Ua Tauva Elia ma Perofeta a Paala, saunia e Jerry Harston

27 Iuni–3 Iulai

1 Tupu 17–19

“Afai o Ieova o le Atua ia, ia Outou Mulimuli Atu ia te Ia”

O le toatele o tamaiti e fiafia i tala. Fesoasoani i tamaiti ia iloa upumoni i tala o loo maua i le 1 Tupu 17–19 lea o le a faamalosia ai o latou faatuatua ia Iesu Keriso.

Tusi Faamaumau Ou Lagona Uunai

Valaaulia le Fefaasoaai

Faaali atu i tamaiti ata i le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga. Fai atu i tamaiti e faasoa mai mea latou te iloa e uiga i tala o loo faaali mai i ata. O a mea tatou te aoaoina mai i nei tala?

Aoao atu le Aoaoga Faavae: Tamaiti Laiti

1 Tupu 17

E faamanuia e le Alii i latou e faatuatua.

O loo faamaumauina i le1 Tupu 17 le tele o faataitaiga o le faatuatua tele. O se taunuuga o le i ai o se faatuatua tele, na fafagaina Elia e oreva i le taimi o se oge, o se fafine ua oti lana tane ma lana tama na faateleina a la meaai, ma sa faatu mai e Elia le tama tama a le fafine ua oti lana tane mai le oti.

Gaoioiga e Mafai Ona Fai

• Faaali atu ni ata po o ni mea faitino lea e o faatasi ma tala i le 1 Tupu 17, e pei o manulele, falaoa, po o se tamaitiiti. Faamatala atu i tamaiti tala nei (“Elia le Perofeta” i le Tala o le Feagaiga Tuai e mafai ona fesoasoani), ma valaaulia i latou e saili le ata po o le mea faitino lea e o faatasi ma tala taitasi. Faamamafa atu sa faatuatua uma Elia ma le fafine ua oti lana tane ia Iesu Keriso ma maua ni faamanuiaga maoae.

• Fesoasoani i tamaiti e mafaufau i ni auala e mafai ai ona latou faailoa atu o loo i ai so latou faatuatua i le Tama Faalelagi ma Iesu Keriso, o lona uiga latou te talitonu ia i Laua ma faatuatua ia i Laua. Usu faatasi ma i latou se pese e uiga i le faatuatua, e pei o le “Ua Ou Iloa o Soifua Lo‘u Tama” (Tusipese a Tamaiti, 8).

1 Tupu 18:17–39

E mafai ona ou filifili e mulimuli ia Iesu Keriso.

Na uunaia e Elia tagata Isaraelu e fai se filifiliga e mulimuli ia Iesu Keriso. Fesoasoani i tamaiti ia iloa e mafai ona latou faia lea foi filifiliga e tasi.

Gaoioiga e Mafai Ona Fai

• Faamalamalama atu i tamaiti e lei mautinoa e tagata i le taimi o Elia pe na latou mananao e mulimuli i le Alii. Faasoa atu le tala o le auala na valaaulia ai i latou e Elia e filifili ia mulimuli i le Alii, o loo maua i le 1 Tupu 18:17–39 (tagai foi ia “Elia ma Faitaulaga a Paala” i Tala o le Feagaiga Tuai). Tau atu i tamaiti pe aisea e te filifili ai e mulimuli ia Iesu Keriso, ma fesili atu ia i latou pe aisea latou te filifili ai e mulimuli ia te Ia.

• Faitau atu i tamaiti po o le a le tala a Elia i tagata: “Afai o le Alii o le Atua ia, ia Outou Mulimuli Atu ia te Ia” (1 Tupu 18:21). O le a le uiga o le mulimuli ia Keriso? Fesoasoani i tamaiti e mafaufau i ni mea patino o le a latou faia e mulimuli ai ia Iesu Keriso, ma valaaulia i latou e tusi ni a latou ata o loʻo faia na mea.

  

  E mafai ona tatou filifili e mulimuli ia Iesu Keriso.

1 Tupu 19:9–12

E tautala mai le Agaga Paia ia te a’u i se leo filemu, ma le itiiti.

Faatasi ai ma sina taitaiga, e mafai ona iloa e tamaiti laiti le faatosinaga a le Agaga Paia i o latou olaga. Mafaufau loloto pe faapefea ona e fesoasoani ia i latou.

Gaoioiga e Mafai Ona Fai

• Aotele atu mo tamaiti le tala o loo maua i le 1 Tupu 19:9–12, ma faitau fuaiupu 11–12. Valaaulia i latou e fai ni taga e fai ma sui o se matagi malosi, mafuie, ma le afi. Ona valaaulia lea o i latou e matua nonofo filemu a o e faitau i le faaiuga o le fuaiupu 12 i se leo malu: “e mulimuli i le mafuie o le afi.” Fai atu ia i latou e taumafai e tautala i se leo filemu, ma itiiti. Faamatala atu ia i latou e uiga i taimi na e lagona ai se musumusuga mai le Agaga Paia.

• Fesoasoani i tamaiti ia iloa le taimi latou te ono lagona ai le uunaiga a le Agaga Paia. Mo se faataitaiga, ta pe usu se pese migao e uiga ia Iesu, ma fesili atu ia i latou pe faapeī ni o latou lagona pe a latou mafaufau e uiga ia te Ia. Fesili atu ia i latou po o a ni o latou lagona i le taimi o isi gaoioiga faʻaaloalo, e pei o le tatalo ma o latou aiga pe taumamafa i le faamanatuga. Faamatala atu o nei lagona e sau mai le Agaga Paia. Tau atu i tamaiti pe na faapefea ona faamanuia lou olaga i le mana o le Agaga Paia.

Aoao atu le Aoaoga Faavae: Tamaiti Matutua

1 Tupu 17:8–16

A fetalai mai le Alii ia te aʻu e osi taulaga, e mafai ona ou usitai i le faatuatua.

O le fafine ua oti lana tane i Sarefata na talitonu i le Alii ma Lana perofeta, e ui lava na faatonuina o ia e faia se osigataulaga sili. E mafai ona fesoasoani lenei tala i tamaiti pe a fetalai mai le Alii e osi a latou taulaga.

Gaoioiga e Mafai Ona Fai

• Faitau atu i tamaiti le 1 Tupu 17:8–16. Valaaulia i latou e faatino le tala a o e faitauina mo le taimi lona lua. Taofi i vaega eseese ma fesili ia i latou pe o a ni o latou lagona pe ana fai o i latou o Elia po o le fafine ua oti lana tane. Valaaulia i latou e faasoa mai mea na latou aoao mai lenei tala.

• Valaaulia se tamaitiiti e tusi i luga o le laupapa se ata o le mea na taʻu atu e le Alii i le fafine ua oti lana tane e ave ia Elia (tagai 1 Tupu 17:12–13). Valaaulia se isi tamaitiiti e tusi se ata o le taui na maua e le fafine ua oti lana tane (tagai 1 Tupu 17:15–16). O a ni nai mea ua poloaiina ai i tatou e le Alii e ositaulaga ai? Fai atu i tamaiti e faamatala mai pe na faapefea ona faamanuiaina i latou i le faia o osigataulaga.

1 Tupu 18:17–39

E mafai ona ou filifili e mulimuli ia Iesu Keriso.

Sa le mautonu tagata Isaraelu e uiga i le mulimuli i le Alii. Mafaufau loloto pe faapefea ona e musuia tamaiti ina ia tuuto i lo latou avea ma soo.

Gaoioiga e Mafai Ona Fai

• Tofi ni tamaiti e faitau ni fuaiupu mai le 1 Tupu 18:17–39 ma tusi se ata o le mea o lo o faamatala mai e ana fuaiupu. Fesoasoani i tamaiti ia malamalama i fuaiupu pe a manaomia. Ona tuu atu lea ia i latou e faaaoga a latou ata e faamatala ai le tala. O le a le mea ua aoao mai e lenei tala ia i tatou e uiga ile Alii?

• Fai i tamaiti e talanoa e uiga i taimi na latou filifili ai i le va o ni mea eseese se lua. O le a le mea na fesoasoani i a latou filifiliga? Fesoasoani ia i latou e mafaufau i ni tulaga atonu latou te manaomia ai ona filifili pe mulimuli ia Iesu Keriso pe leai. O a ni mea moni mai le tala i le 1 Tupu 18:17–39 e mafai ona fesoasoani ia i latou e filifili ai?

1 Tupu 19:9–12

E tautala mai le Agaga Paia ia te a’u i se leo filemu, ma le itiiti.

Ua tumu le lalolagi i leo le mautonu e faigata ai ona lagona le leo filemu ma le itiiti o le Agaga. E faapefea ona e fesoasoani i tamaiti ina ia lagona?

Gaoioiga e Mafai Ona Fai

• Fai i tamaiti e faalogo lelei a o e faitau lemu atu ia i latou le 1 Tupu 19:11–12 . Valaaulia i latou e saili le 1 Tupu 19 e saili ai fuaiupu na e faitauina ma iloa le mea na faia e Elia. Talanoa e uiga i mea na latou faia e faalogo ai i mea na e fai atu ai, ma fesoasoani ia latou faatusatusa lenei mea i mea e tatau ona tatou faia e faalogo ai i le “leo filemu ma le itiiti” o le Agaga. Tuu atu i tamaiti e auauai i le faitauina lemu o isi fuaiupu mai le 1 Tupu 19 ao sue e isi tamaiti na fuaiupu i tusitusiga paia.

• Faasoa atu i tamaiti nisi o mau faaopoopo e faamatala ai le auala e fesootai mai ai le Agaga ia i tatou (tagai i le Taiala i Tusitusiga Paia, “Inspiration, Inspire,” scriptures.ChurchofJesusChrist.org). Fai i tamaiti e talanoa e uiga i taimi na latou lagonaina ai le Agaga Paia o taitaiina i latou pe molimau atu ia i latou. O a mea na latou faia? O le a se mea e mafai ona faalavelaveina i tatou mai le iloaina o le Agaga? Faitau faatasi le Moronae 4:3, ma uunaia tamaiti e filifili se mea se tasi o le a latou faia ina ia latou “maua pea lona Agaga e faatasi ma i latou.”

Uunaia le Aoaoina i le Aiga

Valaaulia tamaiti e mafaufau i se mea latou te mananao e fai ona o mea ua latou aoaoina i le aso. Mo se faataitaiga, e mafai ona latou faatuina ni sini faaleagaga, faaleatamai, faaletino, po o le va fealoai ia avea atili e pei o Iesu Keriso.

Faaleleia o Lo Tatou Aoao Atu

Fesoasoani i tamaiti ia iloa le Agaga. “O se tasi o mea aupito sili ona taua e mafai ona e faia o se faiaoga o le fesoasoani lea ia i latou e te aoaoina e iloa le aafiaga o le Agaga Paia. … Fesoasoani [i tamaiti] e faafesootai o latou lagona faaleagaga ma le faatosinaga a le Agaga Paia.” (Aoao Atu i le Ala a le Faaola,11.)