Manatu e Nofouta i Ai

“Iesu Ua Fetalai Isaraelu, ‘O Mai’”

I le toafa o Sinai, na faapotopoto ai e Mose le fanauga a Isaraelu i le auvae o se mauga. Na tautino mai e le Alii sa Ia finagalo e liliu lenei vaega o pologa na le’i leva ona faasaolotoina, i se nuu malosi. Na fetalai o Ia, “E fai foi outou ma malo o ositaulaga, ma nuu paia mo a’u” (Esoto 19:6). Sa Ia folafola mai o le a latou lauolaola ma manuia, e tusa lava pe na siomia e fili na sili atu le toatele ma sili atu ona malolosi (tagai i le Teuteronome 28:1–14).

O nei mea uma o le a tutupu e lē ona sa toatele pe malolosi pe atamamai le fanauga a Isaraelu. O le a tupu, na fetalai mai ai le Alii, “[pe] afai tou te matuā faalogo mai i lo’u leo, ma tausisi i la’u feagaiga” (Esoto 19:5). O le mana o le Atua, ae e le o latou lava, o le a faapea ona malolosi ai i latou.

Peitai, sa le’o taimi uma na usitai ai le fanauga a Isaraelu i Lona siufofoga, ma i le aluga o le taimi na latou taofi ai le tausia o Ana feagaiga. E toatele sa amata ona tapuai i isi atua ma faataitai i faiga a aganuu sa siomia i latou. Sa latou teena le mea tonu lava na ala ai ona avea i latou ma se malo, na tulagaese mai isi tagata uma—o le latou sootaga o le feagaiga ma le Alii. O le aunoa ma le mana o le Atua e puipuia i latou (tagai i le 2 Tupu 17:6–7), sa leai ai se mea e taofia o latou fili (tagai i le 2 Nofoaiga a Tupu 36:12–20).

O le Faataapeapega

O ni nai taimi i le va o le pe a o le 735 ma le 720 TLM, na osofaia ai e Asuria le Malo i Matu o Isaraelu, o le nofoaga o ituaiga e sefulu, ma ave faatagataotaua ai le faitau afe o tagata Isaraelu i vaega eseese o le Malo o Asuria (tagai i le 2 Tupu 17:1–7).¹ Na oo ina ta’ua tagata Isaraelu o “ituaiga ua leiloloa” o se vaega ona sa aveesea mai i latou mai lo latou laueleele ma faataapeapeina solo i isi atunuu. Ae sa leiloloa foi i latou i se faauigaga loloto atu: i le aluga o le taimi na leiloa ai lo latou faalagiga o le faasinomaga o le nuu o le feagaiga a le Atua.

Ona sa i ai taimi na sili atu ai le amiotonu o le Malo i Saute o Iuta nai lo o le Malo i Matu, o lea sa umi ai [lo latou leiloloa].² Peitai ane, na iu ina liliuese foi tagata iina mai le Alii. Na osofaia e Asuria ma manumalo ai i le tele o le Malo i Saute; sa na’o Ierusalema lava na faasaoina faavavega (tagai i le 2 Tupu 19; Isaia 10:12–13). Mulimuli ane, i le va o le 597 ma le 580 TLM, na faatamaiaina ai e Papelonia ia Ierusalema, na aofia ai le malumalu, ma ave faatagataotaua le toatele o tagata na nofoia le nuu (tagai i le 2 Tupu 24–25; 2 Nofoaiga a Tupu 36; Ieremia 39; 52). Pe a ma le 70 tausaga mulimuli ane, na faatagaina ai e na totoe o Iuta e toe foi i Ierusalema ma toe fausia le malumalu. Ae peitai, o le toatele sa nonofo i Papelonia.³

A o mavae atu augatupulaga, o le fanauga a Isaraelu mai ituaiga uma sa “faataapeape … i nuu uma na latou le iloa” (Sakaria 7:14; tagai foi i le Amosa 9:8–9). O ni isi na taitaieseina e le Alii i isi laueleele (tagai i le 2 Nifaei 1:1–5; Ominae 1:15–16). O isi na tuua Isaraelu ina ia sao ai mai le tapueina (tagai i le 2 Tupu 25:22–26; Ieremia 42:13–19; 43:1–7) pe ona o mafuaaga faaupufai po o le tamaoaiga.⁴

Tatou te ta’ua nei mea na tutupu o le faataapeapeina o Isaraelu. Ma e taua le iloa e uiga i le faataapeapeina mo ni nai mafuaaga. Mo se tasi o mea, o le autu iloga o le Feagaiga Tuai: O le toatele o perofeta o le Feagaiga Tuai o ni molimau vaaitino ia i le tifato faaleagaga lea na oo atu ai i le faataapeapeina o Isaraelu. Sa latou muaivaaia lena faataapeapega ma lapatai atu e uiga i ai, ma o ni isi o i latou na soifua i le taimi na tupu ai.⁵ E aoga le manatua o lena mea pe a e faitau i tusi a Isaia, Ieremia, Amosa, ma le tele o isi tusi i le vaega mulimuli mai o le Feagaiga Tuai. Faatasi ai ma lena vaaiga i le mafaufau, a e faitau i a latou valoaga e uiga ia Asuria ma Papelonia, o le ifo i tupua ma le faatagataotauaina, tuufuaina ma iu ai i le toefuataiga, o le a e iloa ai le mea o loo latou talanoa mai ai.

O le malamalama i le faataapeapeina o Isaraelu o le a fesoasoani e te malamalama lelei ai foi i le Tusi a Mamona, aua o le Tusi a Mamona o se faamaumauga o se lalā o Isaraelu na faataapeapeina (tagai i le 1 Nifae 15:12). O lenei faamaumauga o loo amata i le sosola ese o le aiga o Liae mai Ierusalema i le pe tusa o le 600 TLM, ae le’i leva lava ae osofai atu loa Papelonia. O Liae o se tasi lea o na perofeta sa vavalo e uiga i le faataapeapeina o Isaraelu.⁶ Ma sa fesoasoani lona aiga e faataunuu lena valoaga, i le aveina o le latou lala o le aiga o Isaraelu ma totoina i le isi itu o le lalolagi, i le Atu Amerika.

O Le Faatafunaga o Ierusalema e Nepusatana, na saunia e William Brassey Hole, © Providence Collection/licensed mai le goodsalt.com

O Le Faapotopotoina

Ae peitai, o le faataapeapeina o Isaraelu, ua na o le afa lena o le tala. E le galo i le Alii Lona nuu, pe tuulafoaia atoa e Ia i latou, e tusa lava pe ua latou tuulafoaia o Ia. O le tele o valoaga e faapea, o le a faataapeapeina Isaraelu na o mai faatasi ai ma le tele o folafolaga o le a i ai se aso e faapotopoto mai ai i latou e le Atua.⁷

O lena aso, o le asō—o o tatou aso. O lea ua amatalia le faapotopotoina. I le 1836, e faitau afe tausaga talu ona mavae le faapotopotoina e Mose o le fanauga a Isaraelu i le auvae o le Mauga o Sinai, na faaali mai ai Mose i le Malumalu o Katelani e tuuina mai ia Iosefa Samita “ki o le faapotopotoina o Isaraelu mai vaega e fa o le lalolagi” (Mataupu Faavae ma Feagaiga 110:11). O le taimi nei, i lalo o le taitaiga a i latou o e ua umia nei ki, ua faapotopotoina mai ai ituaiga o Isaraelu mai atunuu uma o loo mafai ona o atu i ai auauna a le Alii.

Na ta’ua e Peresitene Russell M. Nelson lenei faapotopotoina “o le mea aupito sili ona taua ua faia i le lalolagi i aso nei. E leai se isi mea e faatusalia i lona maoae, e leai se isi mea e faatusalia i le taua, e leai se isi mea e faatusalia i le malualii. Ma afai e te filifili e, pe afai e te manao ai, e mafai ona avea oe o se vaega taua o lena mea.”⁸

E faapefea ona e faia? O le a le uiga o le ia faapotopoto Isaraelu? O lona uiga ea o le toefuataiga o ituaiga e sefululua i le laueleele sa latou nofoia? O le mea moni, e matuai sili atu lona uiga, e matuai sili atu ona faavavau. E pei ona faamalamalama mai e Peresitene Nelson:

“Pe a tatou talanoa i le faapotopotoina, ua na ona tatou fai atu lava o lenei upumoni faalefaavae: o tagata uma o fanau a lo tatou Tama Faalelagi, i itu uma o le veli, e tatau ona faalogo i le savali o le talalelei toefuataiina a Iesu Keriso. …

“Soo se taimi e te faia ai soo se mea e fesoasoani ai i soo se tasi—po o le fea lava le itu o le veli—laa agai i luma i le osia o feagaiga ma le Atua ma maua o latou sauniga e tatau ai o le papatisoga ma le malumalu, ua e fesoasoani e faapotopoto Isaraelu. E faigofie lava.”⁹

E tupu lenei mea, e pei ona fai mai Isaia, “e taitoatasi” (Isaia 27:12) po o le, e pei ona valoia e Ieremia, “e taitasi i aai, ma le taitoalua i aiga” (Ieremia 3:14).

O le faapotopotoina o Isaraelu o lona uiga o le toe aumaia o le fanau a le Atua ia te Ia. O lona uiga o le toefuataiga o i latou i lo latou sootaga faafeagaiga ma Ia. O lona uiga o le toefaatuina o le “nuu paia” lea ua leva ona Ia fuafuaina e faatuina (Esoto 19:6).

O Mai

I le avea ai o se tagata tausi feagaiga, ua avea ai oe o se vaega o le aiga o Isaraelu.¹⁰ Ua faapotopotoina mai oe, ma o oe o se tagata e faapotopotoa. O le tala na fatu faasolo mo le fia selau tausaga le umi lea na amataina i se feagaiga i le va o le Atua ma Aperaamo ua faasolo atu i lona faatumutumuga, ma o oe o se tagata ua sili ona taua ai. O le taimi lenei o “Iesu ua fetalai Isaraelu, ‘O mai.’”¹¹

O le savali lenei a le au faapotopoto: O mai i le feagaiga. O mai i Siona. O mai ia Iesu Keriso, le Paia o e Toatasi o Isaraelu, ma o le a Ia aumaia oe i le Atua, lou Tama.

Faamatalaga

1. O ituaiga e sefulu ia na ave faatagataotauaina e Asuria o Reupena, Simeona, Isakara, Sepulona, Tanu, Nafatali, Kato, Asera, Efaraima, ma Manase. O sui o le ituaiga o Levi na salalau solo i teritori o isi ituaiga ina ia mafai ona faatino o latou tiutetauave faaositaulaga.

2. O le Malo i Saute na matele ina aofia ai ituaiga o Iuta ma Peniamina. Ae peitai, na nonofo ai foi iina sui o nai isi ituaiga (tagai i le 2 Nofoaiga a Tupu 11:14–17). Mo se faataitaiga, o Liae, o lē na nofo i Ierusalema, sa o se ituaiga o Manase.

3. Tagai i le Esera 1; 7; Neemia 2. O le Malo o Papelonia na faatoilaloina e le Malo o Peresia. O le tupu o Peresia, o Kuresa, lea na faatagaina ni nai vaega o tagata Iutaia na faaaunuua e toe foi atu i Ierusalema.

4. I le TA 70, na toe faatamaiaina ai Ierusalema ma lona malumalu, ae o le taimi lenei o Roma, ma o tagata Iutaia na totoe na faataapeapeina solo i le tele o atunuu o le lalolagi.

5. Tagai i le Ieremia 29:18; Esekielu 22:15; Hosea 9:17; Amosa 9:9; 1 Nifae 1:13.

6. Tagai i le 1 Nifae 1:13, 18–20; 10:12–14.

7. Tagai i le Isaia 5:26; 27:12; 54; Ieremia 16:14–15; 29:14; 31:10; Esekielu 11:17; 34:12; 37:21–28; Sakaria 10:8; 1 Nifae 10:14; 22:25; 3 Nifae 16:1–5; 17:4.

8. Russell M. Nelson ma Wendy Nelson, “Faamoemoe o Isaraelu” (faigalotu a le autalavou i le lalolagi atoa, 3 Iuni, 2018), faaopoopoga i le New Era ma le Ensign, 8, ChurchofJesusChrist.org.

9. Russell M. Nelson ma Wendy W. Nelson, “Faamoemoe o Isaraelu,” 15, ChurchofJesusChrist.org.

10. Tagai i le 2 Nifae 30:2.

11. “Ia Fiafia Tatou,” Viiga, nu. 3.