“1–7 Mē. Luke 12–17; Sione 11: ‘Tau Fiefia mo Au; he Kuó u ʻIlo ʻa ʻEku Sipi ʻa ia Naʻe Molé,’” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: Fuakava Foʻoú 2023 (2022)
“1–7 Mē. Luke 12–17; Sione 11,” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: 2023
Ko e Foha Maumau Koloá, tā ʻe Liz Lemon Swindle
1–7 Mē
Luke 12–17; Sione 11
“Tau Fiefia mo Au; he Kuó u ʻIlo ʻa ʻEku Sipi ʻa Ia Naʻe Molé”
ʻI hoʻo lau ʻa e Luke 12–17 mo e Sione 11, fekumi ʻi he faʻa lotu ki he meʻa ʻoku finangalo ʻa e Tamai Hēvaní ke ke ʻiloʻi mo fakahokó. ʻE lava ke hoko hoʻo ako ʻa e ngaahi vahe ko ʻení ke fakaava ai ho lotó ki he ngaahi pōpoaki naʻe fakataumuʻa pē ia kiate koe.
Lekooti e Ngaahi Ongo ʻOkú ke Maʻú
ʻI he ngaahi tūkunga lahi, ʻe meimei ke pehē ʻoku fisifisimuʻa kapau ʻe maʻu ha laumālie ʻe toko 99 mei he toko 100—ka ʻoku ʻikai pehē ia ʻi he taimi ʻoku fakafofongaʻi ai ʻe he fika peheé ʻa e fānau ʻofeina ʻa e ʻOtuá (vakai Tokāteline mo e Ngaahi Fuakava 18:10). ʻI he tuʻunga ko iá, naʻa mo e laumālie ʻe tahá ʻoku taau ia ke tau fekumi fakaʻauliliki “kae ʻoua ke [tau] ʻilo ia” (Luke 15:4), ʻi he founga ko ia ne akoʻi ʻe he Fakamoʻuí ʻi he talanoa fakatātā ki he sipi heé. Pea ʻe lava leva ke toki kamata ʻa e fakafiefiá, he ʻe “fiefia ʻi he langí ʻo lahi ʻi he fakatomala ʻa e angahala ʻe toko tahá, ʻi he angatonu ʻe toko hivangofulu mā toko hiva, ʻoku ʻikai ʻaonga ke nau fakatomalá” (Luke 15:7). Kapau ʻoku ngali taʻetotonu ia, ʻoku ʻaonga ke manatuʻi ko hono tuʻunga totonú ʻoku ʻikai ha taha ia ʻoku “ʻikai ʻaonga ke [ne] fakatomala.” ʻOku tau fie maʻu kotoa pē ke fakahaofi kitautolu. Pea ʻe lava leva ke tau kau kotoa ʻi he fakahaofí, ʻo fiefia fakataha ʻi he foʻi laumālie kotoa pē ʻoku fakahaofí (vakai Tokāteline mo e Ngaahi Fuakava 18:15–16).
Ngaahi Fakakaukau ki Hono Ako Fakataautaha ʻo e Folofolá
ʻOku tāpuekina au ʻi heʻeku tuku hoku lotó ki he ngaahi meʻa ʻoku taʻengatá.
Ko e hā ka folofola ai e ʻOtuá ʻo pehē “Ko e vale koe” ki ha tangata faʻa ngāue, mo lavameʻa ʻa ia kuó ne langa ha ngaahi feleoko lalahi pea fakafonu ia ʻaki ʻa e ngaahi fua ʻo ʻene ngāué? (vakai Luke 12:16–21). ʻI he ngaahi vahe ko ʻeni ʻi he tohi ʻa Luké, ʻoku akoʻi ʻe he Fakamoʻuí ha ngaahi talanoa fakatātā ʻe ala tokoni ke tau tokanga taha ki he ngaahi meʻa ʻoku taʻengatá. ʻOku hiki atu heni ha niʻihi ʻo e ngaahi talanoa fakatātā ko ʻení. Te ke fakamatala fakanounouʻi fēfē ʻa e ʻuhinga ʻo e tala-fakatātā takitaha? ʻOkú ke pehē ko e hā ʻoku finangalo ʻa e ʻEikí ke ke akó?
-
Ko e tangata vale naʻe koloaʻiá (Luke 12:13–21)
-
Ko e ʻohomohe lahí (Luke 14:12–24)
-
Ko e foha maumau koloá (Luke 15:11–32)
-
Ko e tauhi koloa taʻefaitotonú (Luke 16:1–12)
-
Ko e tangata koloaʻiá mo Lasalosi (Luke 16:19–31)
Vakai foki Mātiu 6:19–34; 2 Nīfai 9:30; Tokāteline mo e Ngaahi Fuakava 25:10.
ʻOku fiefia ʻa e Tamai Hēvaní ʻi he taimi ʻoku maʻu ai ʻa kinautolu naʻe heé.
ʻI hoʻo lau ʻa e ngaahi talanoa fakatātā naʻe akoʻi ʻe Sīsū ʻi he Luke 15, ko e hā ʻokú ke ako fekauʻaki mo e ongo ʻoku maʻu ʻe he Tamai Hēvaní kiate kinautolu kuo faiangahala pe “heé”? Ko e hā ʻoku totonu ke ongoʻi ʻe ha taki fakalaumālie—pe ko ha taha ʻiate kitautolu—kiate kinautolú? Fakakaukau ki he founga naʻe mei tali ʻaki ʻe he kau Fālesí mo e kau tangata tohí ʻa e ngaahi fehuʻi ko ʻení (vakai e Luke 15:1–2). ʻE lava ke maʻu e tali ʻa Sīsuú ʻi ha talanoa fakatātā ʻe tolu ʻi he Luke 15. ʻI hoʻo laú, fakakaukau ki he meʻa naʻe akoʻi ʻe Sīsū ki he kau tangata tohí mo e kau Fālesí ʻaki e ngaahi talanoa fakatātā ko ʻení.
ʻE lava foki ke ke fakakaukau ke faʻu ha lisi ʻo e ngaahi meʻa ʻoku faitatau mo faikehekehe ai ʻa e ngaahi talanoa fakatātaá. Hangē ko ʻení, te ke lava ʻo ʻiloʻi ʻa e meʻa naʻe mole ʻi he talanoa fakatātā takitaha pea mo e ʻuhinga naʻe mole aí, founga naʻe maʻu aí, mo e fakafeangai ʻa e kakaí ʻi he taimi naʻe maʻu aí. Ko e hā ha ngaahi pōpoaki ʻa Sīsū ki he niʻihi ko ia ʻoku “heé”—ʻo kau ai ʻa kinautolu ʻoku ʻikai ke nau ʻiloʻi ʻoku nau heé? Ko e hā ha ngaahi pōpoaki naʻá ne ʻoatu ki he kakai ko ia ʻoku nau fekumi ki he niʻihi ʻoku heé?
Vakai foki Tokāteline mo e Ngaahi Fuakava 18:10–16 .
Ko e Konga Siliva naʻe Molé, tā ʻe James Tissot
Ko e hā naʻe akoʻi ʻe Kalaisi ʻi he talanoa fakatātā ki he tauhi koloa taʻeangatonú?
Naʻe fakamatalaʻi ʻe ʻEletā James E. Talmage ha lēsoni te tau lava ʻo ako mei he talanoa fakatātaá: “Ke mou faivelenga; he ʻoku vave ke ʻosi ʻa e ʻaho te mou lava ʻo ngāueʻaki ai hoʻomou ngaahi koloa fakaemāmaní. Ako mei he taʻefaitotonú mo e koví; kapau ʻoku nau mātuʻaki tokanga ke teuteu ki he kahaʻu pē ʻoku nau fakakaukau ki aí, ʻe fēfē hono lahi ange ʻa e totonu ke ke teuteu ki aí, ʻi hoʻo tui ki ha kahaʻu taʻengatá! Kapau kuo teʻeki ke ke poto mo anga-fakapotopoto ʻi hono fakaʻaongaʻi ʻo e ‘koloa taʻe māʻoniʻoní’, ʻe fēfē ai haʻo falalaʻanga ke tauhi e ngaahi koloa lahi ange ʻoku tolongá?” (Jesus the Christ [1916], 464). Ko e hā ha ngaahi lēsoni kehe ʻokú ke maʻu ʻi he talanoa fakatātā ko ʻení?
Te u ofi ange ki he ʻOtuá ʻi heʻeku houngaʻia ʻi hoku ngaahi tāpuakí.
Kapau naʻá ke kau ʻi he kau kilia ʻe toko hongofulú, ʻokú ke pehē te ke toe foki ʻo fakamālō ki he Fakamoʻuí? Ko e hā mo ha toe ngaahi tāpuaki kehe naʻe maʻu ʻe he tangata kilia houngaʻiá koeʻuhí ko ʻene fakahaaʻi ʻene fakamāloó?
Te ke lava foki ʻo fakalaulauloto ki he folofola ʻa e Fakamoʻuí, “Kuo fakamoʻui koe ʻe hoʻo tuí” (veesi 19). ʻI hoʻo fakakaukaú, ʻoku fekauʻaki fēfē ʻa e loto houngaʻiá mo e tuí? ʻOkú na fakatou tokoni fēfe ke tau hoko ʻo haohaoá? ʻE lava ke tokoni atu ʻa e vitiō “Palesiteni Lāsolo M. Nalesoni ʻi he Mālohi Faifakamoʻui ʻo e Fakafetaʻí” (ChurchofJesusChrist.org) ke ke fakalaulauloto ki he ngaahi fehuʻi ko ʻení.
Vakai foki, Dale G. Renlund, “Fakakaukau ki he Angalelei mo e Mafimafi ʻo e ʻOtuá,” Liahona, Mē 2020, 41–44.
Ko Sīsū Kalaisi ʻa e Toetuʻú mo e Moʻuí.
Ko e mana ko ia ʻo hono fokotuʻu hake ʻa Lasalosi mei he maté ko ha fakamoʻoni mālohi mo taʻe toe-fehuʻia ia ko Sīsū ko e ʻAlo moʻoni Ia ʻo e ʻOtuá mo e Mīsaia naʻe talaʻofa maí. Ko e hā ha ngaahi lea, kupuʻi lea pe fakaikiiki ʻi he Sione 11:1–46 ʻokú ne fakamālohia hoʻo tui ko Sīsū Kalaisi ʻa e “toetuʻú, mo e moʻuí”? Ko e hā ʻene ʻuhinga kiate koe ko Sīsū ʻa e “toetuʻú, mo e moʻuí”?
Ngaahi Fakakaukau ki Hono Ako Fakafāmili ʻo e Folofolá mo e Efiafi ʻi ʻApí
-
Luke 15:1–10.ʻOku mahino nai ki he kau mēmipa ho fāmilí ʻa e ongo ko ia ʻo e mole ha meʻa—pe ke te mole? ʻE lava ke kamataʻi ʻe he talanoa ki heʻenau ngaahi aʻusiá ha fealēleaʻaki fekauʻaki mo e ngaahi talanoa fakatātā ʻo e sipi heé mo e foʻi paʻanga naʻe molé. Pe te mou vaʻinga langatoi fakafāmili. ʻOku tokoni fēfē ʻa e ʻekitivitī ko ʻení ke mahino kiate kitautolu ʻa e ngaahi talanoa fakatātā ko ʻení?
-
Luke 15:11–32.Ko e hā ha founga ʻe lava ke tau hangē ai ko e tamai ʻi he talanoa ko ʻení ʻi he mole hatau ʻofaʻanga? Ko e hā te tau lava ʻo ako mei he aʻusia ʻa e foha lahí ʻe ala tokoni ke tau anga faka-Kalaisi ange? Ko e hā ha ngaahi founga ʻoku tatau ai ʻa e tamai ʻi he talanoa fakatātā ko ʻení mo ʻetau Tamai Hēvaní?
-
Luke 17:11–19.Ke tokoni ki he kau mēmipa homou fāmilí ke nau fakaʻaongaʻi ʻa e talanoa ki he kau kilia ʻe toko hongofulú, te ke lava ʻo fakaafeʻi ke nau fai ha fanga kiʻi tohi fakapulipuli ʻo fakahaaʻi ai ʻenau houngaʻia ki he tokotaha takitaha. Te mou lava foki ʻo hivaʻi fakataha e “Tānaki Ho Ngaahi Tāpuakí” (Ngaahi Himí, fika 148) pea tānaki e ngaahi tāpuaki kuo maʻu ʻe homou fāmilí.
-
Sione 11:1–46.ʻE lava ʻe he kau mēmipa ʻo e fāmilí ʻo vahevahe ʻenau ngaahi fakamoʻoni kia Sīsū Kalaisí.
Ke maʻu ha ngaahi fakakaukau lahi ange ki hono akoʻi ʻo e fānaú, vakai ki he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Palaimelí.
Himi ʻoku fokotuʻu atú: “ʻOku ʻOfa ʻa e Tauhi,” Ngaahi Himí, fika 128.
Ko Hono Fakatupulaki ʻo ʻEtau Founga Akoʻí
Fakaʻaongaʻi e ngaahi talanoá mo e sīpingá ke akoʻi ʻaki e ngaahi tefitoʻi moʻoni ʻo e ongoongoleleí. Naʻe faʻa akoʻi ʻe he Fakamoʻuí ʻa e ngaahi tefitoʻi moʻoni ʻo e ongoongoleleí ʻaki hono fakaʻaongaʻi e ngaahi talanoá mo e talanoa fakatātaá. Fakakaukau ki ha ngaahi sīpinga mo ha talanoa mei hoʻo moʻuí te ke ala fakaʻaongaʻi ke moʻui ʻaki ha tefitoʻi moʻoni ʻo e ongoongoleleí ʻi homou fāmilí (vakai Ko e Faiako ʻi he Founga ʻa e Fakamoʻuí, 22).
Ko e fē ʻa e Toko Hivá, tā ʻe Liz Lemon Swindle.