Parau hi’u B

Fa’aineine i te mau tamari’i nō te hō’ē orara’a tā’āto’a i ni’a i te ē’a nō te fafaura’a a te Atua

I te mau ’āva’e e pae sābati, tē fa’aitoitohia nei te mau ’orometua nō te Paraimere ’ia mono i te arata’i ha’api’ira’a o te Mai, pe’e mai tei tārenahia, i te hō’ē o teie mau rāve’a ha’api’ira’a ’aore rā hau atu, i te pae o te sābati.

Te mau parau tumu ’e te mau ’ōro’a o te ’evanelia a Iesu Mesia

Tē ha’api’i nei te haʼapiʼiraʼa tumu a te Mesia ia tātou e mea nāhea ’ia ho’i fa’ahou i te Atua ra.

I te fāra’a Iesu Mesia i te mau ta’ata i Amerika, ’ua ha’api’i ’oia ia rātou i tāna ha’api’ira’a tumu. ’Ua parau ’Oia ē, e nehenehe tā tātou e tomo i roto i te bāsileia o te Atua mai te mea ē, e fa’aro’o tō tātou, e tātarahapa tātou, e bāpetizohia tātou, e fāri’i tātou i te Vārua Maita’i, ’e e tāpe’a māite e tae noa atu i te hope’a.(hi’o 3 Nephi 11:31–40 ; Te Ha’api’ira’aTumu ’e te mau Fafaura’a 20:29). E nehenehe te mau ’ātivite i raro nei e tauturu ia ’outou ’ia ha’api’i i te mau tamari’i ē, e tauturu teie mau parau tumu ’e teie mau ’ōro’a ia tātou ’ia ha’afātata atu ā i te Fa’aora i roto i tō tātou orara’a.

Nō te ha’api’i rahi atu ā nō ni’a i te ha’api’ira’a tumu a te Mesia, ’a hi’o 2 Nephi 31.

Te mau ’ātivite e au

• E hōro’a i te mau tamari’i i te mau hōho’a e fa’ahōho’a i te fa’aro’o ia Iesu Mesia, te tātarahapa, te bāpetizora’a, ’e te ha’amaura’a (hi’o Buka hōho’a o te ’evanelia, 1, 111, 103, ’e 105). E tai’o ’aore rā e fa’ahiti ’ā’au ’e te mau tamari’i i te hīro’a fa’aro’o maha, ’e e ani ia rātou ’ia ’āfa’i i tā rātou hōho’a i ni’a ’ia fa’ahiti-ana’e-hia taua parau tumu ra ’e ’aore rā, te ’ōro’a. E tauturu i te mau tamari’i ’ia hāro’aro’a ē, nāhea teie mau parau tumu tāta’itahi ’e teie mau ’ōro’a i te tauturu ia tātou ’ia riro hau atu mai te Metua i te Ao ra ’e ia Iesu Mesia.

• Nāhea e ti’a ai ia ’outou ’ia tauturu i te mau tamari’i ’ia hāro’aro’a ē, e ’ere te fa’aro’o, te tātarahapa, te bāpetizora’a ’e te ha’amaura’a i te mau ’ohipa nō te hō’ē noa taime, e fa’auru rā te reira i tō tātou tupura’a pae vārua i te roara’a o tō tātou orara’a ? ’Ei hi’ora’a, e nehenehe ’outou e fa’a’ite ia rātou i te hō’ē hōho’a nō te hō’ē huero ’e te hō’ē tumu rā’au rahi (’aore rā e pāpa’i hōho’a i teie mau mea i ni’a i te tāpura ’ere’ere). ’A Tauturu ia rātou ’ia feruri i te mau mea ’o tē tauturu i te huero ’ia tupu ’ei tumu rā’au rahi, mai te pape, te repo ’e te mahana. ’A tauturu ia rātou ’ia ’ite ē, e au teie mai te mau mea tā tātou e rave nei nō te ha’afātata atu ā i te Atua i roto i tō tātou orara’a—patura’a i tō tātou fa’aro’o ia Iesu Mesia, te tātarahapara’a i te mahana tāta’itahi, te orara’a i tā tātou mau fafaura’a nō te bāpetizora’a ’e te fa’aro’ora’a i te Vārua Maita’i.

• E fa’a’ite i te mau tamari’i i te ’ā’amu nō ni’a i te ahitiri i roto i te a’ora’a a Elder Dale G. Renlund « Nāhea te tātarahapara’a e nehenehe ai e tauturu iā’u ia ’ite i te ’oa’oa ? » (Friend, Tītema 2017, 12–13, ’aore rā Liahona, Tītema 2017, 70–71; hi’o ato’a i te video « Repentance: A Joyful Choice [Te tātarahapara’a : E mā’itira’a ’oa’oa] » [ChurchofJesusChrist.org]). I te mau taime rau i roto i te ’ā’amu, e ani i te mau tamari’i ’ia feruri e aha tā Elder Renlund i fāri’i. Nō te aha tātou e fāri’i ai i te ’oa’oa ’ia tātarahapa ana’e tātou ? E fa’a’ite i te mau tamari’i i te ’oa’oa ’e te here tā ’outou i fāri’i ’a ani ai ’outou i te Metua i te Ao ra ’ia fa’a’ore mai i tā ’outou hapa.

Bāpetizora’a

Ua horo‘a mai o Iesu Mesia i te hō’ē hi’ora’a nō tātou a bāpetizohia ’Oia nā roto i te utuhira’a.

Noa atu ē, ’aita Iesu i rave i te hara, ’ua bāpetizohia ’oia nō te hōro’a i te hi’ora’a maita’i roa nō te ha’apa’ora’a i te parau a te Metua i te Ao ra (hi’o 2 Nephi 31:6–10).

Nō te ha’api’i rahi atu ā nō ni’a i te bāpetizora’a, ’a hi’o Te Ha’api’ira’aTumu ’e te mau Fafaura’a 20:37 ; Gospel Topics, « Baptism », topics.ChurchofJesusChrist.org.

Te mau ’ātivite e au

• ’A fa’a’ite i te hō’ē hōho’a nō te bāpetizora’a o te Fa’aora ’e nō te bāpetizora’a o te tahi atu ta’ata (’aore rā hi’o Buka hōho’a ’evanelia,N°35 ’e ’aore rā no °103 ’aore rāN°104). E ani i te mau tamari’i ’ia fa’a’ite mai e aha te mea ta’a ’ē ’e e aha te mea hō’ē ā huru i rotopū i nā hōho’a e piti. E tai’o ’āmui i te Mataio 3:13–17 ’aore rā « Pene 10 : ’Ua bāpetizohia Iesu » i roto i Te mau ’ā’amu o te Faufa’a ’Āpī, 26–29, ’aore rā e māta’ita’i i te video nō ni’a i te reira i ni’a i te ChurchofJesusChrist.org. E vaiiho i te mau tamari’i ’ia fa’atoro i ni’a i te mau mea i roto i te mau hōho’a tei fa’ahitihia i roto i te tai’ora’a ’aore rā, te video. ’A parau i te mau tamari’i nō ni’a i tō ’outou here i te Fa’aora ’e i tō ’outou hina’aro ’ia pe’e iāna.

• E Fa’aro’o ’e ’aore rā, e hīmene i te hō’ē hīmene nō ni’a i te bāpetizora’a, mai te « Baptême » (Chants pour les enfants, 66). E aha tā tātou e ha’api’i mai nei nō ni’a i te bāpetizoraʼa nā roto mai i teie hīmene ? E tai’o i te 2 Nephi 31:9–10, ’e e ani i te mau tamari’i ’ia fa’aro’o nō te aha Iesu Mesia i bāpetizohia ai. E ani ia rātou ’ia pāpa’i i te hō’ē hōho’a nō rātou iho i tō rātou mahana bāpetizora’a.

E nehenehe au e mā’iti ’ia rave i te hō’ē fafaura’a ’e te Atua ’e ’ia bāpetizohia.

Te fa’aineinera’a nō te bāpetizora’a, ’ua hau atu ïa i te fa’aineinera’a nō te hō’ē ’ohipa e tupu. Te aura’a ra, e fa’aineine nō te rave i te hō’ē fafaura’a ’e ’ia ha’apa’o i te reira fafaura’a nō te orara’a tā’āto’a. ’A feruri nāhea e ti’a ai ia ’outou ’ia tauturu i te mau tamari’i ’ia hāro’aro’a i te fafaura’a tā rātou e rave ’e te Metua i te Ao ra ’ia bāpetizo-ana’e-hia rātou, tei roto ato’a te mau fafaura’a tāna i rave nō rātou ’e te mau fafaura’a tā rātou e rave i mua iāna.

Te mau ’ātivite e au

• E fa’ata’a ē, te hō’ē fafaura’a ’o te hō’ē ïa parau fafau i rotopū i te hō’ē ta’ata ’e te Metua i te ao ra. ’A tūtava ai tātou i te ha’apa’o i tā tātou mau parau fafau i te Atua, e fafau mai te Atua e ha’amaita’i ia tātou. ’A pāpa’i i ni’a i te tāpura Tā’u mau parau fafau i te Atua ’e Te mau fafaura’a a te Atua iā’u. Tai’o ’āmui i te Mosia 18:10, 13 ’e Te Ha’api’ira’aTumu ’e te mau Fafaura’a 20:37, ’e e tauturu i te mau tamari’i ia hāmani i te hō’ē tāpura nō te mau parau fafau tā rātou i ’ite mai i raro a’e i te mau upo’o parau tano (hi’o ato’a Dallin H. Oaks, « Your Baptism Covenant (tō ’outou bāpetizora’a) », Friend, Fepuare 2021, 2–3). ’A fa’a’ite e mea nāhea tō te Metua i te Ao ra ha’amaita’ira’a ia ’oe ’a tūtava ai ’oe i te ha’apa’o i tā ’oe fafaura’a nō te bāpetizora’a.

• E fa’a’ite i te mau tamari’i i te mau hoho’a nō te mau mea tā Iesu i rave a ora ai ’oia i ni’a i te fenua nei (nō te tahi mau hi’ora’a, ’a hi’o Gospel Art Book, nos. 33–49). E ani i te mau tamari’i ’ia fa’ata’a mai e aha tā Iesu e rave ra i roto i te hoho’a tāta’itahi. E tai’o i te Mosia 18:8–10, 13, ’e e ani i te mau tamari’i ’ia fa’aro’o i te mau mea tā rātou e fafau e rave ’ia bāpetizo-ana’e-hia rātou (hi’o ato’a « The Baptism Covenant (Te fafaura’a nō te bāpetizora’a) », Friend, Fepuare 2019, 7 ; Liahona, Fepuare 2019, F3). Nāhea teie mau fafaura’a ’ia fa’auru i tā tātou mau ’ohipa i te mau mahana ato’a ? E ani i te mau tamariʼi ’ia pāpa’i i te hōʼē hōhoʼa nō rātou iho e tauturu ra i te tahi taʼata mai tā Iesu e rave. ’Aore rā e nehenehe ’outou e hāmani i te hō’ē tāreta iti nō te mau tamari’i ’e te i’oa o te Fa’aora i ni’a iho.

  

  ’Ia bāpetizohia tātou, e rave tātou i te mau fafaura’a i te Atua ’e e rave ’oia i te mau fafaura’a ia tātou.

Ha’amaura’a

’Ia ha’amau-ana’e-hia vau, e riro mai au ’ei melo nō te ’Ēkālesia a Iesu Mesia i te Feiā Mo’a i te mau Mahana Hope’a nei.

Te rirora’a ei melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei, e hōro’a mai te reira i te mau ha’amaita’ira’a e rave rahi, tae noa atu i te mau rāve’a nō te mau tamari’i ’ia rave itoito i te ’ohipa a te Atua.

Nō te ha’api’i rahi atu ā nō ni’a i te ha’amaura’a ’e i te hōro’a o te Vārua Maita’i, ’a hi’o Gary E. Stevenson, « Nāhea te Vārua Maita’i e nehenehe ai e tauturu ia ʼoutou ? », Liahona, Mē 2017, 117–20 ;Gospel Topics, « Holy Ghost (Vārua Maita’i) », topics.ChurchofJesusChrist.org.

Te mau ’ātivite e au

• E ani i te hō’ē ta’ata tei bāpetizohia ’e tei ha’amauhia ’aita i maoro a’e nei ’ia haere mai i roto i te piha ha’api’ira’a ’e ’ia fa’a’ite mai e aha te huru ’ia ha’amauhia. E aha te aura’a nō teie ta’ata ’ia riro mai ei melo nō te ’Ēkālesia a Iesu Mesia i te Feiā Mo’a i te mau Mahana Hope’a nei ? Tauturu i te mau tamari’i ’ia feruri i te mau rāve’a e nehenehe ai ia rātou ’ia ha’apa’o i tā rātou fafaura’a nō te bāpetizora’a ’ei melo nō te ’Ēkālesia (mai te tāvinira’a ia vetahi ’ē, te anira’a ia vetahi ’ē ’ia ha’api’i rahi atu ā nō ni’a ia Iesu, te purera’a i roto i te mau rurura’a, ’e tē vai atu ra) ’A fa’a’ite e mea nāhea te ravera’a i teie mau mea i te tauturura’a ia ’oe ia fāri’i i te ’oa’oa nō te rirora’a ’ei melo nō te ’Ēkālesia a te Mesia.

• E fa’a’ite i te hō’ē hoho’a o te mau ta’ata i te pape nō Moromona (hi’o Buka hoho’a ’evanelia,N°76), ’e e ani i te mau tamari’i ’ia fa’ata’a mai e aha tātou e ’ite ra i roto i te hoho’a. Fa’ati’a i te ’ā’amu o Alama ’e tōna mau ta’ata e bāpetizohia ra i reira (hi’o Mosia 18:1–17 ; « Pene 15 : Tē ha’api’i nei Alama ’e tē bāpetizo nei », Mau ’Ā’amu o te Buka a Moromona, 43–44, ’e ’aore rā te video e tano i ni’a i te ChurchofJesusChrist.org). ’A tai’o fa’ahou i te Mosia 18:8–9 ’e ’a ani i te mau tamari’i ’ia rave i te mau ’ohipa nō te tauturu ia rātou ’ia ha’amana’o i te mau mea tā te ta’ata i hina’aro e rave ’ei mau melo nō te ’Ēkālesia a te Mesia. E fa’a’ite i te hō’ē taime a ’ite ai ’oe i te mau melo o te ’Ēkālesia i te tāvinira’a mai teie te huru.

’Ia ha’amauhia vau e fāri’i au i te hōro’a o te Vārua Maita’i.

’Ia bāpetizo ana’e-hia tātou ’e ’ia ha’amau ana’e-hia, e fafau mai te Metua i te ao ra ē, « e vai noa tōna vārua i roto ia [tātou] » (Te Ha’api’ira’aTumu ’e te mau Fafaura’a 20:77). ’Ua parauhia teie hōro’a fa’ahiahia nō ō mai i te Atua ra te hōro’a o te Vārua Maita’i.

Te mau ’ātivite e au

• E tai’o i Te Ha’api’ira’aTumu ’e te mau Fafaura’a 33:15, ’e e ani i te mau tamari’i ’ia fa’aro’o i te hōro’a ta’a ’ē tā te Metua i te Ao ra e hōro’a mai ia tātou ’ia bāpetizohia ’e ’ia ha’amauhia tātou. Nō te tauturu ia rātou ’ia ha’api’i rahi atu ā e nāhea te hōro’a o te Vārua Maita’i i te tauturu ia rātou, e hi’o ’āmui fa’ahou i te Ioane 14:26 ; Galatia 5:22–23 ; 2 Nephi 32:5 ; 3 Nephi 27:20. E nehenehe ato’a ’outou e hi’o fa’ahou i te pāpa’ira’a « Te Vārua Maita’i… » (Liahona, Tiunu 2019, F12–F13).

• Hou te ha’api’ira’a, ’a ani i te mau metua o te hō’ē ’aore rā hau atu o te mau tamari’i ’ia fa’a’ite mai e mea nāhea rātou i te ha’amaita’i-ra’a-hia nō te mea tei ia rātou ra te hōro’a o te Vārua Maita’i. Nāhea ’oia i te tauturu ia rātou ? Nāhea rātou i te fa’aro’o i tōna reo ?

• ’A hīmene ’āmui i te hīmene nō ni’a i te Vārua Maita’i, mai te hīmene « The Holy Ghost [Le Saint-Esprit] » (Chants pour les enfants, 56). ’A tauturu i te mau tamari’i ’ia hāro’aro’a i te mea tā te hīmene e ha’api’i nei ia tātou nō ni’a i te huru te Vārua Maita’i ’ia tauturu ia tātou.

E nehenehe te Vārua Maita’i e paraparau mai iā’u nā roto i te mau rāve’a rau.

Te mau tamari’i e nehenehe e ’ite i te reo o te Vārua, e ineine ïa rātou nō te fāri’i i te heheura’a nō rātou iho nō te arata’i ia rātou i roto i tō rātou orara’a. ’A ha’api’i ia rātou ē, e rave rahi rāve’a e nehenehe i te Vārua Maita’i ’ia paraparau mai ia tātou.

Te mau ’ātivite e au

• Tauturu i te mau tamari’i ’ia feruri i te mau rāve’a rau e nehenehe ai ia tātou ’ia paraparau i te hō’ē hoa e ora ra i te ātea ’ē, mai te pāpa’ira’a i te hō’ē rata, te hāponora’a i te hō’ē rata uira, ’aore rā te ’āparaura’a i ni’a i te niuniu. Ā ha’api’i ia rātou ē, e nehenehe te Metua i te ao ra e paraparau mai ia tātou nā roto i te Vārua Maita’i. Fa’a’ohipa i te parau poro’i a te peresideni Dallin H. Oaks « Nāhea te Metua i te ao ra ’ia paraparau mai ia tātou ? » nō te tauturu i te mau tamari’i ’ia hāro’aro’a i te mau rāve’a rau e nehenehe ai i te Vārua Maita’i ’ia paraparau mai i tō tātou ferurira’a ’e i tō tātou ’ā’au (Liahona, Māti 2020, F2–F3).

• E fa’a’ite atu i te hō’ē ’itera’a a paraparau mai ai te Vārua Maita’i ia ’outou nā roto ānei i te mau mana’o i roto i tō ’outou ferurira’a ’aore rā nā roto ānei i te hō’ē mana’o i roto i tō ’outou ’ā’au, (hi’o Te Ha’api’ira’aTumu ’e te mau Fafaura’a 6:22–23 ; 8:2–3 ; hi’o ato’a Henry B. Eyring, « Iriti i tō ’outou ’ā’au i te Vārua Maita’i », Liahona, ’Ātete 2019, F2–F3). ’A fa’a’ite pāpū i te mau tamari’i ē, e nehenehe te Vārua Maita’i e tauturu ia rātou mai te reira te huru.

• E tauturu i te mau tamari’i ’ia feruri i te mau taime ’a fāri’i ai paha rātou i te Vārua—ei hi’ora’a, ’ia hīmene ana’e i te hō’ē hīmene nō ni’a i te Fa’aora ’aore rā ’ia rave ana’e rātou i te tahi ’ohipa maita’i nō vetahi ’ē. E tauturu ia rātou ’ia ’ite i te mau mana’o pae vārua tā te Vārua Maita’i e hōro’a mai. I tō ’outou mana’o, nō te aha te Vārua Maita’i e hōro’a mai ai ia tātou i taua mau mana’o ra ? ’A tauturu i te mau tamari’i ’ia feruri i te mau mea e ti’a ia tātou ’ia rave nō te fa’aro’o i te Vārua Maita’i ’ia paraparau mai ia tātou. ’A paraparau nō ni’a i te mea tā ’outou e rave nō te fa’aro’o māramarama atu ā i te Vārua.

Te ’ōro’a mo’a

’Ia rave ana’e au i te ’ōro’a mo’a, e ha’amana’o vau i te tusia a te Fa’aora ’e e fa’a’āpī au i tā’u mau fafaura’a.

’Ua hōro’a mai te Fa’aora ia tātou i te ’ōro’a mo’a nō te tauturu ia tātou ’ia ha’amana’o i tāna tusia nō tātou ’e nō te fa’a’āpī i tā tātou mau fafaura’a. Maoti teie ’ōro’a tahepetoma, e nehenehe tātou e tāmau noa i te fāna’o i te mau ha’amaita’ira’a o tō tātou bāpetizora’a i roto i tō tātou orara’a.

Nō te ha’api’i rahi atu ā, a hi’o Mataio 26:26–30 ; 3 Nephi 18:1–12 ; Te Ha’api’ira’aTumu ’e te mau Fafaura’a 20:77, 79.

Te mau ’ātivite e au

• E ani i te mau tamari’i ’ia fa’a’ū i te hōho’a pāpa’i « Jesus Introduced the Sacrament to the Nephites [’Ua fa’a’ite Iesu i te ’ōro’a mo’a i te ’ati Nephi] » i roto i te Buka fa’a’ūra’a nō te mau ’ā’amu o te pāpa’ira’a mo’a : Buka a Moromona (2019), 26. E ani ia rātou ’ia fa’atoro i ni’a i te mea tā te ta’ata e feruri ra i roto i te hōho’a. Tai’o i te mau tamari’i i te mau tuha’a o te 3 Nephi 18:1–12 ’e ’aore rā, « Pene 45 : Tē ha’api’i nei Iesu Mesia nō ni’a i te ’ōro’a mo’a ’e te pure », Te mau ’ā’amu o te Buka a Moromona, 126–27, ’e ’aore rā,’a māta’ita’i te video tano i ni’a ChurchofJesusChrist.org. E aha tā tātou e nehenehe e rave nō te ha’amana’o ia Iesu i roto i te ’ōro’a mo’a ?

• E ani i te mau tamari’i ’ia parau mai ia ’outou i te tahi mau mea e ti’a ia rātou ’ia ha’amana’o noa ’ia rave, mai te tā’amura’a i tō rātou tīa’a ’aore rā te horoira’a i tō rātou rima hou ’a tāma’a ai rātou. Nō te aha e mea faufa’a ’ia ha’amana’o i teie mau mea ? E tai’o i te Moroni 4:3 i te mau tamari’i, ’e e ani ia rātou ’ia fa’aro’o e aha tā tātou e fafau e ha’amana’o tāmau noa ’ia rave ana’e tātou i te ’ōro’a mo’a. Nō te aha e mea faufa’a ’ia ha’amana’o ia Iesu Mesia ? Tauturu i te mau tamarii ’ia hāro’aro’a nāhea te faraoa ’e te pape o te ’ōro’a mo’a i te tauturu ia tātou ’ia ha’amana’o i te mea tā Iesu i rave nō tātou (hi’o Moroni 4:3 ; 5:2).

• E pāpa’i i ni’a i te tāpura ’ere’ere « Tē fafau nei au ’ia . » ’A tai’o i te mau pure o te ’ōro’a i te mau tamari’i (hi’o i Te Ha’api’ira’a Tumu ’e Te Mau Parau Fafau 20:77, 79). ’Ia fa’aro’o ana’e rātou i te hō’ē fafaura’a tā tātou e rave i mua i te Atua, e fa’aea ’e e tauturu ia rātou ’ia fa’a’ī i te pereota i ni’a i te tāpura ’ere’ere i te fafaura’a tā rātou i fa’aro’o. Tauturu ia rātou ’ia hāro’aro’a ē, ’ia rave ana’e tātou i te ’ōro’a mo’a, tē rave ato’a ra ïa tātou i te hō’ē ā mau fafaura’a tā tātou i rave i te bāpetizora’a.

• E aha te aura’a te ravera’a i ni’a ia tātou iho i te i’oa o Iesu Mesia ? Nō te tauturu i te mau tamari’i ’ia pāhono i teie uira’a, ’a fa’a’ite i te hō’ē hi’ora’a nō te hō’ē mea tā tātou e tu’u i tō tātou i’oa i ni’a iho. Nō te aha tātou e tu’u ai i tō tātou i’oa i ni’a i teie mau mea ? Nō te aha Iesu Mesia e hina’aro ai e tu’u i tōna i’oa i ni’a iho ia tātou ? E nehenehe e fa’a’ite atu i teie tātarara’a a te peresideni Russell M. Nelson : « Te ravera’a i te i’oa o te Fa’aora i ni’a iho ia tātou o te paraura’a ïa ’e te fa’a’itera’a ia vetahi ’ē—nā roto i tā tātou mau ’ohipa ’e tā tātou mau parau ē—’o Iesu te Mesia » (« Te i’oa ti’a o te ’Ēkālesia », Liahona, Novema 2018, 88).

Te mana ’e te mau tāviri o te autahu’ara’a

E ha’amaita’i te Atua i tāna mau tamari’i nā roto i te mana autahu’ara’a.

E fārii te tā’āto’ara’a o te mau tamari’i a te Atua—te vahine e te tāne, te mea ’āpī ’e te mea pa’ari—i te mana o te Atua ’a ha’apa’o ai rātou i te mau fafaura’a tā rātou i rave e ’ōna. E rave tātou i teie mau fafaura’a ’ia fāri’i ana’e tātou i te mau ’ōro’a autahu’ara’a mai te bāpetizora’a (hi’o Buka arata’i rahi : Tāvinira’a i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei, 3.5, ChurchofJesusChrist.org).

Nō te ha’api’i rahi atu ā, ’a hi’o Russell M. Nelson, « Te mau tao’a pae vārua », Liahona, Novema 2019, 76–79 ; « Te mau parau tumu o te autahu’ara’a », pene 3 i roto i te Buka arata’i rahi.

Te mau ’ātivite e au

• Tauturu i te mau tamari’i ’ia ’ite i te mau ha’amaita’ira’a tā rātou e fāri’i maoti te autahu’ara’a. Nō te fa’a’ōhie i te ferurira’a, e nehenehe ’outou e fa’a’ite i te video « Te mau ha’amaita’ira’a o te autahu’ara’a » (ChurchofJesusChrist.org). E nehenehe e pāpa’i i teie mau uira’a i ni’a i te ’iri pāpa’ira’a. Nō te aha teie mau parau mau e riro ai ’ei mea faufa’a rahi nō tātou ? E fa’a’ite pāpū ē, e tae mai teie mau ha’amaita’ira’a ia tātou maoti ’o Iesu Mesia ’e tōna mana autahu’ara’a.

• Pāpa’i i teie mau upo’o parau i ni’a i te tāpura ’ere’ere : Te pūai o te Atua ’e Te pūai ’e te mana o te Atua tei hōro’ahia i te mau tāne i te fenua nei. E ani i te mau tamari’i ’ia tu’u i te mau hoho’a i raro a’e i te upo’o parau mātāmua ’o tē tauturu ia tātou ’ia māramarama e nāhea te Atua i te fa’a’ohipara’a i tōna pūai nō te ha’amaita’i ia tātou, mai te hāmanira’a i te ao nei, te arata’ira’a ’e te fa’aterera’a ia tātou, ma te fa’a’ite ia tātou ē, tē here nei ’e tē ’ite nei ’oia ia tātou, ’e tē fa’aro’o nei ’e tē pāhono nei ’oia i tā tātou mau pure (hi’o Buka Hōho’a ’Evanelia, nos. 3, 68, 90, 111). E ani ia rātou ’ia tu’u i te mau hoho’a i raro a’e i te upo’o parau piti ’o tē tauturu ia tātou ’ia māramarama e nāhea te mau ta’ata ti’amā i ni’a i te fenua nei i te fa’a’ohipa i te pūai ’e te mana o te Atua nō te ha’amaita’i ia tātou, mai te ha’amaita’ira’a i te feiā ma’i, te bāpetizora’a, te ha’amaura’a, ’e te fa’aterera’a i te ’ōro’a mo’a, ’e te tā’atira’a i te mau ’utuāfare (hi’o Buka Hōho’a ’Evanelia, nos. 46, 104, 105, 107, 120). E fa’a’ite nō te aha ’outou e māuruuru ai i te autahu’ara’a ’e i te mau ha’amaita’ira’a tā te reira e hōro’a mai.

• Hō’ē o te mau rāve’a tumu e fāri’i ai tātou i te mau ha’amaita’ira’a o te mana o te Atua i roto i tō tātou orara’a, e mea nā roto ïa i te mau ’ōro’a o te autahu’ara’a (hi’o Te Ha’api’ira’aTumu ’e te mau Fafaura’a 84:20). Nō te tauturu i te mau tamari’i ’ia ha’api’i mai i teie parau mau, e tāpura ’outou i te mau pāpa’ira’a mo’a i muri nei i ni’a i te tāpura ’ere’ere : 3 Nephi 11:21–26, 33 (bāpetizora’a) ; Moroni 2 (ha’amaura’a) ; Moroni 4–5 (‘ōro’a mo’a). E nehenehe te mau tamari’i tāta’itahi e mā’iti i te hō’ē o teie mau ’īrava ’e ’ia fa’a’ite mai i te ’ōro’a tā te reira e fa’ata’a ra. E ani i te mau tamari’i ’ia fa’a’ite mai e mea nāhea rātou i te ha’amaita’ira’ahia nā roto i te fāri’ira’a i te mau ’ōro’a o te autahu’ara’a.

• E tauturu i te mau tamari’i ’ia māramarama ē, e fāri’i rātou i te mana nō ō mai i te Atua ra ’a bāpetizohia ai rātou ’e ’a ha’apa’o ai rātou i tā rātou fafaura’a nō te bāpetizora’a. ’A ani i te mau tamari’i e mea nāhea teie mana i te tauturu ia rātou.

Nā te mau tāviri o te autahu’ara’a e fa’atere nei i te ’ohipa a te Atua ’e nā te mana o te autahu’ara’a e fa’atupu nei i te reira.

E nehenehe te mau melo tāne ti’amā o te ’Ēkālesia e fa’atōro’ahia i te hō’ē tōro’a i roto i te autahu’ara’a. Ta’a ’ē atu i te reira, i te mau taime ato’a e fa’ata’ahia te hō’ē ta’ata nō te hō’ē pi’ira’a ’aore rā, e fa’ata’ahia nō te tauturu i roto i te ’ohipa a te Atua, e nehenehe ’oia e fa’a’ohipa i te mana autahu’ara’a tei hōro’ahia iāna. Nā te mau ta’ata tei mau i te mau tāviri o te autahu’ara’a e fa’a’ohipa i te mau mana ato’a o te autahu’ara’a, mai te peresideni titi, te ’episekōpo, ’e te mau peresideni pupu autahu’ara’a. Te mau tāviri o te autahu’ara’a ’o te mana ïa nō te fa’atere i te fa’a’ohipara’a i te autahu’ara’a i roto i te ravera’a i te ’ohipa a te Fatu.

Te mau ’ātivite e au

• E tai’o ’e te mau tamari’i i te Mareko 3:14–15, ’e e fa’a’ite ia rātou i te hō’ē hōho’a nō te ’ohipa i tupu tei fa’ata’ahia i reira (mai te Buka hōho’a o te ’evanelia,N°38). ’A ani i te mau tamari’i ē, ’ua ’ite a’ena ānei rātou i te hō’ē ta’ata i te fa’atōro’ara’ahia i te hō’ē tōro’a o te autahu’ara’a ’e ’aore rā, ’a fa’ata’ahia ai nō te hō’ē pi’ira’a (’aore rā, ’a fa’ati’a atu ia rātou nō ni’a i te mau ohipa i tupu i ni’a iho ia ’outou). Nāhea te reira e tū’ati ai i te mea tā te Fa’aora i rave e tāna mau āpōsetolo ? Tauturu i te mau tamari’i ’ia tāpura i ni’a i te tāpura ’ere’ere i te mau tōro’a o te autahu’ara’a ’aore rā, te mau pi’ira’a e nehenehe e hōro’ahia i te mau melo o te ’Ēkālesia, mai te hō’ē ’orometua ha’api’i ’aore rā te hō’ē ti’a fa’atere i roto i te hō’ē fa’anahonara’a. I pīha’i iho i te tōro’a ’aore rā te pi’ira’a tāta’itahi, e nehenehe ’outou e pāpa’i e aha te mana tā te hō’ē ta’ata e rave nā roto i taua tōro’a ra ’aore rā, taua pi’ira’a ra. E fa’a’ite atu i te mau tamari’i e mea nāhea tō ’outou fa’ata’ara’ahia e te hō’ē ta’ata i raro a’e i te arata’ira’a a te mau tāviri o te autahu’ara’a i te tauturura’a ia ’outou ’ia tāvini.

• E ani i te mau tamari’i ’ia feruri i te hō’ē mea e tītau ’outou i te hō’ē tāviri, mai te hō’ē pere’o’o ’aore rā te hō’ē ’ōpani. E aha tē tupu mai te mea ’aita tā ’outou e tāviri ? E tai’o ’āmui i Te Ha’api’ira’aTumu ’e te mau Fafaura’a 65:2, ’e e fa’a’ite i tō ’outou ’itera’a pāpū nō ni’a i te faufa’a ’ia fāri’i i te mau tāviri o te autahu’ara’a i ni’a i te fenua nei. E nehenehe ato’a e māta’ita’i i te video « Where Are the Keys ? [Tei hea te mau tāviri] » (ChurchofJesusChrist.org) ’e e ’imi i te mea tā Elder Stevenson e ha’api’i nei nō ni’a i te mau tāviri o te autahu’ara’a.

• ’A ani i te hō’ē ta’ata i roto i te pāroita tei mau i te mau tāviri ’ia haere mai i roto i te piha ha’api’ira’a ’e ’ia fa’a’ite i te mau tamari’i e aha te aura’a ’ia mau i te mau tāviri o te autahu’ara’a. E ani iāna ’ia fa’ata’a mai i tāna mau hōpoi’a. E aha te mau tuha’a o te ’ohipa a te Fatu tāna e arata’i nei ? E mea nāhea te Fa’aora i te tauturu mai iāna ?

Te hiero ’e te fa’anahora’a nō te ’oa’oa

Te hiero ’o te fare ïa o te Fatu.

’Ua riro te mau hiero ’ei tuha’a nō te fa’anahora’a a te Metua i te Ao ra nō tāna mau tamari’i. I roto i te mau hiero, e rave tātou i te mau fafaura’a mo’a i mua Iāna, e horo’ahia te mana o te autahu’ara’a, e fāri’i tātou i te heheura’a, e ravehia i te mau ’ōro’a nō tō tātou mau tupuna i pohe, ’e e tā’atihia i tō tātou mau ’utuāfare ’e a muri noa atu. E nehenehe teie mau mea ato’a maoti ’o Iesu Mesia ’e tāna tusia tāra’ehara.

Nāhea e ti’a ai ia ’outou ’ia tauturu i te mau tamari’i tā ’outou e ha’api’i ra ’ia ’ite i te mo’ara’a o te fare o te Fatu ’e ’ia fa’aineine ia rātou iho ’ia vai ti’amā nō te ’āmui atu i roto i te mau ōro’a o te hiero ? E nehenehe e hi’o fa’ahou i teie mau rāve’a tauturu : Te Ha’api’ira’aTumu ’e te mau Fafaura’a 97:15–17 ; Russell M. Nelson, « Mau parau ’ōpanira’a », Liahona, Novema 2019, 120–22 ; « Nō te aha te feiā mo’a i te mau mahana hope’a nei e patu ai i te mau hiero », temples.ChurchofJesusChrist.org.

’Ua riro te mau hiero ’ei tuha’a nō te fa’anahora’a a te Metua i te Ao ra nō tāna mau tamari’i.

Te mau ’ātivite e au

• E fa’a’ite atu i te hō’ē ’aore rā, te tahi atu ā mau hōho’a hiero. E ani i te mau tamari’i e aha te mea e fa’ariro i te hiero ’ei vāhi ta’a ’ē. E ha’apāpū ē, i ni’a i te hiero tāta’itahi tē vai ra teie pāpa’ira’a : « Ha’amo’ahia i te Fatu : Te fare o te Fatu ». E ani i te mau tamari’i, i tō rātou mana’o, e aha te aura’a « Ha’amo’ahia i te Fatu ». Nō te aha te hiero i pi’ihia ai ē, te fare o te Fatu ? E aha tā teie e ha’api’i mai nei ia tātou nō ni’a i te hiero ? Mai te mea ē, ’ua haere te hō’ē o te mau tamari’i i te hiero, e nehenehe ato’a tā rātou e fa’a’ite mai i tō rātou huru i te taime tei reira rātou. Mai te mea ’ua haere ’outou i te hiero, ’a fa’a’ite e mea nāhea tō ’outou itera’a ē, tei reira te Fatu, ’e ’a paraparau nō te aha te hiero i riro ai ’ei vāhi mo’a nō ’outou.

• ’A tai’o ’āmui i Te Ha’api’ira’aTumu ’e te mau Fafaura’a 97:15–17. E ani i te mau tamari’i ’ia ’imi e aha tā te Fatu e tīa’i nei i te feiā e tomo i roto i tōna fare mo’a. Nō te aha e tītauhia ai ia tātou ’ia ora ti’amā nō te tomo i roto i tōna fare ? ’Ei tuha’a nō teie ’āparaura’a, ’a parau i te mau tamari’i nō ni’a i te parau fa’ati’a nō te hiero, ’oia ato’a nāhea ’ia fāri’i i te hō’ē. E ani i te hō’ē melo o te ’episekōpora’a ’ia fa’a’ite mai ia rātou mai te aha te huru tē uiuira’a nō te parau fa’ati’a nō te hiero ’e te mau uira’a e uihia i roto.

I roto i te hiero e rave tātou i te mau fafaura’a ’e te Atua.

’Ua ha’api’i mai te peresideni Russell M. Nelson : « Tē ani manihini mai nei ’o Iesu Mesia ia tātou ’ia rave i te ’ē’a nō te fafaura’a nō te ho’i i pīha’i iho i tō tātou nā Metua i te Ao ra ’e ’ia pārahi i pīha’i iho i te feiā tā tātou i here » (« Haere mai, ’a pe’e mai iā’u », Liahona, Mē 2019, 91). Tauturu i te mau tamari’i ’ia hāro’aro’a ē, te ’ē’a nō te fafaura’a ’o te bāpetizora’a ïa, te ha’amaura’a, ’e te ’ōro’a hiero ’e te tā’atira’a.

Te mau ’ātivite e au

• E ani i te mau tamari’i ’ia tauturu ia ’outou ’ia hi’o fa’ahou i te fafaura’a tā tātou e rave ’e te Atua ’ia bāpetizo-ana’e-hia tātou ’e tā tātou e fa’a’āpī ’ia rave ana’e tātou i te ’ōro’a mo’a (hi’o Mosia 18:10 ; Te Ha’api’ira’aTumu ’e te mau Fafaura’a 20:77, 79). ’A fa’a’ite i te hō’ē hōho’a o te hiero ’e ’a fa’ata’a ē, e rave rahi atu ā tā te Metua i te Ao ra mau ha’amaita’ira’a e hina’aro e hōro’a mai ia tātou i roto i te hiero.

• ’A pāpa’i hōho’a i te hō’ē ’ūputa e arata’i atu i te hō’e ’ē’a. E ani i te mau tamari’i nō te aha rātou e mana’o ai ē, e mea maita’i ’ia vai te hō’ē ’ē’a nō te haere nā ni’a iho. Tai’o ’āmui i te 2 Nephi 31:17–20, i reira Nephi e fa’aau ai i te fafaura’a o te bāpetizora’a i te hō’ē ’ūputa ’e e ani ia tātou ia tāmau noa i ni’a i te ē’a i muri a’e i te bāpetizora’a. E rave rahi atu ā fafaura’a e rave i muri a’e i te bāpetizora’a, tae noa atu i te mau fafaura’a i ravehia i roto i te hiero. E ha’amāramarama atu ē ’ua pi’i te peresideni Nelson i teie ’ē’a te « ’ē’a nō te fafaura’a ».

I roto i te hiero, e bāpetizohia ʼe e haʼamauhia tātou nō te mau tupuna tei pohe.

Nā te ’evanelia a Iesu Mesia e fa’ati’a i te mau tamari’i pā’āto’a a te Atua ’ia ho’i e ora i pīha’i iho iāna, noa atu ē, e pohe rātou ma te ’ite ’ore i te ’evanelia. I roto i te hiero, e nehenehe tātou e bāpetizohia ’e e ha’amauhia ’ei melo nō te ’Ēkālesia a Iesu Mesia ’ei mono nō rātou.

Te mau ’ātivite e au

• ’A paraparau nō ni’a i te hō’ē taime ’a rave ai te hō’ē ta’ata i te hō’ē mea nō ’oe ’o tē ’ore e nehenehe ia ’oe ’ia rave nō ’oe iho. E ani i te mau tamari’i ’ia fa’a’ite mai i teie huru ’itera’a i tupu i ni’a ia rātou. E fa’ata’a atu ē, ’ia haere ana’e tātou i te hiero, e nehenehe tātou e fāri’i i te mau ’ōro’a mo’a mai te bāpetizora’a nō vetahi ’ē ’o tei pohe. Nāhea tātou e riro ai mai ia Iesu ’ia rave ana’e tātou i te ’ohipa nō tei pohe ? E aha tei ravehia e ana nō tātou tē ʼore e ti’a ia tātou ’ia rave nō tātou iho ?

• E ani i te hō’ē feiā ’āpī ’aore rā hau atu tei bāpetizohia nō tō rātou mau tupuna ’ia fa’a’ite mai i tō rātou ’itera’a. E ani ia rātou mai te aha te huru i roto i te hiero. E fa’aitoito ia rātou ’ia fa’a’ite mai e aha tā rātou i fāri’i i te ravera’a i teie ’ohipa nō tō rātou mau tupuna.

• ’A pāpa’i hōho’a i te hō’ē tumu rā’au i ni’a i te tāpura ’ere’ere, tae noa atu i te mau a’a ’e te mau ’āma’a. E ani i te mau tamari’i ’ia feruri nāhea te hō’ē ’utuāfare e riro ai mai te hō’ē tumu rā’au. E tāpa’o i te mau a’a e mau Tupuna, e tāpa’o i te mau āma’a e mau Huā’ai, ’e e tāpa’o i te tumu o te tumu rā’au ’o ’Outou. E tai’o ’āmui i teie pereota nō roto mai i Te Ha’api’ira’aTumu ’e te mau Fafaura’a 128:18 : « Nō te mea ’ia ’ore rātou, [tō tātou mau tupuna] e ’ore roa e ti’a ia tātou ’ia ha’amaita’i-roa-hia ; e ’ore ato’a ho’i rātou e ha’amaita’i-roa-hia ’ia ’ore tātou nei ». E ui atu i te mau uira’a mai teie i muri nei : « Nō te aha tātou e hina’aro ai i tō tātou mau tupuna ? Nō te aha tō tātou hua’ai e hina’aro ai ia tātou ? Nāhea tō tātou mau metua, tō tātou mau metua tupuna ’e te tahi atu mau tupuna i te tauturura’a ia tātou ? » E ani atu i te mau tamari’i ’ia ’imi i te toe’a o Te Ha’api’ira’aTumu ’e te mau Fafaura’a 128:18 nō te hō’ē pereota ’o tē fa’ata’a mai e nāhea e ti’a ai ia tātou ’ia tauturu i tō tātou mau tupuna.

• E nehenehe e ’ohipa i pīha’i iho i te mau metua o te tamari’i tāta’itahi nō te ’imi i te i’oa o te hō’ē tupuna nō te tamari’i nō te ’āfa’i i te hiero (hi’o FamilySearch.org).