“15–21 Aokuso. Salamo 49–51; 61–66; 69–72; 77–78; 85–86: ‘[Ona] Ou Ta’u Atu ai Lea o Mea na Na Faia mo Lo’u Agaga,’” Sau, Mulimuli Mai ia te A’u—Mo Tagata Taitoatasi ma Aiga: Feagaiga Tuai 2022 (2021)
“15–21 Aokuso. Salamo 49–51; 61–66; 69–72; 77–78; 85–86,” Sau, Mulimuli Mai ia te A’u—Mo Tagata Taitoatasi ma Aiga: 2022
Laveaiga O Le Mea Na Leiloa, saunia e Michael T. Malm
15–21 Aokuso
Salamo 49–51; 61–66; 69–72; 77–78; 85–86
“[Ona] Ou Ta’u Atu ai Lea o Mea na Na Faia mo Lo’u Agaga”
O le otootoga lenei o loo faailoa atu ai ni isi o autu faaleaoaoga faavae na tautalagia i nei salamo. A o e faitauina, atonu e i ai ni upu, ata, po o ni manatu faapitoa e tulaga ese ia te oe. O le a se mea e te lagona o loo taumafai le Alii e aoao atu ia te oe?
Tusifaamaumau Ou Lagona Uunai
Na faasoa mai e le au tusi Salamo ni lagona patino o’oo’o i a latou fatugasolo. Sa latou tusitusi e uiga i lagona lotovaivai, fefe, ma le faanoanoa salamo. E i ai taimi, na foliga mai sa latou lagona ai le tuulafoaiina e le Atua, ma o ni isi o salamo o loo tauave ai se lagona o le le fiafia po o le atuatuvale. Afai na oo ia te oe ni lagona faapenei, o le faitau o le Salamo e mafai ona fesoasoani e te iloa ai ua le na’o oe. Peitai, o le a e tau ai foi i salamo e mafai ona faamalosiau ia te oe pe a e maua i na faalogona, aua na viviia foi e le au fai salamo le Alii mo Lona agalelei, maofa i Lona mana, ma olioli i Lona alofa mutimutivale. Sa latou iloaina ua mamafatu le lalolagi i le tiapolo ma le agasala, ae o le Alii e “lelei, ma ua e faamagalo sala” (Salamo 86:5). Sa latou malamalama o le i ai o le faatuatua i le Alii e le faapea o le a e le tauivi ai ma le popolevale, agasala, po o le fefe. O lona uiga o loo e iloa O Ai e te liliu atu i ai pe a e [oo i tauiviga].
Manatu mo Suesuega Faaletagata Lava Ia o Tusitusiga Paia
E na o Iesu Keriso lava e oo mai ai le Togiolaina.
O le Salamo 49 o loo i ai se savali mo “tagatanuu atoa ma alii, o e tamaoaiga faatasi ma e matitiva” (fuaiupu 2). O le a sau tala o le a le savali lea? O le a se mea e te lagona e faaopoopo atu e le Salamo 62:5–12 i lena savali?
O le faitauina o nei salamo e ono uunaia ai oe e mafaufau loloto i auala ua tuu ai e ni isi o tagata o latou faatuatuaga i se mea e ese mai i le Atua mo le togiolaina (tagai i le Salamo 49:6–7). O faapefea ona aafia lou olaga i lau molimau o “e faaola e le Atua [lou] agaga ai le pule a le tuugamau”? (fuaiupu 15).
Tagai foi i le Faataoto 28:6; Alema 34:8–17.
E mafai ona faamagaloina a’u i a’u agasala, ona o le alofa mutimutivale o le Faaola.
O augani mo le alofa mutimutivale i le Salamo 51 na māfua i le Tupu o Tavita, o le sa ta’usalaina i le mulilua ma le fasioti tagata (tagai i le 2 Samuelu 11). E tusa lava pe tau le matuia a tatou agasala, e mafai ona tatou fesootai i le manaomia o le alofa mutimutivale ua faaaliaina i lenei salamo. E mafai foi ona tatou aoao mai se mea e faatatau i le po o le a le uiga o le salamo. Mo se faataitaiga, o a ni upu po o ni fuaitau i le Salamo 51 o aoaoina oe e faatatau i le uiga tatou te manaomia ia salamo ai? O le a se mea ua e aoaoina e uiga i taunuuga o le Togiola a le Faaola e mafai ona i ai i lou olaga?
Atonu e te fesiligia na lava fesili a o e faitauina le Salamo 85–86. E mafai foi ona e saili mo fuaitau o loo faamatala ai le Alii. E faapefea ona faamalosia e nei fuaiupu lou faatuatua o le a Ia faamagaloina oe? (tagai, mo se faataitaiga, Salamo 86:5, 13, 15).
Tagai foi i le Alema 36; Russell M. Nelson, “E Mafai Ona Tatou Faia Ia Lelei Atu ma Ia Tatou Lelei Atu,” Liahona, Me 2019, 67–69; Carole M. Stephens, “O Le Fomai Sili,” Liahona, Nov. 2016, 9–12.
Salamo 51:13–15; 66:16–17; 71:15–24
O la’u molimau ia Iesu Keriso e mafai ona fesoasoani i isi ia o mai ia te Ia.
Mafaufau loloto pe na faapefea ona e maua lau molimau ia Iesu Keriso ma Lona mana togiola. Ma, a o e suesue i le Salamo 51:13–15; 66:16–17; 71:15–24, mafaufau pe mafai faapefea ona e valaaulia isi e “o mai ia … matamata i galuega a le Atua” (Salamo 66:5). O le a le uiga ia te oe o le e “ta’uta’u atu … [Lana] amiotonu i aso uma lava”? (Salamo 71:24). O le a faapefea ona e ta’u atu i isi “mea na na faia mo [lou] Agaga”? (Salamo 66:16).
Tagai foi i le Mosaea 28:1–4; Alema 26.
E mafai ona tatou faasoa atu i isi a tatou molimau o mea ua faia e le Alii mo i tatou.
O le a fesoasoani mai le Alii ia te a’u i taimi ou te manaomia vave ai le fesoasoani.
Ua faamatalaina i nai isi salamo, i se gagana manino, le faapeī o le lagonaina o le taumamao mai le Atua ma le matuai manaomia afano o Lana fesoasoani. Atonu e te mafaufau e vaavaai mo faamatalaga faapena i le Salamo 63:1, 8; 69:1–8, 18–21; 77:1–9. O a ni mea na e maua i le Salamo 63; 69; 77–78 ma avatu ai i nei au faisalamo le faamalosiauga?
Pe a e puapuagatia, e faapefea ona fesoasoani ia e “manatua galuega a Ieova” ma Ana “vavega anamua”? (Salamo 77:11). O ni isi o na vavega o loo faamatalaina i le Salamo 78. A o e faitau e uiga i ai, mafaufau loloto po o le a se mea e fesoasoani ia te oe “ia fai le Atua ma [ou] faatuatuaga” (fuaiupu 7). O a ni aafiaga mai le talafaasolopito o lou aiga e musuia oe?
Manatu mo Suesuega Faaleaiga o Tusitusiga Paia ma Afiafi Faaleaiga
-
Salamo 51:17.Mafaufau pe ono faapefea ona e aoaoina lou aiga i le uiga o le i ai o se loto momomo. Mo se faataitaiga, e mafai e tagata o le aiga ona auauai e tata’e se mea e malō le atigi, e pei o se fuamoa po o se fatu. E faapefea ona pei o tatou loto o lena atigi i ni isi o taimi? E mafai faapefea ona tatou tatala atu o tatou loto i le Alii? O le faitau faatasi o le Salamo 51 e ono tuuina mai ai ni manatu.
-
Salamo 61:2–3.Atonu o le a fiafia tagata o le aiga e tusi ni ata o faailoga o loo i nei fuaiupu ma talanoa i auala ua pei ai Iesu Keriso o se “papa,” maualuga, “[tatou] malu,” ma “se ‘olo malosi.”
-
Salamo 71:17; 78:5–7.O le a se mea e finagalo le Alii e te “faailoa … i [lau] fanau”? (Salamo 78:5). Atonu e mafai e tagata taitoatasi o le aiga ona faasoa mai se faataitaiga o “vavega,” a le Alii, e pei o se tala o tusitusiga paia, se aafiaga, o se molimau a le tagata lava ia, e fesoasoani ai ia i latou “ia fai le Atua mo latou faatuatuaga” (Salamo 71:17; 78:7).
-
Salamo 72.O le Salamo 72 sa tusia e Tavita e uiga i lona atalii o Solomona, ae o le tele lava e mafai foi ona faatatau ia Iesu Keriso. Ao faitau e lou aiga le salamo lenei, e mafai ona latou uuina i luga se ata o le Faaola pe a latou tau i ni fuaiupu e faamanatu atu ai Iesu Keriso ia i latou. E mafai faapefea ona tatou fesoasoani e faataunuu le manaoga ina “tumu foi le lalolagi uma i lona mamalu”? (Salamo 72:19; tagai foi i le Mataupu Faavae ma Feagaiga 65:2).
-
Salamo 85:11.O le fuaiupu lenei e mafai ona musuia ai se talanoaga e uiga i mea na tutupu i le Toefuataiga o le talalelei—le ala ua avea ai le Tusi a Mamona o le upumoni ua “[tupu] ae … ai le lalolagi” ma le ala na o mai ai avefeau faalelagi “mai le lagi” (tagai foi i le Mose 7:62). O le vitio “Preparation of Joseph Smith: Tutored by Heaven” (ChurchofJesusChrist.org) o loo faaalia ai ni isi o nei mea na tutupu.
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Pese fautuaina: “Ua Naunau ia te Oe,” Viiga, nu. 57.
Faaleleia o Lo Tatou Aoao Atu
Faaaoga auala eseese. “Vaavaai mo ni auala e mafai ona faaopoopo ai ni vaega eseese i au taumafaiga i le aoaoina atu o le talalelei. O le faia o lena mea o le a faaopoopo atu ai le oa ma le matagofie i le aafiaga. … Mafaufau pe mafai faapefea e le faaaogaina o musika, tala, ata ma isi ituaiga o faatufugaga ona valaaulia le Agaga” (Aoao Atu i le Ala a le Faaola, 22).
Aua le Masalosalo, Toma, saunia e J. Kirk Richards