ngaahi vahe ko ʻení kiate aú? maʻa hoku fāmilí? maʻa hoku fatongiá?”
Lekooti e Ngaahi Ongo ʻOkú ke Maʻú
ʻOku pau pē naʻe fakaʻohovale ki he kau ākonga ʻa Sīsuú ʻa ʻEne kikité: ʻe fakaʻauha ʻaupito ʻa e temipale mālohi ʻo Selusalemá, mo e senitā fakalaumālie mo fakafonua ʻa e kakai Siú ʻo aʻu ki he “ʻikai ke toe ʻi heni … ha maka kuo fokotuʻu ki ha maka.” Naʻe vivili ʻa e kau ākongá ke nau ʻilo lahi ange. Naʻa nau ʻeke ange, “ʻE hoko ʻa fē ʻa e ngaahi meʻa ni?” “Pea ko e hā ʻa e fakaʻilonga ʻo hoʻo hāʻele maí?” (Siosefa Sāmita—Mātiu 1:2–4). Naʻe fakahā ʻe he tali ʻa e Fakamoʻuí ko e fakaʻauha lahi ʻe hoko mai ki Selusalemá—ko ha kikite ne fakahoko ʻi he AD 70—ʻe siʻisiʻi ia ʻi hono fakafehoanaki ki he ngaahi fakaʻilonga ʻo ʻEne hāʻele mai ʻi he ngaahi ʻaho fakaʻosí. ʻE fakataimi pē ʻa e ngaahi meʻa ʻoku hā ngali fakamakatuʻu ange ʻi he temipale ʻi Selusalemá—ʻa e laʻaá, māhiná, fetuʻú, ngaahi puleʻangá, mo e tahí. ʻE aʻu ʻo “ngalulululu ʻa e ngaahi mālohi ʻo e langí” (Siosefa Sāmita—Mātiu 1:33). Kapau te tau tokanga fakalaumālie, ʻe lava ke akoʻi mai ʻe he moveuveu ko ʻení ke tau falala ki ha meʻa ʻoku tuʻuloa moʻoní. Hangē ko ia naʻe talaʻofa mai ʻe Sīsuú, “ʻE mole atu ai ʻa e langí mo e māmaní; ka ʻe ʻikai mole atu ʻa ʻeku ngaahi leá. … Pea ko ia ia te ne meʻa mahuʻinga ʻaki ʻa ʻeku leá, ʻe ʻikai ke kākaaʻi ia” (Siosefa Sāmita—Mātiu 1:35, 37).
Ngaahi Fakakaukau ki Hono Ako Fakataautaha ʻo e Folofolá
Ko e hā ʻa e Siosefa Sāmita—Mātiu?
ʻOku tuʻu ʻa e Siosefa Sāmita—Mātiú ʻi he Mataʻitofe Mahuʻingá, ko e Liliu ia ʻa Siosefa Sāmita ki he veesi fakaʻosi ʻo e Mātiu 23 mo e kotoa ʻo e Mātiu 24. ʻOku toe fakafoki mai ʻe he ngaahi liliu fakalaumālie ʻa Siosefa Sāmitá ʻa e ngaahi moʻoni mahuʻinga ko ia naʻe molé. ʻOku lau ʻa e veesi 12–21 ki hono fakaʻauha ʻo Selusalema ʻi he kuonga muʻá; ʻoku ʻi he veesi 21–55ha ngaahi kikite fekauʻaki mo e kuonga fakaʻosí.
Siosefa Sāmita—Mātiu 1:21–37; Maʻake 13:21–37; Luke 21:25–38
ʻE ala tokoni e ngaahi kikite fekauʻaki mo e Hāʻele ʻAngaua Mai ʻa e Fakamoʻuí ke u hanganaki atu ki he kahaʻú ʻi he tui.
ʻE lava ke fakatupu loto-hohaʻa ʻa e laukonga kau ki he ngaahi meʻa ʻe hoko ʻi he Hāʻele ʻAngaua Mai ʻa Sīsū Kalaisí. Ka ʻi he taimi naʻe kikiteʻi ʻe Sīsū ʻa e ngaahi meʻa ko ʻeni ʻe hokó, naʻá Ne folofola ange ki Heʻene kau ākongá ke “ʻoua naʻa mou puputuʻu” (Siosefa Sāmita—Mātiu 1:23). ʻE founga fēfē ha “ʻoua [naʻa mou] puputuʻu” ʻi hoʻomou fanongo ʻo kau ki he ngaahi mofuiké, taú, kākaá, mo e hongé? Fakakaukau ki he fehuʻi ko ʻení ʻi hoʻo lau ʻa e ngaahi veesi ko ʻení. Fakaʻilongaʻi pe hiki ha faʻahinga faleʻi fakafiemālie te ke maʻu.
Vakai foki, Ngaahi Tefito ʻo e Ongoongoleleí, “Hāʻele ʻAngaua Mai ʻa Sīsū Kalaisí,” topics.ChurchofJesusChrist.org.
Siosefa Sāmita—Mātiu 1:26–27, 38–55; Mātiu 25:1–13; Luke 21:29–36
Kuo pau maʻu pē ke u mateuteu ki he Hāʻele ʻAngaua Mai ʻa e Fakamoʻuí.
Kuo teʻeki fakahā ʻe he ʻOtuá “ʻa e ʻaho pe ʻa e feituʻu laʻā ʻe haʻu ai ʻa e Foha ʻo e tangatá” (Mātiu 25:13). Ka ʻoku ʻikai ko Hono finangaló ke hoko mai ʻa e ʻaho ko iá ʻoku “taʻomia” ʻiate kitautolu (Luke 21:34), ko ia kuó Ne ʻomi ai ʻa e faleʻi ki he founga ke tau mateuteu aí.
ʻI hoʻo lau ʻa e ngaahi veesi ko ʻení, ʻiloʻi ʻa e ngaahi talanoa fakatātā mo e ngaahi fakafehoanaki kehe naʻe fakaʻaongaʻi ʻe he Fakamoʻuí ke Ne akoʻi mai ke tau mateuteu maʻu pē ki Heʻene Hāʻele ʻAngaua Maí. Ko e hā ha meʻa ʻokú ke ako mei ai? Ko e hā ʻa e meʻa ʻoku ueʻi fakalaumālie koe ke ke faí?
Te ke lava foki ʻo fakakaukau ki he founga ʻoku finangalo ʻa e Fakamoʻuí ke ke tokoni ki hono teuteuʻi ʻo e māmaní ki Heʻene Hāʻele ʻAngaua Maí. ʻOkú ke ongoʻi ʻoku ʻuhinga ki he hā ke mateuteu ke tali ʻa e Fakamoʻuí ʻi Heʻene hāʻele maí? ʻE lava e pōpoaki ʻa ʻEletā D. Toti Kulisitofasoni ko e “Teuteu ki he Toe Hāʻele Mai ʻa e ʻEikí” (Liahona, Mē 2019, 81–84) ʻo tokoni atu ke ke fakalaulauloto ki heni.
Vakai foki e Russell M. Nelson, “Tali Lelei ʻa e Kahaʻú ʻi he Tui,” Liahona, Nōvema 2020, 73–76.
ʻOku ʻamanaki mai e Tamai Hēvaní ke u ngāue fakapotopoto ʻaki ʻEne ngaahi meʻafoakí.
ʻI he talanoa fakatātā ʻa e Fakamoʻuí, naʻe ʻuhinga ʻa e “talēnití” ki he paʻangá. Ka ʻe lava ke ueʻi kitautolu ʻe he talanoa fakatātā ʻo e ngaahi talēnití ke tau fakalaulauloto ki he founga ʻoku tau fakaʻaongaʻi ai ha taha ʻo hotau ngaahi tāpuakí, kae ʻikai ko e paʻangá pē. Hili hono lau e talanoa fakatātā ko ʻení, te ke fie faʻu ha lisi ʻo e ngaahi tāpuaki mo e ngaahi fatongia kuo fakafalala atu ʻe he Tamai Hēvaní kiate koé. Ko e hā ʻokú Ne ʻamanaki te ke fakaʻaongaʻi ki ai e ngaahi tāpuaki ko ʻení? ʻE founga fēfē haʻo ngāue fakapotopoto ange ʻaki ʻa e ngaahi meʻafoaki ko ʻení?
ʻI heʻeku tauhi ʻa e niʻihi kehé, ʻoku ou tauhi ai ki he ʻOtuá.
Kapau ʻokú ke fifili pe ʻe fakamaauʻi fēfē ʻe he ʻEikí hoʻo moʻuí, lau ʻa e talanoa fakatātā ki he fanga sipí mo e fanga kosí. ʻOkú ke pehē ko e hā ʻe tokoni ai hono tokangaʻi ʻa kinautolu ʻoku faingataʻaʻiá ke teuteuʻi koe ke ke “maʻu ʻa e puleʻanga” ʻo e ʻOtuá?
ʻOku faitatau fēfē ʻa e talanoa fakatātā ko ʻení mo e talanoa fakatātā ʻe ua ʻi he Mātiu 25? Ko e hā ha ngaahi pōpoaki ʻoku faitatau ai ʻa e talanoa ʻe tolú?
Vakai foki Mōsaia 2:17; 5:13
Ngaahi Fakakaukau ki Hono Ako Fakafāmili ʻo e Folofolá mo e Efiafi ʻi ʻApí
-
Siosefa Sāmita—Mātiu.Ke tokoni ki ho fāmilí ke nau vakaiʻi ʻa e vahe ko ʻení, fakaafeʻi ke nau fekumi ki he ngaahi akonaki ʻa e Fakamoʻuí ki he founga ke tau mateuteu ai ki Heʻene Hāʻele ʻAngaua Maí (hangē ko ʻení, vakai, veesi 22–23, 29–30, 37, 46–48). Ko e hā te tau lava ʻo fai ke muimui ai ki he faleʻi ko ʻení? Mahalo ʻe fiefia homou fāmilí ʻi hono hivaʻi e “ʻO Ka Ne Ka Toe Haʻú” (Tohi Hiva ʻa e Fānaú, 46–47) pea tā ha ngaahi fakatātā ʻo e meʻa ʻoku nau fakakaukau ʻe hoko ʻi he Hāʻele ʻAngaua Mai ʻa e Fakamoʻuí.
-
Siosefa Sāmita—Mātiu 1:22, 37.ʻOku ʻuhinga ki he hā ke mahuʻingaʻia ʻi he folofola ʻa e ʻOtuá? ʻE founga fēfē haʻatau fakahoko fakataautaha mo fakafāmili ʻení? ʻE tokoni fēfē ia ke tau fakaʻehiʻehi ai mei hano kākaaʻi kitautolu?
-
Mātiu 25:1–13.Te ke lava ʻo fakaʻaongaʻi ʻa e fakatātā ʻo e kau tāupoʻou ʻe toko hongofulú ʻoku fakakau atu ʻi he lēsoni ko ʻení ke mou aleaʻi ai ʻa e Mātiu 25:1–13. Ko e hā ha ngaahi fakaikiiki ʻoku tau vakai ki ai ʻi he fakatātaá ʻoku fakamatalaʻi atu ʻi he ngaahi veesi ko ʻení?
Te ke lava ʻo kosi ha pepa ʻi ha fōtunga ʻo ha tulutā o e loló pea fūfuuʻi takai e ngaahi tulutaá ʻi homou ʻapí. Te ke lava ʻo fakapipiki ʻa e ngaahi tulutaá ki ha ngaahi meʻa hangē ko e folofolá pe ko ha fakatātā ʻo e temipalé. ʻI he taimi ʻoku maʻu ai ʻe he kau mēmipa ʻo e fāmilí ʻa e ngaahi tulutaá, te mou lava ʻo aleaʻi ʻa e founga ʻoku tokoniʻi ai kitautolu ʻe he ngaahi meʻá ni ke tau teuteu ki he Hāʻele ʻAngaua Maí.
-
Maʻake 12:38–44; Luke 21:1–4.Ko e hā ʻoku akoʻi mai ʻe he ngaahi veesi ko ʻení kau ki he ʻafio mai ʻa e Fakamoʻuí ki heʻetau ngaahi foakí? Fakaʻaliʻali ki homou fāmilí ʻa e founga ke totongi ai e vahehongofulú mo e foaki ʻaukaí ki he ʻEikí. ʻOku tokoni fēfē ʻa e ngaahi foaki ko ʻení ke langa e puleʻanga ʻo e ʻOtuá? Ko e hā ha ngaahi founga kehe te tau lava ai ʻo foaki “ʻa ia kotoa pē [ʻoku tau] maʻú” ki he ʻEikí? (Maʻake 12:44).
Paʻanga ʻa e Fefine Uitoú, tā ʻe Sandra Rast
Ke maʻu ha ngaahi fakakaukau lahi ange ki hono akoʻi ʻo e fānaú, vakai ki he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Palaimelí.
Hiva ʻoku fokotuʻu atú: “ʻO Ka Ne Ka Toe Haʻú,” Tohi Hiva ʻa e Fānaú, 46–47.
Ko Hono Fakatupulaki e Ako Fakataautahá
Teuteu ho ʻātakaí. “ʻE lava ke tokoni lahi hotau ʻātakaí ki heʻetau malava ke ako mo ongoʻi e moʻoní” (Ko e Faiako ʻi he Founga ʻa e Fakamoʻuí, 15). Feinga ke kumi ha feituʻu ke ako ai e folofolá ʻa ia ʻe lava ke ne fakaafeʻi ʻa e ivi tākiekina ʻo e Laumālie Māʻoniʻoní. ʻE ala tokoni foki ʻa e ngaahi hiva mo e fakatātā ʻoku langaki moʻuí ke ne fakaafeʻi ʻa e Laumālié.
Toko Nima ʻIate Kinautolu Naʻe Poto, tā ʻe Walter Rane