malumalu o Serupapelu

Ata o le malumalu o Serupapelu, saunia e Sam Lawlor

18–24 Iulai

Esera 1; 3–7; Neemia 2; 4–6; 8

“O Loo Faia e A’u le Galuega Tele”

Na aoao mai Peresitene Ezra Taft Benson, “O le afioga a le Atua … e i ai le mana e faamalosia ai le Au Paia ma faaauupegaina ai i latou i le Agaga ina ia mafai ona latou tetee atu i le leaga, ae taofi mau i le lelei, ma maua le olioli i lenei olaga” (Aoaoga a Peresitene o le Ekalesia: Ezra Taft Benson [2014], 118).

Tusifaamaumau Ou Lagona Uunai

Na taofia faatagataotaua ia tagata Iutaia i Papelonia mo le tusa ma le 70 tausaga. Na aveesea mai ia i latou ia Ierusalema ma le malumalu, ma na galo i le toatele o i latou a latou tautinoga i le tulafono a le Atua. Ae sa le’i faagaloina e le Atua i latou. O le mea moni, sa Ia tautino atu e ala mai i Lana perofeta, “Ona ou asiasi ai lea ia te outou, ma ou faataunuuina la’u upu lelei ia te outou, i le faafoisia mai outou i lenei mea” (Ieremia 29:10). O le faamaoni ai i lenei valoaga, sa faia ai e le Alii le ala mo tagata Iutaia e toe foi mai ai, ma sa Ia faatuina a’e ni auauna o e na ausiaina “le galuega tele” mo Lona nuu (Neemia 6:3). O nei auauna na aofia ai se kovana na igoa ia Serupapelu, o lā na vaaia le toefausiaina o le maota o le Alii; o Esera, o se faitaulaga ma se tusiupu o lē na toe faaliliuina atu loto o tagata i le tulafono a le Alii; ma Neemia, sa avea mulimuli ane ma kovana o Iuta o lē na taitaia le galuega o le toefausiaina o pa puipui faataamilo i Ierusalema. Ioe, sa latou fetaia’i ma le tetee, ae sa latou mauaina foi le lagolagosua mai punavai sa le’i mafaufauina. O o latou aafiaga e mafai ona logo ma musuia ai i tatou, aua o loo tatou faia foi se galuega tele. Ma e pei o i latou, o la tatou galuega e matele foi ina faatatau i le maota o le Alii, le tulafono a le Alii, ma le puipuiga faaleagaga tatou te maua ia te Ia.

Mo se vaaiga aoao i tusi o Esera ma Neemia, tagai i le “Esera” ma le “Neemia” i le Bible Dictionary.

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Esera 1

E musuia e le Alii ia tagata e faataunuu ai Ona faamoemoega.

Ina ua uma ona faatoilaloina e Peresia ia Papelonia, sa musuia e le Alii ia le tupu o Peresia, o Kuresa e auina atu se vaega o tagata Iutaia i Ierusalema e toe fau le malumalu. Ao e faitau i le Esera 1, ia maitau le mea sa manao Kuresa e fai e lagolago ai tagata Iutaia i lenei galuega taua. O a ni auala o e vaaia ai le Alii o galue e tauala atu i alii ma tamaitai o siomia oe, e aofia ai latou e le o ni tagata o Lana Ekalesia? O le a se mea o fautuaina atu e lenei mea ia te oe e uiga i le Alii ma Lana galuega?

Tagai foi i le Isaia 44:24–28.

Esera 3:8–13; 6:16–22

E mafai e malumalu ona aumaia le olioli ia te a’u.

Ina ua osofaia e Papelonia ia Ierusalema, sa latou faamo’amo’aina le malumalu ma susunu e tau i le palapala (tagai i le 2 Tupu 25:1–10; 2 Nofoaiga a Tupu 36:17–19). Mata o le a sou lagona pe ana e i ai faatasi ma tagata Iutaia o e na vaaitino i lenei mea? (tagai i le Salamo 137). Maitau ia faalogona o tagata Iutaia, i le fiasefulu tausaga mulimuli ane, ina ua faatagaina i latou e toe foi ma toe fau le malumalu (tagai i le Esera 3:8–13; 6:16–22). Mafaufau loloto i ou lava lagona e uiga i le malumalu. Aisea e avea ai malumalu o se punavai o le olioli? E mafai faapefea ona e faaalia lou loto faafetai i le Alii mo malumalu?

Mo faataitaiga i onaponei o le olioli i le fausiga o malumalu, tagai i vitio “Practice, Celebration, Dedication: Temple Blessings i El Salvador” ma le “The Laie Hawaii Temple Youth Cultural Celebration” (ChurchofJesusChrist.org).

o se aiga o loo savalivali i laufanua o le malumalu

E mafai ona avea le malumalu ma se punavai o le olioli i o tatou olaga.

Esera 4–6; Neemia 2; 4; 6

E mafai ona ou fesoasoani i le galuega a le Atua ia alualu i luma e ui lava i mea faafeagai.

E seāseā leai ni tetee i le galuega a le Alii, ma sa mautinoa lava le moni o lenei mea i taumafaiga na taitaiina e Serupapelu ma Neemia. I tulaga uma e lua, o “e na ita mai ia Iuta” (Esera 4:1) o tagata Samaria—o e na tupuga mai i tagata Isaraelu o e na fefiloi ma tagata o Nuuese. O le faitau e uiga i lo latou tetee i le fausiga o le malumalu (tagai i le Esera 4–6) e ono taitai atu ai oe e mafaufau loloto i le tetee o loo feagai ma le galuega a le Atua i aso nei, ma le ala e ono mafai ona e tali atu ai pe a oo mai ia tetee.

E faapena foi, le faitau atu e uiga i le galuega a Neemia i le toe lipeaina o papuipui o Ierusalema (tagai i le Neemia 2; 4; 6) atonu e te manatunatu ai i le galuega o loo finagalo le Atua e te faia. O le a se mea ua e aoao mai i le faataitaiga a Neemia?

Tagai foi i le Dieter F. Uchtdorf, “O Loo Tatou Faia le Galuega Tele ma Ua Le Mafai ona Tatou O Ifo i Lalo,” Liahona, Me 2009, 59–62.

Esera 7; Neemia 8

E faamanuiaina a’u pe a ou faitau i tusitusiga paia.

E ui lava ina sa uma ona toefauina le malumalu, sa tauivi faaleagaga lava tagata Ierusalema, o se vaega, mo le tele o augatupulaga, ona sa faatapulaaina lo latou mauaina o “le tusi o le tulafono a Mose” (Neemia 8:1). Sa maua e Esera le tusiupu le faatagaga mai le tupu o Peresia e alu atu i Ierusalema, lea sa ia “aumai ai … le tulafono i luma o le faapotopotoga” (Neemia 8:2). E mafai faapefea ona e mulimuli i le faataitaiga a Esera e pei ona faamatalaina i le Esera 7:10? Ao e faitau i le Neemia 8, lea o loo aumai ai le tala i le faitauina atu e Esera o le tulafono i tagata, o a ni ou manatu e uiga i le mana o le upu a le Atua i lou olaga?

Tagai foi i le Teachings: Ezra Taft Benson, 115–24.

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Esera 3:8–13; 6:16–22.Na faapefea ona faaalia e tagata Iutaia lo latou olioli mo le malumalu a o fausiaina ma sosoo ai ma lona faapaiaina? O le a se mea o tatou faia e faailoa atu ai lo tatou olioli mo le malumalu? Atonu e mafai e lou aiga ona matamata i ata o malumalu ma talanoa i auala e aumaia ai e malumalu le olioli ia te outou (tagai i le temples.ChurchofJesusChrist.org).

Esera 7:6, 9–10, 27–28.E feololo ni taimi i nei fuaiupu, na tusia ai e Esera e faapea, sa i ai le aao o le Alii i ona luga a o ia malaga atu i Ierusalema. Mata o le a le uiga o lenei fasifuaitau? Na faapefea ona tatou lagonaina le aao o le Alii i o tatou luga? Atonu e mafai e tagata o le aiga ona faasoa mai ni faataitaiga mai o latou olaga.

Neemia 2; 4; 6.O le tala ia Neemia e mafai ona musuia ai tagata o le aiga pe a latou fetaiai ma tetee a o latou faia “le galuega tele” (Neemia 6:3). E mafai e tagata o le aiga ona fau se pa mai mea faitino o loo i lou fale a o outou faitau faatasi i fuaitau autu (e pei o le Neemia 2:17–20; 4:13–18; 6:1–3). O le a se mea ua tatou aoao mai ia Neemia e uiga i le feagai ma le tetee? O le a le galuega tele e finagalo le Alii tatou te faia? O faapefea ona faamalosia i tatou e le Alii ia faatoilalo le tetee i lenei galuega?

Neemia 8:1–12.I le Neemia 8, na faitau atu ai e Esera le tulafono a Mose i se nuu o e na pulunaunau e faalogo i le afioga a le Atua. O le faitau o fuaiupu 1–12 e mafai ona fesoasoani e faaloloto atili ai le talisapaiaina e lou aiga o le afioga a le Atua. Na faapeī lagona o tagata e uiga i le tulafono a le Atua? E mafai faapefea ona tatou fesoasoani i le tasi ma le isi ia “faamatalaina atu … le mea ua faitauina”? (fuaiupu 8).

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Ou Te Fia Vaai i le Malumalu,” Tusipese a Tamaiti, 99.

Faaleleia o Lo Tatou Aoao Atu

Fefaasoaa’i mau o se aiga. I le taimi o le tou suesuega faaleaiga o tusitusiga paia, tuu atu i tagata o le aiga e faasoa mai ni fuaitau mai a latou suesuega faaletagata lava ia e faapitoa le anoa ia i latou.

O Esera o loo faitau atu tusitusiga paia i tagata

Atatusi o Esera o loo faitau atu tusitusiga paia i tagata i Ierusalema, na saunia e H. Willard Ortlip, © Providence Collection/licensed from goodsalt.com