Ua faaali e Elisaia kariota afi i auauna

Atatusi o Elisaia o loo faaali atu i ana auauna le kariota afi, © Review & Herald Publishing/licensed mai le goodsalt.com

4–10 Iulai

2 Tupu 2–7

“O Loo ia Isaraelu le Perofeta”

O gaoioiga i lenei otootoga e faatupuina e faaosofia ai a oe lava manatu fatufatuai. E ala i le suesue ma le agaga tatalo, e mafai ai ona e maua musumusuga e faamalieina ai manaoga o tamaiti o loo e aoaoina.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Ina ia uunaia tamaiti e faasoa mai ni mea latou te iloa e uiga i le perofeta o Elisaia, valaaulia i latou e tusi se ata o se mea na ia faia.

aikona o le aoao atu

Aoao atu le Aoaoga Faavae: Tamaiti Laiti

2 Tupu 4–5

E mafai e le Atua ona faia vavega i lo’u olaga.

E ala i le perofeta o Elisaia, na faamanuia ai e le Alii le toatele o tagata i ni auala faavavega. Fesoasoani i tamaiti ia iloa vavega a le Alii i o latou olaga.

Gaoioiga e Mafai Ona Fai

• Faasoa atu se tasi pe sili atu o vavega o lo o tusia i le 2 Tupu 4–5 (tagai i le “Elisaia le Perofeta” ma le “Ua Faamalolo e Elisaia Naamanu” i Tala o le Feagaiga Tuai). Tuu atu i tamaiti e faasoa mai mea latou te fiafia i ai e uiga i nei tala. Valaaulia i latou e toe faamatala atu ia tala i le tasi ma le isi.

• Ia molimau atu e mafai e le Alii ona faaaogaina Lona mana e fai ai mea silisili e fesoasoani ia i tatou. Ua tatou taua nei mea o vavega. Faasoa pe na faapefea ona faaali mai e le Alii Lona alofa mo oe i ni auala tetele pe laiti. Usu faatasi se pese e faatatau i le alofa o le Atua, e pei o le “E Alofa Lo’u Tama Faalelagi Ia Te A’uTusipese a Tamaiti, 16). Fai atu i tamaiti e faasoa mai pe faapefea ona latou iloa e alofa le Tama Faalelagi ia i latou.

2 Tupu 5:1–15

E mafai ona ou filifili e fai le mea ua poloai mai ai le Atua e ala i Lana perofeta.

Sa faigata ia Naamanu ona usitai i le taimi na taʻu atu ai e le perofeta o Elisaia ia te ia le ala e faamalolo ai le lepela. Mafaufau loloto pe faapefea ona e fesoasoani i tamaiti ia malamalama i faamanuiaga e maua mai le usiusitai.

Gaoioiga e Mafai Ona Fai

• Faamatala le tala o Naamanu (tagai 2 Tupu 5:9–14; “Ua Faamalolo e Elisaia Naamanu” i Tala o le Feagaiga Tuai; i totonu o le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga). Faamamafa atu o le taimi muamua na le manao Naamanu e taele i le Vaitafe o Ioritana, e ui lava na tau atu e Elisaia ia te ia o le a faamaloloina lona maʻi. Faamatala atu e uiga i se taimi na e le mautinoa ai e te manao e fai le mea sao, ma fesoasoani i tamaiti e mafaufau i ni a latou lava faataitaiga. Ona faasoa atu lea pe faapefea ona faamanuiaina Naamanu ina ua ia faia le filifiliga saʻo.

• Faitau le 2 Tupu 5:13 i tamaiti, ma faamatala atu na fesoasoani auauna a Naamanu ia te ia e filifili e usitai i le perofeta o Elisaia. Fesoasoani i tamaiti e mafaufau i ni auala e mafai ai ona latou fesoasoani i a latou uo po o tagata o le aiga e faalogo ma usitai i le perofeta.

2 Tupu 6:8–17

O loo leoleoina aʻu e le Alii.

Ina ua vaai atu le auauna a Elisaia i le autau a Suria o lo o siomiaina i latou, sa matua fefe lava o ia. Ae peitai, na taʻu atu e Elisaia ia te ia e “aua e te fefe” ona o le Alii sa faatasi ma i latou (2 Tupu 6:16).

Gaoioiga e Mafai Ona Fai

• Faitau le 2 Tupu 6:15 i tamaiti, pe toe faaupuina ina ia latou malamalama ai. Valaaulia tamaiti e vaai faalemafaufau faapea o loo siomia i latou e se autau toatele ma solofanua ma kariota, e pei ona sa i ai le auauna a Elisaia. O a ni o latou lagona o le a i ai? O lea se mea o le a latou faia? Fai atu ia i latou e moeiini o latou mata a o e faitauina atu le 2 Tupu 6:16–17 ia i latou. A e oo i upu “faapupula ona mata,” fai i tamaiti e pupula o latou mata. Faamatala ia i latou le mea na vaaia e le auauna na puipuia ai o ia ma Elisaia. Faasoa atu pe faapefea ona e iloa o loo leoleoina i tatou e le Alii.

• Usu faatasi se pese e uiga i le tausiga a le Atua mo i tatou, e pei o le fuaiupu muamua o le “Fanau, ua Leoleo mai le Atua” (Viiga, 180). Sui upu o le pese i igoa o tamaiti e faamamafa ai o loo leoleoina i latou e le Atua.

aikona o le aoao atu

Aoao atu le Aoaoga Faavae: Tamaiti Matutua

2 Tupu 4–5

O nei faauoga o ni vavega lava i lo’u olaga.

I le taimi o lana galuega, sa faamalolo ma faamanuia e Elisaia le toatele o tagata. E faapefea ona fesoasoani vavega i le 2 Tupu 4–5 i tamaiti e iloa ai le aao o le Tama Faalelagi i o latou olaga?

Gaoioiga e Mafai Ona Fai

• Ia valaaulia tamaiti e tusi i luga o le laupapa ni vavega se tele latou te manatuaina mai tusitusiga paia. Ona tuu atu lea ia i latou le taimi e iloilo ai le 2 Tupu 4-5 ma faaopoopo ia latou lisi (tagai 2 Tupu 4:1--7, 14–17, 32–35, 38–41, 42–44; 5:10–14). O a ni mea o aoao mai e nei vavega e uiga i lagona o le Tama Faalelagi e uiga ia i tatou?

• Fai i tamaiti e talanoa e uiga i le mea e taʻu o le vavega. Afai latou te manaomia le fesoasoani, e mafai ona latou iloilo “Vavega” i le Taiala i Tusitusiga Paia (scriptures.ChurchofJesusChrist.org). Valaaulia i latou e faasoa mai ni vavega na faia e Iesu. Talanoa i le auala na e vaaia ai le mana o le Atua i lou olaga. Atonu e te faaaofia ai ni vavega i aso taitasi e pei o le lagonaina o le filemu, le meaalofa o le ola i aso taitasi, po o le fesoasoani i galuega i aso taitasi. Valaaulia tamaiti e talanoa e uiga i vavega i o latou olaga, o vavega tetele faapea ma vavega laiti.

2 Tupu 5:1–15

E mafai ona ou filifili ia faamaoni, lotomaualalo, ma usitai.

Na manao Naamanu ia faamaloloina mai le lepela, ae na te lei mafaufauina se faatonuga faigofie na tuuina atu e Elisaia ia te ia: “Ina alu ia, ina taele faafitu i Ioritana” (2 Tupu 5:10). Mafaufau pe faapefea ona e faaaogaina lenei tala e aoao atu ai tamaiti e uiga i le faatuatua ia Iesu Keriso, lotomaualalo, ma le usiusitai.

Gaoioiga e Mafai Ona Fai

• Tusi le faatuatua, lotomaualalo, ma le usiusitai i luga o le laupapa, ma fesili i tamaiti po o le a le uiga o nei upu (tagai i le Faamaoni i le Faatuatua, 63–65, 100, 201–2). Valaaulia tamaiti e faitau le 2 Tupu 5:9–14. E mafai foi ona e faaali atu ni vaega o le vitio “Naaman and Elisha” (ChurchofJesuChrist.org). Na faapefea ona faaalia e Naamanu le faatuatua, lotomaualalo, ma le usiusitai i le Alii? Aisea e taua ai mo i tatou le i ai o nei uiga lelei?

• Fai i tamaiti e faamatala mai e uiga i se taimi na fesoasoani ai se uo ia i latou e filifili le mea sa’o. Faasoa mai foi sou lava aafiaga. Faitau faatasi le 2 Tupu 5:10-13 e aoao ai i le ala na fesoasoani ai auauna a Naamanu ia te ia e filifili ia usiusitai i le perofeta. O le a se mea e mafai ona tatou faia e fesoasoani ai i le tasi ma le isi ia mulimuli i lo tatou perofeta i lenei vaitaimi?

• Valaaulia tamaiti e faama’ea le itulau o gaoioiga ma faasoa atu i se tagata o le aiga se mea na latou aoaoina mai le tala ia Naamanu i le 2 Tupu 5:1–15.

2 Tupu 6:8–17

E le o tuua na o a’u.

Atonu e lagona e tamaiti o loo e aoaoina i nisi taimi le pei o le auauna a Elisaia—e le mautonu pe faapefea ona fetaiai ma luitau o i luma atu o i latou. E mafai ona e faaaogaina le tala i le 2 Tupu 6: 8–17 e aoao ai i latou ia “aua le fefe” aua e le tuua na o i latou e le Alii.

Gaoioiga e Mafai Ona Fai

• Faitau faatasi le 2 Tupu 6:15-17. Valaaulia se tasi o tamaiti e faafoliga o ia o le auauna a Elisaia a o fesili isi tamaiti e uiga i ona aafiaga, e pei o ona lagona ina ua siomia e le autau a Suria le aai pe na faapeī le vaai atu i le autau a le Atua. Talanoa ma tamaiti e uiga i taimi na latou lagona ai le tuua toatasi i le taumafai e ola i le talalelei. E faapefea ona fesoasoani mai le Alii ia tatou iloa e le o tuulafoaiina i tatou?

• Usu se pese e faatatau i le faalagolago i le Alii, e pei o le “Ou te lē Masalo” (Viiga, nu. 87). O le a le mea ua aoao mai e le pese e uiga i le faatuatua i le Alii?

aikona o le aoaoina

Uunaia le Aoaoina i le Aiga

Valaaulia tamaiti e faasoa atu ni mea na tutupu i o latou aiga ina ua latou iloaina le aao o le Atua i o latou olaga. Uunaia i latou e fai atu i tagata o o latou aiga e faasoa mai ni aafiaga talitutusa.

Faaleleia o Lo Tatou Aoao Atu

E tele auala e aoao ai tamaiti. “O au taumafaiga e aoao tamaiti o le a sili ona aoga a o e faaaogaina ni metotia eseese o le aoao atu,” e aofia ai tala, fesoasoani vaaia, ma musika (Aoao Atu i le Ala a le Faaola,25).

itulau o gaoioiga: E mafai ona ou filifili e fai le mea ua poloai mai ai le Atua e ala i Lana perofeta