Eseta o loo tatalo

Eseta, saunia e James Johnson

25–31 Iulai

Eseta

“Ua I Ai Oe … Ona o Se Aso Faapenei”

Ua molimau mai tusitusiga paia uma e uiga ia Iesu Keriso. Mafaufau loloto pe faapefea ona e fesoasoani i tamaiti ia iloa le aafiaga o le Faaola i le tala ia Eseta.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Pasi faataamilo se ata o Eseta (tagai i le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga). A o uuina e tamaiti le ata, valaaulia i latou e faasoa mai se mea latou te iloa e uiga i le tala ia Eseta.

aikona o le aoao atu

Aoao atu le Aoaoga Faavae: Tamaiti Laiti

Eseta 2:5–7

E mafai ona ou auauna atu i lo’u aiga.

Ina ua maliliu matua o Eseta, sa tausi o ia e lona tausoga o Moretekai. E mafai ona e faaaogaina a la’ua aafiaga o se avanoa e talanoa ai e uiga i le auauna atu i tagata o o tatou aiga.

Gaoioiga e Mafai Ona Fai

• I luga o le laupapa, tusi ni ata e suitulaga ia Eseta, ona matua, ma lona tausoga o Moretekai. Faamalamalama atu faapea na maliliu matua o Eseta, o lea sa manaomia ai e Eseta se tasi e tausia o ia. Faitau le Eseta 2:7 i tamaiti, ma fai atu i tamaiti e faalogo po o le a le mea na faia e Moretekai. Fesoasoani i tamaiti e mafaufau i mea atonu o manaomia e tagata o o latou aiga lea e mafai ona fesoasoani atu ai tamaiti.

• Valaaulia ni nai tamaiti e faatino se mea agalelei e mafai ona latou faia e auauna atu ai i se tasi i lo latou aiga, ma fai atu i isi tamaiti e mate mai le mea o loo latou faia. Valaaulia i latou e talanoa e uiga i mea o loo latou faia e faamanuia ai o latou aiga, ma faamatala atu nisi mea o e faia.

• Usu se pese e faatatau i le fesoasoani i o tatou aiga, e pei o le “Pe A Tatou Fesoasoani” (Tusipese a Tamaiti,108). Faasoa atu lau molimau e faapea, o le fesoasoani atu i o tatou aiga e faafiafia ai i tatou.

Eseta 4:15–16

E mafai ona ou lototele.

O tamaiti e te aoaoina o le a feagai ma ni tulaga pe a latou manaomia le fesoasoani a le Alii ia lototetele. E faapefea ona e fesoasoani ia latou aoao mai le faataitaiga a Eseta o le lototele?

Gaoioiga e Mafai Ona Fai

• Pe o iloa ea e tamaiti o loo e aoaoina le uiga o le lototele? Faasoa atu se faauigaga faigofie, e pei “O le lototele o lona uiga o le faia o le mea saʻo tusa lava pe e te fefe.” Faasoa atu le tala ia Eseta (tagai “Masiofo o Eseta” i Tala o le Feagaiga Tuai), ma fesoasoani i tamaiti ia latou iloa le lototele o Eseta. Tuu atu i tamaiti e faaaoga ata i le itulau o gaoioiga o lenei vaiaso e toe faamatala ai le tala.

• Faaali atu se ata o Eseta (tagai i le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga). Usu ma tamaiti se pese e uiga i le lototele, e pei o le “O Le a Ou Lototoa” (Tusipese a Tamaiti,85). Faasino atu i upu ma fasifuaitau i le pese e faamatala ai Eseta, ma molimau atu e mafai e le Faaola ona fesoasoani i tamaiti ia lototetele.

• Tau atu i tamaiti e uiga i taimi na lototele ai Iesu Keriso; mo se faataitaiga, ina ua Ia puapuagatia mo a tatou agasala, i Ketesemane ma luga o le satauro (tagai Mataio 26: 36–39; 27: 33–35). Fai i tamaiti e faamatala mai se taimi na latou lototetele ai (mafaufau e faafesootai muamua o latou aiga e fesili ia i latou mo ni faataitaiga). O a mea na fesoasoani ia i latou e lagona ai le lototele? Tau atu i tamaiti le auala na fesoasoani ai le Alii ia te oe e maua le lototele i se taimi na e lagona ai le fefe.

  Eseta ma le tupu

  O Eseta i luma o le Tupu, saunia e Minerva Teichert

aikona o le aoao atu

Aoao atu le Aoaoga Faavae: Tamaiti Matutua

Eseta 4:14

E mafai ona avea a’u o se meafaigaluega i aao o le Atua.

Ina ua fefe Eseta, sa faamalosiau Moretekai ia te ia i le aoaoina o ia atonu o le Alii na faia o ia ma masiofo “ona o se aso faapenei” (Eseta 4:14). Mafaufau loloto pe faapefea ona saunia e le Alii tamaiti o loo e aoaoina mo o latou avanoa e faamanuia ai isi.

Gaoioiga e Mafai Ona Fai

• Valaaulia se tasi e taina se pese mo tamaiti i se mea faifaaili, pe faaali se ata o se tasi o taina se mea faifaaili. Talanoa e uiga i le avea ma meafaigaluega i aao o le Atua. Toeiloilo ma tamaiti le tala ia Eseta (tagai “Masiofo o Eseta” i Tala o le Feagaiga Tuai), ma valaaulia i latou e talanoa e uiga i le auala na avea ai Eseta ma meafaigaluega mo le Alii e faataunuu ai Lona finagalo. E mafai faapefea ona avea i tatou ma meafaigaluega mo le Alii?

• A maeʻa ona iloiloina le tala ia Eseta, ona faapipii lea o se kata ma le igoa o se tagata mai le tala i papatua o tamaiti taitasi. Valaaulia tamaiti e taumafai e saili po o ai le igoa o loo pipii i o latou papatua i le fai atu i isi tamaiti o fesili e pei o le “Na amiotonu lenei tagata?” po o le “O se tamaitai lenei tagata?” Ia talanoaina pe na faapefea ona avea Moretekai ma Eseta ma mea faigaluega a le Alii e laveai ai tagata lutaia.

Eseta 3:1-11; 4:10-17

E fesoasoani le Tama Faalelagi ia ou maua le lototele pe a ou fefe.

O anafea na e vaaia ai le lototetele o tamaiti o loo e aoaoina? O a ni aafiaga e mafai ona e faasoa atu ina ua e manaomia le fesoasoani a le Alii e lototele ai?

Gaoioiga e Mafai Ona Fai

• Tusi i luga o le laupapa Na faaalia e Moretekai le lototele e ala i le … ma Na faaalia e Eseta le lototele e ala i le … Valaaulia ni tamaiti e faitau le Eseta 3:1–11 ma isi e faitau le Eseta 4:10–17. Fai atu ia i latou e faaaoga mea na latou faitauina e faamaea ai fuaiupu i luga o le laupapa. Ona tusi lea O le a ou faaalia le lototele e ala i le … ma valaaulia tamaiti e lisi ni mea e finagalo le Tama Faalelagi latou te faia e manaomia ai le lototele. E mafai faapefea ona avea i tatou e pei o Moretekai ma Eseta?

• Ia valaaulia tamaiti e mafaufau i ni tulaga o loo feagai ma i latou atonu e faigata ai ona faia le mea saʻo. Tusi i luga o le laupapa upu lototele a Eseta “E faapena foi ona ou alu atu ai i le tupu, … afai ou te oti ai, oti ai pea ia” (Eseta 4:16). Fesoasoani i tamaiti e faaaoga upu a Eseta ia i latou lava i le suia o le “alu atu ai i le tupu” i se filifiliga amiotonu ae faigata latou te ono faia. Ona valaaulia lea o i latou e sui le “oti” i se mea le lelei e ono sau mai le faia o le mea saʻo. Aisea e sili ai le faia o le mea saʻo, tusa lava pe i ai ni taunuuga faigata?

• Faaali le vitio “Choose the Harder Right” (ChurchofJesusChrist.org), ma valaaulia tamaiti e filifili i se “sa’o faigata” i o latou olaga o le a latou filifilia. Talanoa pe faapefea ona avea Iesu Keriso ma faataitaiga o lenei mataupu.

Eseta 4:1-3, 10-17

O le anapogi e mafai ona fesoasoani ia te a’u ma faamanuia ai isi.

I se taimi na manaomia ai le fesoasoani, na anapogi ai Eseta ma tagata lutaia. E faapefea ona e fesoasoani i tamaiti o loo e aoaoina ia malamalama i faamanuiaga faaleagaga o le anapogi?

Gaoioiga e Mafai Ona Fai

• Fesoasoani i tamaiti e fai se lisi o mea e mafai ona latou anapogi ai (afai e manaomia, e mafai ona latou tagai i le “Anapogi ma Taulaga Anapogi” i le Faamaoni i le Faatuatua,20--22). Ona fai atu lea ia i latou e faitau le Eseta 4:1–3, 10–17 e iloa ai pe aisea na anapopogi ai tagata Iutaia ma Eseta. Uunaia tamaiti e mafaufau i se mafuaaga latou te ono manaomia ai se fesoasoani faapitoa mai le Alii, ma fautua atu latou te faia lena mafuaaga o se vaega o la latou anapogi i le isi Aso Sa anapogi.

• Ia valaaulia tamaiti e faafoliga o loo latou faamatala atu i se uo le mafuaaga ua latou anapogi ai. O le a sa latou tala e fai atu ai? Faasino atu i latou i le Taiala i Tusitusiga Paia, “Anapogi, Anapopogi” (scriptures.ChurchofJesusChrist.org) pe a latou manaomia le fesoasoani. Faasoa se mea na tupu i le taimi na e anapogi ai ia maua ai le fesoasoani a le Alii. Valaaulia tamaiti e faasoa mai ni aafiaga na latou maua i le anapogi.

aikona o le aoaoina

Uunaia le Aoaoina i le Aiga

Usu faatasi se pese e uiga i se mataupu faavae na e aoaoina i le vasega i le asō (vaai le faasino autu i le Tusipese a Tamaiti mo ni manatu). Valaaulia i latou e usu le pese ma o latou aiga.

Faaleleia o Lo Tatou Aoao Atu

Ola i mea e te aoao atu. O lou aoao atu o le a sili atu ona mamana pe a mafai ona e molimau mai se aafiaga patino ia te oe lava ia e faatatau i faamanuiaga o le ola ai i le talalelei. Ao e filifilia mataupu faavae e aoao atu i tamaiti, mafaufau loloto pe faapefea ona e ola atoatoa atili i na mataupu faavae. (Tagai Aoao Atu i le Ala o le Faaola, 13–14.)

itulau o gaoioiga: E mafai ona ou lototele