Tavita ma Koliata, saunia e Steve Nethercott

13–19 Iuni

1 Samuelu 8–10; 13; 15–18

“O Loo Ia Ieova le Taua”

O fautuaga i lenei otootoga e mafai ona fesoasoani ia te oe e faailoa ai ni isi o mataupu faavae taua o loo i nei mataupu. E mafai ona e maua isi mataupu faavae ao e suesue.

Tusifaamaumau Ou Lagona Uunai

Talu lava ona nofoia e ituaiga o Isaraelu le nuu o le folafolaga, sa avea ai lava Filisitia ma se lamatiaga faifaipea i lo latou saogalemu. E tele taimi i aso ua mavae, na laveaiina ai e le Alii ia Isaraelu mai o latou fili. Ae o lenei sa fai atu lava toeaina o Isaraelu, “E fai lava so matou tupu … [e] alu atu foi o ia i o matou luma, ma ia tau i o matou taua” (1 Samuelu 8:19–20). Sa gauai i ai le Alii, ma na faauuina ai Saulo e fai ma tupu. Ae peitai ina ua lafo mai e le sauai taufaafefe o Koliata lana lui i le autau a Isaraelu, Sa “fefefe tele”—Saulo—e pei o lana autau atoa (1 Samuelu 17:11). I le aso lena, sa le’o le Tupu o Saulo na faasaoina Isaraelu ae o se tama leoleo mamoe faatauvaa e igoa ia Tavita, o le sa le’i faia se ofutau ae sa faaofuina i le faatuatua e faigata ona malamalama i ai i le Alii O lenei taua na faamaonia atu ai ia Isaraelu, ma i soo se tasi o loo i ai ni taua faaleagaga e tauina, “e le faaolaina tagata e Ieova i se pelu” ma “o loo ia Ieova le taua” (1 Samuelu 17:47).

Manatu mo Suesuega Faaletagata Lava Ia o Tusitusiga Paia

1 Samuelu 8

O Iesu Keriso o lo’u Tupu.

Ao e faitau i le 1 Samuelu 8, maitau le lagona na i ai o le Alii i le manao o Isaraelu mo se tupu e ese mai i lo o Ia lava. O le a le uiga o le ia filifili le Alii e “fai ma tupu [ia te oe]”? (1 Samuelu 8:7). Atonu foi e te mafaufau i auala e tofotofoina ai oe e mulimuli i aga le amiotonu a le lalolagi nai lo o le mulimuli i le Alii. E mafai faapefea ona e faaalia e te manao ia Iesu Keriso e fai ma ou Tupu e Faavavau?

Tagai foi i le Faamasino 8:22–23; Mosaea 29:1–36; Neil L. Andersen, “Manumalo i le Lalolagi,” Liahona, Me 2017, 58–62.

1 Samuelu 9:15–17; 10:1–12; 16:1–13

E valaau e le Atua tagata e ala i valoaga e galulue i Lona malo.

Sa filifili e le Atua ia Saulo ma Tavita e fai ma tupu e ala i le valoaga ma faaaliga (tagai i le 1 Samuelu 9:15–17; 10:1–12; 16:1–13). O le ala foi lea e valaau ai e Ia alii ma tamaitai e auauna i Lana Ekalesia i aso nei. O a ni mea e te aoao mai i nei tala e uiga i le uiga o le “valaauina e le Atua e ala i valoaga”? (Mataupu Faavae o le Faatuatua 1:5). O a faamanuiaga e maua mai i le valaauina ma vaetofia e auauna faamaoniaina a le Alii?

Atatusi o Samuelu o loo faauuina Saulo, © Lifeway Collection/licensed from goodsalt.com

1 Samuelu 13:5–14; 15

“E sili le usitai i lo le taulaga.”

E ui ina sa umi faaletino Saulo, ae sa ia lagona le “faatauvaa i [lona] lava manatu” ina ua avea o ia ma tupu (1 Samuelu 15:17). E ui i lea, ina ua faamanuiaina i le manuia, sa amata ona tele ina faalagolago ia te ia lava ae itiiti i le Alii. O le a se faamaoniga e te vaaia o lenei mea i le 1 Samuelu 13:5–14; 15? Pe ana faapea sa oulua i ai ma Saulo, o le a sau tala na semanu e te fai atu ai ia te ia lea atonu e fesoasoani ai ia te ia e faatoilalo lona “fouvale” ma le “faamaa’a”? (1 Samuelu 15:23).

Tagai foi i le 2 Nifae 9:28–29; Helamana 12:4–5; Mataupu Faavae ma Feagaiga 121:39–40; Thomas S. Monson, “Ia Mafaufau i le Ala o Ou Vae,” Liahona, Nov. 2014, 86–88.

1 Samuelu 16:7

“E silasila le Alii i le loto.”

O a nisi o auala e faamasino ai e tagata isi, “i le vaai i le tino”? O le a le uiga o le vaai “i le loto,” e pei ona faia e le Alii? (1 Samuelu 16:7). Mafaufau pe faapefea ona e faatataua lenei mataupu faavae i le ala e te vaai ai i isi—ma oe lava. E ono faapefea ona aafia ai au fegalegaleaiga po o mafutaga ma isi ona o le faia o lea mea?

1 Samuelu 17

Faatasi ai ma le fesoasoani a le Alii, e mafai ai ona ou manumalo i soo se luitau.

A o e faitau i le 1 Samuelu 17, mafaufau loloto i upu a tagata eseese o loo i lenei mataupu (tagai i le lisi o loo i lalo). O a ni mea o faaalia i a latou upu e uiga ia i latou? O faapefea ona faaalia i upu a Tavita lona lototele ma le faatuatua i le Alii?

• Koliata: fuaiupu 8–10, 43–44

• Eliapo: fuaiupu 28

• Saulo: fuaiupu 33

• Tavita: fuaiupu 26, 32, 34–37, 39, 45–47

Mafaufau loloto i taua patino o loo feagai ma oe. O le a se mea e mafai ona e maua i le 1 Samuelu 17 e faamalosia ai lou faatuatua e mafai e le Alii ona fesoasoani ia te oe?

Tagai foi Gordon B. Hinckley, “Overpowering the Goliaths in Our Lives,” Ensign, Me 1983, 46, 51–52.

Manatu mo Suesuega Faaleaiga o Tusitusiga Paia ma Afiafi Faaleaiga

1 Samuelu 9:15–21; 16:7.O le faitauina o nei fuaiupu faatasi ai ma upu nei mai ia Elder Dieter F. Uchtdorf e mafai ona musuia ai se talatalanoaga i le pogai na filifili ai e le Alii ia Saulo ma Tavita: “Afai e na o mata faaletino tatou te tilotilo ai ia i tatou, atonu o le a tatou le vaaia la i tatou lava o ni tagata ua lava le lelei. Ae o loo silasila mai lo tatou Tama Faalelagi ia i tatou i tagata moni e pei ona tatou i ai ma tagata e mafai ona tatou avea ai (“E Aoga!” Liahona, Nov. 2015, 23). Atonu e mafai e tagata o le aiga ona auauai e talanoa e uiga i uiga auaumama lelei latou te vaaia i loto o le tasi ma le isi (tagai i le 1 Samuelu 16:7).

1 Samuelu 10:6–12.O le a se taimi na tatou vaaia ai ua faamanuia e le Atua ia se tasi i le mana faaleagaga e faataunuu ai se tofiga po o se valaauga e pei ona Ia faamanuiaina ai Saulo? O a ni aafiaga e mafai ona tatou faasoa atu i se taimi na “liliu ai o [tatou] loto e le Atua” po o le “ona osofia lea o [tatou] e le Agaga o le Atua” i Lana galuega? (fuaiupu 9–10).

1 Samuelu 17:20–54.Atonu e fiafia lou aiga e faitau faatasi le tala ia Tavita ma Koliata (O “Tavita ma Koliata” i Tala o le Feagaiga Tuai e mafai ona fesoasoani) po o le matamata o le vitio “The Lord Will Deliver Me” (ChurchofJesusChrist.org). O lenei mea e mafai ona taitai atu ai i se talanoaga e faatatau i luitau tatou te feagai ia e tai pei o ni “Koliata” ia i tatou. E mafai foi ona outou tusia ni isi o nei luitau i luga o se faailoga po o se ata tusi o Koliata ma auauai e tauai atu i ai ni mea faitino (e pei o ni pepa e numinumi faalapotopoto).

Atonu foi e manaia le faitau e uiga i le ofutau ma auupega sa i ai ia Koliata (tagai i fuaiupu 4–7). O a ni mea sa i ai ia Tavita? (tagai i fuaiupu 38–40, 45–47). O a ni mea ua tuuina mai e le Alii e fesoasoani ia i tatou e faatoilalo ai o tatou Koliata?

1 Samuelu 18:1–4.Na faapefea ona avea Tavita ma Ionatana o se uo lelei i le tasi ma le isi? Ua faapefea ona faamanuiaina i tatou e uo lelei? O a ni mea e mafai ona tatou faia e avea ai o ni lelei—e aofia ai tagata o le tatou aiga?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “O Le a Ou Lototoa,” Tusipese a Tamaiti, 85.

Faaleleia o Lo Tatou Aoao Atu

Tuu atu pea lava pea lau molimau. “O lau molimau faigofie, ma faamaoni o upumoni faaleagaga e mafai ona i ai se uunaiga mamana i luga o [lou aiga]. E sili atu ona mamana se molimau pe a tuusao ma mai i le loto. E le tatau ona aloaia pe umi tele” (Aoao Atu i le Ala a le Faaola,11).

Atatusi o Tavita, na saunia e Dilleen Marsh