Eseta o loo tatalo

Eseta, na saunia e James Johnson

25–31 Iulai

Eseta

“Ua Fai Oe … [m]o se Aso Faapenei”

A o e faitau i le Eseta, saili ni musumusuga mai le Agaga e talafeagai ia te oe, ma tusifaamaumau lagona uunai e te maua.

Tusifaamaumau Ou Lagona Uunai

O le tele o mea na tutupu i le tusi o Eseta e foliga mai o le laki pe tupufua. E faapefea la ona e faamatalaina le ala na avea ai se teine Iutaia matuaoti ma masiofo o Peresia i le taimi tonu lava ia laveai ai ona tagata mai le fasiotia? O a ni avanoa na fetaui tonu ai ma le lagona atu e Moretekai le tausoga o Eseta se taupulepulega e fasioti le tupu? O nei ea mea sa tupufua pe sa o ni vaega o se fuafuaga faalelagi? Na saunoa Elder Ronald A. Rasband: “O le mea e ono foliga mai na tupu faafuasei, o le mea moni, na faafoe e se Tama o i le Lagi. … O loo i ai le Alii i auiliiliga iti o o tatou olaga” (“E Ala i le Mamanu Faalelagi,” Liahona, Nov. 2017, 56). Atonu e le o taimi uma tatou te vaai ai i le tosinaga a le Alii i “nei auiliiliga iti.” Ae tatou te aoao mai i le aafiaga a Eseta, e mafai ona Ia taiala o tatou ala ma saunia i tatou “[m]o se aso faapenei” (Eseta 4:14) pe a mafai ona avea i tatou ma meafaigaluega i Ona aao e faataunuu ai Ona faamoemoega.

Mo se vaaiga aoao o le tusi o Eseta, tagai i le “Eseta, tusi o” i le Bible Dictionary.

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Eseta

E mafai ona fai a’u e le Alii o se meafaigaluega e faamanuia ai isi.

Na aoao mai Sister Anne C. Pinegree: “O le avea ma se tufugaaao o le Atua, o se avanoa sili ma o se tiutetauave paia. Pe o fea lava o tatou nonofo ai, pe o a lava o tatou tulaga, e le afaina pe ua tatou faaipoipo pe leai, pe o le a foi le matua, e manaomia e le Alii i tatou taitoatasi ia faataunuuina a tatou vaega taua i le fausiaina o Lona malo i lenei tisipenisione faaiu” (“Iloaina o le Finagalo o le Alii mo Oe,” Liahona, Nov. 2005, 112).

A o e faitau i le tala ia Eseta, mafaufau loloto i le ala e faatatau ai lenei faamatalaga ia te ia. Vaavaai mo auala na mafai ona faia e le Alii mo ia e laveai ai sa Iuta (tagai i le, mo le faataitaiga, Eseta 2:21–23; 3:10–14; 4:14–16). O lou faia o le mea silisili i aso uma o le a faamanuiaina ai oe ma faatagaina oe e faamanuiaina isi. O a ni isi o tulaga po o sootaga e te lagona ua Ia taialaina ai oe “ [m]o se aso faapenei”? (Eseta 4:14). Afai o i ai sou faamanuiaga faapeteriaka, mafaufau e faitau e aoao atili ai e uiga i le galuega a le Alii mo oe e fai.

Eseta 3; 5:9–14; 7

O le faamaualuga ma le ita e mafai ona oo atu ai i le toilalo.

I le tusi a Eseta, tatou te aoao ai mai le faamaoni o Eseta ma Moretekai faapea foi mai le faamaualuga ma le ita o Hamanu. Ao e faitau i le Eseta 3; 5:9–14, mafaufau e maitau lagona, upu, ma amioga a Hamanu. O a ni mea o latou faaalia e uiga ia te ia ma ana faaosofiaga? O a ni taunuuga sa fetaiai ma ia? (tagai i le Eseta 7). O le faitau e uiga ia Hamanu e ono faaosofia ai oe e iloilo po o a ni mea e faaosofia ai ou lagona ma faatinoga. Pe o musuia oe e fai ni suiga? E mafai faapefea ona e liliu atu i le Faaola mo le fesoasoani?

Tagai foi i le Faataoto 16:32; Alema 5:28.

Eseta 3–4; 5:2–3; 8:11–12

O le anapogi e faaalia ai lo’u faalagolago i le Alii.

Maitau ia tulaga na taitai atu ai Eseta ma tagata uma o Iutaia e anapopogi (tagai i le Eseta 3:13; 4:1–3, 10–17). Na faapefea ona avea le anapogi o se faamanuiga ia i latou? (tagai i le Eseta 5:2–3; 8:11–12). Aisea ua fetalai mai ai le Alii tatou te anapopogi? (tagai i Autu o le Talalelei, “Anapogi ma Taulaga Anapogi,” topics.ChurchofJesusChrist.org). Mafaufau i se mea e mafai ona e faia e avea ai le anapogi o se faamanuiaga maoae atu i lou olaga.

Tagai foi i le Isaia 58:6–12; Mataio 4:1–4; 17:14–21; “Fasting: Young Single Adult Ward, Amanda” (vitio), ChurchofJesusChrist.org

Eseta 3:1–11; 4:10–17; 5:1–4

O le faia o le mea sa’o e masani ona manaomia ai le tele o le lototoa.

Ina ua tutu atu Moretekai ma Eseta mo o laua talitonuga, sa o la tuu o laua ola i se tulaga lamatia. O a tatou filifiliga e i ai taunuuga e ono itiiti le ogaoga, ae o le faia o le mea sa’o e mafai ona manaomia ai pea le lototoa. O le a se mea ua tatou aoao mai i le Eseta 3:1–4; 4:10–17 e uiga i le i ai o le lototoa e fai le mea sa’o? Ia maitau taunuuga eseese na oo ia Moretekai ma Eseta ina ua uma ona faaali atu le lototoa (tagai i le Eseta 3:5–11; 5:1–4). O le a se mea e manaomia ona iloa e se tagata e uiga i le Atua ina ia mafai ona faia ai filifiliga na faia e Eseta ma Moretekai—ia fai le mea sa’o e tusa lava po o a taunuuga?

O le isi taimi e te mafaufau ai i taunuuga o le faia o le mea sa’o, atonu e te faaaogaina upu faalototele a Eseta o loo i le Eseta 4:16 i lou lava tulaga. Mo se faataitaiga atonu e te faapea ifo ia te oe lava, “A ou filifilia le mea sa’o, ae [leiloloa ai au uo], e [leiloloa a’u uo].”

Tagai foi i le Thomas S. Monson, “Ia Outou Lototetele,” Liahona, Me 2009, 123–27.

O Eseta ma le tupu

O Eseta i luma o le Tupu, saunia e Minerva Teichert

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Eseta 1–10.A uma ona toe faamanatu le tala ia Eseta (tagai i le “Masiofo o Eseta” i Tala o le Feagaiga Tuai po o le vitio “For Such a Time as This,” ChurchofJesusChrist.org), atonu e fai ni papeti faigofie o ni isi o tagata (tagai i le itulau o le gaoioiga i le vaiaso lenei i le Sau, Mulimuli Mai ia te A’u—Mo le Peraimeri). E mafai lea ona latou faaaogaina e toe faamatala ai le tala. E mafai foi ona outou usuina se pese e faatatau i le toa ma le amio sa’o, e pei o le “Ia Fai Le Mea Tonu” (Tusipese a Tamaiti, 80) po o le “Fai Mea Tonu” (Viiga, nu. 147). O a upu o i le pese e faamanatu mai ai ia i tatou ia Eseta?

Eseta 2:5–7.O le a se mea e mafai ona tatou aoao mai i le faataitaiga a Moretekai e uiga i le fesoasoani i tagata o le aiga i taimi o tofotofoga? O ai o loo i lo tatou aiga e manaomia la tatou lagolago? Fai se fuafuaga e fesoasoani ai ia i latou.

Eseta 4:15–17.O le toa o Eseta e mafai ona musuia ai lou aiga e talanoa i auala e atinae ai le lototele e tutu atu mo le upumoni i tulaga latou te fetaiai. O le a le uiga o le tala a Eseta e faapea, “Afai ou te oti ai, oti ai pea ia”? E faapefea ona faatatau ana upu ia i latou pe a manaomia ona tatou totoa? O le vitio “Courage” (ChurchofJesusChrist.org) o loo tuuina mai ai ni isi o faataitaiga.

Eseta 9:26–32.O le tausamiga faaIutaia o le Puro, sa faavaeina ia manatua ai le tala ia Eseta. I le taimi o le taumafataga i le vaiaso lenei, mafaufau e faasoa atu ni tala o ni taimi na faamanuiaina ai e tagata o lou aiga, e aofia ai augatuaa, ia isi e ala i le tutu atu mo le mea sa’o e pei ona sa faia e Eseta.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Fai Le Mea Tonu,” Tusipese a Tamaiti, 80.

Faaleleia o Lo Tatou Aoao Atu

Faataitai i le soifuaga o le Faaola. “O le mana a le Faaola e aoao ma siitia ai isi na sau mai le auala na Ia soifua ai ma le ituaiga o tagata na avea ai o Ia. O le filiga tele e te taumafai e ola ai e pei o Iesu Keriso, o le a atili ai ona mafai ona e aoao atu e pei o Ia” (Aoao Atu i le Ala a le Faaola, 13).

Eseta

Masiofo o Eseta, saunia e Minerva Teichert, ©William Betty Stokes