O Le Sosola Ese o Pagota, saunia e James Tissot ma isi

11–17 Iulai

2 Tupu 17–25

“Ua Ia Faatuatua ia Ieova le Atua o Isaraelu”

Ina ua faalogo Iosia i upu mai le tusi o le tulafono, sa tali atu o ia ma le faatuatua. E mafai faapefea ona e tali atu ma le faatuatua i mea e te faitau i ai i le 2 Tupu 17–25?

Tusifaamaumau Ou Lagona Uunai

E ui lava i le auaunaga mataina a le perofeta o Elisaia, ae sa faaauau lava le faiifo o le faaleagaga o le Malo i Matu o Isaraelu. Sa faalauiloa e tupu amioleaga le ifo i tupua, ma sa i ai taua e tele ma le liliuese. Mulimuli ane, sa faatoilaloina ai e le Malo o Asuria ma faataapeapeina ai ituaiga e sefulu o Isaraelu.

O le taimi lea, sa le’i lelei foi le Malo i Saute o Iuta; sa matuai salalau iina le ifo i tupua. Ae i le lotolotoi o lenei papala faaleagaga, o tala faaleagaga o loo ta’ua ai ni tupu amiotonu se toalua o e, mo se taimi, na liliuina mai o laua tagata i le Alii. O le tasi o Esekia. I le taimi o lana nofoaiga, o le au Asuria, o e na fou lo latou manumalo i matu, na faatoilaloina le tele o le itu i matu. Ae sa faaalia e Esekia ma lona nuu le faatuatua i le Alii, o lē sa laveaiina Ierusalema i se auala faavavega. Mulimuli ane, i le mavae ai o se isi periota o le liliuese, na amata ai le nofoaiga a Iosia. O se vaega na musuiaina ai, o le toe mauaina lea o le tusi o le tulafono, na aumaia ai e Iosia ni suiga na toefaafouina ai le olaga faalelotu o le toatele o lona nuu.

O le a se mea tatou te aoao mai i nei vaega susulu e lua i ni tausaga pogisa o le talafaasolopito o Iuta? Faatasi ai ma isi mea, atonu e te mafaufau loloto i le mana o le faatuatua ma le [mana] o le upu a le Atua i lou olaga. E pei o Isaraelu ma Iuta, tatou te faia uma lava ia filifilia lelei ma filifiliga leaga. Ma a tatou lagonaina e manaomia ni suiga i o tatou olaga, atonu o faataitaiga a Esekia ma Iosia e mafai ona musuia ai i tatou e “faatuatua ia Ieova lo matou Atua” (2 Tupu 18:22).

Tagai foi i le 2 Nofoaiga Tupu 29–35; o le vaega o “Thoughts to Keep in Mind” “Jesus Will Say to All Israel, ‘Come Home.’”

Manatu mo Suesuega Faaletagata Lava Ia o Tusitusiga Paia

2 Tupu 18–19

E mafai ona ou faamaoni i le Alii i le taimi o luitau.

O le toatele o i tatou ua oo i ni taimi e luitauina ai o tatou faatuatua. Mo Esekia ma lona nuu, o se tasi o na taimi na oo mai ina ua osofaia e le autau a Asuria ia Iuta, na faaleagaina ai le tele o nuu, ma agai atu i Ierusalema. Ao e faitau i le 2 Tupu 18–19, vaai faalemafaufau e faapea sa e nofo i Ierusalema i le aluga o lenei taimi. Mata na faapeī ou lagona, mo se faataitaiga, i le faalogo atu i taufaifaiga a le au Asuria e pei ona tusi faamaumauina i le 2 Tupu 18:28–37 ma le 19:10–13? O le a se mea e te aoao mai i le mea na faia e Esekia e tali atu ai? (tagai i le 2 Tupu 19:1–7, 14–19). Na faapefea ona lagolagoina e le Alii ia Esekia? (tagai i le 2 Tupu 19:35–37). Mafaufau loloto pe na faapefea ona Ia lagolagoina oe i taimi luitauina.

Atonu foi e te mafaufau loloto i le faamatalatalaina o Esekia i le 2 Tupu 18:5–7. O a ni mea o fautua mai e nei fuaiupu e uiga i le pogai sa mafai ai e Esekia ona tumau faamaoni ina ua oo atu luitau? E mafai faapefea ona e mulimuli i lana faataitaiga?

Tagai foi i le 3 Nifae 3–4; D. Todd Christofferson, “Tumau ma Mausali i le Faatuatua o Keriso,” Liahona, Nov. 2018, 30–33.

2 Tupu 19:20–37

O mea uma o loo i aao o le Alii.

O Sanerivi, le tupu o Asuria, na i ai ni mafuaaga lelei e talitonu ai o le a faatoilalo e lana autau ia Ierusalema. Na faatoilalo e Asuria le tele o malo, e aofia ai ma Isaraelu—aisea la o le a ese ai Ierusalema? (tagai i le 2 Tupu 17; 18:33–34; 19:11–13). Ae sa i ai se savali a le Alii mo Sanerivi, sa tauala atu i le perofeta o Isaia, ma o loo tusi faamaumauina i le 2 Tupu 19:20–34. E faapefea ona e aoteleina lenei savali? O a ni upumoni e te maua i nei fuaiupu e fesoasoani e te maua ai le faatuatua i le Alii ma Lana fuafuaga?

Tagai foi i le Helamana 12:4–23; Mataupu Faavae ma Feagaiga 101:16.

2 Tupu 21–23

O tusitusiga paia e mafai ona liliu atu ai lo’u loto i le Alii.

Pe na e lagonaina ea e i ai se mea faaleagaga e le o ia te oe? Atonu na e lagonaina e mafai ona malosi tele atu lou sootaga ma le Atua. O le a se mea na fesoasoani e te toe liliu atu ai ia te Ia? Mafaufau loloto i nei fesili ao e faitau e uiga i le ala na o ese ai le Malo o Iuta mai le Atua i lalo o le Tupu o Manase (tagai i le 2 Tupu 21) ma le ala na fesoasoani ai le Tupu o Iosia ia i latou e toe faatuuto i latou lava ia te Ia (tagai i le 2 Tupu 22–23). O le a se mea na musuiaina ai Iosia ma lona nuu? Atonu e musuia oe i le tala lenei e toe faafou lou tuuto e “mulimuli atu ia Ieova … i [lou] loto atoa ma [lou] agaga atoa” (2 Tupu 23:3).

Ao e faitau i nei mataupu, mafaufau foi e suesue le mataupu 6 i le Aoaoga a Peresitene o le Ekalesia: Spencer W. Kimball ([2006], 59–68), o loo faapea ona fautuaina mai ai e Peresitene Kimball o le tala i le Tupu o Iosia “o se tasi o tala aupito matagofie i tusitusiga paia uma” (itulau 62). Aisea na manatu ai faapena ia Peresitene Kimball? O le a se mea e te maua i upu a Peresitene Kimball, ae maise lava o lana saunoaga e uiga i le Tupu o Iosia, e fesoasoani e te faaaogaina ai le 2 Tupu 22–23 i lou olaga?

Tagai foi i le Alema 31:5; Takashi Wada, “Taumamafa Fiafia i le Afioga a Keriso,” Liahona, Me 2019, 38–40; “Josiah and the Book of the Law” (vitio), ChurchofJesusChrist.org.

E mafai e tusitusiga paia ona faaliliu atu o tatou loto i le Alii.

Manatu mo Suesuega Faaleaiga o Tusitusiga Paia ma Afiafi Faaleaiga

2 Tupu 19:14–19.O le a se mea e mafai ona tatou aoao mai i le faataitaiga a Esekia e mafai ona fesoasoani ia i tatou pe a i ai ni a tatou faafitauli po o ni fesili faigata? Na faapefea ona taliina e le Alii a tatou tatalo mo se fesoasoani? Atonu e mafai e tagata taitoatasi o le aiga ona fai se mea e faaali i le fale e faamanatu ai ia i latou e liliu atu i le Alii.

2 Tupu 22:3–7.O le aufaigaluega o loo faamatalaina i le 2 Tupu 22:3–7 sa faatuatuaina i le tupe na faaaoga e toefau ai le malumalu “aua na latou faia ma le faamaoni lava” (fuaiupu 7). A uma ona faitau nei fuaiupu, e mafai ona e fai atu i tagata o le aiga e ta’u mai ni mea na faatuatuaina atu ia i latou. E mafai faapefea ona faatuatuaina i tatou e pei o le aufaigaluega o loo i nei fuaiupu?

2 Tupu 22:8–11, 19; 23:1–3.O le a se mea tatou te faagaeetia ai i le ala na tali atu ai Iosia ma lona nuu i le afioga a le Atua? E faapefea ona tatou tali atu i le afioga a le Atua o loo i tusituiga paia? E mafai e tagata o lou aiga ona faasoa i fuaitau o mau po o tala ua faateleina ai lo latou manao e mulimuli i le Tama Faalelagi ma Iesu Keriso.

2 Tupu 23:25.O le a se mea e tu matilatila mai ia i tatou e uiga i le faamatalaga o Iosia i lenei fuaiupu? E mafai ona tusi e lou aiga i luga o ni fatu pepa ni mea e mafai ona latou faia i lenei vaiaso e liliu atu ai i le Alii ma o latou loto atoa.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “A Ou Suesue i Mau Paia,” Viiga, nu. 174.

Faaleleia o Suesuega Faaletagata Lava Ia

Tagai mo ni upu ma fasifuaitau musuia. A o e faitau, e ono aumai e le Agaga ni upu ma ni fuaitau faapitoa i lou mafaufau. E mafai ona latou musuia ma uunaia oe; e mafai foi faapei na tusia i latou mo oe lava.

Atatusi o se tusiupu o loo aveina atu se tusitaai o tusitusiga paia i le Tupu o Iosia, saunia e Robert T. Barrett