Talisuaga Mulimuli

O Le Talisuaga Mulimuli, saunia e William Henry Margetson

5–11 Iuni

Ioane 14–17

“Ia Tumau Pea Outou i Lo’u Alofa”

Tatalo ia iloa manaoga o tamaiti o loo e aoaoina a o e faitauina le Ioane 14–17. O leSau, Mulimuli Mai ia te A’u—Mo Tagata Taitoatasi ma Aiga e mafai ona fesoasoani e lagolago i lau suesuega, ma o lenei otootoga e mafai ona faaalia ai manatu e uiga i auala e aoaoina ai tamaiti i lau vasega.

aikona o le fefaasoaai

Valaaulia le Fefaasoaai

Ina ia fesoasoani i tamaiti e faasoa mai mea o loo latou aoaoina i le fale, ia tofu avanoa tamaiti taitoatasi e uu se fatu pepa ma faasoa atu se mea na te faia e faaalia ai le alofa mo isi.

aikona o le aoao atu

Aoao atu le Aoaoga Faavae: Tamaiti Laiti

Ioane 14:15

E faaali atu lo’u alofa ia Iesu Keriso e ala i le tausia o Ana poloaiga.

Fesoasoani i tamaiti ia malamalama e mafai ona latou faaali atu i le Faaola latou te alolofa ia te Ia e ala i le tausia o Ana poloaiga.

O Gaoioiga e Mafai Ona Fai

• Fesoasoani i tamaiti e tauloto le Ioane 14:15. Fai atu ia i latou e fai mai “Afai tou te alolofa mai ia te au” pe a e uuina i luga se fatu pepa. Fai atu ia i latou e fai mai “Ia outou tausi mai i a‘u poloaiga” pe a e uuina i luga tusitusiga paia.

• Fesoasoani i tamaiti e mafaufau i nisi o poloaiga a Iesu. Valaaulia i latou e fautua mai ni auala e mafai ona latou tausia ai poloaiga taitasi. Ia molimau atu o le faia o nei mea e faaalia ai lo tatou alolofa ia Iesu Keriso.

• Usu faatasi se pese e faatatau i poloaiga, e pei o le “Tausi Poloaiga” (Tusipese a Tamaiti, 68).

• Taaalo ma tamaiti i le taaloga i le itulau o gaoioiga o lenei vaiaso.

Ioane 14:26–27; 15:26; 16:13–14

E fesoasoani le Agaga Paia ia te au.

Sa aoao atu e Iesu Ona soo i upumoni taua e uiga i le Agaga Paia. Mafaufau i auala e mafai ai e nei upumoni ona faamanuia tamaiti o loo e aoaoina.

O Gaoioiga e Mafai Ona Fai

• Faaali le ata O Le Talisuaga Mulimuli (Tusi Ata o le Talalelei, nu. 54). Faamalamalama i tamaiti o le Talisuaga Mulimuli, na aoao atu ai e Iesu Ona soo e uiga i le Agaga Paia. Faasoa atu nisi o upumoni na Ia aoao mai i le Ioane 14:26–27; 15:26; 16:13–14.

  O Iesu o loo fetalai atu i le au soo

  O le Talisuaga Mulimuli, saunia e Clark Kelley Price

• Faasoa atu se aafiaga na faamafanafanaina ai oe e le Agaga Paia, taialaina oe, pe fesoasoani ia te oe ia iloa le upumoni. Molimau atu e mafai e le Agaga Paia ona fesoasoani i tamaiti i ni auala faapena.

• Faatasi ma tamaiti, usu se pese e uiga i le Agaga Paia, e pei o le “O Le Agaga Paia” (Tusipese a Tamaiti, 56). Valaaulia i latou e faalogologo mo mea o loo ta’ua i le pese e fai e le Agaga Paia.

Ioane 17:3

E mafai ona ou iloa le Tama Faalelagi ma Iesu Keriso.

Na aoao mai Iesu Keriso o le “ola e faavavau” o le iloa lea “o le Atua moni e toatasi, ma Iesu Keriso.” A oo ina iloa e tamaiti o loo e aoaoina i Latou, o le a latou maua le malosi faaleagaga o le a faamanuiaina ai i latou i o latou olaga atoa ma fesoasoani ia i latou ia ausia le ola e faavavau.

O Gaoioiga e Mafai Ona Fai

• Faitau le Ioane 17:3, ma fai atu i tamaiti e faalogo po o ai e finagalo Iesu tatou te iloa. Faaali atu ni nai ata e faatusa i auala e mafai ona tatou iloa ai le Tama Faalelagi ma Iesu Keriso, e pei o ata o tusitusiga paia, o se aiga o aoao faatasi, ma se tasi o auauna atu i se isi tagata. Faafaō ata i lalo, ma valaaulia tamaiti e feauauai e fuli ata ma faamatala mai po o le a le mea o loo i le ata. E faapefea ona fesoasoani nei mea tatou te iloa ai le Tama Faalelagi ma Iesu?

• Talanoa ma tamaiti e uiga i mea latou te faia ia iloa atili ai a latou uo. E faapefea ona tatou iloa lelei le Tama Faalelagi ma Iesu Keriso? Faasoa atu ni auala na e faia ai lenei mea.

aikona o le aoao atu

Aoao atu le Aoaoga Faavae: Tamaiti Matutua

Ioane 14:15; 15:10–14

E faaali atu lo’u alofa ia Iesu Keriso e ala i le tausia o Ana poloaiga.

A o e faitauina nei fuaitau i lau suesuega patino, mafaufau i tamaiti o loo e aoaoina. E faapefea ona faamanuiaina i latou pe a latou malamalama o lo latou usiusitai i le Faaola o se faailoga lea o lo latou alolofa mo Ia?

O Gaoioiga e Mafai Ona Fai

• Valaaulia tamaiti e faasoa mai ni auala na faaalia ai e Iesu sa usiusitai o Ia i le Tama Faalelagi. Faaali atu ata mai le soifuaga o le Faaola e fesoasoani ai ia i latou (tagai Tusi Ata o le Talalelei, nu. 34–35, 56–57). Fai atu i tamaiti e talanoa e uiga i taimi na latou usitai ai i le Tama Faalelagi.

• Fai i se tamaitiiti e faitau le Ioane 14:15. Ia feauaua’i tamaiti e tusi ni ata e faatusa i se tasi o tausia se poloaiga, a o mate mai e le isi vaega o le vasega le ata o loo ia tusia. Mo faataitaiga o poloaiga, tagai i le Mo Le Malosi o le Autalavou tamaitusi (2022). E faapefea ona faaali atu i le Faaola tatou te alolofa ia te Ia i lo tatou tausia o nei poloaiga?

Ioane 14:26; 15:26; 16:13

O le Agaga Paia e taiala, faamafanafana, ma molimau atu i upumoni.

Ua maua e tamaiti o loo e aoaoina le meaalofa o le Agaga Paia? O le a se mea ua latou iloa e uiga i le auala e mafai ai e le Agaga Paia ona fesoasoani ia i latou? Mafaufau pe faapefea ona e fesoasoani ia i latou ia malamalama atili i matafaioi a le Agaga Paia.

O Gaoioiga e Mafai Ona Fai

• Tuu atu i tamaiti fuaiupu nei e faitau i paga: Ioane 14:26; 15:26; ma le 16:13. Fai i ai e sue mai upu o loo aoao ai i latou i mea e fai e le Agaga Paia. Tusi upu i le laupapa.

• Faasoa atu se aafiaga ina ua taiala oe e le Agaga Paia, faamafanafana oe, lapataia oe, pe molimau atu foi se upumoni ia te oe. Valaaulia tamaiti e faasoa mai soo se aafiaga sa latou oo i ai. Na faapefea ona latou iloaina le tosinaga a le Agaga Paia?

• Valaaulia tamaiti taitasi e tusi ona foliga i luga o se tagapepa. Ki se moliuila, e faatusa i le Agaga Paia, i totonu o tagapepa taitasi. Ona tuu lea o mea i pepa e poloka ai le malamalama, e pei o se fasi ieie, e aoao atu ai e mafai e a tatou filifiliga sese ona faaitiitia le tosinaga a le Agaga Paia i o tatou olaga. Tuu i tamaiti e aveese le mea mai a latou pepa e faatusa i le salamo.

Ioane 15:1–9; 17:3

E finagalo le Tama Faalelagi ma Iesu ia ou iloa i La’ua.

O le a e faamanuiaina olaga o tamaiti i lou fesoasoani ia latou iloa atili le Tama Faalelagi ma Iesu Keriso.

O Gaoioiga e Mafai Ona Fai

• Faaali atu se laau totō (po o se ata o se laau) a o feauaua’i tamaiti e faitau fuaiupu o i le Ioane 15:1–9. E faapefea ona avea Iesu e pei o se vine? E faapefea ona pei i tatou o lalā? O le a se mea e mafai ona tatou faia ina ia “tumau ai,” pe latalata atu i ai, i le Faaola?

• Faitau leotele le Ioane 17:3. Fesili i tamaiti pe o a mea o loo latou faia ia iloa ai le Tama Faalelagi ma Iesu Keriso. Faasoa atu pe o faapefea ona e iloa i La’ua.

aikona o le aoaoina

Uunaia le Aoaoina i le Aiga

Uunaia tamaiti e faasoa atu i o latou aiga se pese na latou aoaoina talu ai nei i le vasega po o taimi o pesepesega.

Faaleleia o Lo Tatou Aoao Atu

Fetuunai gaoioiga. Afai o e faiaoga i tamaiti laiti ifo, e mafai ona e maua manatu faaopoopo e mafai ona e fetuunaia mo lau vasega i le vaega lenei o le otootoga mo tamaiti matutua atu. E faapena foi, e mafai ona fetuunai gaoioiga mo tamaiti laiti ifo e aoao ai tamaiti matutua atu.

itulau o gaoioiga: E faaali atu lo’u alofa ia Iesu Keriso e ala i le tausia o Ana poloaiga