Zache sou pyebwa Sikamò a, pa James Tissot

15–21 Me.

Matye 21–23; Mak 11; Lik 19–20; Jan 12

“Gade, Wa W la Ap Vini”

Pandan w ap li Matye 21-23; Mak 11; Lik 19-20; ak Jan 12, prete atansyon a enpresyon ou resevwa nan men Sentespri a. Refere w a “Satisfè Bezwen Timoun ki Pi Piti yo” nan kòmansman resous sa a pou bagay ou dwe kenbe nan lespri w pandan w ap ansenye prensip sa yo.

Envite Pataj

Montre foto ki nan plan leson semèn sa a nan Vini, Suiv Mwen—Pou Moun yo ak Fanmi yo, epi envite timoun yo pou yo pataje sa yo konnen sou sa ki ap pase nan foto sa a.

Anseye Doktrin nan: Timoun Ki Pi Piti yo

Lik 19:1–10

Papa nou ki nan Syèl la ak Jezikri konnen m e Li konn non m.

Pandan w ap li konvèsasyon Sovè a avèk Zache a, ki mesaj ou jwenn ki kapab beni timoun w ap ansenye yo?

Aktivite Posib

• Montre foto Zache sou Pye Sikamò a (nan plan sa a oubyen nan ChurchofJesusChrist.org). Ede timoun yo jwenn Zache epi di non li. Kreye aksyon pou timoun yo fè pandan w ap rakonte istwa Zache ak Jezikri a—paregzanp, kanpe sou pwent zòtèy yo pou yo ka wè anlè yon foul oubyen fè tankou w ap monte yon pyebwa. Eksplike ke Sovè a te wè Zache e Li te rele l pa non li. Temwaye ke Sovè a konnen non chak nan timoun yo epi Li konn non yo.

• Vini avèk yon ankadreman foto nan klas la, oubyen fè youn avèk papye. Envite chak timoun pou yo kenbe ankadreman an devan figi yo lè tou pa yo rive pandan rès klas la ap di “Papa nou ki nan Syèl la ak Jezikri konnen [non timoun nan].”

• Chante yon chan ansanm sou lanmou Papa nou ki nan Syèl la, tankou “Je Suis Enfant de Dieu” (Chants Pour Les Enfants, 2-3). Ede timoun yo koute bagay ki ap ede yo konnen ke Papa nou ki nan Syèl la renmen yo.

Matye 21:12–14

Tanp lan se yon kote ki sakre.

Reverans Jezi pou tanp lan, jan sa dekri nan vèsè sa yo, ka ede timoun w ap ansenye yo konprann ke tanp lan se yon kote ki sakre.

Aktivite Posib

• Montre foto Jezi ki ap pwòpte tanp lan (Liv Ilistrasyon Levanjil la, no. 51), epi rakonte istwa yo rapòte nan Matye 21:12–14la. Ede timoun yo jwenn lajan ak bèt ki nan foto a. Apre sa diskite rezon ki fè Sovè a te vle kanbis yo ak moun ki ap vann bèt yo pou yo kite tanp lan.

• Montre foto tanp (pa ekzanp, gade Liv Ilistrasyon Levanjil la, no. 117-19), epi mande timoun yo pou yo di kijan yo santi yo lè yo wè yon tanp. Ou ta ka eksplike ke tanp lan se yon kote nou ale pou nou fè pwomès avèk Bondye, pou nou chèche repons priyè nou yo, ak santi nou pwòch Bondye. Ede timoun yo idantifye santiman Sentespri an k ap di yo ke tanp lan se yon kote spesyal. Mande timoun yo pou yo aji kòm si yo te andedan yon tanp. Pa egzanp, yo ta ka pale an chichotman epi chita avèk reverans.

• Chante yon chan ansanm konsènan tanp, tankou “Oh J aime Voir Le Temple” (Chants Pour Les Enfants, 99), epi envite timoun yo fikse bi pou yo ale andedan tanp lan yon jou.

Tanp la se kay Senyè a.

Matye 21:28–32

Mwen ka obeyisan.

Pè Selès nou an vle pou nou obeyisan. Parabòl de pitit gason yo se yon opòtinite pou nou ansenye enpòtans obeyisans.

Aktivite Posib

• Desine yon foto de pitit gason yo sou tablo a, epi itilize desen yo pandan w ap rakonte parabòl la nan Matye 21:28-32a. Ki pitit gason ki te fè bon bagay la alafen? Mande timoun yo pou yo site kèk bagay yo kapab fè pou yo ka obeyisan lakay yo. Kite yo desine foto tèt yo ki ap akonpli youn nan bagay sa yo.

• Envite timoun yo pataje eksperyans yo te genyen lè yo te obeyisan avèk paran yo. Kijan yo te beni poutèt yo te obeyisan?

Anseye Doktrin nan: Timoun Ki Pi Gran yo

Lik 19:1–10

Si m chèche Sovè a, m ap jwenn Li

Ou ta ka itilize istwa Zache a pou ede timoun yo reflechi sou sa yo ka fè pou yo vin pi prè Sovè a.

Aktivite Posib

• Li Lik 19:1-10, pran poz apre chak de ou twa vèsè pou diskite sa vèsè yo revele konsènan Zache. Kisa Zache te fè pou l te ka wè Jezi? Kijan L te reponn lè Jezi te mande l pou desann pyebwa a? Mande chak timoun yo pou yo pataje yon rezon ki te fè yo vle wè Jezi. Si Sovè a te vin nan vil nou an, kisa nou t ap fè pou nou prepare nou?

• Envite timoun yo pou yo panse a moun yo konnen ki, menm jan ak Zache, ta ka chèche Sovè a. Mande timoun yo kisa yo ta ka fè pou ede yon moun aprann konsènan Sovè a.

• Envite timoun yo pou yo pataje eksperyans sou yon lè yo te santi Papa nou ki nan Syèl la ak Jezikri te konnen yo e renmen yo.

Matye 21:12–14

Tanp lan se yon kote sakre ke m dwe respekte.

Kijan istwa Sovè a ki ap netwaye tanp lan ede w ansenye timoun yo sou karaktè sakre tanp lan?

Aktivite Posib

• Envite timoun yo pou yo li Matye 21:12–14. Montre foto Jezikri k ap netwaye tanp lan (Liv Ilistrasyon Levanjil la, no. 51), epi mande yo ki vèsè ki dekri nan foto a.

• Envite timoun yo pou yo pataje jan yo te santi yo lè yo te al andedan yon tanp, vizite lakou tanp lan, oubyen gade foto tanp. Kisa ki te ede yo konnen ke tanp lan se yon kote sakre? Ou ta ka pataje avèk timoun yo rezon ki fè w renmen tanp lan. Poukisa li sakre pou ou?

• Envite youn oubyen plis nan jèn yo pou vin nan klas la pou yo pale de kijan yo te prepare yo pou antre nan tanp lan. Si yo te ale nan tanp lan, mande yo pou yo pale de jan yo te santi yo lè yo te la.

• Koupe foto yon tanp pou fè pyès yon jwèt kastèt, epi bay chak timoun youn nan pyès yo. Mande timoun yo pou yo ekri nan do pyès yo a yon bagay yo ka fè pou prepare yo pou yo antre nan tanp lan. Lè chak timoun yo pataje yon ide, ajoute pyès li a nan jwèt kastèt la.

• Ekri bagay sa a sou tablo a: ka ede m prepare pou m sèvi nan tanp lan. Envite timoun yo pou yo sigjere kèk fason pou konplete fraz sa a. Kèk ide ta ka enkli “Respekte alyans batèm mwen yo” oubyen “Sentespri a.”

Matye 22:25–28

Jezi vle pou m jis nan aksyon m ak dezi mwen.

Jezi te ansenye eskrib yo ak Farizyen yo kijan li enpòtan pou moun viv levanjil la toutbon—pa sèlman pran pòz yo jis. Kisa ki t ap ede timoun yo konprann verite sa a?

Aktivite Posib

• Pandan w ap li Matye 23:25-28 avèk timoun yo, anvizaje pataje definisyon ipokrit nan Diksyonè Bib la: “Yon moun ki pran pòz li relijye lè l pa relijye.” Poukisa l pa bon pou yon moun ipokrit?

• Montre timoun yo yon gode ki pwòp sou deyò men ki sal andedan pou ede ilistre metafò a nan Matye 23:25. Kijan nou ka asire nou ke nou pwòp e pur andedan?

Ankouraje Aprantisaj Lakay

Ede timoun yo panse a yon bagay yo te aprann nan klas la ke yo ka pataje avèk fanmi yo lakay yo.

Amelyore Ansèyman Nou

Sipòte paran timoun yo. “Paran yo se enstriktè levanjil ki pi enpòtan pou pitit yo—yo gen responsablite prensipal ak pi gwo pouvwa pou enfliyanse pitit yo (gade nan Detewonòm 6:6–7). Lè w ap anseye timoun nan legliz la, chèche nan lapriyè pou w konn ki fason pou soutni paran yo nan wòl esansyèl yo a.” (Anseye nan Fason Sovè a,25).