alii o loo suesue i tusitusiga paia

29 Aokuso–4Setema

Faataoto 1–4; 15–16; 22; 31; Failauga 1–3; 11–12

“O le Mata’u i le Atua O le Amataga lea o le Poto”

A o e suesueina le Faataoto ma Failauga, mafaufau i tamaiti o e aoaoina. O a ni feau mai nei mau e mafai ona fesoasoani ia i latou ia latalata atili i le Tama Faalelagi ma Iesu Keriso?

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Tusi i luga o le laupapa ia ata o mea o loʻo taua i le tusi o Faataoto, pei o se fatu, se malamalama, poʻo se auala. Fesoasoani i tamaiti e faitau le Faataoto 3:5; 4:18,26, ma valaaulia i latou e faasoa mai mea na latou aoaoina e uiga i nei mea mai mau.

aikona o le aoao atu

Aoao atu le Aoaoga Faavae: Tamaiti Laiti

Faataoto 3:5

E mafai ona ou faatuatua i le Alii ma lo’u loto atoa.

A tatou faatuatua i le Aliʻi ma o tatou loto atoa, ua tatou faatuatua ia te Ia ma iloa o le a Ia fesoasoani mai ia i tatou.

Gaoioiga e Mafai Ona Fai

• Tuu atu i tamaiti e uu se ata o le Faaola ao e faitauina le Faataoto 3:5. Ta’u atu i tamaiti le uiga ia te oe o le faatuatua i le Alii. Valaaulia tamaiti e fai se fatu ma o latou lima pe uu o latou lima i luga o o latou fatu a o toe fai le fuaitau “faatuatua i le Alii ma lou loto atoa” mo ni nai taimi.

• Tusi se fatu lapoʻa i luga o le laupapa, ma fesoasoani i tamaiti e mafaufau i mea e mafai ona latou faia e faaali ai latou te faatuatua i le Alii. Valaaulia i latou e tusi o latou manatu i totonu o le fatu po o luga o se fasipepa. Uunaia i latou e faasoa atu a latou manatu ma o latou aiga.

Tamaiti e toalua o loo talanoa

E mafai e tamaiti ona avatu “se tali filemu” i le faaaogaina o upu alofa (Faataoto 15:1).

Faataoto 15:1,18

E mafai ona ou faaaogaina upu alofa.

I taimi faigata poʻo tulaga le fiafia, atonu e faaosoosoina i tatou e tali atu ma le ita. Ua aoao mai le Faataoto 15:1,18 ia i tatou le auala e mafai ai ona tatou liliu ese le ita.

Gaoioiga e Mafai Ona Fai

• Faitau le Faataoto 15: 1 i tamaiti, ma faamatala ni upu poʻo ni fasifuaitau atonu latou te le masani ai. Faasoa ni nai faataʻitaʻiga o tulaga e ono ita ai le tamaititi (pei o se finauga ma se uso poʻo se tuafafine). Fesoasoani ia latou mafaufau i “tali filemu,” poʻo ni upu alofa, e mafai ona latou faaaogaina nai lo o upu ita. Fesoasoani ia latou e faataitai le fai lemu o nei upu pe i se leo malu.

• Usu se pese e faatatau i le agalelei, e pei o le “O Le Agalelei e Amata Ia Te A’u” (Tusipese a Tamaiti,83). O le a se mea o aoao mai e lenei pese ia i tatou e uiga i le agalelei atu?

• Ina ia fesoasoani i tamaiti ia malamalama i le uiga o le ia “faagesegese i le ita” (Faataoto 15:18), faamatala atu sau oe lava tala e uiga i le taimi na e (po o se tasi e te iloa) lagona ai le ita ae na filifili e agalelei. Tuu atu i tamaiti e faasoa mai a latou lava aafiaga. Fesoasoani i tamaiti e mafaufau i mea e mafai ona latou faia nai lo le ita. Mo se faataʻitaʻiga, e mafai ona latou mafaufau e uiga ia Iesu, ole atu i le Tama Faʻalelagi e fesoasoani ia i latou, usu se pese Peraimeri ia i latou lava, pe, a mafai, naʻo le savali ese.

Faataoto 22:6

E mafai ona ou faasoa atu mea ua ou maua i isi.

E mafai e tamaiti laiti ona aʻoaʻo e fesoasoani i tagata o siomiaina i latou o loʻo manaʻomia se fesoasoani. Faafefea ona e faamalosia i latou e faasoa mea ua latou maua i isi?

Gaoioiga e Mafai Ona Fai

• Faaali atu i tamaiti ni ata o isi o loʻo tautua pe fesoasoani i tagata e manaʻomia se fesoasoani, e aofia ai ma ata o le Faaola (e pei o le Tusi Ata o le Talalelei, nu. 42, 44, 46). Fai atu i tamaiti e faamatala atu ia te oe mea o lo o tutupu i ata taitasi. Faitau atu i tamaiti le Faataoto 22:9. Faamatala o se tasi auala e mafai ona tatou auauna atu ai o le foai atu o “areto i e matitiva,” ae e tele isi auala e fesoasoani ai ia i latou e le tagolima. Tofi ni tamaiti e tusi se ata o lo o latou fesoasoani i se tasi.

• Aumai i le vasega ni mea faitino e mafai ona e fetufaai ai ma tamaiti, pei o ata po o penivali. A o e tuʻuina atu i tamaiti taʻi tasi, fai atu, “O le a ou faasoa atu ia [igoa o le tamaititi].” Tuu atu i tamaiti e feauauai i le fetufaai atu o mea i le tasi. O a nisi mea e mafai ona tatou faasoa atu i isi?

• Usu faatasi se pese e faatatau i le auaunaga, e pei o le “‘Foai,’ O Si Auvai Lea” (Tusipese a Tamaiti,116). Faaali le vitio “Gordon Hinckley: Lessons I Learned as a Boy” (ChurchofJesusChrist.org). Fesili atu i tamaiti pe faapeī o latou lagona pe a latou fesoasoani i isi.

aikona o le aoao atu

Aoao atu le Aoaoga Faavae: Tamaiti Matutua

Faataoto 1:7; 2:5; 15:33; 16:6; Failauga 12:13

O le “mata’u i le Atua” o lona uiga ia alofa ma usitai ia te Ia.

O se tasi o feʻau taua i le Faataoto ma le Failauga o le “mata’u i le Atua, ma tausi i ana tulafono” (Failauga 12:13). Mafaufau loloto pe faapefea ona e fesoasoani i tamaiti ia malamalama i le uiga o le matataʻu i le Atua.

Gaoioiga e Mafai Ona Fai

• Fai i tamaiti e lisi mai ni mea e ono fefefe ai tagata. Fai atu ia i latou e faitau le Faataoto 1:7 ma le Failauga 12:13. O le a le uiga o le mata’u i le Atua? Ina ia fesoasoani e taliina lenei fesili, fai i se tamaititi e toe faitau ia fuaiupu, suia le upu “mata’u” i le upu “faaaloalo.” Toe fai le gaoioiga lea i upu pei o le “alofa,” “usiusitai,” po o le “usitai.” Faafefea e lenei mea ona suia lo tatou malamalamaʻaga i le uiga o le mataʻu i le Atua?

• Fai i tamaiti uma e filifili se tasi o fuaiupu nei e faitau, ma vaavaai mo le upu “mata’u”: Faataoto 1:7; 2:5; 15:33; 16:6. Fai i tamaiti e faasoa mai po oa ni mea o aoao mai e a latou fuaiupu e uiga i faamanuiaga e oʻo mai pe a tatou matataʻu i le Alii, o lona uiga tatou te faʻaalia le migao ma le faʻaaloalo ia te Ia (tagai foi Faataoto 14:26–27). Faafefea ona tatou faaali atu i le Alii tatou te alolofa ma faaaloalo ia te Ia?

Faataoto 3:5–7

“Ia e faatuatua i le Alii ma lou loto atoa.”

• Faitau faatasi le Faataoto 3:5--7, ma valaaulia tamaiti e lisi ni mea o loʻo taʻu mai i nei fuaiupu e tatau ona tatou faia ae le tatau ona faia. Fesili atu ia i latou po o le a so latou manatu o le a le uiga o nei mea uma. O a ni uiga taua tatou te mauaina i tagata tatou te talitonuina? O a ni uiga taua o i ai i le Alii e fesoasoani tatou te talitonu ai ia te Ia?

• Ina ia faaali atu le uiga o le “aua le faalagolago i lou lava atamai,” tuu atu i tamaiti e taumafai le faalagolago i se fasi laau po o se penitala i mea eseese, e pei o se tusi po o se fasipepa. O fea mea faitino na sili ona lelei? Aisea e taua ai le “faatuatua i le Alii” ae le faalagolago i lo tatou “lava malamalama”?

Faataoto 15:1,18; 16:32

“O le tali filemu e liliueseina ai le ita.”

O le tautala i luga o le ita e masani ona atili ogaoga ai se tulaga faigata. O nei fuaiupu ua aʻoaʻo mai o a tatou upu ma a tatou amioga e mafai ona liliu ese le toasa poʻo le ita.

Gaoioiga e Mafai Ona Fai

• Tusi upu ita ma finauga i luga o le laupapa, ma fetufaai se faataʻitaʻiga o se finauga e ono i ai i tamaiti. Ona fai atu lea i tamaiti e faitau le Faataoto 15:1,18; 16:32 ma saili fautuaga e mafai ona latou tuʻuina atu i tamaiti o loʻo finau. Soo se taimi lava e fetufaai mai ai e tamaiti se aitia, valaaulia i latou e tape se vaega o upu i luga o le laupapa. Valaaulia i latou e suia na upu i isi e faamatalaina ai uiga faaKeriso e aumaia le filemu.

• Fesoasoani i tamaiti e mafaufau i tala i tusitusiga paia ina ua faataʻitaʻia e le Faaola mea o loʻo aʻoaʻo mai i le Faataoto 15: 1,18; 16:32. Mo ni manatu, e mafai ona latou saili i le Ioane 8:1–11; 18:1–11. Usu faatasi se pese e faatatau i le faataitaiga a le Faaola, e pei o le “O Loo Ou Taumafai e Avea e Pei o Iesu” (Tusipese a Tamaiti, 40). E faafefea ona tatou mulimuli i le faataʻitaʻiga a Iesu a o tatou fegalegaleai ma tagata o aiga, uo, ma isi?

aikona o le aoaoina

Uunaia le Aoaoina i le Aiga

Fesoasoani i tamaiti e piki se fuaiupu na latou faitauina i le vasega latou te fiafia iai. Fautuaina i latou e faasoa atu lena fuaiupu i o latou aiga ma taʻu atu ia i latou mea na latou aoaoina mai ai.

Faaleleia o Lo Tatou Aoao Atu

Alualu i Luma o se Faiaoga e Faapei o Keriso. Mafaufau loloto i ni auala e mafai ai ona e faateleina lou mafai e fesoasoani ai i tamaiti e atiaʻe lo latou faatuatua i le Tama Faalelagi ma Iesu Keriso. O fesili o le iloiloga faaletagata lava ia o loo i le itulau 37 o le Aoao Atu i le Ala a le Faaola e mafai ona fesoasoani.

itulau o gaoioiga: E mafai ona ou faaaoga upu alofa