tagata o loo tuua aai faatafunaina

O le Solaaga a Pagota, saunia e James Tissot ma isi

11-17 Iulai

2 Tupu 17–25

“Na Ia Faatuatua i le Alii le Atua o Isaraelu”

A o e fuafuaina ni gaoioiga e aoao ai tamaiti, ia manatua o gaoioiga mo tamaiti laiti o loo i ai i lenei otootoga e mafai ona fetuunai mo tamaiti matutua ma faapena ai lava.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Tusi igoa o tamaiti taitasi i luga o se fasipepa, ma tuu pepa i totonu o se koneteina. I le amataga o le vasega, tuu atu i tamaiti e auauai i le filifilia o se igoa. Pe a seiina le igoa o se tamaitiiti, valaaulia le tamaitiiti lena e faasoa mai se mea na ia aoaoina e uiga i le talalelei po o Iesu Keriso talu ai nei. Toe fai seia tofu maua e tamaiti taitoatasi se avanoa e faasoa mai ai.

aikona o le aoao atu

Aoao atu le Aoaoga Faavae: Tamaiti Laiti

2 Tupu 18:3, 5

E mafai ona ou faatuatua i le Tama Faalelagi ma Iesu Keriso.

O le faataitaiga a Esekia i le 2 Tupu 18: 3, 5 e mafai ona fesoasoani i tamaiti o loo e aoaoina e faatuatua i le Atua.

Gaoioiga e Mafai Ona Fai

• Taʻu mai ni mea e ono faia e se tupu lelei ma ni mea e ono faia e se tupu leaga. Fai i tamaiti e tutu i luga ma fiafia mo mea lelei ma nonofo i lalo mo mea leaga. Faamatala i tamaiti o Isaraelu e tele o latou tupu, o nisi e amiotonu a o isi e leai. Fai i tamaiti e faalogologo pe aisea na avea ai Esekia ma tupu lelei a o e faitauina le 2 Tupu 18:3, 5. Fesoasoani ia latou mafaufau i ni auala e mafai ona tatou faaalia ai tatou te faatuatua i le Alii pei o Esekia.

• Fesoasoani i tamaiti ia malamalama i le uiga o le faatuatuaina o se tasi. Talanoa e uiga i tagata e te faatuatuaina, ma tuu le avanoa i tamaiti e faia ai foi. Faaali atu se ata o Iesu Keriso. Aisea e mafai ai ona tatou faatuatua ia Iesu Keriso? Faailoa atu lou talitonuina e alofa Iesu Keriso ia i tatou ma o le a fesoasoani ia tatou toe foi atu e nonofo faavavau ma le Tama Faalelagi.

2 Tupu 22:8–11; 23:2

O tusitusiga paia o se faamanuiaga.

E ui atonu e le mafai e tamaiti laiti ona faitau pe malamalama i mea uma o loo i tusitusiga paia, ae e mafai ona faamanuiaina i latou i le mana o tusitusiga paia. O le a se mea e mafai ona e faia e fesoasoani ai ia latou maua se manao ia faamanuiaina e le afioga a le Atua?

Gaoioiga e Mafai Ona Fai

• Nanā se kopi o tusitusiga paia i se mea i totonu o le potu, ma valaaulia tamaiti e sue. Faamatala i aso o le Tupu o Iosia, o le toatele o tagata e leʻi aoaoina mai i tusitusiga paia seʻia oo ina mauaina i latou e se faifeau i le malumalu (tagai 2 Tupu 22:8--11). O a tusitusiga paia? Aisea tatou te manaomia ai tusitusiga paia? Taʻu i tamaiti le mafuaaga ua e fiafia ai ua i ai a tatou tusitusiga paia i aso nei, ma tuu i latou e faasoa mai o latou lagona e uiga i tusitusiga paia.

• Faitau le 2 Tupu 23:2 i tamaiti, ma fai atu ia latou e faalogo mo mea na faia e le tupu i tusitusiga paia. Aisea na taua ai i tagata uma ona faalogo i mea na tusia i tusitusiga paia? Usu se pese e faatatau i tusitusiga paia, e pei o le “Saili, Mafaufau Loloto, ma Tatalo” (Tusipese a Tamaiti,66), ma fai i tamaiti e talanoa e uiga i ni o latou lagona pe a latou faalogo i aoaoga ma tala mai tusitusiga paia.

  o le aiga o loo suesue i tusitusiga paia

  E mafai e tusitusiga paia ona fesoasoani e liliu atu o tatou loto i le Alii.

aikona o le aoao atu

Aoao atu le Aoaoga Faavae: Tamaiti Matutua

2 Tupu 18:3-6; 19:14–19

E mafai ona ou faatuatua i le Tama Faalelagi ma Iesu Keriso.

Ina ua faamataʻuina e Asuria Ierusalema, na liliu atu le tupu amiotonu o Esekia i le Alii i le faatuatua. O le faataitaiga a Esekia e mafai ona fesoasoani ia te oe ma tamaiti e talanoa ai pe faafefea ona faaalia lo tatou faatuatua i le Alii, tusa lava pe luʻitauina lena faatuatua.

Gaoioiga e Mafai Ona Fai

• I le faaaoga ai o le faafanua lona 3 o le Tusi Paia, “O le Vaevaega o Ituaiga e 12,” faamatala faapuupuu atu i tamaiti sa faatoilaloina le Malo i Matu o Isaraelu e tagata ua taʻua o Asuria. Faamatala na mulimuli ane taumafai Asuria e faatoilalo le Malo i Saute o Iuta. Valaaulia tamaiti e vaai faalemafaufau pe o a ni o latou lagona pe a fai latou te nonofo i Iuta ma iloa ua o mai Asuria e faatafuna le aai. Fai atu i tamaiti e faitau le 2 Tupu 18:3, 5–6 e iloa ai pe aisea na mafai ai e Esekia, le tupu o luta, ona lototele ina ua o mai Asuria.

• Valaaulia tamaiti e faitau le 2 Tupu 19:14–19, ma vaavaai mo mea na faia e Esekia ina ua faamatauina e Asuria lona malo. Na faapefea ona faaalia i lona faia o nei mea lona faatuatua i le Alii? O a ni mea tatou te faia e faaalia ai lo tatou faatuatua i le Alii pe a tatou manaomia se fesoasoani?

2 Tupu 22:8-13; 23:2–3

O loo aoaoina au e tusitusiga paia i le auala e mulimuli ai ia Iesu Keriso.

Ina ua mavae tausaga o le pogisa faaleagaga, na toe faafouina e tagata Iutaia a latou tautinoga i le Alii. Na mafua lenei mea ona sa toe maua e le Tupu o Iosia le tusi o tulafono ma faitau atu i tagata. O lenei tala e mafai ona fesoasoani i tamaiti ia malamalama pe aisea e taua tele ai tusitusiga paia.

Gaoioiga e Mafai Ona Fai

• Fai atu i tamaiti na ta’u atu e le Tupu o Iosia i ona tagata e faafou le malumalu, ma a o latou faia, sa latou mauaina ai se mea taua tele. Valaaulia tamaiti e faitau le 2 Tupu 22:8–11 e sue ai po o le a lena mea. Faamatala o le tusi na latou mauaina o loo i ai feagaiga ma tulafono e leʻi iloa e le fanauga a Isaraelu. O le a le mea e ono tupu ia i tatou pe a na tatou le mauaina tusitusiga paia? Fesili i tamaiti pe aisea latou te fiafia ai ona ua maua tusitusiga paia. Aisea o le a faigata ai ona mulimuli i le Faaola pe afai tatou te le maua tusitusiga paia?

• Tuu atu i tamaiti taitasi se fasipepa, ma fai atu ia i latou e saeia. Faamatala i aso o le Tupu o Iosia, o isi taimi na faaleaga e tagata, pe “saei,” o latou ofu pe a latou le fiafia. Fai i tamaiti e vaavaai mo le upu “saei” i le 2 Tupu 22:11. Aisea atonu na le fiafia ai Iosia? Fesoasoani i tamaiti e sue tali i le fuaiupu 13. Aisea e taua ai mo i tatou le faitau e le aunoa i tusitusiga paia?

• Faitau faatasi le 2 Tupu 23:2–3 ma fai atu i tamaiti e vaai pe na faapefea ona fesoasoani tusitusiga paia ia Iosia ma lona nuu. Faasoa atu i tamaiti se mau na musuia ai oe e “mulimuli atu i le Alii” (fuaiupu 3), ma valaaulia tamaiti e faasoa mai ni mau na fesoasoani ia i latou. Usu faatasi “I Will Walk with Jesus” (ChurchofJesusChrist.org).

2 Tupu 23:3

O le a ou tausia a’u feagaiga ma le Atua.

Ina ua iloa e Iosia ma ona tagata tulafono a le Atua, na latou osia se feagaiga e ola ai. E mafai ona e fesoasoani i tamaiti o loo e aoaoina ia mananao ia tumau faamaoni i feagaiga na latou osia i le papatisoga.

Gaoioiga e Mafai Ona Fai

• Fai i tamaiti e faitau le 2 Tupu 23:3 ma saili upu po o fasifuaitau e faaali ai lagona o tagata e uiga i tulafono a le Alii. Valaaulia i latou e tutu ma talanoa e uiga i mea e mafai ona faauiga i ai le “[tu] i le feagaiga.” Valaaulia i latou e savavali i le mea o tutu ai ma talanoa e faatatau i le faauigaina o le “mulimuli atu i le Alii.” Valaaulia i latou e tuu o latou lima i luga o o latou fatu ma fautua mai ni auala e mafai ai ona tatou tausia poloaiga “ma o [tatou] loto atoa.”

• Fesoasoani i tamaiti e fai se lisi o folafolaga na latou faia i le papatisoga (tagai Mosaea 18:10; Mataupu Faavae ma Feagaiga 20:37, 77, 79). O le a le mea ua folafola mai e le Atua ia i tatou pe a tatou tausia a tatou feagaiga? O le a se mea ua tatou aoao mai le 2 Tupu 23:3 e uiga i le ala e tatau ona tatou tausia ai a tatou feagaiga?

aikona o le aoaoina

Uunaia le Aoaoina i le Aiga

Ia valaaulia tamaiti e fetufaai atu i se tagata o le aiga se fuaiupu o se mau po o se tala mai tusitusiga paia ua faamanuiaina ai i latou.

Faaleleia o Lo Tatou Aoao Atu

Fausia le talitonuina i tamaiti. O se tasi o auala e fesoasoani ai i tamaiti e atinae lo latou talitonuina o le viia o i latou pe a latou auai i talanoaga i le vasega. Folafola atu i tamaiti o le a fesoasoani le Agaga Paia ia i latou ao latou aoao.

itulau o gaoioiga: O tusitusiga paia o se faamanuiaga