o le malumalu o Serupapelu

Ata tusi o le malumalu o Serupapelu, saunia e Sam Lawlor

18–24 Iulai

Esera 1; 3–7; Neemia 2; 4–6; 8

“O Loo Faia e A’u le Galuega Tele”

A o e suesue, mafaufau po o fea o savali i le Esera ma Neemia e sili ona manaomia e tamaiti o loo e aoaoina. Faia se fuafuaga e aoao atu e aofia ai uunaiga e te maua mai le Agaga Paia.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Tusi i luga o le laupapa Serupapelu, Esera, ma Neemia. Tusi pe faaali atu ni ata e fesootai ma nei tagata, pei o se malumalu, tusitusiga paia, ma puipui o Ierusalema. Fesoasoani i tamaiti e faafetaui igoa i ata, ma tuu atu ia i latou e faasoa mai mea ua latou iloa e uiga i mea na faia e nei tagata.

aikona o le aoao atu

Aoao atu le Aoaoga Faavae: Tamaiti Laiti

Esera 3:8-13

E mafai e le malumalu ona aumaia ia te aʻu le fiafia.

O le tala ia Serupapelu ma tagata Iutaia ma le toe fausia o le malumalu e mafai ona fesoasoani i tamaiti o e aoaoina ia fiafia i faamanuiaga e oo mai ona o le maota o le Alii.

Gaoioiga e Mafai Ona Fai

• Valaaulia tamaiti e talanoa e uiga i se mea e faafiafia ai i latou. Faaali atu se ata o se tasi o loo ataata i luma o le malumalu (pei o le ata i lenei otootoga), ma fesili i tamaiti pe aisea e ono fiafia ai le tagata. Molimau atu o le malumalu o le maota o le Alii, ma faamatala e uiga i se taimi na e lagona ai le fiafia ona o le malumalu.

• Faitau atu i tamaiti le vaega mulimuli o le Esera 3:12, ma faamatala atu ina ua faataatia e tagata Iutaia le faavae o le malumalu, “e toatele foi na alalaga ona o le fiafia ua leotetele.” Valaaulia ia tamaiti e alalaga i le fiafia. Fesoasoani ia i latou e mafaufau i mafuaaga e mafai ai ona tatou fiafia e uiga i le malumalu. Mo se faataitaiga, i totonu o le malumalu tatou te osia ai ni folafolaga ma le Atua e faatagaina ai o tatou aiga ona faatasi e faavavau.

• Usu faatasi ma tamaiti se pese e faatatau i le malumalu, e pei o le “Ou Te Fia Vaai i le Malumalu” (Tusipese a Tamaiti,99). A maeʻa laina taitasi, malolo e fesili i se tamaitiiti e faasoa mai se mea e fiafia i ai e uiga i le malumalu.

  aiga o loo savalivali i laufanua o le malumalu

  E mafai ona avea le malumalu ma puna o le fiafia i o tatou olaga.

Neemia 2:17–20; 6:1–9

O le a fesoasoani mai le Alii ia te a’u e faia Lana galuega.

A o faalelei e Neemia pa o siomia ai Ierusalema, na taumafai ona fili e taofi o ia, peitai sa tumau pea ma le faamaoni o ia i lana galuega. O a nisi o mea taua e finagalo le Alii e fai e tamaiti, ma e faapefea ona e faamalosia i latou e faamaoni i lena galuega?

Gaoioiga e Mafai Ona Fai

• Faasoa atu ma tamaiti le tala ia Neemia (tagai Neemia 2:17–20; 6:1–9; Dieter F. Uchtdorf, “O Loo Tatou Faia Se Galuega Tele ma E Le Mafai Ona Tatou O Ifo I Lalo,” Liahona, Me 2009, 59–62). Faamatala atu i tamaiti le mea na fai e Neemia ina ua ulagia o ia e tagata ona o lona manao e faaleleia puipui o Ierusalema: “O le Atua o le lagi, o ia lava na te faamanuiaina ia te i matou; o le mea lea e tulai ai o i matou ana auauna ma faia le galuega” (Neemia 2:20). Valaaulia tamaiti e tutu i luga ma faafoliga o loo fesoasoani e faafou pa o Ierusalema.

• Aumai ni poloka i le vasega, ma tuu i tamaiti e faaaoga e fesoasoani ai ia te oe i le fausiaina o se puipui (pe tusi se puipui i luga o le laupapa). Fesoasoani i tamaiti e mafaufau i ni mea taua e ono fai atu ai le Tama Faalelagi latou te faia, e pei o le aoao pe faapefea ona faitau tusitusiga paia. I manatu taitasi latou te faasoa mai, valaaulia i latou e faaopoopo se poloka i le puipui. Faamatala atu a o faia e Neemia lana galuega taua o le faafouina o pa o Ierusalema, sa taumafai tagata e taofi o ia. Faitau le Neemia 6:9, ma valaaulia tamaiti e sisii i luga o latou lima pe a e faitauina le “faamalosi mai oʻu lima.” Tau atu i tamaiti e uiga i se taimi na e lagonaina ai le faamalosia e le Atua o ou lima e faia Lana galuega.

Neemia 8: 1-12

O tusitusiga paia o se faamanuiaga.

E mafai ona e faaaogaina le tala ia Esera o loo faitauina le tulafono e fesoasoani ai i tamaiti e mafaufau i le faamanuiaina o i tatou i le mauaina o tusitusiga paia.

Gaoioiga e Mafai Ona Fai

• Tau atu i tamaiti na faitau e Esera tusitusiga paia i tagata. Faitau leotele nisi o fasifuaitau mai le Neemia 8:2–3, 5–6, 8–9, 12 e faamatala ai mea na faia e tagata ina ua latou faalogo i tusitusiga paia, ma valaaulia tamaiti e faatino ia fasifuaitau. Aisea tatou te lotofaafetai ai i le mauaina o tusitusiga paia?

• Valaaulia tamaiti e valivali le itulau o gaoioiga o lenei vaiaso. A o latou faia, faasoa ma tamaiti pe faapefea e le faitauina o tusitusiga paia ona faalatalata atili atu oe i le Faaola.

aikona o le aoao atu

Aoao atu le Aoaoga Faavae: Tamaiti Matutua

Esera 3:8–13; 6:16–22

Ua aumaia e le malumalu ia te aʻu mafuaaga e fiafia ai.

A o e iloiloina ma tamaiti le tala ia Serupapelu ma le toe fausia o le malumalu e tagata Iutaia, saili ni auala e molimau atu ai i le fiafia e oo mai ia i tatou ona ua i ai malumalu i aso nei.

Gaoioiga e Mafai Ona Fai

• Valaaulia tamaiti e galulue faatasi e saili fasifuaitau i le Esera 3:10–13 e faaalia ai lagona o tagata Iutaia ina ua toe fausia le malumalu i Ierusalema. E faapefea ona faaalia lo tatou fiafia i le i ai o malumalu i le lalolagi i aso nei? Fesoasoani i tamaiti e mafaufau i ni auala e mafai ai ona latou sauniuni e o atu i le malumalu.

• Faasoa atu i tamaiti ou lagona e uiga i le malumalu. Na faapefea ona fesoasoani le malumalu ia te oe e te latalata atili ai i le Tama Faalelagi ma le Faaola? Aisea tatou te faamanatu ai pe a faapaia se malumalu? Tuu atu i tamaiti le taimi e tusi ai i lalo o latou lagona e uiga i le malumalu, ma uunaia i latou e faasoa mai mea na latou tusia ma o latou aiga.

Neemia 2; 4; 6

O le a faamalosia aʻu e le Alii e faia “se galuega tele.”

E i ai se galuega taua a le Alii mo tamaiti o loo e aoaoina. O le a se mea e mafai ona latou aoao mai ia Neemia e uiga i le tumau i lena galuega tusa lava pe latou te fetaiaʻi ma mea faigata?

Gaoioiga e Mafai Ona Fai

• Iloilo ma tamaiti le tala e uiga ia Neemia sa faafouina puipui na siomia ai Ierusalema, e aofia ai le tetee na feagai ma ia. Faitau faatasi le Neemia 2:19, ma fai i tamaiti e faasoa mai ni tulaga atonu e amuamu mai ai se tasi ia i tatou ona o le faia o le mea saʻo. E tusa ai ma le Neemia 2:20, o le a le tali a Neemia? E faapefea ona tatou tali atu pe a tauemu mai tagata ia i tatou pe faitioina i tatou mo le faia o le mea saʻo?

• Faitau faatasi le Neemia 6:1–9. Na faapefea ona taumafai fili o Neemia e taofi o ia mai le galue i luga o le pa, ma na faapefea ona ia tali atu? O le a le galuega e finagalo le Atua tatou te faia? (tagai, mo se faataitaiga Mosaea 18:8-10). E mafai faapefea ona tatou mulimuli i le faataitaiga a Neemia i le fuaiupu 9 pe a faigata ona fai le mea ua faatonuina ai tatou e le Atua e fai?

Neemia 8: 1-12

E faamanuiaina a’u pe a ou suesue i tusitusiga paia.

Ua leva ona le faalogo tagata o Ierusalema i le afioga a le Atua ao le’i faitauina e Esera i tagata. O le tala ia Esera e faamanatu mai ai ia i tatou le taua o tusitusiga paia e tatau ona i ai ia i tatou.

Gaoioiga e Mafai Ona Fai

• Valaaulia tamaiti e iloilo le Neemia 8:1–12 mo upu po o fasifuaitau e faaalia ai lagona o tagata e uiga i le faalogo i le afioga a le Atua. Fai i tamaiti e faasoa mai o latou lagona pe a latou faitau i tusitusiga paia, ma fefaasoaai foi ou lagona.

• Valaaulia se tamaititi e faitau le Neemia 8:8, ma fesili i tamaiti po o le a le mea e fesoasoani ia i latou e malamalama ai i tusitusiga paia. Faaali ia i latou auala e faaaoga ai fesoasoaniga i suesuega o tusitusiga paia e pei o le Taiala i Tusitusiga paia ma le Autu o le Talalelei (ChurchofJesusChrist.org). Ia valaaulia tamaiti e faasoa atu se mea ua latou aoaoina e uiga i le Faaola mai tusitusiga paia.

aikona o le aoaoina

Uunaia le Aoaoina i le Aiga

Ia valaaulia tamaiti e filifili se mea ua latou aoaoina i le aso latou te mananao e faasoa atu i o latou aiga.

Faaleleia o Lo Tatou Aoao Atu

Saunia Faaleagaga. “O le aoao atu o le talalelei ma le mana o lona uiga e le na o le sauniaina o se lesona ae o le sauniaina o i tatou lava. … O faiaoga lelei o le talalelei—ae latou te lei mafaufau e faatumu le taimi o le vasega—e taulai atu i le faatumuina o latou loto i le Agaga Paia” (Aoao Atu i le Ala a le Faaola, 12).

itulau o gaoioiga: O tusitusiga paia o se faamanuiaga