“22--28 Aokuso. Salamo 102–103; 110; 116–119; 127–128; 135–139; 146–150: ‘Ia Vivii Atu ia Ieova o Mea Uma Lava e Manava,’” Sau, Mulimuli Mai ia te A’u—Mo le Peraimeri: Feagaiga Tuai 2022 (2021)
“22--28 Aokuso. Salamo 102–103; 110; 116–119; 127–128; 135–139; 146–150,” Sau, Mulimuli Mai ia te A’u—Mo le Peraimeri: 2022
Ia Tootutuli Tulivae Uma, saunia e J. Kirk Richards
22--28 Aokuso
Salamo 102–103; 110; 116–119; 127–128; 135–139; 146–150
“Ia Vivii Atu ia Ieova o Mea Uma Lava e Manava”
Afai e te manaomia ni manatu faaopoopo ao e sauniuni e aoao atu, vaai i le “Punaoa Faaopoopo mo le Aoaoina o Tamaiti” ma le “Taulimaina o Manaoga o Tamaiti Laiti” i le amataga o le punaoa lenei.
Tusi Faamaumau Ou Lagona Uunaia
Valaaulia le Fefaasoaai
Faaali atu ni ata mai le otootoga o lenei vaiaso i le Sau Mulimuli Mai ia te A’u—Mo Tagata Taitoatasi ma Aiga, ma valaaulia ia tamaiti e talanoa e uiga i mea latou te vaai i ai i totonu o ata. Fesoasoani ia i latou e vaai i fesootaiga i le va o nei ata ma mea o loo latou aoaoina i le tusi o le Salamo.
Aoao atu le Aoaoga Faavae: Tamaiti Laiti
O le afioga a le Atua e pei o se malamalama.
O tamaiti o loo e aoaoina o loo i luga o le ala e toe foi atu i le Tama Faalelagi. E mafai e le afioga a le Atua ona faatumauina i latou i luga o lena ala i le taimi nei ma i o latou olaga atoa.
Gaoioiga e Mafai Ona Fai
-
Faaali atu ni ata o mea na ta’ua i le Salamo 119:105, ma valaaulia tamaiti e faatulaga sa’o ata a o e faitau atu le mau. Fai i tamaiti e toe fai faatasi mai ma oe fasifuaitau mai le mau a o e faasino i ata.
-
Valaaulia ia tamaiti e talanoa e uiga i le pe faapeī lagona o le i ai i le pogisa. O a ni mea e faigata ona fai i le pogisa? Atonu o le a e valaauliaina se tamaitiiti e taumafai e fai se mea ao moeiini o latou mata, e pei o le tusiina o se ata. Aisea e faigofie tele ai ona faia pe a malamalama? Fesoasoani i tamaiti ia malamalama pe faapefea e le afioga a le Atua, e pei ona maua i tusitusiga paia ma afioga a perofeta soifua, ona faamalamalamaina lo tatou ala e toe foi atu ai i le Tama Faalelagi.
E silafia ma alolofa le Tama Faalelagi ma Iesu Keriso ia te a’u.
I le faagasologa o o tatou olaga, tatou te manaomia le faamanatu mai faapea, e silafia patino i tatou e le Tama Faalelagi ma Iesu Keriso. E mafai ona fesoasoani le Salamo 139 ia te oe e aoao atu ai i tamaiti e faapea, ua Laua silafia i latou ma alolofa ia i latou.
Gaoioiga e Mafai Ona Fai
-
Fai ni lisi pupuu o mea e te iloa e uiga i tamaiti taitasi. A o e auaua’i faitauina taitasi ia lisi, fai atu i tamaiti e mate mai po o ai o loo e faamatalaina. Faitau le Salamo 139:1–3, ma fesoasoani e faamalamalama i tamaiti upu atonu latou te le iloa. Molimau atu ua silafia lelei i latou e le Tama Faalelagi ma Iesu Keriso—La te silafia o latou igoa, mea latou te fiafia ai ma faanoanoa ai, ma mea latou te lelei tele ai.
-
Faitau le Salamo 139:23, ma valaaulia tamaiti e tuu o latou lima i luga o o latou fatu pe a e ta’ua le “loto” ma tago i o latou ulu pe a e ta’ua le “manatunatu.” Faasoa atu se taimi na e lagona ai ua silafia e le Atua lou loto ma ou manatu.
E mafai ona ou vivii atu i le Alii.
O le vivii atu i le Alii o lona uiga o le faaalia o lo tatou lotofaafetai ma le alofa mo Ia. Fesoasoani i tamaiti ia latou iloa o loo tatou vivii atu ia te Ia pe a tatou faia ni mea e pei o le pese, tatalo, ma le usiusitai i Ana aoaoga.
Gaoioiga e Mafai Ona Fai
-
Valaaulia tamaiti e faasoa mai ni aafiaga ia na viia ai i latou e se tagata po o le tau atu ia i latou sa latou faia se galuega lelei. Faasoa atu nisi o mea lelei mai le Salamo 146:6–9 lea na faia e le Alii, ma valaaulia ia tamaiti e talanoa e uiga i isi mea na Ia faia mo i tatou. Fesoasoani ia i latou e mafaufau i auala e mafai ona latou vivii atu ai ia te Ia mo na mea.
-
Usu faatasi se pese e vivii atu ai, e pei o le “Beauty Everywhere” (Children’s Songbook,232). Faamalamalama atu faapea mo le fanauga a Isaraelu i aso anamua, o Salamo sa pei o pese o loo tatou usuina nei e tapuai ma vivii atu ai i le Atua.
Aoao atu le Aoaoga Faavae: Tamaiti Matutua
Ua ofo mai e le Alii ia te a’u le faamafanafanaga ma le faamoemoe.
E silafia e le Atua o tatou tofotofoga ma faanoanoaga, ma e finagalo o Ia e faamafanafana ma faamalosiau mai ia i tatou. Fesoasoani i tamaiti e atiina ae lo latou faatuatua ia te Ia ina ia mafai ona latou liliu atu ia te Ia i taimi faigata.
Faamalologa, saunia e J. Kirk Richards
Gaoioiga e Mafai Ona Fai
-
Fai atu i se tasi o tamaiti e faitau le Salamo 102:1–2. E mafai faapefea ona fesoasoani le Alii ia i tatou i taimi o o tatou faafitauli? E faapefea ona tatou ole atu mo Lana fesoasoani? Faasoa atu se aafiaga na e lagonaina ua faafofogaina e le Atua au tatalo i taimi na e puapuagatia ai, ma valaaulia ia tamaiti e faasoa mai ni o latou aafiaga ma molimau.
-
Valaaulia tamaiti e sue ni upu o le faamafanafana ma le faamoemoe i le Salamo 103. E mafai faapefea e nei upu ona fesoasoani i tagata o feagai ma luitau? Uunaia ia tamaiti e tusi i lalo ni fasifuaitau latou te lagona e aoga e faamanatu atu ai ia i latou e mafai e le Alii ona fesoasoani ia i latou pe a i ai ni o latou tofotofoga.
E fesoasoani afioga a le Atua ia te a’u ia mulimuli i Lona ala.
E ui e ono foliga pogisa le lalolagi i nisi taimi, ae e mafai e le afioga a le Atua ona faasusulu atu lo tatou ala ma fesoasoani ia i tatou ia toe foi atu ia te Ia.
Gaoioiga e Mafai Ona Fai
-
Tusi i luga o le laupapa se ata o le malamalama (e pei o se lamepa) ma se ata o tusitusiga paia. Valaaulia tamaiti e faitau le Salamo 119:105. E fesoasoani faapefea le malamalama ia i tatou? E faapefea ona fesoasoani le afioga a le Atua ia i tatou? Fai i tamaiti e tusi a latou tali i luga o le laupapa i autafa o ata. E faapefea ona pei le afioga a le Atua o se malamalama? E faapefea ona fesoasoani ia i tatou ia tumau ai i luga o le ala lea e toe taitai atu ai i tatou i le Tama Faalelagi?
-
Vaevae tamaiti i paga, ma tuu atu ia tofu le paga ma se tasi o fasifuaitau o mau nei: Salamo 119:47–48; Salamo 119:105; 1 Nifae 11:25; 2 Nifae 31:20. Valaaulia i latou e faitau ia fasifuaitau ma vaavaai mo mea na tuuina mai e le Tama Faalelagi ia i tatou e fesoasoani tatou te tumau ai i luga o le ala e toe foi atu ai ia te Ia. Valaaulia ia tamaiti e mafaufau loloto ma faasoa mai mea na latou lagona le uunaia e fai ona o mea sa latou aoaoina.
-
Usu faatasi se pese e uiga i le mulimuli i le ala a le Atua, e pei o le “I Will Walk with Jesus” (ChurchofJesusChrist.org). O le a se mea ua tatou aoao mai lenei pese e uiga i le auala e tumau ai i luga o le ala sa’o?
E mafai ona fesoasoani mai le Tama Faalelagi ma Iesu Keriso ia te a’u ia iloa le auala e alualu ai i luma.
Ua aoao mai le Salamo 139 e faapea, ua silafia e le Atua mea uma e uiga ia i tatou, e aofia ai ma o tatou malosiaga ma vaivaiga. Afai tatou te liliu atu ia te Ia, e mafai ona Ia aoao i tatou i mea tatou te manaomia ona fai ia avea atili ai faapei o Ia.
Gaoioiga e Mafai Ona Fai
-
Tusi upu o le Salamo 139:23–24 i luga o le laupapa, ma valaaulia tamaiti e vase lalo o upu ia e faamatala mai ai mea e mafai ona faia e le Atua mo i tatou. Aisea tatou te mananao ai e faia e le Atua nei mea? E mafai faapefea ona tatou valaauliaina o Ia e “taitaiina mai [i tatou] i le ala o le faavavau”?
-
Uunaia tamaiti e “saili” i o latou lava olaga mo ni auala latou te mafai ona faaleleia ai i eria e fa o le taulaiga i le polokalama a Tamaiti ma le Autalavou—faaleagaga, faaleagafesootai, faaletino, ma le faaleatamai. Faamanatu atu ia i latou faapea, ua silafia e le Alii le ala e mafai ai ona latou alualu i luma i nei eria taitasi, ma uunaia i latou ia saili mo Lana taitaiga.
-
Usu se pese e uiga i le ala e mafai ai ona fesoasoani mai le Tama Faalelagi ia i tatou ia alualu i luma, e pei o le fuaiupu lona lua o le “Fesoasoani Mai Ia Te A‘u Tama Pele” (Tusipese a Tamaiti, 52). Faasoa atu le auala na fesoasoani ai le Tama Faalelagi ma Iesu Keriso ia te oe ia faaleleia.
Uunaia le Aoaoina i le Aiga
Mai lea taimi i lea taimi, e mafai ona e valaaulia se tasi o tamaiti ma se tasi o tagata o lona aiga e faasoa mai i le vasega mea o loo latou faia e aoao ai le talalelei i le aiga. Uunaia le vaega o totoe o tamaiti e faasoa atu nei manatu i o latou aiga.
Faaleleia o Lo Tatou Aoao Atu
Faaaoga musika. O pese Peraimeri ma viiga e mafai ona fesoasoani i tamaiti ia malamalama ma faafaigofie ia upumoni o le talalelei i se auala e le mafaagaloina. E mafai foi e pesepesega ona faagauai atu tamaiti i le aoaoina. (Tagai Aoao Atu i le Ala a le Faaola,22.)