Jisōs ej jiburlepe ajri eo

Kwoj juon Rūkaki an Ajri ro

Kwar kūr jān Anij n̄an katakin ajri ro Nejin ilo jekjek eo an Rilo̧mo̧o̧r. Kar kōjeņolo̧k eok n̄an kūr in jān maron̄ eo an priesthood eo An ekwojarjar. Men̄e kwojjab juon rūkaki eo eļap imminene ippān, ilo am̧ mour erreo, jar aolep raan, im ekkatak jeje ko rekwojarjar, Jemedwōj Ilan̄ enaaj lewaj n̄an eok kareel im kajoor eo an Jetōb Kwojarjar n̄an jipan̄ eok tōprak (lale 2 Nipai 33:1).

Ro otemjej kar lewaj lōke in ņa ioom̧ n̄an kōjparok ajri ro nejin Jemedwōj Ilan̄, im Ejeļā ta eo rej aikuj im wāween eo em̧m̧antata n̄an an tōpar er. Ilo am̧ lukkuun jar n̄an bōk im̧we eo an Jetōb Kwojarjar, enaaj tōl eok ilo am̧ kōppopo im ilo am̧ katakin. Enaaj kwaļo̧k n̄an eok ta eo kwoj aikuj in ba im ta eo kwoj aikuj in kōm̧m̧ane (lale 2 Nipai 32:5).

Jab pere maron̄ eo an ajri eo n̄an meļeļe gospel in. Ilo aolep mour ko aer, ajri rein raorōk emakijkij aer ebbōk meļeļe, ejaake im kōm̧anm̧an ļo̧k ļōmņak ko aer, im kōm̧m̧ani im kwaļo̧k ta ko rej loi. Menin eļaptata an m̧ool ilo gospel in, bwe ajri ro repojak im kijōrjōr in ekkatak m̧ool ko. Aer tōmak enaaj ilo men ko an jetōb rem̧ool im rekwojarjar, im ilo aolep iien ilo aer bōk iien n̄an ekkatak. Rej m̧ōņōņō in mour kake ta eo rej ekkatak, men̄e aer meļeļe ejjab likio. En̄in ej jekjek eo jej aikuj aolep bōk gospel in. Ilo an kar Rilo̧mo̧o̧r katakin, “eo e jāmin bōk aelōn̄ in Anij āinwōt juon ajri e dik e jāmin deļo̧n̄ ilowaan” (Luk 18:17).

Kūr eo n̄an katakin ajri ro ej juon kūr ekwojarjar, im jenij en̄jake eddodo jet iien. Ak keememej bwe Jem̧ōm̧ Ilan̄ eaar kūr eok, im E enaaj rejetak eok. En̄in ej jerbal eo an Irooj, im ilo am̧ jerbal “kōn aolepān būruōmi, ami maron̄, ļōmņak im kajoor” (Katak im Bujen Ko 4:2), Enaaj kōļapļo̧k kapeel eo am̧, menin letok ko, im kapeel ko, im jerbal eo am̧ enaaj kōjeraam̧m̧an mour ko an ajri ro kwoj katakin.