O Keriso i le ofu talaloa lanumumu na siomia e tagata o loo tootutuli

Ia Tootutuli Tulivae Uma, saunia e J. Kirk Richards

22–28 Aokuso

Salamo 102–103; 110; 116–119; 127–128; 135–139; 146–150

“Ia Vivii Atu ia Ieova O Mea Uma Lava E Manava”

Ua aoao mai leSalamo 119:105 o le afioga a le Atua o “le malamalama i [lou] ala.” Ao e faitau i le Salamo, tusifaamaumau fuaitau ma manatu e musuia ai oe ma fesoasoani e faamalamalama ai lou ala e toe foi atu ai i le Tama Faalelagi.

Tusifaamaumau Ou Lagona Uunai

O le igoa faaIutaia anamua o le tusi o Salamo o se upu Eperu o lona uiga o “viiviiga.” O lena upu o le, Tehillim, e fesootai foi i le alaga “aleluia” (o lona uiga o le “viia Ieova” po o le “viia le Alii”). Afai e tatau ona e filifilia se upu se tasi e aotele ai le savali autu o le Salamo, o le “vivii” o se filifiliga lelei lea. O ni isi o Salamo o loo i ai le valaaulia tuusa’o ina “ia vivii atu ia Ieova” (tagai faapitoa i le Salamo 146–50), ma o i latou uma e mafai ona musuia ai se lagona o le tapuai ma le vivii. Ua valaaulia i tatou e le Salamo e manatunatu i le mana o le Alii, i Lona alofa mutimutivale, ma i mea maoae ua Ia faia. E le mafai ona tatou toe totogia o Ia mo soo se mea o nei mea, ae e mafai ona tatou vivii atu ia te Ia mo ia mea. O lena vivii e ono eseese ona ituaiga mo tagata eseese—e ono aafia ai le pepese, tatalo, ma le tuuina atu o molimau. E masani ona oo atu ai i se tautinoga loloto atu i le Alii ma ia mulimuli i Ana aoaoga. Po o a lava ituaiga o a “outou vivii atu i le Alii” i lou olaga, e mafai ona e maua ni musumusuga se tele e fai ai ao e faitau ma mafaufau i le Salamo.

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Salamo 102–3; 116

E mafai e le Alii ona faamafanafana a’u i o’u mafatiaga.

Ia manatua le ala o loo faamatala ai e le Salamo 102:1–11 ia lagona o le popolevale ma le tuulafoaia lea e masani ona oo mai i taimi o puapuaga. Atonu ua e oo i ni lagona faapena, ma e fesoasoani nei faamatalaga e te malamalama lelei ai i ou aafiaga. Pe atonu foi e fesoasoani nei fuaiupu e te malamalama ai i lagona o isi o loo mafatia ai.

Ao e faitau i le Salamo 102:12–28; 103; 116, vaavaai mo fuaitau e avatu ai ia te oe le lototele e mafai ona e “valaau atu i le suafa o Ieova” i ou tofotofoga (Salamo 116:13). Atonu e te manao e faailoga, tauloto, pe faasoa atu i isi ia fuaitau e avatu ai ia te oe le faamoemoe ia te Ia.

Tagai foi i le Isaia 25:8; 2 Korinito 1:3–7; Eperu 2:17–18; Alema 7:11–13; Evan A. Schmutz, “O Le a Soloiesea e le Atua o Loimata Uma,” Liahona, Nov. 2016, 116–18.

O Iesu o loo faamalolo

Faamalologa, saunia e J. Kirk Richards

Salamo 110; 118

E mafai e le Salamo ona faasino atu a’u i le Faaola.

O loo i ai i le Salamo ia fuaitau e faasino agai atu i le soifuaga ma le auaunaga a Iesu Keriso. O nisi nei o faataitaiga:

• Salamo 110:1–4 (tagai i le Mataio 22:41–45; Eperu 5:4–10; 6:20)

• Salamo 118:22 (tagai i le Mataio 21:42; Galuega 4:10–11; 1 Peteru 2:7)

• Salamo 118:25–26 (tagai i le Mataio 21:9)

O a ni upumoni o aoao ai oe e nei fuaiupu e uiga ia Iesu Keriso? E faapefea ona faamanuiaina oe i le iloa o nei upumoni?

A o e faitau i le Salamo i le vaiaso lenei, ia faaauau ona tusitusi e uiga i isi fuaitau o aoao atu ia te oe e uiga i le Faaola. Atonu foi e te faitau pe faalogologo i nisi o viiga e sili ona e fiafia i ai e fesoasoani e te mafaufau ai ia te Ia.

Salamo 119

O le afioga a le Atua o le a ou tumau ai i luga o Lana ala.

O le salamo lenei o loo i ai ni fasifuaitau se tele ua faatusa ai o tatou olaga i se malaga toe foi atu i le Tama Faalelagi. Ao e faitau, vaavaai mo upu e pei o le ala, ala, ala, vae, ma le sese. Mafaufau i le malaga o lou lava olaga—o le mea sa e i ai, o le mea ua e i ai nei, ma o gafea o loo e agai i ai. O le a se mea ua e aoao mai lenei salamo e uiga i lau malaga toe foi atu i le aiga [Tama Faalelagi]? E tusa ai ma le salamo lenei, o le a le mea ua tuuina mai e le Atua e fesoasoani e te tumau ai i le ala sa’o?

Atonu e te fiafia i le iloa o le uluai gagana Eperu, o fuaiupu muamua e valu i le Salamo 119 e amata i le mataitusi muamua ole pi faitau faaEperu. O isi fuaiupu e valu o loo sosoo ai e amata i le isi mataitusi e sosoo ai, ma faapena ai lava e tau i le faaiuga o le pi faitau.

Tagai foi i le Isaia 42:16; 2 Nifae 31:17–21; Alema 7:19–20.

Salamo 134–36

E sili atu le malosi o le Alii nai lo soo se tupua lava.

Maitau mafuaaga o loo tuuina mai i le Salamo 135:15–18 e uiga i le aisea e faavalevalea ai le faalagolago i atua sese. O le a se mea atonu e faaosoosoina oe e faalagolago i ai e talitutusa ma tupua o loo faamatala mai i nei fuaiupu?

Atonu e te faia se lisi o ni mea malolosi e mafai ona faia e le Alii, e pei ona faamatalaina i le Salamo 134–36. O a ni mea malolosi ua Ia faia mo oe?

Salamo 146–50

“Ia outou vivii atu ia Ieova.”

A o e faitau i salamo faaiu nei o le faafetai, mafaufau i mafuaaga e tatau ai ona e vivii atu i le Alii. Aisea e taua ai le vivii atu ia te Ia? O a ni auala e mafai ona e vivii atu ai ia te Ia?

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Salamo 119:105.Atonu e mafai ona fatu e lou aiga se auala ma savavali ai i le pogisa, e faaaoga ai se moli e faamalamalama ai le ala i luma. Ao outou savavali, e mafai ona e fai atu fesili e pei o le “O a ni mea i o tatou olaga ua pei o le pogisa lenei?” po o le “E faapefea ona avea le upu a le Atua ma se malamalama?” O le usuina o se pese e uiga i le malamalama o le Atua, e pei o le “Aoao Mai ia Ou Savali i le Malamalama” (Tusipese a Tamaiti, 70), e mafai ona fesoasoani e te faamalosia ai le mataupu faavae o loo aoaoina i le Salamo 119:105.

Salamo 127–28.O le a le uiga o le fesoasoani mai o le Alii ia i tatou e “atiina ae [o tatou] fale”? (Salamo 127:1). E mafai faapefea ona sili atu lo tatou faaaofia o Ia i a tatou taumafaiga e fatufatu se aiga amiotonu? Ina ia fesoasoani i lou aiga e tali le fesili lenei, atonu e te tusia se ata o se fale i se pepa ona otioti lea i ni fasi paso. I le pito i tua o fasi [paso] taitasi, e mafai ona tusi ai e tagata o le aiga ni faamatalaga po o se ata o auala e avea ai le Alii o se vaega o lou aiga. Ona outou tuufaatasia lea o le paso. O a nisi mea e mafai ona tatou maua i nei salamo e musuia ai i tatou e savavali i ala o le Alii?

Salamo 139.A uma ona faitau fuaiupu 1–4, ona talanoa lea o tagata o le aiga i auala e mafai ona latou iloa patino ai le Atua (tagai foi i le fuaiupu 14–15, 23–24).

Salamo 146–50.Atonu e te valaaulia lou aiga e faitau leotele ni nai fuaiupu o le Salamo 146–50, ma taumafai e faailoa atu lagona o le tusitala. E mafai faapefea ona tatou faailoa atu lo tatou viia o le Alii? Atonu o le a fiafia tagata o le aiga e tusi a latou salamo o viiviiga ma faasoa atu i le tasi ma le isi.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Aoao Mai ia Ou Savali i le Malamalama,” Tusipese a Tamaiti, 77.

Faaleleia o Lo Tatou Aoao Atu

Faaaoga lipine faalogologo. A o e aoao atu lou aiga i mau, mafaufau e faalogologo i lipine o tusitusiga paia, o loo maua i le ChurchofJesusChrist.org po o le polokalama o le Gospel Library. O le faalogologo i salamo e mafai ona faapitoa le mamana ona sa faatatau ina ia faitauina leotele.

auala i totonu o le vaomatua

“Ia e taitaiina atu a’u i le ala o au poloaiga; aua ou te fiafia lava i ai” (Salamo 119:35).