Ata vali o Tepora o loo taitaia le autau a Isaraelu, © Providence Collection/licensed from goodsalt.com

30 Me–5 Iuni

Faamasino 2–4; 6–8; 13–16

“Ona Faatuina ai Lea e Ieova o le Faaola”

Ua molimau mai tusitusiga paia e uiga ia Iesu Keriso. Mafaufau loloto pe faapefea e tala e te faitau i ai i le Faamasino ona fesoasoani e te latalata atili atu ai ia te Ia.

Tusifaamaumau Ou Lagona Uunai

Ua tatou iloa uma lava le lagona o le faia o se mea sese, lagona le faanoanoa e uiga i ai, ona salamo lea ma filifili mautu e sui o tatou ala. Ae i ni isi o tulaga e galo ia i tatou lo tatou filifili mautu na muamua atu, ma, a tatou fetaia’i ma faaosoosoga, tatou te ono toe faia foi lea lava mea sese e tasi. O lenei mamanu matautia o se mea masani lea i aafiaga a Isaraelu ua faamatalaina i le tusi o Faamasino. O le faatosinaina e talitonuga ma faiga o tapuaiga o sa Kananā—o i latou na tuu latou te tutuliesea i fafo o le nuu—sa soli e Isaraelu a latou feagaiga ma le Alii ma liliu ese mai le tapuai atu ia te Ia. O se taunuuga, sa latou le toe maua ai Lana puipuiga ma pauu atu ai i le faatagataotauaina. Ae ui i lea, o taimi taitasi na tupu a lenei mea, na tuuina atu ai e le Alii ia i latou le avanoa e salamo ai ma faatuina ai se Faaola, se taitai au na ta’ua o se “faamasino.” Sa le o faamasino uma i le tusi o Faamasino na amiotonu, ae o nisi o i latou sa faaalia le faatuatua tele i le laveaiga o le fanauga a Isaraelu ma toe fuatai mai i latou i o latou mafutaga faalefeagaiga ma le Alii. O nei tala e faamanatu ai ia i tatou e le afaina po o le a le mea na taitaiese ai i tatou mai ia Iesu Keriso, o Ia o le Faaola o Isaraelu ma e naunau i taimi uma e laveai i tatou ma toe faafeiloai atu ia te Ia.

Mo se vaaiga aoao o le tusi o Faamasino, tagai i le “Judges, book of” i le Bible Dictionary.

Manatu mo Suesuega Faaletagata Lava Ia o Tusitusiga Paia

Faamasino 2:1–19; 4:1–16

E ofo mai e le Alii le faaolataga pe a ou se ese.

O le tusi o Faamasino e mafai ona avea o se lapataiga ia i tatou: e ui lava ina tatou lagonaina le mana o le Alii i o tatou olaga, e mafai lava i taimi uma ona tatou toe pauu ese. O le tusi e mafai foi ona tuuina mai ai le faamalosiau ia i latou o e e pauu ese, aua ua ofo mai e le Alii se ala e toe foi atu ai. Mo se faataitaiga, ao e faitau i le Faamasino 2:1–19, vaavaai mo faatinoga na taitai ese ai Isaraelu mai le Alii ma le ala na laveai ai latou e le Alii. O le a se mea o aoao mai e nei fuaiupu e uiga i le Alii? O le a se mea e mafai ona e faia e atili tumau faamaoni ai pea ia te Ia?

O le a e tau i le mamanu o le fouvale, faanoanoa, ma le laveaiina e tupu pea lava pea i le [tusi] atoa o Faamasino (tagai faapitoa i mataupu 3, 4, 6, ma le 13). Ao e faitau i le tusi o Faamasino, mafaufau loloto i mea na fai e faamasino e laveai ai Isaraelu ma le ala e fesoasoani ai le Faaola ia te oe i taimi e te manaomia ai le laveaiga.

O se tasi o faataitaiga taua o se tasi na fesoasoani e laveai Isaraelu o Tepora. Faitau e uiga ia te ia i le Faamasino 4:1–16, ma maitau le faatosinaga sa ia faia i tagata na siomia o ia. O a ni upu po o faatinoga a Tepora e faaali atu ai ia te oe sa i ai lona faatuatua i le Alii? O le a sou lagona o le uiga o le fesili a Tepora i le fuaiupu 14: “E lei afio atu ea o Ieova i ou luma?”

Tagai foi i le Alema 7:13; Mataupu Faavae ma Feagaiga 84:87–88.

Faamasino 2:13

O ai Paala ma Asaira?

O Paala o le atua o le matagi a sa Kanana, ae o Asaira o le atua fafine o le lauolaola a sa Kanana. O le tapuaia o nei atua e toalua ua faaalia ai le taua o le lauolaola o le fanua ma tagata i a sa Kanana. O le ala na tapuai ai tagata i nei ma isi atua pepelo—e aofia ai, i ni isi o taimi, o feusuaiga le mama ma le ositaulagaina o tamaiti—sa faapitoa ona tufanua i le Alii.

Faamasino 6–8

E mafai e le Alii ona faia vavega pe a ou faatuatua i Ona ala.

Ina ia maua vavega a le Alii i o tatou olaga, e ao ona tatou faatuatua i Ona ala, e tusa lava pe foliga mai e ese lava Ona ala. O le tala ia Kitiona, o loo maua i le Faamasino 6–8, o se faataitaiga lelei o lenei tulaga. Na faapefea ona galueaina e le Alii se vavega sa le’i talitonuina ina ua faatoilalo e le autau a Kitiona ia sa Mitiana? O le a se mea e te lagona o loo taumafai le Alii e aoao atu ia te oe? O faapefea ona e vaaia le faia e le Alii o Lana galuega i auala e foliga fesiligia?

Tagai foi Russell M. Nelson, “E Leai se Mea e Le Mafaia e le Atua,” Ensign, Me 1988, 33–35.

Faamasino 13–16

E oo mai le malosi mai le faamaoni i a’u feagaiga ma le Atua.

Sa aveesea le malosi faaletino o Samasoni faapea ma lona malosi faaleagaga ona sa ia solia feagaiga ma le Atua, e aofia ai ma na [feagaiga] sa faatatau faapitoa lava i Naseri (mo faamatalaga e uiga i Naseri, tagai i le Numera 6:1–6; Faamasino 13:7). Ao e faitau i le tala a Samasoni i le Faamasino 13–16, mafaufau loloto i feagaiga taitasi ua e faia. Ua faapefea ona faamanuiaina oe i le malosi ona ua e tausia na feagaiga? O le a se mea ua e aoaoina mai le tala ia Samasoni ua musuia ai oe ia tumau faamaoni i au feagaiga ma le Atua?

Ua Tulei i Lalo e Samasoni ia Poutu, na saunia e James Tissot ma isi

Manatu mo Suesuega Faaleaiga o Tusitusiga Paia ma Afiafi Faaleaiga

Faamasino 2:10.Ina ua mavae le maliu o Iosua, o le isi augatupulaga o Isaraelu na sosoo ai, sa “le iloa Ieova.” Talanoa ma lou aiga pe faapefea ona latou iloa le Alii ma “galuega ia ia faia” mo i latou. O le a faapefea ona e faamautinoa o lenei malamalama o le a faasaosaoina mo augatupulaga o le lumanai?

Faamasino 3:7–10.O nei fuaitau ua aotele ai se mamanu e tupu soo i le tusi atoa o Faamasino. A o faitau e tagata o lou aiga nei fuaiupu, e mafai ona latou faailoa mai mea na fai e Isaraelu e o ese ai mai le Alii ma mea na faia e le Alii e laveai ai i latou. O a ni mea e ono taitai ai i tatou e faagalo le Alii? E mafai faapefea ona Ia laveaia i tatou? E mafai faapefea ona tatou atili faamaoni ia te Ia i taimi uma?

Faamasino 6:13–16, 25–30.Sa faaalia e Kitiona le lototele maoae i le usitaia o le Alii, e ui lava sa le’i lauiloa ana amioga. O le a se mea ua fetalai mai le Alii tatou te faia e ono le ioe i ai isi? E mafai faapefea e fetalaiga a le Alii ia Kitiona i fuaiupu 13–16 ona musuia i tatou e fai le mea sa’o?

Faamasino 7.Mata e mafai ona outou faaaogaina se tala faatino po o isi gaoioiga fatufatuai e fesoasoani ai i lou aiga ia aoao mai le aafiaga o le autau a Kitiona e faamatala ai lenei mataupu? E mafai faapefea ona faatatau fetalaiga a le Alii o loo i lenei mataupu (tagai, mo se faataitaiga i, fuaiupu 2 ma le 15) i o tatou olaga?

Faamasino 13:5.O feagaiga a Samasoni ma le Alii na tuuina atu ai ia te ia le malosi, e pei lava ona tuuina mai e a tatou feagaiga ia i tatou le malosi. Atonu o le a fiafia lou aiga e fai nisi o gaoioiga faaletino ma talanoaina auala e mafai e na gaoioiga ona fesoasoani ia tatou malolosi ai. O le a se mea e mafai ona tatou faia e fesoasoani ai ia tatou malolosi atu faaleagaga? Mo nisi o manatu, e mafai e tagata o le aiga ona faitau le Mosaea 18:8–10; Mataupu Faavae ma Feagaiga 20:77, 79. E faapefea e le tausia o a tatou feagaiga ona aumaia ia i tatou le malosi faaleagaga?

Mo nisi manatu mo le aoaoina o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Fa’aola o Isaraelu,” Viiga, nu. 5.

Faaleleia o Suesuega Faaletagata Lava ia

Faatino mea ua e aoaoina. A o e suesue, fesili ifo ia te oe lava pe faapefea ona e faaaogaina mea o loo e aoaoina, ona tuuto lea e fai. Ia tuu atu i le Agaga e taialaina oe. (Tagai Aoao Atu i le Ala a le Faaola,35.)

Autau a Kitiona, saunia e Daniel Lewis