O le Tupu o Tavita o loo saofai i le nofoalii

Faanofoaliiina o le Tupu o Tavita, saunia e Miles Harston

20–26 Iuni

2 Samuelu 5–7; 11–12; 1 Tupu 3; 8; 11

“[E] Faatuina Lou Malo e Faavavau”

“O tusi paia uma lava e mai le Agaga o le Atua ia, e aoga foi ia e aoao ai, e aoai ai, e faatonu ai, e faapoto ai foi i le amiotonu” (2 Timoteo 3:16).

Tusifaamaumau Ou Lagona Uunai

O le nofoaiga a le Tupu o Tavita sa amataina ma le tele o folafolaga. Sa lauiloa i lona faatuatua le fefe i le faatoilaloina o Koliata. I le avea ai ma tupu, sa ia taofimauina ai Ierusalema e fai ma ona laumua ma tuufaatasia ai Isaraelu (tagai i le 2 Samuelu 5). Sa le’i malosi muamua faapea le malo. Ae peitai, sa gauai atu Tavita i le faaosoosoga ma aveesea ai lona malosi faaleagaga.

O le nofoaiga a Solomona le atalii o Tavita sa faapena foi ona amataina ma le tele o folafolaga. Sa logologoa lona poto mai le lagi ma le iloatino. I le avea ai ma tupu, sa ia faalauteleina ai tuaoi o Isaraelu ma fausia se malumalu matagofie i le Alii. Sa le’i malosi muamua faapea le malo. Ae peitai, sa faatagaina ma le faavalevalea e Solomona lona loto ina ia liliu ese atu i isi atua.

O a ni mea e mafai ona tatou aoao mai i nei tala faanoanoa? Atonu o se lesona e tasi o le, e tusa lava po o a o tatou aafiaga ua tuanai, o lo tatou malosi faaleagaga e faalagolago lea i filifiliga tatou te faia i le asō. E mafai foi ona tatou vaaia i nei tala, e le o lo tatou lava malosi po o le lototele po o le poto o le a faasaoina ai i tatou—o le Alii. O nei tala ua faaali mai ai ia i tatou, o le faamoemoe moni o Isaraelu—ma i tatou—e le o i ai ia Tavita, Solomona, po o se isi lava tupu i le olaga nei, ae o le isi “atalii o Tavita”: o Iesu Keriso (Mataio 1:1), o le Tupu e Faavavau o lē o le a “faamagalo mai le agasala a [Lona] nuu” pe afai tatou te “toe foi mai ia te [Ia]” (1 Tupu 8:33–34).

Mo se vaaiga aoao o tusi o 2 Samuelu ma le 1 Tupu, tagai i le “Samuel, books of” ma le “Kings, books of” i le Bible Dictionary.

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

2 Samuelu 5:17–25

E mafai ona tuuina mai e le Alii le taitaiga ia te a’u.

O le taimi lava na mafai ai e Tavita ona tuufaatasia Isaraelu (tagai i le 2 Samuelu 5:1–5), na tatau ai loa ona ia puipuia lona nuu mai i Filisitia. Ao e faitau i le 2 Samuelu 5:17–25, mafaufau pe faapefea ona fesoasoani le faataitaiga a Tavita ia te oe i luitau lua te fetaia’i (tagai foi i le 1 Samuelu 23:2, 10–11; 30:8; 2 Samuelu 2:1). O faapefea ona e sailia le taitaiga a le Alii i lou olaga? O faapefea ona faamanuiaina oe e ala i le faatinoina o faaaliga e te maua.

Tagai foi i le 1 Nofoaiga Tupu 12; Richard G. Scott, “E Faapefea ona Maua ia Faaaliga ma Musumusuga mo Lou Olaga Patino,” Liahona, Me 2012, 45–47.

2 Samuelu 7

O le a le “fale” na folafola atu e le Alii ia Tavita?

Ina ua ofo atu Tavita e fau se fale, o lona uiga o se malumalu, mo le Alii (tagai i le 2 Samuelu 7:1–3), sa tali mai le Alii e faapea, e moni lava o le a fausia e le atalii o Tavita (tagai i fuaiupu 12–15; tagai foi i le 1 Nofoaiga Tupu 17:1–15). Sa fetalai atu foi le Alii, ae a uma o le a ia fausia se “fale” mo Tavita, o lona uiga o se fanau, ma o lona nofoalii o le a tumau e faavavau (tagai i le 2 Samuelu 7:11, 16, 25–29; Salamo 89:3–4, 35–37). O lenei folafolaga sa faataunuuina ia Iesu Keriso, o lo tatou Tupu Faavavau, o se na tupuga mai ia Tavita (tagai i le Mataio 1:1; Luka 1:32–33; Ioane 18:33–37).

2 Samuelu 11; 12:1–14

E tatau ona ou mataala ma sauni i taimi uma e tetee i le agasala.

O le faamaoni o Tavita i le Alii i le taimi na tuanai, sa le’i faapea na le oo ai i faaosoosoga ina ua ia “fealuai i luga o le fale o le tupu” ma “iloa atu ai … le fafine o loo taele” (2 Samuelu 11:2). Mafaufau po o a ni lesona e mafai ona e aoao mai i ona aafiaga. O fesili pei o nei atonu e fesoasoani i lou suesueina o lenei tala:

• O a filifiliga sa faia e Tavita na faapea ona taitai atu ai o ia i lalo o se ala faateteleina o le agasala? Ae o a ni filifiliga amiotonu na ono mafai ona ia faia?

• O faapefea ona taumafai le fili e taitai atu oe i lalo o ala agasala i lou lava olaga? O a ni filifiliga e mafai ona e faia i le taimi nei e toe foi atu ai i le saogalemu?

Tagai foi i le 2 Nifae 28:20–24; “To Look Upon” (vitio), ChurchofJesusChrist.org.

1 Tupu 3:1–15

O le meaalofa o le iloatino e fesoasoani ou te iloa ai le eseesega i le va o le sa’o ma le sese.

Afai e fai mai le Alii ia te oe, “Ina fai mai ia, pe se a se mea ou te avatu ia te oe” (1 Tupu 3:5), o le a se mea e te fai atu ai? O le a se mea ua faagaeetia ai oe i le tali a Solomona? Mafaufau loloto pe aisea ua avea ai “le loto matala” e “masino ai i le lelei ma le leaga” (fuaiupu 9) o se meaalofa taua tele. O a ni mea e mafai ona e faia e sailia ai lenei meaalofa?

Tagai foi i le 2 Nofoaiga Tupu 1; Moronae 7:12–19; David A. Bednar, “Quick to Observe,” Ensign, Tes. 2006, 30–36.

1 Tupu 8:12–61

O le malumalu o le maota o le Alii.

Mo le fia selau o tausaga, o le afioaga o le Atua, sa fai ma sui ai le falefetafa’i feaveai lea na fausia e Mose. E ui ina sa manao Tavita e fau mo le Atua se nofoaga tumau e afio ai, ae na filifili e le Atua le atalii o Tavita, o Solomona, e fau le malumalu o le Alii. Ao e faitau i le tatalo a Solomona ma upu sa ia fai atu ai i lona nuu ina ua mae’a le malumalu, ia maitau ona lagona e uiga i le Alii ma Lona maota. E mafai foi ona e faia se lisi o faamanuiaga na ole atu ai Solomona i lana tatalo. O le a se mea e te matauina e uiga i nei faamanuiaga? O faapefea ona faamanuiaina oe i le maota o le Alii i o tatou aso?

Tagai foi i le 2 Nofoaiga Tupu 6.

Malumalu o Barranquilla Colombia

Malumalu o Barranquilla Colombia

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

2 Samuelu 5:19, 23.O le a se taimi na tatou “aioi atu ai i le Alii” mo le taitaiga ma le fesoasoaniga? Na faapefea ona Ia tali mai ia i tatou?

2 Samuelu 7:16.Ina ua ta’u atu e le Alii ia Tavita, “E mausali lou nofoalii e faavavau,” sa faatatau atu o Ia i se tupu i le lumanai i le laina o le aiga o Tavita o lē o le a nofotupu e faavavau: o Iesu Keriso. Atonu o le a fiafia lou aiga e fatufatu ni palealii e fai i le fale a’o talatalanoa i mafuaaga tou te faafetai ai o Iesu Keriso lo outou Tupu Faavavau.

2 Samuelu 11.O le faitau e uiga i agasala matautia a Tavita atonu o se avanoa lelei lea e talatalanoa ai i ogaoga matautia o ponokalafi, mafaufauga le mama, ma le ola le mama. E mafai ona aoga punaoa nei i le tou talatalanoaga: o le lomiga ia Oketopa 2019 o le Liahona, o punaoa a le Ekalesia ua Tautalagia ai Ponokalafi (ChurchofJesusChrist.org/addressing-pornography), ma vitios “What Should I Do When I See Pornography?” ma le “Watch Your Step” (ChurchofJesusChrist.org). E mafai e tagata o le aiga ona faia se fuafuaga e uiga i mea o le a latou faia pe a latou tau i ponokalafi.

1 Tupu 11:9–11.O a nisi o “isi atua” (fuaiupu 10) e mafai ona liliu ese ai o tatou loto mai le Alii? E mafai faapefea ona tatou tuu o tatou loto ia faatotonugalemu i le Tama Faalelagi ma Iesu Keriso?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Faapaia Mai A’u,” Viiga, nu. 70.

Faaleleia o Lo Tatou Aoao Atu

Taulai i mataupu faavae o le a manuia ai lou aiga. Ao e suesue ma le agaga tatalo i le afioga a le Atua, ia fesili ifo ia te oe lava “O le a se mea ou te mauaina ii o le a aoga tele i lo’u aiga?” (tagai i le Teaching in the Savior’s Way, 17).

malumalu o Solomona

Atatusi o le malumalu o Solomona, na saunia e Sam Lawlor