Ajri in būraimere ro ilo kūlaaj

Kōjerbal Itok Ļoor Eō—N̄an Būraimere

Kōppopo n̄an Katakin ilo Būraimere

Ekkatak an juon make im baam̧le ilo m̧weo eaikuj in pedped wōt ilo ekkatak eo an gospel in. Menin em̧ool n̄an kwe im ajri ro kwoj katakin. Ilo am̧ kōppopo n̄an katakin, jino kake en̄jake ko am̧ make ilo jeje ko rekwojarjar. M̧aanjabpopo eo am̧ elukkuun aorōktata enaaj waļo̧k ilo am̧ mour kōn gospel in, etale jeje ko rekwojarjar, im kappukot im̧we eo an Jetōb Kwojarjar.

Itok, Ļoor Eō—N̄an Kajjojo Armej im Baam̧le ko ej m̧ōttan eo eaorōk jim̧or ilo am̧ ekkatak im am̧ m̧aanjabpopo n̄an katakin. Enaaj jipan̄ eok bōk juon meļeļe eo em̧wilaļļo̧k an pedped in katak ko loi ilo jeje ko rekwojarjar. Itok, Ļoor Eō—N̄an Būraimere naaj leļo̧k m̧akūtkūt ko n̄an elōn̄ iaan jeje ko rekwojarjar im bwebwenato ko bwe ren ekkatak ilo m̧weo ilo wiik eo.

Ilo iien am̧ kōppopo, ļōmņak im im̧we ko renaaj itok n̄an kwe kōn ajri ro kwoj katakin. Kwonaaj bōk ļōmņak ko kōn wāween an pedped in katak ko ilo jeje ko rekwojarjar naaj kōjeraam̧m̧an mour ko aer. Kwonaaj bōk tōl n̄an im̧we er n̄an lo pedped in katak ko ilo aer ekkatak jān jeje ko rekwojarjar kōn er make im ippān baam̧le ko aer.

juon kōrā ej ekkatak jeje ko rekwojarjar

Ļōmņak ko n̄an Katakin

Ilo am̧ m̧aanjabpopo n̄an katakin, komaron̄ in bōk im̧we ko jet jān am̧ etali laajrak in katak ko ilo bok in jipan̄ in. Jab ļōmņak kōn itia kein āinwōt kōmeļeļe ko em̧ōj kōllaajraki ijjeļo̧kin āinwōt jet kakobaba n̄an kameramļo̧k im̧we ko am̧ make. Kwojeļā kajjien ajri rein, im enaaj ļapļo̧k am̧ jeļā kajjier ilo am̧ iaio̧ ippāer ilo kūlaaj. Irooj ebar jeļā kajjier, im Enaaj im̧we eok ilo wāween ko rem̧m̧antata ilo am̧ katakin im kōjeraam̧m̧an er.

Kein jipan̄ ko jet repojak n̄an am̧ kōjerbali ilo am̧ kōppopo, ekoba itia ko ilo Itok, Ļoor Eō—N̄an Kajjojo Armej im Baam̧le ko im Māākjiin ko an Kabun̄. N̄an meļeļe ko reļļapļo̧k kōn men kein im kein jipan̄ ko jet, lale “Kein Katakin ko Jet n̄an Katakin Ajri ro” ilo kein katak in.

Jet Men ko n̄an Keememeji

• Kajjojo iien kwoj pād ippān ajri ro, ļōmņaki wāween ko komaron̄ jipan̄ er en̄jake iakwe eo an Jemedwōj Ilan̄ im Jisōs Kraist im kile im̧we eo an Jetōb Kwojarjar.

• Jinen im jemān ajri ro ewōr aer eddo eaorōk n̄an katakin nejier. Āinwōt juon rūkaki, ewōr am̧ juon eddo eaorōk n̄an rie, kōketak im kalōk m̧weo ioon ekkatak kōn gospel. Kwon kijenmej n̄an ajri ro me ro jineer im jemeer rejjab katakin gospel eo ilo m̧ōko m̧weer. Kobaik aolep ajri ro ilo iien kōnono kōn gospel eo, ekkar n̄an jekjek ko ilo m̧weo im̧weer.

• Āliji em̧m̧an. Em̧m̧anļo̧k an ajri ro ekkatak n̄e m̧ool kein rej āliji ilo elōn̄ kain im wāween m̧akūtkūt ko. Eļan̄n̄e kwoj loe ke em̧m̧an m̧akūtkūt in ekkatak eo n̄an ajri ro, ļōmņak in bar āliji, eļaptata n̄e kwoj katakin ajri ro reddikļo̧k. Kwomaron̄ bar etale m̧akūtkūt eo an katak eo ļo̧k.

• Jemedwōj Ilan̄ ekōņan bwe kwon wājepdik am̧ katakin āinwōt juon rūkaki. Ekar kōpooji elōn̄ kein jipan̄ ko n̄an jipan̄ eok, ekoba kweilo̧k in ko̧o̧njeļ ko an rūkaki ro. Ilo kweilo̧k in komaron̄ ko̧o̧njeļ ippān rūkaki ro jet kōn apan̄ ko kwoj jelm̧aeiki. Kwomaron̄ bar kōnono im kamineneik pedped in katakin ko āinwōt an Kraist.

• Eļan̄n̄e kwoj katakin ajri ro reddikļo̧k im aikuj jipan̄ ko jet, lale “Tōpar Aikuj ko an Ajri ro Reddikļo̧k” ilo kein katakin in.

Bok in jipan̄ in ekoba kōllaajrak in katakin ko n̄an kajjojo wiik ilo iiō eo. Ilo Jabōt ko n̄e Būraimere eo ejjab kōm̧m̧an kōn wōt kweilo̧k eo eļap, kweilo̧k ko an stake, ak jabdewōt un ko jet, em̧ōj rojan̄ baam̧le ko n̄an wōnm̧aanļo̧k wōt im riiti Kallim̧ur M̧okta ilo m̧ōko m̧weer ekkar n̄an jikejuuļ eo kar kōlaajrake ilo Itok, Ļoor Eō—N̄an Kajjojo Armej im Baam̧le ko. Jab inepata kōn katak ko kwolikjab jeni; katakin laajrak eo em̧ōj kwaļo̧ke aolep wiik.