aikona o manatu

Manatu e Nofouta i Ai

Faitauina o Solo i le Feagaiga Tuai

I tusi o le Feagaiga Tuai lea e muamua i le tusi o Iopu, e tele ina tatou maua ai tala—o tala faamatala e faamatala ai mea taua na tutupu mai se vaaiga faaleagaga. Na fau e Noa se vaa, na laveai e Mose ia Isaraelu, na tatalo Hana ia maua sa na tama, ma isi mea faapena. E amata atu ia Iopu, ona tatou maua se ituaiga ese o tusitusiga, a o liliu atu tusitala o le Feagaiga Tuai i le gagana faafatusolo e faailoa ai lagona loloto po o valoaga sili ona taua i se auala e manatua ai pea.

Ua uma ona tatou vaaia ni nai faataitaiga o solo o loo taape solo i tusi ua mavae o le Feagaiga Tuai. Ma mai le tusi o Iopu agai i luma, o le a tatou vaaia ai le tele o na tusiga. O tusi o Iopu, Salamo ma le Faataoto e toetoe lava o solo uma, e faapea foi ni vaega o tusitusiga a perofeta e pei o Isaia, Ieremia ma Amosa. Ona e ese le faitauga o solo mai le faitauga o se tala, o le malamalama i ai e masani ona manaomia ai se faiga e ese mai. O nisi nei o manatu e mafai ona sili ai le anoa o lau faitauga o solo o le Feagaiga Tuai.

O le Iloa o Solo FaaEperu

Muamua, atonu e fesoasoani lou manatua o solo FaaEperu i le Feagaiga Tuai e le faavae i le tutusa o faaleoga o upu, e pei o isi ituaiga o solo. Ma e ui o le pa’o, fefulisaiga o upu, ma le ta’u soo o faaleoga o ni itu taatele lea o solo FaaEperu anamua, ae e masani lava ona leiloa [ese] le uiga i le faaliliuga. Peitai, o se tasi o itu o le a e maitauina, o le ta’u soo lea o mafaufauga po o manatu. O le fuaiupu lenei mai le Isaia o loo i ai se faataitaiga faigofie:

• Ia e ofu i lou malosi, o oe Siona e;

• Ia e ofu i ou ofu matagofie, o oe Ierusalema e (Isaia 52:1).

O le Salamo 29 o loo i ai ni laina ogatusa se tele—o se tasi lenei o faataitaiga:

• E malosi le siufofoga o Ieova;

• e mamalu le siufofoga o Ieova (Salamo 29:4).

Ma o se tulaga lenei o le iloa o le laina lona lua e ogatusa i le muamua, lea e faigofie ai ona malamalama i le fuaitau.

• O a’u foi ua ou avatu ia te outou nifo mamā i a outou aai uma,

• ma le oge i mea e ai i o outou nuu uma (Amosa 4:6).

I faataitaiga nei, o loo ta’u faalua ai se manatu ma sina eseesega itiiti. O lenei auala e mafai ona faamamafa ai le manatu ua ta’u faafia ao faaaoga ai eseesega e atili faamatala atoatoa ai pe atinae ai.

I isi tulaga, o fuaitau e ogatusa e faaaoga ai gagana talitutusa e faailoa ai ni manatu faatusatusa, e pei o le faataitaiga lenei:

• O le tali filemu e liliueseina ai le ita:

• a o le upu faatiga e tupu ai le ita (Faataoto 15:1).

O le ogatusaga lenei sa le’i tupu faafuasei. Sa faia lava e tusitala ma le loto i ai. Na mafai ai ona latou faailoa atu ni faalogona faaleagaga po o upumoni i se auala na foliga mai ia i latou sa mamana ma matagofie. A e maitauina la se ogatusaga i tusitusiga i le Feagaiga Tuai, ia fesili ifo ia te oe lava pe faapefea ona fesoasoani e te malamalama ai i le savali a le tusitala. Mo se faataitaiga, o le a se mea atonu o taumafai Isaia e ta’u mai e ala i le faatatauina o le “malosi” i “ofu matagofie” ma “Siona” ia “Ierusalema”? (Isaia 52:1). O le a se mea e mafai ona tatou taunuu i ai e uiga i le fuaitau “o se tali filemu” pe afai tatou te iloa o lona faafeagai o “upu faatiga” ? (Faataoto 15:1).

o se alii o loo tusitusi i luga o se tusitaai

Na te Faafoisia Mai Lo’u Agaga, saunia e Walter Rane

O Solo FaaEperu o se Uo Fou

Atonu e aoga mo oe le faatusatusa o le faitauga o solo i le feiloai i se tagata fou. Mo se faataitaiga, atonu e te faatusaina le faitau o solo o le Feagaiga Tuai i le feiloai atu i se tasi mai se atunuu mamao ma se aganuu fou e le tautala i le gagana tatou te tautatala ai—ma ua silia i le lua afe tausaga le matua. E masalo o le a fai mai e lenei tagata ni tala tatou te le malamalama ai i le taimi muamua, ae e le faapea ai la e leai sana mea aoga e ta’u mai ia i tatou. Faatasi ai ma sina onosai ma sina agaalofa, o le a iu ai ina avea le tatou uo fou o se uo mamae. E manaomia lava ona tatou faaaluina se taimi faatasi, ma taumafai ia vaai atu i mea mai i lona itu. Atonu foi tatou te iloa ane i o tatou loto tatou e fai si o tatou malamalama moni lava i le tasi ma le isi.

O le taimi muamua lava e te faitau ai i se fuaitau mai le Isaia, mo se faataitaiga, ia mafaufau i ai o lau faailoaga muamua lea i se uo fou. Fesili ifo ia te oe lava, “O le a so’u faalogona lautele?” O le a sou lagona i le fuaitau—e tusa lava pe e te le malamalama i upu uma? Ona toe faitau lea, mo ni nai taimi pe a mafai. O ni isi o tagata latou te maua se faauigaga faaopoopo i le faitauina leotele o fuaitau. Ia maitau upu faapitoa na filifilia e Isaia, ae maise lava i upu e vali ai se ata i lou mafaufau. O le a sou lagona ona o na ata? O le a se mea o fautua mai e le ata e uiga i lagona o Isaia? O le tele o lou suesue i upu o nei fatusolo o le Feagaiga Tuai, o le tele foi lea o lou iloa, sa latou filifilia ma le loto i ai a latou upu ma auala e faaali mai ai se savali loloto faaleagaga.

O solo e mafai ona avea ma ni uo lelei ona latou te fesoasoani ia tatou malamalama i o tatou faalogona ma aafiaga. O solo o le Feagaiga Tuai e faapitoa le taua ona latou te fesoasoani ia tatou malamalama i o tatou faalogona ma aafiaga aupito taua—o na [faalogona ma aafiaga] e faatatau i lo tatou sootaga ma le Atua.

A o e suesueina solo i le Feagaiga Tuai, ia manatua o le suesueina o tusitusiga paia e sili ona taua pe a taitai atu ai i tatou ia Iesu Keriso. Vaavaai mo faailoga, ata faatusa, ma upumoni e atinae ai lou faatuatua ia te Ia. Faalogologo mo uunaiga mai le Agaga Paia a o e suesue.

Tusitusiga Atamai

O se tasi o vaega o solo i le Feagaiga Tuai o le mea e ta’ua e le au atamamai o “tusitusiga atamai.” O le Iopu, Faataoto, ma le Failauga e i ai i le vaega lenei. E ui o salamo e faaalia ai lagona o le vivii, tagiaue, ma le tapuai, o tusitusiga atamai e taulai atu i fautuaga mo soo se taimi po o fesili loloto ma taua o le malamalama. Mo se faataitaiga, o le tusi a Iopu, o loo suesue ai le faamasinotonu o le Atua ma mafuaaga e i tua atu o le puapuagatia o le tagata. O le Faataoto o loo ofoina mai ai fautuaga i le ala e ola manuia ai, e aofia ai upu poto na aoina ma tuufaasolo mai i augatupulaga ua mavae. Ae o le Failauga ua fesiligia ai le faamoemoega o le olaga lava ia—pe a foliga mai e mo na’o se taimi ma faafuasei ia mea uma, o fea tatou te maua ai le taua moni? Atonu e te manatu o tusitusiga atamai o ni talanoaga magafagafa faatasi ma ni faufautua musuia o e mananao e faasoa atu ni isi o mafaufauga e uiga i le Atua ma le lalolagi na Ia foafoaina—ma atonu e fesoasoani e te malamalama lelei teisi ai i nei mea nai lo o le taimi muamua.