O Faamasinoga a Iopu, saunia e Joseph Brickey

1–7 Aokuso

Iopu 1–3; 12–14; 19; 21–24; 38–40; 42

“Ou Te Faamoemoe Pea ia te Ia”

A o e faitau e uiga ia Iopu, o le a taiala oe e le Agaga ia iloa upumoni taua e talafeagai ia te oe. Tusi i lalo mea e te tau i ai, ma mafaufau loloto pe faapefea ona faatatau nei upumoni ia te oe.

Tusifaamaumau Ou Lagona Uunai

O se mea masani le mafaufau pe aisea e tutupu ai mea leaga i tagata lelei—e faapena foi i le, pe aisea e tutupu ai mea lelei i tagata leaga. Aisea o le a faataga ai e le Atua, o lē e amiotonu, lena mea [e tupu]? O fesili faapenei e su’esu’eina e ala atu i le aafiaga o Iopu, o se tasi na tagata lelei sa tutupu ai ni mea leaga. Ona o tofotofoga o Iopu, sa masalosalo ai ana uo pe o ia moni o se tagata lelei. Sa faamautu mai e Iopu lona lava amiotonu ma taumanatunatu pe faamaoni moni ea le Atua. Ae e ui lava i lona pagatia ma le taumanatunatu, sa faatumauina lava e Iopu lona faamaoni ma le faatuatua ia Iesu Keriso. I le tusi a Iopu, na fesiligia ma tofotofoina ai le faatuatua, ae sa le’i lafoaiaina atoatoa. E le faapea la ua taliina ai fesili uma. Ae ua aoao mai le tusi a Iopu, seiiloga lava ua taliina, e mafai ona i ai faatasi lava ia fesili ma le faatuatua, ma e tusa lava po o le a le mea e tupu i le taimi nei, e mafai ona tatou faapea ifo e uiga i lo tatou Alii, “Ou te faamoemoe pea ia te Ia” (Iopu 13:15).

Mo se vaaiga aoao i le tusi a Iopu, tagai i le “Iopu” i le Taiala i Tusitusiga Paia (scriptures.ChurchofJesusChrist.org).

Manatu mo Suesuega Faaletagata Lava Ia o Tusitusiga Paia

Iopu 1–3; 12–13

O lo’u faatuatua i le Tama Faalelagi ma Iesu Keriso e mafai ona fesoasoani ou te tumau faamaoni ai i tulaga uma.

O mataupu amata o le Iopu ua fuafuaina e faamamafa mai ai le matafaioi a Satani i le avea ai ma o tatou fili po o le tagata e tuuaia, ae le ina ia faamatala mai ai le ala e fesootai moni ai le Atua ma Satani. A e faitau i tuuaiga a Satani e uiga ia Iopu (tagai i le Iopu1:9–11; 2:4–5), atonu e te mafaufau loloto pe mata e faapena foi se faamatalaga e faia e uiga ia te oe. Atonu e te fesili ifo ia te oe lava, O a ni a’u mafuaaga ou te tumau faamaoni ai le Atua? Mafaufau loloto i tofotofoga na tuuina atu ia Iopu ma ana tali (tagai i le Iopu 1:20–22; 2:9–10). O le a se mea e mafai ona e aoao mai ia te ia, e ono fesoasoani e te tali atu ai i ou luitau?

E ui lava sa taumafai Iopu ia tumau faamaoni, ae sa faaauau pea ona tofotofoga ma puapuaga (maitau ana auega i le mataupu 3). O le mea moni, sa foliga mai na faateteleina ona puapuaga, ma na fautuaina ai e ana uo e faapea, ua faasalaina o ia e le Atua (tagai i le Iopu 4–5; 8; 11). Ao e faitau i le vaega o le tali a Iopu i mataupu 12–13, mafaufau i mea na iloa e Iopu e uiga i le Atua lea na mafai ai ona faaauau ona ia faatuatuaina, e ui lava i ona puapuaga ma fesili na le’i taliina. O le a se mea ua e iloa e uiga i le Atua, e fesoasoani i lou feagai ai ma luitau? Na faapefea ona e iloa nei upumoni, ma ua faapefea ona latou faamalosia lou faatuatua?

Iopu 19

O Iesu Keriso o lo’u Faaola.

O ni isi taimi e faaalia mai ai ia i tatou ia upumoni aupito taua i le totonugalemu o le loloto o lo tatou ita. Mafaufau loloto i tofotofoga na faamatalaina e Iopu i le Iopu 19:1–22 ma upumoni na ia folafolaina mai i le Iopu 19:23–27. Ona mafaufau loloto lea i auala ua e iloa ai o loo soifua lou Faaola. O le a le eseesega e faia e lenei malamalama pe a e oo i tofotofoga faigata?

Tagai foi i le Mataupu Faavae ma Feagaiga 121:1–12; 122.

Iopu, saunia e Gary L. Kapp.

Iopu 21–24

“A tofotofoina a’u, ou te sao atu ai e pei o le auro.”

A e faitau atili e uiga i le faafinauga i le va o Iopu ma ana uo e uiga i mafuaaga na ala ai ona pagatia Iopu, atonu e te mafaufau loloto i ala o le a e tali atu ai i le fesili o loo i le fatu o le latou faafinauga: Aisea e puapuagatia ai i isi taimi ia tagata amiotonu ae o isi taimi e le faasalaina ai tagata amioleaga? Mafaufau i lenei mea a o e faitau i le Iopu 21–24. O a mea ua e iloa e uiga i le Tama Faalelagi ma Lana fuafuaga e mafai ona fesoasoani e tuu mai ni tali? Tagai, mo se faataitaiga i le, 2 Nifae 2:11–13; Mosaea 23:21–23; 24:10–16; Aperaamo 3:22–26; Dallin H. Oaks, “Faafeagai o Mea Uma,” Liahona, Me 2016, 114–17.

Tagai foi i le L. Todd Budge, “Faalagolago Tumau ma Malosi,” Liahona, Nov. 2019, 47–49.

Iopu 38; 40; 42

E sili atu le silasila mamao a le Atua nai lo o a’u.

O le le fiafia ai i tuuaiga a ana uo (tagai i le Iopu 16:1–5; 19:1–3), Na tagi faafia atu ai Iopu i le Atua i le sailiga o se faamalamalamaga mo ona puapuaga (tagai i le Iopu 19:6–7; 23:1–9; 31). Na saunoa Elder Neal A. Maxwell (1926–2004) e faapea, “pe afai ua tele naua lo tatou le onosai i taimi o le Atua,” e foliga mai sa i ai Iopu, “ua tatou fai atu tatou te iloa le mea sili. E ese a a ea—o i tatou e faia ia uatitaulima ua tatou taumafai e fautuaina o Ia o lē e pule i aso ma taimi uma” (“Hope through the Atonement of Jesus Christ,” Ensign, Nov. 1998, 63). Mafaufau i nei upu ao e faitau i le tali a le Atua ia Iopu i mataupu 38 ma le 40. O a ni upumoni sa Ia aoao atu ia Iopu? Aisea e taua ai lo tatou iloa o nei upumoni. a o tatou tauivi ma le faigata ma fesili i lenei olaga? O le a se mea e faagaeetia ai oe i le tali a Iopu i le Iopu 42:1–6?

Manatu mo Suesuega Faaleaiga o Tusitusiga Paia ma Afiafi Faaleaiga

Iopu 1:21-22.Ina ia malamalama i le ala atonu na manatu ai Iopu, e pei ona faamatalaina i nei fuaiupu, e mafai ona faitau e lou aiga le “Iopu” i le Old Testament Stories pe faatino le Iopu 1:13–22. O le a se mea e mafai ona tatou aoaoina mai le faataitaiga a Iopu?

Iopu 14:14.O le a faapefea ona tatou taliina le fesili a Iopu o loo i le fuaiupu lea? E mafai faapefea ona fesoasoani le Alema 11:42–44 ia i tatou? (Tagai foi i le vitio “He Lives—Celebrate Easter Because Jesus Christ Lives,” ChurchofJesusChrist.org.)

Iopu 16:1–5.Pe tatou te faapei ea o uo a Iopu, o e na faamasinoina ma faitioina Iopu i le taimi na ia manaomia ai le faamafanafanaga? (tagai i le Iopu 16:1–4; tagai foi i le Ioane 7:24). E mafai faapefea e a tatou upu ona faamalosia isi i lo latou faavauvau? (tagai i le Iopu 16:5).

Iopu 19:23–27.A uma ona faitau nei fuaiupu, e mafai e tagata o le aiga na faasoa mai pe faapefea ona latou iloa o loo soifua lo tatou Faaola. Atonu tou te galulue faatasi e tuu a outou upu o molimau (po o tusiga ata a tamaiti o le Faaola) i se tusi, e pei o se apitalaaga a le aiga (tagai i le fuaiupu 23). E mafai foi ona outou usua se pese e molimau mai i le Faaola, e pei o le “Ua Ou Iloa Lo’u Faaola” (Viiga, nu. 73), ma fefaasoaai ni fuaitau e faamalosia ai tou faatuatua ia te Ia.

Iopu 23:8–11.O le a le uiga o le “sao atu” mai o tatou tofotofoga “pei o le auro”? (tagai foi i le vitio “The Refiner’s Fire,” ChurchofJesusChrist.org). O ai ua tatou iloa sa faia lenei mea? Atonu o le a fiafia tamaiti e fai se mea ma tusi ai luga upu mai le fuaiupu 10 . Atonu foi tou te talanoaina auala na faatoilalo ai e Iesu Keriso Ona tofotofoga (tagai i le Luka 22:41–44; Mataupu Faavae ma Feagaiga 19:16–19).

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “O Lo’o Soifua Lo’u Faaola,” Viiga, nu. 72

Faaleleia o Suesuega Faaletagata Lava Ia

Vaai faalemafaufau. O malamalamaaga loloto anoa e mafai ona oo mai a o tatou taumafai e tuu i tatou lava i totonu o mau. Mo se faataitaiga, o le tuu o oe lava i le tulaga o Iopu, e mafai ona fesoasoani e te mafaufau loloto ai i le tou va ma le Tama Faalelagi ma Iesu Keriso.

Iopu ma Ana Uo, saunia e Ilya Repin