Ruta ma Naomi

O Le Mea E Te Alu I Ai, saunia e Sandy Freckleton Gagon

6–12 Iuni

Ruta; 1 Samuelu 1–3

“Ua Olioli Lava Lo’u Loto ia Ieova”

A o e suesue i le vaiaso lenei i olaga o Ruta, Naomi, Hana, ma isi, faalogo toto’a i le Agaga ma tusifaamaumau soo se lagona uunai e te maua. O le a se mea ua musuia oe e fai?

Tusifaamaumau Ou Lagona Uunai

O nisi taimi tatou te vaaifaalemafaufau ai e tatau ona mulimuli o tatou olaga i se ala manino mai lava i le amataga e oo i le iuga. Aua, o le mamao aupito puupuu i le va o ni tulaga se lua o se laina sa’o. Ae peitai, o le olaga e tumu i tolopooga ma auala ‘alo e avatu ai i tatou i tulaga e le’i mafaufauina. Tatou te iloa ai o o tatou olaga e fai si ese mai le mea sa tatou manatu e tatau ona i ai.

Sa malamalama lelei Ruta ma Hana i lenei mea. O Ruta e le o Isaraelu, ae sa faaipoipo i se [Isaraelu], ma ina ua maliu lana tane, sa i ai sana filifiliga e fai. Mata o le a toe foi atu o ia i lona aiga ma lona olaga tuai, sa masani ai, pe o le a ia talia le talitonuga a Isaraelu ma se aiga fou ma lona tina faaletulafono? (tagai i le Ruta 1:4–18). O le fuafuaga a Hana mo lona olaga o le a ia fanauina se fanau, ma o lona le mafai ona faia o lena mea na tuua ai o ia “i le loto tiga” (tagai i le 1 Samuelu 1:1–10). A o e faitau e uiga ia Ruta ma Hana, mafaufau i le faatuatua atonu sa ia i laua e tuu ai o laua olaga i aao o le Alii ma malaga ai i o laua ala sa le’i mafaufauina. Ona e mafaufau lea i la oe lava malaga. O le a ese le foliga mai [le ala] a Ruta ma Hana—ma isi tagata uma. Ae i taimi o tofotofoga ma mea e ofo ai i le va o le taimi nei ma lou taunuuga e faavavau, e mafai ona e aoao e fai faatasi ma Hana, “Ua olioli lava lo’u loto ia Ieova” (1 Samuelu 2:1).

Mo se aotelega o tusi o Ruta ma 1 Samuelu, tagai i le “Ruth” ma le “Samuel, books of” i le Bible Dictionary.

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Ruta

E mafai e Keriso ona liliu mala i le manumalo.

Ina ua maliu le tane a Ruta, na i ai taunuuga o le mala mo ia na sili atu foi ona ogaoga nai lo o taunuuga e ono feagai ma fafine ua oti lana tane i aso nei. I le aganuu a Isaraelu i lena vaitaimi, o se tamaitai e leai se tane po o ni atalii na leai sona aiā i fanua ma toeitiiti lava a leai se auala e maua ai se mea e tausi ai o ia. Ao e faitau i le tala a Ruta, maitau le ala na liliu ai e le Alii le mala i ni faamanuiaga maoae. O le a se mea e te matauina e uiga ia Ruta atonu na fesoasoani ia te ia? O le a le matafaioi a Poasa i le laveaiina o Ruta mai lona tulaga pagatia? (tagai i le Ruta 4:4–7). O a ni uiga faaKeriso o e vaaia ia Ruta ma Poasa?

Ruta; 1 Samuelu 1

E mafai ona ou faatuatua o le a taiala ma fesoasoani le Atua ia te a’u e tusa lava po o le a lo’u tulaga.

Mata e mafai ona e vaaia oe lava i tala ia Ruta, Naomi ma Hana? Atonu na e mafatia i se toesega tele, e pei ona sa i ai Ruta ma Naomi (tagai i le Ruta 1:1–5). Pe atonu, e pei o Hana, o loo e moomoo mo ni faamanuiaga e te le’i mauaina lava (tagai i le 1 Samuelu 1:1–10). Mafaufau loloto po o a ni savali e mafai ona e aoao mai i faataitaiga a nei tamaitai faatuatua. Na faapefea ona faaalia e Ruta ma Hana le faatuatua i le Atua? O a faamanuiaga na laua mauaina? E mafai faapefea ona e mulimuli i a la’ua faataitaiga? Mafaufau pe o faapefea ona e “sau e faatuatua” i le Alii (Ruta 2:12) e ui lava ina lagona le faigata o le olaga.

Tagai foi Reyna I. Aburto, “I Mala i Manū, Iesu, Afio Mai!” Liahona, Nov. 2019, 57–60.

Hana ma Samuelu

Mo Lenei Tamaitiiti Na Ou Tatalo Ai, saunia e Elspeth Young

1 Samuelu 2:1–10

E mafai ona olioli lo’u loto i le Alii.

Ina ua uma ona ave e Hana le taulealea o Samuelu i le malumalu, sa ia tautalagia ni upu vivii matagofie i le Alii, ua tusifaamaumauina i le 1 Samuelu 2:1–10. O nei upu e sili foi ona faagaeetia pe a e mafaufau e faapea, o se taimi puupuu e le’i mamao atu, “ua tiga lona loto, … ma ua tagi tele” (1 Samuelu 1:10). A’o e suesue i nei fuaiupu, o a ni savali e te maua ai e faapea ona faateleina ai ou lagona vivii ma le lotofaafetai i le Alii? Atonu o le a musuia oe e le pese a Hana e su’e se auala fatufatuai e faailoa atu ai lou lotofaafetai i le Alii—o se pese, o se atavali, o se galuega o auaunaga, po o soo se mea e ta’u atu ai ou lagona ia te Ia.

Ioe, e le o tatalo faatauanau uma e taliina i le ala na tali ai le [tatalo] a Hana. O le a se mea e te maua i le savali a Peresitene Dieter F. Uchtdorf “Ia lotofaafetai i So’o Se Tulaga” e mafai ona fesoasoani ia te oe pe a le taliina au tatalo i le ala na e faamoemoe i ai? (Liahona, Me 2014, 70–77)

1 Samuelu 3

E mafai ona ou faalogo ma usitai i le siufofoga o le Alii.

E pei o i tatou uma, na tatau ia Samuelu ona aoao ia iloa le siufofoga o le Alii. Ao e suesue i le 1 Samuelu 3, o le a se mea e te aoao mai i lenei alii talavou e faatatau i le faalogoina ma usitai i le siufofoga o le Alii? O a ni aafiaga na e maua i le lagonaina o Lona siufofoga? O a ni avanoa o ia te oe, e pei o Eli, e fesoasoani ai i isi ia iloa le taimi e fetalai mai ai le Alii ia i latou? (tagai i le 1 Samuelu 3:7).

Tagai foi i le Ioane 14:14–21; David P. Homer, “Lagonaina o Lona Siufofoga,” Liahona, Me 2019, 41–43.

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Ruta 1:16–18; 2:5–8, 11–12.E mafai ona vaavaai lou aiga mo ni faataitaiga o le agalelei ma le faamaoni i nei fuaiupu. E faapefea ona tatou faaali atu le agalelei i lo tatou aiga ma isi ma le faamaoni ia Iesu Keriso? O le mataupu “Ruta ma Naomi” (i Tala o le Feagaiga Tuai) e mafai ona fesoasoani i lou aiga e aoao mai i le faataitaiga a Ruta.

1 Samuelu 1:15.Atonu e te liligiina i fafo se mea mai se koneteina e fesoasoani i tagata o le aiga e vaaifaalemafaufau ai i le uiga o le tala a Hana ina ua ia fai mai, “ua ou momoli atu lo’u loto ia Ieova.” Aisea ua avea ai lenei auala o se auala lelei e faamatala ai le mea e tatau ona i ai a tatou tatalo? E mafai faapefea ona tatou faaleleia a tatou tatalo faletagata lava ia ma tatalo faaleaiga?

1 Samuelu 2:1–10.O le solo o le vivii o Hana i le Alii e mafai ona e mafaufau ai i pese e te faaaogaina e vivii ai i le Alii. E mafai ona outou usuina faatasi ni [pese]. E mafai foi ona mafaufau tagata o lou aiga i isi auala e faaali atu ai o latou lagona mo Iesu Keriso. Mo se faataitaiga, e mafai ona latou tusia ni ata e faaalia ai le mafuaaga latou te alolofa ai i le Faaola.

1 Samuelu 3:1–11.Atonu e malie pe a faatino le tala o le valaauga e le Alii o Samuelu, pe e mafai ona matamata lou aiga i le vitio “Samuelu and Eli” (ChurchofJesusChrist.org). E mafai e tagata o le aiga ona talanoa e uiga i taimi na latou lagonaina ai le talanoa atu o le Alii ia i latou ma le ala na latou tali atu ai i Ana upu.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Ua Susulu Mai Nei o le La,” Viiga, nu. 140.

Faaleleia o Suesuega Faaletagata Lava ia

Tuu atu i le Agaga e taitaia au suesuega. Tatalo ina ia taiala oe e le Agaga Paia i mea e manaomia ona e aoao i ai. Ia mataala i Ana musumusuga, tusa lava pe taitai atu ai oe e lenei mea e faitau e uiga i se autu e te le’i mafaufauina po o le suesue i se isi auala .

o le tama o Samuelu i totonu o le faleie

Atatusi o Samuelu o loo faalogo atu i le Alii, na saunia e Sam Lawlor