O Ieova O Lo’u LeoLeo Mamoe, saunia e Yongsung Kim, havenlight.com

8–14 Aokuso

Salamo 1–2; 8; 19–33; 40; 46

“O Ieova O Lo’u Leoleo Mamoe”

Aua e te faatapulaaina oe lava i filifiliga o le Salamo po o mataupu faavae ua fautuaina atu i lenei otootoga. Tuu atu i le Agaga e taitaia oe i upumoni e fesoasoani e te lagona ai le latalata atili i le Alii.

Tusifaamaumau Ou Lagona Uunai

Tatou te le o mautinoa pe o ai na tusia le [tusi] o Salamo. O ni isi na mafua mai i le Tupu o Tavita, ae o le tele lava, e le o mailoa ia tusitala. Ae i le mae’a ai o le faitauina o le Salamo, tatou te lagona ai e pei ua tatou iloa loto o Faisalamo, e tusa lava pe tatou te le iloa o latou igoa. O le mea ua tatou iloa o Salamo sa o se vaega taua o tapuaiga a tagata Isaraelu, ma ua tatou iloa na masani ona sii mai i latou e le Faaola. I le Salamo, ua mafai ai ona tatou malamalama lelei i loto o le nuu anamua o le Atua. Ua tatou iloa ai o latou lagona e uiga i le Atua, o mea sa latou popole i ai, ma ala na latou maua ai le toafilemu. I le avea ai ma tagata talitonu i aso nei, i le lalolagi atoa, o loo tatou faaaogaina ai lava nei upu i a tatou tapuaiga i le Atua. O tusitala o Salamo e foliga ai na i ai so latou malamalamaaga manino i o tatou loto ma foliga mai na latou maua se auala e faaalia ai o tatou lagona e uiga i le Atua, mea tatou te popole ai, ma ala tatou te maua ai le toafilemu.

Mo se vaaiga aoao o le tusi o Salamo, tagai i le “Salamo” i le Bible Dictionary.

Manatu mo Suesuega Faaletagata Lava Ia o Tusitusiga Paia

Salamo 1; 23; 26–28; 46

Ua aoao mai le Salamo ia tatou faalagolago i le Alii.

Atonu e te maitauina a o e faitau i le Salamo, i le faaalia soo e le tusitala o le fefe, faanoanoa, ma le atuatuvale. O lagona faapena o ni lagona ua masani ai, e faapena foi i tagata faatuatua. Ae o le mea e musuia ai le Salamo o fofō latou te ofoina mai, e aofia ai le faalagolago atoatoa i le Alii. Mafaufau i savali musuia nei ao e faitau i le Salamo 1; 23; 26–28; 46. Vaavaai mo mea nei, ma tusi i lalo mea e te tau i ai:

• O valaaulia ia faalagolago i le Alii:

• O upu e faamatala ai le Alii:

• O upu e faamatala ai le filemu, malosi, ma isi faamanuiaga Na te tuuina mai:

• O upu e faamatala ai i latou o e faalagolago ia te Ia:

Salamo 2; 22

O le Salamo e faasino atu ai o tatou mafaufau i le soifuaga ma le auaunaga a Iesu Keriso.

E i ai ni Salamo ua faasino atu i le soifuaga i le olaga nei o Iesu Keriso. Na vaaia e tagata Kerisiano i le Feagaiga Fou ia nei foi sootaga—mo se faataitaiga, na latou iloaina i le Salamo 2 se faasinoga i le faamasinoina o Iesu i luma o le Tupu o Herota ma Ponotio Pilato (tagai i le Galuega 4:24–30). Mafaufau e faitau le Salamo 2 ma le 22 faapea ma le Mataio 27:35–46; Luka 23:34–35; ma le Ioane 19:23–24. Vaavaai mo sootaga i le va o upu i nei salamo ma le soifuaga o le Faaola, ma ia vaavaai pea mo sootaga talitutusa a o e suesue i le tusi o Salamo i le aluga o nai vaiaso a sau.

Vaaifaalemafaufau o oe o se tagata Iutaia i le taimi o Iesu, o lē sa masani i Salamo ma iloa ai sootaga i le soifuaga o le Faaola. O a ni auala e ono avea ai lenei malamalamaaga o se faamanuiaga ia te oe?

Tagai foi i le Salamo 31:5; 34:20; 41:9; Luka 24:44; Eperu 2:9–12.

Salamo 8; 19; 33

“Ua tumu le lalolagi i le alofa o Ieova”

O le faitauina o le Salamo 8; 19; ma le 33 e mafai ona musuia ai oe e mafaufau i le tele o foafoaga matagofie a le Alii. Gauai atu i ou mafaufauga ma lagona ao e [faitau]. O faapefea ona “tala mai” e foafoaga a le Alii “le mamalu o le Atua” ia te oe? (Salamo 19:1).

Salamo 19:7–11; 29

O le afioga a le Alii e mamana, “e faafiafia ai le loto.”

I le Salamo, o upu e pei o le molimau, feau, poloaiga, ma le faamasinoga e mafai ona faasino i le afioga a le Alii. Ia manatua lena mea a o e faitauina le Salamo 19:7–11. O le a se mea ua fautuaina mai ia te oe i nei fuaiupu e uiga i le afioga a le Alii? O le a se mea o aoao atu e le Salamo 29 ia te oe e uiga i Lona siufofoga? I lou aafiaga, o faapefea ona tutusa le afioga po o le siufofoga o le Alii i nei faauigaga?

E ao ona tatou mamā ma lē pona faaleagaga e ulu atu ai le afioaga o le Alii.

Salamo 24; 26–27

O le ulu atu i le afioaga o le Alii e manaomia ai le mamā a’ia’i.

Ona sa fausia le malumalu i Ierusalema i luga o se mauga, o le fuaitau “mauga o Ieova” (Salamo 24:3) e mafai ona faasino i le malumalu po o le afioaga o le Atua. O le a se mea ua faaopoopo atu e lenei mea i lou malamalama i le Salamo 24? O le a le uiga ia te oe o le i ai o ni “lima mamā, ma le loto mamā”? (Salamo 24:4).

O le a se mea o aoao atu e le Salamo 26 ma le 27 ia te oe e uiga i le maota o le Alii?

Tagai foi i le Salamo 15; David A. Bednar,“O Lima Mama ma se Loto e Mama,” Liahona, Nov. 2007, 80–83.

Manatu mo Suesuega Faaleaiga o Tusitusiga Paia ma Afiafi Faaleaiga

Salamo 22.A o faitau e se tasi o tagata o le aiga lenei salamo, e mafai e isi ona vaavaai mo ni mea e tutusa ai i le Mataio 27:35–46. Ona latou fefaasoaai lea o o latou lagona e uiga ia Iesu Keriso ma Lana taulaga mo i tatou.

Salamo 23.O le Salamo 23 sa o se musumusuga mo nisi o viiga, e pei o le “O le Alii o Lo’u Leoleo Mamoe” ma le “The Lord My Pasture Will Prepare” (Viiga, nu. 60, 109). Atonu o le a mananao lou aiga e usu se tasi o nei viiga ma faailoa mai upu o le salamo atonu na musuiaina ai upu [o viiga]. Pe atonu latou te fiafia foi e tusi ni ata o se mea latou te maua i le salamo po o le viiga ma tuu atu i tagata o le aiga e mate le fuaiupu po o upu [o le viiga] e o faatasi ma ata. O a ni auala e pei ai le Faaola o se leoleo mamoe ia i tatou?

Salamo 24:3–5.Ina ia faamamafa atu le taua o le i ai o lima mama ma se loto mama, e mafai ona e faitau atu le Salamo 24:3–5 a o fufulu e tagata o le aiga o latou lima. O le a se mea e ono faatusa i ai lima i lenei salamo? O le a se mea e mafai ona faatusa i ai le loto? O a ni mea e mafai ona tatou faia e faamama ai faaleagaga o tatou lima ma faamama ai o tatou loto?

Salamo 30:5, 11.O le Salamo 30:5 o loo i ai le folafolaga e faapea “e afe ane le tagi i le afiafi, a o le alaga fiafia i le taeao.” Na faapefea ona liliuina e le Alii o tatou faanoanoaga i le fiafia? Atonu o le a fiafia ni isi o tagata o le aiga i le faatinoina o mea o loo faamatala mai i le fuaiupu 11 .

Salamo 33.Maitau pe faafia ona faaaogaina le upu uma i lenei salamo. O le a se mea ua tatou aoaoina e uiga i le Alii mai le faaaogaina soo o lenei upu, ae maise lava i fuaiupu 13–15?

Salamo 46:10.Atonu tou te faia faatasi se mea e manaomia ai e tagata o le aiga ona “ia filemu.” E mafai faapefea e le ia filemu ona fesoasoani ia i tatou e iloa ai le Atua? O a ni avanoa ua tatou maua e ia filemu ai ma oo ai ina iloa le Atua?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “O le Alii o Lo’u Leoleo Mamoe,” Viiga, nu. 60.

Faaleleia o Suesuega Faaletagata Lava Ia

Ia fatufatuai. O mau e pei o le Salamo e masani ona musuia ai tagata e vivii i le Alii i auala fatufatuai. Afai e te lagona le musuia e faailoa lau tapuaiga e ala i musika, fatugasolo, ata vaaia, po o ni isi lava auala, ia galue loa i na lagona. Mafaufau e faasoa atu mea e te fatuina e fesoasoani ai i isi e atinae le faatuatua i le Tama Faalelagi ma Iesu Keriso.

O le Leoleo Mamoe Lelei, na saunia e Ken Spencer