tamaloloa e toatolu o talanoa i se tamaloa i luga o le eleele

O Faamasinoga o Iopu, saunia e Joseph Brickey

1–7 Aokuso

Iopu 1–3; 12–14; 19; 21–24; 38–40; 42

“Ou Te Faamoemoe Pea ia te Ia”

A o e suesue i le tala ia Iopu, o a ni savali na e mauaina mo lou lava olaga? O fea o na savali ua e lagona e manaomia ona faalogo i ai tamaiti o loo e aoaoina?

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Faaali atu i tamaiti se ata o Iopu (tagai i le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga). Fesili i tamaiti po o le a so latou manatu o le a se lagona o le tamaloa i le ata. Valaaulia i latou e faasoa mai nisi mea latou te iloa e uiga ia Iopu.

aikona o le aoao atu

Aoao atu le Aoaoga Faavae: Tamaiti Laiti

Iopu 1–2; 13:15

O le a fesoasoani mai le Tama Faalelagi ma Iesu Keriso ia te aʻu i taimi faigata a o ou faatuatua ia i Laua.

Na faalagolago Iopu i le Atua ma mafai ona tumau faamaoni e tusa lava pe na feagai ma tofotofoga faigata. O le tala ia Iopu e mafai ona fesoasoani i tamaiti e faamalosia ai lo latou faatuatua i le Tama Faalelagi ma Iesu Keriso ina ia latou saunia ai e fetaiai ma o latou lava tofotofoga faigata.

Gaoioiga e Mafai Ona Fai

• Ia valaaulia tamaiti e faasoa mai ni mea ua latou iloa e uiga ia Iopu, ma fesoasoani ia latou malamalama i le mea na tupu ia te ia (tagai Iopu 1–2; “Iopu” i Tala o le Feagaiga Tuai). Fesili atu ia i latou pe o a ni o latou lagona pe ana fai o i latou o Iopu. O ai e mafai ona fesoasoani ia i tatou pe a tutupu ni mea faanoanoa i o tatou olaga? Faaali atu se ata o Iesu Keriso, ma faamatala o le faatuatua o Iopu i le Alii na fesoasoani ia te ia i taimi o ona tofotofoga (tagai Iopu 1:21).

• Faitau atu i tamaiti upu a Iopu i le Iopu 13:15: “Ou te faamoemoe ia te ia.” Ina ia fesoasoani i tamaiti ia malamalama i le uiga o le talitonu i le Atua, talanoa ma i latou e uiga i isi tagata latou te talitonuina. Mo se faataitaiga, o le a le mea tatou te faamoemoeina o tatou matua e fai? O le a le mea tatou te faamoemoeina o tatou faiaoga e fai? O le a le mea tatou te faamoemoeina e faia e le Tama Faalelagi ma Iesu Keriso? Faailoa atu lou talitonu i le Tama Faalelagi ma Iesu Keriso, ma fesoasoani i tamaiti e mafaufau i ni auala e mafai ona latou faaali atu ai latou te alolofa ma talitonu ia i Laua.

Iopu 19:25

O Iesu Keriso o lo’u Faaola.

Sa mafai e Iopu ona onosaia ona tofotofoga ma puapuaga ona o lona faatuatua i le Alii. E faʻapefea ona e fesoasoani i tamaiti e fausia lo latou faatuatua ia Iesu Keriso, lo tatou Faaola?

Gaoioiga e Mafai Ona Fai

• Faaali atu se ata o Iesu i luga o le satauro po o totonu o le tuugamau (tagai Tusi Ata o le Talalelei, nu. 57, 58). Fai atu i tamaiti e faamatala mai le mea lea o loo tupu i le ata. Faitau atu i tamaiti le molimau a Iopu i le Iopu 19:25. Faaali atu se ata o le Faaola ua toetu mai (tagai Tusi Ata o le Talalelei, nu. 59, 60; tagai foi i le itulau o gaoioiga o lenei vaiaso) ma molimau atu o Iesu Keriso na toetu ma o lo o soifua nei. Aisea tatou te faafetai ai ona ua toetu mai Iesu?

• Faaali atu se ata o Iopu, ma faamatala atu sa i ai ia Iopu le tiga tele ona sa papala uma lona tino. Ua leai lona fale, ma ua maliliu foi lana fanau. Ae na iloa e Iopu se mea taua na avatu ai ia te ia le mafanafana. Faitau le Iopu 19:25, ma fesili atu i tamaiti po o le a le mea na iloa e Iopu. Faasoa atu i tamaiti pe faapefea ona e iloa o loo soifua Iesu Keriso, ma valaaulia i latou e faasoa atu a latou molimau e uiga ia te Ia.

  tamalo o loo tilotilo i luga

  Iopu, saunia e Gary L. Kapp

• Valaaulia tamaiti e valivali le itulau o gaoioiga o lenei vaiaso. Ao latou faia, ta pe usu se pese e faatatau i le Toetu o Iesu, e pei o le “Pe Na Toe Soifua Moni Mai ea Iesu?” po o le “Ua Toe Tu mai o Ia” (Tusipese a Tamaiti, 45, 44). Fai atu ia i latou e faasoa mai o latou lagona e uiga ia Iesu, ma fesoasoani ia latou malamalama e mafai ona tatou maua ni lagona lelei mai le Agaga Paia e fesoasoani tatou te iloa ai e moni Iesu Keriso.

aikona o le aoao atu

Aoao atu le Aoaoga Faavae: Tamaiti Matutua

Iopu 1–2; 12; 19

O le a fesoasoani le Tama Faalelagi ma Iesu Keriso ia te aʻu e manumalo i ou luitau pe a ou faatuatua ia i Laua.

E tofu tagata uma ma aso faigata, ma o nisi tagata e i ai tofotofoga mo se taimi umi. O le faatuatua o Iopu i le Atua na lagolagoina ai o ia i ona tofotofoga. Mafaufau pe faapefea ona fesoasoani lana tala i tamaiti e fausia ai lo latou faatuatua i le Tama Faalelagi ma Iesu Keriso ina ia mafai ai ona latou feagai ma o latou tofotofoga, i le taimi nei ma i le lumanaʻi.

Gaoioiga e Mafai Ona Fai

• Fai atu i tamaiti e faasoa mai mea latou te iloa e uiga i le tala ia Iopu. O le a le ituaiga tagata sa i ai o ia? O le a le mea na tupu ia te ia? Na faapefea ona ia tali atu i ona luitau? Faasino i latou i le Iopu 1–2 e fesoasoani ia i latou e faamatala ai le tala (tagai Iopu 1: 1, 13–22; 2: 7–10; tagai foi i le “Iopu” i Tala o le Feagaiga Tuai). Valaaulia tamaiti e faasoa atu ni o latou lagona i le savali autu a Iopu.

• Faaali atu ni nai ata o Iesu Keriso o fegalegalea’i ma isi, ma fesili i tamaiti pe o le a so latou manatu i mea o loo aoao mai e nei ata ia i tatou e uiga po o ai Iesu Keriso ma pe faapefea o Ia. O a nisi mea ua tatou iloa e uiga ia te Ia? Valaaulia tamaiti e faitau nisi o nei fuaiupu e saili ai ni mea na iloa e Iopu e uiga i le Alii: Iopu 12:10, 13, 16; 19:25–27. Aisea e taua ai le iloa o nei mea e uiga i le Faaola?

• Valaaulia tamaiti e faitau le Iopu 19:14–19, ma fesili ia i latou po o le a le mea o loo fai mai ai nei fuaiupu e uiga i le taulimaina e isi tagata o Iopu. O a ni o tatou lagona pe a tupu lenei mea ia i tatou? Fai i tamaiti e faitau le Iopu 19:23–27 e iloa ai pe na faapefea ona maua e Iopu le mafanafana i lenei tulaga. O a ni mea o loo aoao mai e nei fuaiupu e uiga i le Faaola? Aisea e taua ai le iloa o loo soifua o Ia ma alofa ia i tatou? (tagai Ioane 17:3).

• Usu faatasi se pese e molimau ia Iesu Keriso, e pei o le “Ua Ou Iloa Lo‘u Fa‘aola” (Viiga, nu.73). O le a se mea tatou te aoaoina mai le pese e uiga i le mafuaaga e taua ai le i ai o se molimau o loo soifua Iesu Keriso? Tau atu i tamaiti le auala ua e iloa ai o loo soifua le Faaola ma pe aisea ua e faafetai ai mo lena malamalama. Uunaia i latou e faasoa mai o latou lagona faapea ma a latou molimau.

Iopu 19:13–19; 22:5

O uo lelei e siitia ma faamalosiau le tasi i le isi.

A o tauivi Iopu, na fai atu ana uo ua faasalaina o ia e le Atua ona ua agasala. O lenei tala e mafai ona fesoasoani ia te oe e aoao ai tamaiti i se auala sili atu e tali atu ai pe a i ai se luitau a se uo (tagai Iopu 16:1-5).

Gaoioiga e Mafai Ona Fai

• Fai i tamaiti e iloilo le tele o mea faigata na tutupu ia Iopu (tagai Iopu 1:13–19; 2:7). Faitau faatasi le Iopu 19:14, 19, ma vaavaai pe na faapefea ona tali atu uo a Iopu i ona tofotofoga (tagai foi Iopu 22: 1–5). Valaaulia tamaiti e vaai faalemafaufau faapea o latou o uo a Iopu—e faapefea ona latou taumafai e fesoasoani ia te ia? Uunaia i latou e mafaufau i se uo atonu o loo feagai ma se taimi faigata ma fuafua se mea e mafai ona latou faia e faaali ai le alofa ma le lagolago i la latou uo.

• Fai i tamaiti e lisi ni uiga lelei o se uo lelei ma taʻu se uo o loo i ai nei uiga lelei. Faaali atu se ata o Iesu Keriso. O a ni auala e avea ai Iesu ma uo lelei ia i tatou taitoatasi? E mafai faapefea ona tatou mulimuli i Lana faataitaiga?

aikona o le aoaoina

Uunaia le Aoaoina i le Aiga

Ia valaaulia tamaiti e faasoa atu i se tagata o le aiga po o se uo se auala e mafai ai ona fesoasoani le Tama Faalelagi ma Iesu Keriso ia i latou pe a feagai ma se taimi faigata.

Faaleleia o Lo Tatou Aoao Atu

Molimau atu i faamanuiaga ua folafola mai. A tuuina mai e le Alii se poloaiga, e masani lava ona Ia folafola mai faamanuiaga mo le tausiaina o lena poloaiga. Pe a e valaaulia tamaiti o le Peraimeri e ola i se mataupu faavae patino, faasoa atu ia folafolaga ua faia e le Atua e auala mai i perofeta ia i latou o e ola ai i lena mataupu faavae. E mafai foi ona e faasoa atu lau molimau i faamanuiaga ua e maua e ala i le ola ai i mataupu faavae.

itulau o gaoioiga: O Iesu Keriso o lo’u Faaola