Li junjunq xb’een aqej taab’asmanq, xb’aan laj J. Kirk Richards

22–28 agosto

Salmos 102–103; 110; 116–119; 127–128; 135–139; 146–150

“Chixjunil li wank xyu’am chixnimaaq xk’ab’a’ li Qaawa’ ”

Wi nakawaj xkomon aana’leb’ naq nakakawresi aawib’ re k’utuk, sik’ sa’ “Xkomon chik li k’anjeleb’aal re xtzolb’aleb’ li kok’al” ut “Xb’aanunkil li nak’anjelak choq’ reheb’ li kok’al li toj ka’ch’ineb’ xyu’am” sa’ xtiklajik li k’anjeleb’aal a’in.

Tz’iib’a li nakak’oxla

Xkanab’ankileb’ chi wotzok

K’ut junjunq li jalam-uuch wankeb’ sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, ut patz’ reheb’ li kok’al naq te’xye k’a’ru neke’ril. Tenq’aheb’ chixk’eeb’al reetal chan ru neke’xk’am rib’ li jalam-uuch rik’in li k’a’ru yookeb’ chixtzolb’al sa’ li hu Salmos.

Xk’utb’al li tzol’leb’: Kok’al toj ka’ch’ineb’ xyu’am

Salmos 119:105

Li raatin li Dios chanchan chik li saqen.

Eb’ li kok’al wankeb’ sa’ li b’e li nak’amok rik’in li qaChoxahil Yuwa’. Li raatin li Dios naru naxtenq’aheb’ chi kanaak sa’ li b’e a’an anajwan ut chiru chixjunil lix yu’ameb’.

Kok’ k’anjel naru chi b’aanumank

• K’uteb’ xjalam-uuch li k’a’aq re ru nayeeman sa’ Salmos 119:105, ut patz’ reheb’ li kok’al naq te’xtuseb’ ru li jalam-uuch naq yooqat chirilb’al li raqal. Patz’ reheb’ li kok’al naq te’xka’suti li ch’ol aatin aawochb’een ut taak’uteb’ li jalam-uuch.

• Patz’ reheb’ li kok’al naq te’aatinaq chirix li neke’reek’a naq wankeb’ sa’ q’ojyin. K’a’ru ch’a’aj xb’aanunkil sa’ q’ojyin? Naru nakapatz’ re junaq ch’ina al naq tixyal xb’aanunkil k’a’ruhaq chi mutz’mu li ru, maare xyiib’ankil junaq jalam-uuch. K’a’ut naq moko ch’a’aj ta xb’aanunkil a’an naq wan li saqen? Tenq’aheb’ li kok’al chixtawb’al ru chan ru naq li raatin li Dios, jo’ natawman sa’eb’ li loq’laj hu ut sa’ li raatineb’ li yo’yookil profeet, naxsaqenob’resi li qab’e nak’amok rik’in li qaChoxahil Yuwa’.

Salmos 139:1–3, 23

Li qaChoxahil Yuwa’ ut li Jesukristo neke’xnaw wu ut nikine’xra.

Chiru chixjunil li qayu’am, tento taajultiko’q qe naq li qaChoxahil Yuwa’ ut li Jesus neke’xnaw qu. Salmos 139 naru nakatxtenq’a chixk’utb’al chiruheb’ li kok’al naq neke’nawe’ ru ut neke’rahe’.

Kok’ k’anjel naru chi b’aanumank

• Tz’iib’a li k’a’ru nakanaw chirixeb’ li junjunq chi kok’al. Taayaab’asiheb’ li k’a’aq re ru a’an chi junjunqal ut taapatz’ reheb’ li kok’al ani li nakat-aatinak wi’. Il Salmos 139:1–3, ut tenq’aheb’ li kok’al chixtawb’aleb’ ru li aatin li maare ink’a’ neke’xtaw ru. Ch’olob’ xyaalal naq neke’nawe’ ru chi us xb’aan li qaChoxahil Yuwa’ ut li Jesus—neke’xnaw lix k’ab’a’eb’, k’a’ru neke’saho’ wi’ xch’ool ut li neke’raho’ wi’ xch’ool, ut li k’a’ru chaab’il choq’ reheb’.

• Yaab’asi Salmos 139:3, ut patz’ reheb’ li kok’al naq te’xk’e li ruq’eb’ sa’ xb’een li raameb’ naq taaye “lin ch’ool” ut te’xch’e’ lix jolomeb’ naq taaye “li naweek’a.” Wotz resil junaq hoonal b’ar wi’ xaweek’a naq li Dios naxnaw ru laa ch’ool ut li nakaweek’a.

Salmos 146:1, 5–9

Naru ninnima ru li Qaawa’.

Xnimankil ru li Qaawa’ naraj naxye b’antioxink chiru ut xk’utb’al qarahom chiru. Tenq’aheb’ li kok’al chixtzolb’al naq naqanima ru naq nokob’ichan, naq nokotijok, ut naq neke’qapaab’ lix k’utum.

Kok’ k’anjel naru chi b’aanumank

• Patz’ reheb’ li kok’al naq te’xwotz xnumsihom naq xe’sahob’resiik xch’ool malaj xyehe’ reheb’ naq chaab’il xk’anjeleb’. Wotz junjunq li k’a’aq re ru chaab’il re Salmos 146:6–9 li xb’aanuhom li Qaawa’, ut patz’ reheb’ li kok’al naq te’xye k’a’ chik ru xb’aanuhom choq’ qe. Tenq’aheb’ chixk’oxlankil chan ru naru te’xloq’oni xb’aaneb’ li k’a’aq re ru a’an.

• Ch’olob’ naq choq’ reheb’ laj Israelita najter chaq, eb’ li Salmo chanchaneb’ chik li b’ich li neke’qab’icha anajwan re xloq’oninkil li Dios.

Xk’utb’al li tzol’leb’: Kok’al ak ninqeb’

Salmos 102:1–2; 103

Li Qaawa’ naxyeechi’i xk’ojob’ankil inch’ool ut woyb’enihom.

Li Dios naxnaw k’a’ru li nayale’ wi’ qix ut li qarahilal, ut naraj xk’ojob’ankil ut xwaklesinkil qach’ool. Tenq’aheb’ li kok’al chixnimob’resinkil lix paab’aaleb’ chirix a’an re naq te’sutq’iiq rik’in a’an sa’eb’ li majelal.

K’irtesink, xb’aan laj J. Kirk Richards

Kok’ k’anjel naru chi b’aanumank

• Patz’ re jun li ch’ina al naq taaril Salmos 102:1–2. Chan ru naq li Qaawa’ naru nokoxtenq’a sa’ li ch’a’ajkilal? Chan ru naq naqapatz’ lix tenq’? Wotz junaq aanumsihom b’ar wi’ xaweek’a naq li Dios xrab’i laa tij naq wankat sa’ majelal, ut patz’ reheb’ li kok’al naq te’xwotz ajwi’ xnumsihomeb’ ut xnawom xch’ooleb’.

• Patz’ reheb’ li kok’al naq te’xsik’ aatin nak’ojob’an ch’oolej ut nak’ehok oyb’enihom sa’ Salmos 103. Chan ru naq eb’ li aatin a’in naru naxtenq’aheb’ li kristiaan wankeb’ sa’ ch’a’ajkilal? Waklesi xch’ooleb’ li kok’al chixtz’iib’ankil ch’ol aatin li wan xyaalal choq’ reheb’ re naq te’xjultika naq naru neke’tenq’aak xb’aan li Qaawa’ naq wankeb’ sa’ ch’a’ajkilal.

Salmos 119:105

Li raatin li Dios nikinixtenq’a chixtaaqenkil lix b’e.

Us ta li ruchich’och’ chanchan naq moymoy ru, li raatin li Dios naru naxsaqenob’resi li qab’e ut tooxtenq’a chi sutq’iik rik’in a’an.

Kok’ k’anjel naru chi b’aanumank

• Yiib’ chiru li pizarron xjalam-uuch jun li saqen (maare jun li pook) ut xjalam-uuch jun li loq’laj hu. Patz’ reheb’ li kok’al naq te’ril Salmos 119:105. Chan ru naq nokoxtenq’a li saqen? Chan ru naq nokoxtenq’a li raatin li Dios? Patz’ reheb’ li kok’al naq te’xtz’iib’a lix sumehomeb’ chiru li pizarron chixk’atqeb’ li jalam-uuch. Chan ru naq li raatin li Dios chanchan chik jun li saqen? Chan ru nokoxtenq’a chi kanaak sa’ li b’e nak’amok qe rik’in li qaChoxahil Yuwa’?

• K’eheb’ li kok’al sa’ ka’kab’il ut k’e reheb’ jun reheb’ li raqal a’in: Salmos 119:47–48; Salmos 119:105; 1 Nefi 11:25; 2 Nefi 31:20. Patz’ reheb’ naq te’ril li raqal ut te’xsik’ k’a’ru xk’e qe li qaChoxahil Yuwa’ re qatenq’ankil chi kanaak sa’ li b’e nak’amok qe rik’in a’an. Patz’ reheb’ li kok’al naq te’xk’oxla ut te’xwotz li neke’reek’a chirix li k’a’ru xe’xtzol.

• B’ichahomaq jun li b’ich chirix xtaaqenkil lix b’e li Dios, maare “Tinb’eeq rik’in li Qaawa’ Jesus” (ChurchofJesusChrist.org). K’a’ru naqatzol sa’ li b’ich chirix kanaak sa’ li chaab’il b’e?

Salmos 139:23–24

Li qaChoxahil Yuwa’ ut li Jesukristo naru nikine’xtenq’a chixnawb’al k’a’ru tento tinchaab’ilo’q wi’.

Salmos 139 naxk’ut naq li Dios naxnaw chixjunil chiqix, lix kawil qametz’ew ut lix q’unal qametz’ew. Wi naqasik’ a’an, naru naxk’ut chiqu k’a’ru tento taqab’aanu re toowulaq jo’ a’an.

Kok’ k’anjel naru chi b’aanumank

• Tz’iib’aheb’ li aaatin wankeb’ sa’ Salmos 139:23–24 chiru li pizarron ut patz’ reheb’ li kok’al naq te’xjuch’eb’ li neke’xye k’a’ru naru naxb’aanu li Dios choq’ qe. K’a’ut naq naqaj naq li Dios tixb’aanu li k’a’aq re ru a’an choq’ qe? Chan ru naru naqab’oq “chiqab’eresinkil sa’ li junelik yu’am”?

• Waklesi xch’ooleb’ li kok’al “chixsik’b’al” sa’ xyu’ameb’ chan ru naru neke’chaab’ilo’ sa’ li kaahib’ chi na’leb’ choq’ reheb’ li kok’al ut li saaj: sa’ musiq’ej, sa’ komonil wank, sa’ tib’elej, ut sa’ k’a’uxleb’aal. Jultika reheb’ naq li Qaawa’ naxnaw chan ru naru neke’chaab’ilo’ sa’ li kaahib’ chi na’leb’ a’an, ut waklesi xch’ooleb’ chixsik’b’al lix b’eresihom.

• B’ichahomaq jun li b’ich chirix li tenq’ naxk’e li qaChoxahil Yuwa’ re toochaab’ilo’q, maare li xkab’ raqal li b’ich “Chinaatenq’a re tinkuyeb’ lix maak” (B’ichleb’aal choq’ reheb’ li Kok’al, 52). Wotz chan ru naq li qaChoxahil Yuwa’ ut li Jesukristo nakate’xtenq’a chi chaab’ilo’k.

Xb’oqb’aleb’ chi tzolok sa’ kab’l

Chi jo’q’ehatq, naru nakapatz’ re jun reheb’ li kok’al ut jun li komon re lix junkab’al naq te’xwotz sa’ li tzoleb’aal k’a’ru yookeb’ chixb’aanunkil sa’ kab’l re xtzolb’al li evangelio. Waklesi xch’ooleb’ xkomoneb’ li kok’al chixwotzb’aleb’ li na’leb’ a’an rik’ineb’ lix junkab’al.

Xkawresinkil qib’ jo’ aj k’utunel

Oksiheb’ li b’ich. Eb’ li b’ich reheb’ li kok’al naru naxtenq’aheb’ li kok’al chixtawb’al ru ut chixjultikankileb’ li na’leb’ re li evangelio. Li b’ichank naru ajwi’ naxtenq’aheb’ li kok’al chi tz’aqonk sa’eb’ li tzolok. (Chi’ilmanq Li k’utuk jo’ li Kolonel, 22.)