Tausamaaga Mulimuli

E Fai ma Faamanatuga ia te Au, saunia e Walter Rane

29 Me–4 Iuni

Mataio 26; Mareko 14; Ioane 13

“E Fai ma Faamanatuga”

A o e faitauina le Mataio 26; Mareko 14; ma le Ioane 13, vaavaai mo mataupu faavae e te lagona o le a faamanuiaina ai tamaiti o loo e aoaoina.

aikona o le fefaasoaai

Valaaulia le Fefaasoaai

Faaali ata o mea o loo tutupu i nei mataupu, e pei o le Tusi Ata o le Talalelei, nu. 54–55, ma valaaulia tamaiti e ta’u mai mea o tutupu i ata.

aikona o le aoao atu

Aoao atu le Aoaoga Faavae: Tamaiti Laiti

Mataio 26:26–29; Mareko 14:22–24

E fesoasoani le faamanatuga ou te mafaufau ai ia Iesu.

Fesoasoani i tamaiti ia malamalama o le tagofia o le faamanatuga o se avanoa lea e manatua ai mea na faia e Iesu mo i tatou.

Gaoioiga e Mafai Ona Fai

• Aotele le tala ia Iesu o amatalia le faamanatuga. E mafai ona e faaaogaina le “Mataupu 49: O Le Faamanatuga Muamua” (i Tala o le Feagaiga Fou, 124–26, po o le vitio talafeagai i luga o le ChurchofJesusChrist.org), po o le vitio “Sacrament” (ChurchofJesusChrist.org). Aisea tatou te tagofia ai le faamanatuga? Fesoasoani ia malamalama tamaiti tatou te manatua Iesu i le taimi o le faamanatuga.

• Faaali atu i tamaiti se fasi falaoa ma se ipu vai. Fesili i ai pe latou te iloa le mea ua faatusa i ai le falaoa ma le vai o le faamanatuga. Faamalamalama o nei faatusa ua fesoasoani tatou te manatua ai na maliu Iesu mo i tatou ma sa toetu mai le oti.

• Fai i tamaiti e moeiini ma mafaufau i se tasi e alolofa i ai, ona valaaulia lea o i latou e ta’u atu se mea e uiga i lena tagata. Fai i ai e toe moeiini, mafaufau i le Faaola, ona faasoa mai lea o ni mea latou te iloa e uiga ia te Ia. Fautuaina i latou e mafaufau ia Iesu i le taimi o le faamanatuga i vaiaso taitasi.

• Valaaulia tamaiti e faaali mai mea e mafai ona latou faia e manatua ai Iesu ma ia migao i le taimi o le faamanatuga. Fesoasoani i tamaiti e fai le tamaitusi o loo faamatalaina i le itulau o gaoioiga o lenei vaiaso ma faaaoga e fesoasoani ai ia i latou e mafaufau e uiga ia Iesu i le taimi o le faamanatuga. Pe tuu atu latou e saili i nisi o mekasini a le Ekalesia mo ni ata o Iesu ma fai se fatufatuga o nei ata e tilotilo i ai i le taimi o le sauniga faamanatuga.

Ioane 13:34–35

E mafai ona ou alofa atu i isi e pei ona sa faia e Iesu.

Sa faaalia e Iesu Lona alofa e ala i le tausia o i latou o siomiaina o Ia. O a ni avanoa o maua e tamaiti o loo e aoaoina e faaalia ai lo latou alolofa mo isi?

Gaoioiga e Mafai Ona Fai

• Faaali atu ata o tala na aoaoina e tamaiti i lenei tausaga ina ua faaalia e Iesu Lona alofa mo isi (tagai otootoga ua tuanai i le Sau, Mulimuli Mai ia te Au—Mo Tagata Taitoatasi ma Aiga). Faitau le Ioane 13:34–35, ma fesoasoani i tamaiti e toe fai le fasifuaitau “Faapei ona ou alofa atu ia te outou, … ia fealofani foi outou.” E mafai faapefea ona tatou faaalia lo tatou alolofa mo o tatou aiga ma uo?

• Valaaulia se tamaitiiti e uu se ata o le Faaola a o usuina e le vasega se pese e uiga i le alofa o le Faaola, e pei o le “Ia Fealofani” (Tusipese a Tamaiti, 73). Tuu atu i tamaiti ni fatu pepa ma valaaulia i latou e tusi se ata o i latou lava o faia se mea e faaalia ai lo latou alolofa mo se isi tagata.

aikona o le aoao atu

Aoao atu le Aoaoga Faavae: Tamaiti Matutua

Mataio 26:26–29; Mareko 14:22–24

E fesoasoani le faamanatuga ia te au ou te manatua ai Iesu Keriso ma Lana taulaga mo au.

E mafai faapefea ona e fesoasoani i tamaiti ina ia maua se aafiaga anoa i le faamanatuga?

Gaoioiga e Mafai Ona Fai

• Valaaulia tamaiti e feauauai e faitau ia fuaiupu i le Mataio 26:26–29 po o le Mareko 14:22–24 (tagai foi Faaliliuga a Iosefa Samita, Mareko 14:20–24 [i le faaopoopoga i le Tusi Paia]) ma le Mataupu Faavae ma Feagaiga 20:75–79. O a upu ma manatu e tutusa i fuaitau e lua?

• Fesili i tamaiti po o a ni mea latou te faia e fesoasoani ai ia latou mafaufau ia Iesu i le taimi o le faamanatuga. Fesoasoani ia i latou e sue mau po o upu mai viiga o le faamanatuga e mafai ona latou faitauina i le taimi o le faamanatuga, ona lisi lea i luga o se kata e mafai e tamaiti ona faasino i ai i le isi taimi latou te aai ai ma feinu i le faamanatuga. Usu faatasi ma tamaiti nisi o nei pese (tagai Viiga, nu. 93–112).

  tamaiti o loo aai ma feinu i le faamanatuga

  E fesoasoani le faamanatuga ia i tatou e manatua ai Iesu Keriso ma Lana taulaga mo i tatou.

• Tusi fasifuaitau autu mai tatalo o le faamanatuga i le laupapa, ma fesoasoani i tamaiti e tauloto. O a uiga o nei fasifuaitau? Aisea e taua ai le faafou o a tatou feagaiga o le papatisoga i vaiaso taitasi?

• Valaaulia se tasi o i ai le Perisitua Arona e faamatala i tamaiti lana aafiaga i le tapenaina, faamanuia, po o le tufaina o le faamanatuga. O le a se mea o fesoasoani ia te ia e saunia ai e faia lenei mea? O a ni ona lagona pe a ia faia lea mea? O a ni auala e faamanatu atu ai ia te ia e le falaoa ma le vai le Faaola?

• Fai i tamaiti ua uma ona papatiso e faasoa mai mea latou te manatua e uiga i o latou papatisoga. O a ni o latou lagona? O a feagaiga na latou faia? (tagai Mosaea 18:8–10). Ta’u i ai o vaiaso uma lava tatou te tagofia ai le faamanatuga, e mafai ona pei ua toe papatiso—e mafai ona faamagalo ai a tatou agasala, ma toe faafou a tatou feagaiga.

Ioane 13:1–17

Sa faaali mai e Iesu Keriso ia te au le auala e auauna atu ai i isi.

O le tala i le mulumuluina e le Faaola o vae o Ona soo e mafai ona musuia ai tamaiti o loo e aoaoina e auauna atu ma le alofa i tagata o siomia i latou.

Gaoioiga e Mafai Ona Fai

• I ni nai aso a o lei faia le vasega, fai atu i se tasi o tamaiti e faitau le Ioane 13:4–9 ma faasoa mai le tala i le vasega mai le vaaiga a Peteru. O le a le mea sa taumafai le Faaola e aoao atu ia Peteru ma isi Aposetolo? E mafai e tamaiti ona talanoa e uiga i mea latou te aoaoina mai lenei tala e uiga ia Iesu Keriso. O le a se mea ua tatou aoaoina e uiga i le auauna atu i isi?

• Faitau faatasi le Ioane 13:12–17. Fai atu i tamaiti taitasi e tusi e uiga i se taimi na auauna ai le Faaola i se isi tagata. Fautuaina i latou e faaaofia ai mea ua latou aoaoina mai Lana faataitaiga. Afai latou te manaomia se fesoasoani, e mafai ona latou vaavaai mo ni faataitaiga i le vitio “Christlike Attributes” (ChurchofJesusChrist.org). Valaaulia i latou e faasoa mai i le vasega mea na latou tusia.

Ioane 13:34–35

E alolofa soo o Iesu Keriso i isi e pei ona sa Ia faia.

Pe a tatou papatiso, ua tatou osia feagaiga e avea ma soo o Iesu Keriso. I le Ioane 13:34–35, na faamatala ai e le Faaola le ala e mafai ai ona tatou faaali atu o i tatou o Ona soo.

Gaoioiga e Mafai Ona Fai

• Tusi i luga o le laupapa: ia outou faapei ona ou ia te outou (Ioane 13:34). Valaaulia tamaiti e sue le mau ma faatutumu avanoa. O a isi mea e mafai ona tatou faia e faaali atu ai o i tatou o soo o Keriso? Atonu e mafaufau tamaiti i nisi upu o le a faauma ai le fuaiupu o i luga o le laupapa, e pei o le auauna atu ma tautuaina pe aoao atu ma aoaoina.

• Valaaulia tamaiti e faitau le Ioane 13:35 ma mafaufau i tagata latou te iloa o ni faataitaiga o soo o Iesu Keriso. Fai atu ia i latou e faasoa mai pe faapefea ona faaalia e nei tagata le alofa mo isi e pei ona sa faia e le Faaola.

aikona o le aoaoina

Uunaia le Aoaoina i le Aiga

Valaaulia tamaiti e faasoa ma o latou aiga se mea o le a latou faia ona o mea na latou aoaoina i le vasega. Mo se faataitaiga, e mafai ona latou faasoa mai pe faapefea ona latou manatua Iesu Keriso i le taimi o le faamanatuga.

Faaleleia o Lo Tatou Aoao Atu

Tuu atu lau molimau i lau vasega. E mafai ona faigofie se molimau e pei o le “Ou te iloa e alofa le Tama Faalelagi ia te outou taitoatasi” po o le “Ou te lagona lava le fiafia o lo’u loto pe a ou aoao e uiga ia Iesu Keriso.”

itulau o gaoioiga: o le faamanatuga