Ua Tauva Elia ma Perofeta a Paala, saunia e Jerry Harston

27 Iuni–3 Iulai

1 Tupu 17–19

“Afai o Ieova o le Atua Ia, ia Outou Mulimuli Atu ia te Ia”

A e faitau i tusitusiga paia, o loo e faaalia lou faatuatua, lea e tapena ai lou loto ma lou mafaufau e faalogo i le “leo filemu ma le itiiti” o le Agaga (1 Tupu 19:12).

Tusi faamaumau Ou Lagona Uunai

Sa taapeape solo le aiga o Isaraelu. O le lotogatasi ma le manuia lea na maua i lalo o le [taitaiga] a Tavita ma Solomona ua leva ona te’a, ma o le sootaga faafeagaiga a le nuu ma le Alii, mo le toatele o tagata, sa na’o se manatuaga ua leva lava. Na vaeluaina le Malo o Isaraelu, o ituaiga e sefulu na faia le Malo i Matu o Isaraelu, a o ituaiga e lua na faia le Malo i Saute o Iutaia. O nei malo e lua sa tau fai maluelue uma faaleagaga, na taitaia e tupu o e na solia a latou feagaiga male Alii ma faatosinaina isi ia fai foi faapea (tagai i le 1 Tupu 11–16). Ae peitai, sa sili ona ogaoga le liliuese i le Malo i Matu, lea sa uunaia ai e le Tupu o Aapo ia Isaraelu e ifo i le atua ese o Paala.

Sa o le tulaga lea na valaauina ai le perofeta o Elia e talai atu. O le tala i lana galuega ua faamanino mai ai, o le faatuatua patino i le Alii e mafai ona lauolaola i e amiotonu e tusa lava po o totonu o se siosiomaga amioleaga. O ni isi taimi e tali mai ai le Alii i se faatuatua faapena i ni vavega ofoofogia, faalauaitele, e pei o le to ifo o le afi mai le lagi. Ae e galue foi o Ia i vavega filemu, ma lē faalauaiteleina, e pei o le taulimaina o manaoga patino o se fafine faatuatua ua oti lana tane ma lana tama tama. Ma o le tele lava o taimi o Ana vavega e matuai patino lava e na’o oe lava e te iloaina—mo se faataitaiga, pe a faaali mai e le Alii o Ia lava ma Lona finagalo e ala mai i “se leo filemu ma le itiiti” (1 Tupu 19:12).

Mo nisi faamatalaga e uiga ia Elia, tagai i le “Elijah” i le Bible Dictionary.

Manatu mo Suesuega Faaletagata Lava Ia o Tusitusiga Paia

1 Tupu 17:1–16

O se valaaulia e ositaulaga o se avanoa e faaali ai lo’u faatuatua.

I le taimi muamua e foliga mai e faigata ona malamalama pe aisea na fai atu ai le perofeta o Elia i le fafine Sarefata ua oti lana tane e avatu se meaai ma se vai mo ia a’o le’i aai i laua ma lana tama tama na matelaina i le fiaai. Ae o le talosaga a Elia e mafai foi ona vaaia o se faamanuiaga mo lenei aiga ausane. Sa laua manaomia faamanuiaga a le Alii, ma o le ositaulaga e masani ona aumaia ai faamanuiaga—e aofia ai faamanuiaga o le faatuatua malosi atu.

Ao e faitau i le tala lenei, ia tuu oe lava i le tulaga o lenei fafine maoae ua oti lana tane. O le a se mea e faafiafiaina ai oe e uiga ia te ia? Mafaufau i avanoa ua e maua e faaaoga ai lou faatuatua—e aofia ai avanoa e ositaulaga ai. E mafai faapefea ona e atili faapei o lenei fafine ua oti lana tane?

Tagai foi i le Mataio 6:25–33; Luka 4:24–26; Lynn G. Robbins, “O Le Sefuluai—O se Poloaiga Foi mo ē Le Tagolima,” Liahona, Me 2005, 34–36.

1 Tupu 18

“Afai o Ieova o le Atua Ia, ia outou mulimuli atu ia te Ia.”

Atonu na manatu Isaraelu sa lelei a latou mafuaaga e tapuai ai ia Paala e ui lava i le poloaiga a le Alii, “Aua ne’i e fai mo oe ni atua ese i o’u luma” (Esoto 20:3). Na lauiloa Paala o le atua o le matagi ma le timu, ma ina ua mavae tausaga e tolu o le lamala, sa matou matuai manaomia lava se matagi. Ma o le tapuai ia Paala sa taliaina e le lautele ma faamaoniaina e le tupu ma le masiofo. Ao e faitau i le 1 Tupu 18, mafaufau i soo se tulaga i lou olaga e mafai ona faatusaina i le tulaga sa i ai Isaraelu. Pe na i ai se taimi na e le mautonu ai e uiga i le mulimuli i le Alii ona o nisi avanoa e filifili ai ia e foliga mai e talafeagai ma faamalosia? (tagai i le 1 Tupu 18:21). I mea na tutupu o loo maua i le mataupu lea, o le a sou manatu i le mea o loo taumafai le Alii e aoao atu i tagata e uiga ia te Ia lava ma e uiga ia Paala? O a ni aafiaga ua aoaoina ai oe i ni upumoni faapena?

Atonu e manaia le maitau o mea na tautala ai ma faia e Elia i lenei mataupu e faaalia ai lona faatuatua i le Alii. O le a se mea ua e aoao mai ia Elia e uiga i le faatuatua?

Tagai foi i le Iosua 24:15; 2 Nifae 2:26–28; D. Todd Christofferson, “Filifiliga ma Tautinoga” (worldwide devotional for young adults, Jan. 12, 2020), ChurchofJesusChrist.org.

O se faaaliga faafaatusa o le 1 Tupu 19:11–12. O Le Perofeta, © Robert Booth Charles/Bridgeman Images

1 Tupu 19:1–18

E masani ona fetalai mai le Alii i auala filemu, ma faatauvaa.

Ina ua faalogo le Masiofo o Iesepela i le mea na tupu i ana faitaulaga i luga o le Mauga o Karamelu, sa le’i liliu o ia—sa matuai ita lava o ia. O le fefe ai mo lona ola, sa sola ai Elia i le vao ma saili sulufaiga ai i totonu o se ana. O iina, i le tauivi ai ma le tuuatoatasi ma le lotovaivai, sa ia maua ai se aafiaga mai le Alii lea sa matuai ese lava mai le mea na tupu i luga o le Mauga o Karamelu. O le a se mea ua e aoao ai mai le aafiaga o Elia i le 1 Tupu 19:1–18 e uiga i le ala e fesootai mai ai le Alii ia te oe i taimi o ou mafatiaga? Mafaufau loloto i taimi i lou olaga na e lagonaina ai Lona siufofoga. O a ni mea e tatau ona e faia ia maua soo ai Lana taitaiga?

Mafaufau loloto i upu ma fuaitau na faaaoga i fuaiupu nei e faamatala ai le ala e fesootai mai ai le Alii ia i tatou: Helamana 5:30; 3 Nifae 11:3–7; Mataupu Faavae ma Feagaiga 6:22–23; 8:2–3; 9:8–9; 11:12–14; 36:2.

Tagai foi i le Salamo 46:10; 1 Nifae 17:45; Russell M. Nelson, “Faalogo ia te Ia,” Liahona, Me 2020, 88–92.

1 Tupu 19:19–21

O le auauna atu i le Alii e faamuamua lava i lo o popolega a le lalolagi.

O le mea moni e faapea, na anaina e Elisaia ni povipo’a suaeleele e 12 ua faaalia ai atonu o ia o se tagata mauoa. O le a se mea e faagaeetia ai oe e uiga i ana faatinoga ua tusi faamaumauina i le 1 Tupu 19:19–21? E mafai faapefea ona e mulimuli i le faataitaiga a Elisaia?

Tagai foi i le Mataio 4:18–22.

Manatu mo Suesuega Faaleaiga o Tusitusiga Paia ma Afiafi Faaleaiga

1 Tupu 17:1–16.O le vitio “Elijah and the Widow of Zarephath” (ChurchofJesusChrist.org) ma le ata o loo i le otootoga lenei, e mafai ona fesoasoani i lou aiga e vaai faalemafaufau i le tala o loo i le 1 Tupu 17:1–16. A uma ona faitau ia fuaiupu ma vaavaai i nei punaoa, e mafai e tagata taitoatasi o le aiga ona lisi ni uiga musuia sa i ai i le fafine ua oti lana tane. O le a se mea ua fetalai mai le Alii ia tatou faia e faaali atu ai lo tatou faatuatua?

1 Tupu 18.O “Elia ma Faitaulaga a Paala” (i le Old Testament Stories) e mafai ona fesoasoani i lou aiga ia iloa le tala i le 1 Tupu 18. Pe o i ai ni mea o taofiofia i tatou mai le tuuto atoatoa i le Alii? E mafai faapefea ona tatou faaalia lo tatou sauniuni e filifili o Ia? (tagai i le fuaiupu 21).

1 Tupu 19:11–12.O le a se mea o le a fesoasoani i lou aiga ia malamalama ai i le taua o le faalogo i le “leo filemu ma le itiiti? E mafai ona outou faitau faatasi i le 1 Tupu 19:11–12 i ni leo lemu pe usu fifilemu se pese e uiga i le Agaga, e pei o le “O Le Agaga Paia” (Tusipese a Tamaiti, 56). Atonu e te faaopoopoa i ai ni isi o leo faalavelave e faaali atu ai auala e taumafai Satani e taofiofi ai i tatou mai le lagonaina o le leo itiiti, ma le filemu. E mafai e tagata o le aiga ona faasoa mai ni mea latou te faia ia nofouta ai i uunaiga a le Agaga.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “O Le Agaga Paia,” Tusipese a Tamaiti, 56.

Faaleleia o Suesuega Faaletagata Lava Ia

Tusi faamaumau ou lagona uunai. A e lagonaina le tautala atu o le Agaga ia te oe, mafaufau e tusi mea e te lagona o loo Ia ta’uina atu ia te oe. O le mafaufau e tuu nei uunaiga i upu e mafai ona fesoasoani e te mafaufau loloto i ai ma teufatuina i latou.

Fafine Sarefata ua Oti Lana Tane, saunia e Rose Datoc Dall