Faatoaga o Ketesemane, saunia e Derek Hegsted

12–18 Iuni

Luka 22; Ioane 18

“Ia Aua Le Faia Lo’u Loto a o Lou Finagalo”

O le aoao mai le Luka 22 ma le Ioane 18 faatasi ma tamaiti o se avanoa e fesoasoani ai ia i latou e faalolotoina lo latou alolofa mo Iesu Keriso ma lo latou faatuatua ia te Ia. Mafaufau ma le agaga tatalo pe faapefea ona e faia lenei mea.

Valaaulia le Fefaasoaai

Faaali atu ata o mea na tutupu i nei mataupu, e pei o Keriso i Ketesemane (Tusi Ata o le Talalelei, nu. 56) ma ata i le Sau, Mulimuli Mai ia te Au—Mo Tagata Taitoatasi ma Aiga. Valaaulia tamaiti e faamatala mai mea o loo tutupu i ata.

Aoao atu le Aoaoga Faavae: Tamaiti Laiti

Luka 22:39–46

Na puapuagatia Iesu mo au aua e alofa o Ia ia te au.

Mafaufau pe mafai faapefea ona e fesoasoani i tamaiti ia lagonaina le alofa o Iesu mo i latou a o outou talanoaina le tala i Ona mafatiaga i Ketesemane.

Gaoioiga e Mafai Ona Fai

• Faamatala le tala o i le Luka 22:39–46 i tamaiti, e ala i le faaaogaina o le “Mataupu 51: O Iesu Ua Puapuagatia i le Faatoaga o Ketesemane” (i le Tala o le Feagaiga Fou, 129–32, po o le vitio talafeagai i luga o le ChurchofJesusChrist.org). Faamalamalama atu sa lagona e Iesu tiga ma le faanoanoa uma ua lagona e tagata uma. Fesili i tamaiti pe o le a se mea e ono lagona ai e se tagata le faanoanoa, tiga, po o le le fiafia. Molimau atu e mafai ona fesoasoani Iesu ia i tatou ia maua se lagona lelei pe a tatou lagonaina nei auala.

• Pasi faataamilo se ata o le Faaola i Ketesemane (e pei o le ata i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga). A o uuina e tamaiti taitasi le ata, fai atu, “Na puapuagatia Iesu ona e alofa o Ia ia [igoa o le tamaitiiti].” Valaaulia tamaiti e toe fai faatasi ma oe nei upu.

• Usu faatasi ma tamaiti se pese e faatatau i le alofa o Iesu mo i tatou, e pei o “Le Alofa o lou Faaola” (Tusipese a Tamaiti, 42). Fesoasoani ia i latou e mafaufau i ni auala na latou lagonaina ai le alofa o Iesu.

Luka 22:41–43

E mafai ona ou tatalo pe a ou manaomia le fesoasoani.

Ina ua tatalo Iesu i Ketesemane, na faaali atu se agelu ma faamalosia o Ia. E mafai faapefea ona e fesoasoani ia malamalama tamaiti o loo e aoaoina e mafai foi e i latou ona tatalo i le Tama Faalelagi mo le malosi?

Gaoioiga e Mafai Ona Fai

• Aotele le Luka 22:41–43 mo tamaiti. Faasoa atu se aafiaga na e tatalo ai mo se fesoasoani ma na faamalosia oe e le Tama Faalelagi e ala i le Agaga Paia pe e ala i le auina atu o se tasi e fesoasoani ia te oe.

• I luga o ni fasipepa, tusi ai ni nai mea e mafai ona tatou fai atu ai i se tatalo, e pei o le “Tama Faalelagi,” “Ou te faafetai atu ia te oe,” “Ou te ole atu ia te oe,” ma le “i le suafa o Iesu Keriso, amene.” Tuu fasipepa i luga o le fola i soo se faasologa, ma fesoasoani i tamaiti e tuu i le faasologa e mafai ai ona tatou faia i se tatalo. O le a se mea e mafai ona tatou faafetai ai i le Tama Faalelagi? O le a se isi mea e mafai ona tatou fai atu ia te Ia? Molimau atu e mafai e tamaiti ona tatalo i le Tama Faalelagi i soo se mea ma soo se taimi.

Keriso o loo tatalo i le Faatoaga o Ketesemane, saunia e Hermann Clementz

Aoao atu le Aoaoga Faavae: Tamaiti Matutua

Luka 22:39–46

I Ketesemane, na tauave ai e Iesu Keriso i Ona lava luga a’u agasala ma tiga.

O le iloa ai o le mea na faia e Iesu mo i tatou i Ketesemane, e mafai ona fesoasoani i tamaiti e salamo ai i a latou agasala ma liliu atu i le Faaola pe a latou feagai ma tofotofoga faigata.

Gaoioiga e Mafai Ona Fai

• Valaaulia tamaiti e faitau le Luka 22:39–46, ma vaavaai mo upu po o fasifuaitau o loo faamatala mai ai lagona o Iesu i Ketesemane. O le a le mea na oo i ai Iesu na afua ai ona Ia lagona faapena? (tagai Mataupu Faavae ma Feagaiga 19:16–19). Tuu atu i tamaiti le avanoa e faasoa mai ai o latou lagona e uiga ia Iesu ma Lana taulaga mo i tatou.

• Valaaulia tamaiti e faasoa mai se taimi na latou faanoanoa pe tiga ai. Fesili i ai pe latou te iloa se tasi sa faapena foi ona lagona. Valaaulia i latou e faitau le Alema 7:11–12. O a mea o aoao mai e nei fuaiupu e uiga ia Iesu Keriso ma Lona puapuagatia mo i tatou?

• Tuu atu i se tamaitiiti se fasilaau e umi atu nai lo le lautele o le faitotoa o le potuaoga, ma fai i ai e uu faalava ma taumafai e savali atu i le faitotoa. Faamalamalama atu o le fasilaau e faatusa i a tatou agasala, ia e taofia ai i tatou mai le ulu atu i le malo o le Atua. Aveese le fasilaau e faatusa i le tauaveina e Iesu i Ona lava luga a tatou agasala ina ia mafai ai ona tatou magalo pe a tatou salamo.

Luka 22:39-44

E mafai ona ou mulimuli i le faataitaiga a Iesu e ala i le usiusitai i le Tama Faalelagi.

Na faaali mai e Iesu le usiusitai i le Tama ina ua Ia fai mai, “Aua le faia lo’u loto, a o lou finagalo”(Luka 22:42). E mafai faapefea ona e fesoasoani i tamaiti e aoao mai le faataitaiga a Iesu?

Gaoioiga e Mafai Ona Fai

• Fesoasoani i tamaiti e tauloto le fasifuaitau “Aua le faia lo’u loto a o lou finagalo” (Luka 22:42) ma talanoaina lona uiga. O le a se mea e mafai ona tatou fai e usitai ai i le finagalo o le Tama Faalelagi?

• Fesoasoani i tamaiti e faailoa mai nisi o mafuaaga e faigata ai i nisi taimi ona fai le mea e finagalo ai le Tama Faalelagi. O a faamanuiaga na e maua i le usitai i le Tama Faalelagi, tusa lava pe na faigata?

Luka 22:50–51

Na alofa Iesu i Ona fili.

O le aoao e avea o se faatupu filemu e le faigofie, ae maise lava pe afai e le agalelei isi ia i tatou. E mafai faapefea e le tala i le Luka 22:50–51 ona musuia tamaiti o loo e aoaoina ina ia agalelei i tulaga uma?

Gaoioiga e Mafai Ona Fai

• Valaaulia tamaiti e faitau le Luka 22:50–51. O le a se mea ua tatou aoao e uiga ia Iesu mai lenei tala? I le aluga o le vaiaso, fai atu i nisi o matua o tamaiti e faamatala atu ia te oe e uiga i taimi na faaalia ai e a latou fanau le agalelei, e tusa lava pe sa faigata. Faasoa atu na tala i le vasega. (Faamanatu i tamaiti o le agalelei e le faapea o le faatagaina o isi e faatiga ia i latou; e tatau ona latou talanoa i o latou matua po o se isi tagata matua faatuatuaina pe afai o faatiga se tasi ia i latou.)

• Usu faatasi se pese e faatatau i le agalelei, e pei o le “O Le Agalelei e Amata Ia Te A’u” (Tusipese a Tamaiti, 83). O le a se mea ua aoao mai e lenei pese e uiga i le agalelei? E mafai faapefea ona tatou faaalia le agalelei i isi e pei ona sa faia e le Faaola?

Uunaia le Aoaoina i le Aiga

Valaaulia tamaiti e faasoa a latou molimau o le Faaola ma o latou aiga. E mafai foi ona latou fai atu i tagata o o latou aiga e faasoa mai a latou molimau e uiga ia te Ia.

Faaleleia o Lo Tatou Aoao Atu

Valaaulia tamaiti e faasoa mai mea ua latou iloa. Fai atu [i tamaiti] e faasoa atu ia oe o latou manatu, lagona, ma aafiaga e fesootai i mataupu faavae o loo e aoaoina. O le a e iloa ai e i ai o latou manatu e faigofie, mama a‘ia’i, ma mamana” (Aoao Atu i le Ala a le Faaola,26).