O Le Mea E Te Alu I Ai, saunia e Sandy Freckleton Gagon

6–12 Iuni

Ruta; 1 Samuelu 1–3

“Ua Olioli Lava Lo’u Loto ia Ieova”

A o e faitauina le Ruta ma le 1 Samuelu 1–3, ole atu i le Tama Faalelagi pe faapefea ona e fesoasoani i tamaiti e aoao mai upumoni i mataupu nei. Tusi faamaumau lagona uunaia e te maua.

Tusi Faamaumau Ou Lagona Uunaia

Valaaulia le Fefaasoaai

Tuu atu i tamaiti e faasoa mai mea latou te iloa e uiga ia Ruta, Naomi, Hana, po o Samuelu. E ono fesoasoani le faaali atu ia i latou o ata, e pei o ata o loo i totonu o le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga.

Aoao atu le Aoaoga Faavae: Tamaiti Laiti

Ruta

E mafai ona ou faaali atu le alofa ma le agalelei ia i latou o siomia aʻu.

Ina ua maliu le toalua o Ruta, sa mafai ona nofo o ia i lona nuu, ae sa ia filifili e alu ma le tina o lona toalua, o Naomi, ma tausi ia te ia. Mafaufau pe mafai faapefea e le faataitaiga faa-Keriso a Ruta ona musuia tamaiti o loo e aoaoina ia agalelei ia i latou o siomiaina i latou.

Gaoioiga e Mafai Ona Fai

• Fai i tamaiti e fai ma sui o Naomi, Ruta, Poasa, po o isi tagata a o e faamatalaina a latou tala mai le tusi a Ruta (tagai foi ia “Ruta ma Naomi” i Tala o le Feagaiga Tuai). Valaaulia tamaiti e sii o latou lima i taimi uma latou te faalogo ai i se gaoioiga o le agalelei i le tala. O a ni o tatou lagona pe a agalelei mai tagata ia i tatou? O a ni o tatou lagona pe a tatou agalelei atu i isi?

• Usu faatasi se pese e faatatau i le agalelei, e pei o le “O Le Agalelei e Amata Ia Te A’u” (Tusipese a Tamaiti, 83). Fesoasoani i tamaiti e mafaufau i auala e mafai ai ona latou faaali atu le agalelei i o latou aiga ma uo. Afai latou te manaomia le fesoasoani, faaali atu ia i latou ata o tagata o loo faaalia le agalelei. Mo manatu uma latou te ta’ua, tuu tamaiti e tusi se fatu i luga o le laupapa.

1 Samuelu 1:1–18

E faafofoga ma tali mai le Tama Faalelagi i au tatalo.

Ina ua faanoanoa Hana ona ua le mafai ona maua sana fanau, sa ia liliu atu i le Alii i le faatuatua ma na Ia taliina lana tatalo. Fesoasoani i tamaiti ia latou iloa e mafai ona latou tatalo i le Tama Faalelagi i taimi uma, ae maise pe a latou faanoanoa.

Gaoioiga e Mafai Ona Fai

• I au lava upu, faamatala atu i tamaiti le mafuaaga na faanoanoa ai Hana (tagai 1 Samuelu 1:2-8; tagai foi “Hana” i Tala o le Feagaiga Tuai). O a mea e mafai ona tatou faia pe a tatou faanoanoa? Faitau atu i tamaiti le 1 Samuelu 1:10, ma valaaulia tamaiti e faalogo mo le mea na faia e Hana. Fesili atu i tamaiti pe faapeī o latou lagona pe a latou tatalo. Faitau mai le fuaiupu 18 e faamatala ai ina ua uma lana tatalo, sa “le toe mata faanoanoa” Hana.

  

  For This Child I Prayed (O Le Tama Nei Na Ou Tatalo Atu Ai), saunia e Elspeth Young

• Faaaoga le itulau o gaoioiga o lenei vaiaso e aoao ai tamaiti e mafai ona latou tatalo i le Tama Faalelagi ma o le a Ia fesoasoani ia i latou. A o valivali tamaiti, usu pe ta se pese e aoao ai e uiga i le tatalo, e pei o le “O Le Tatalo A Le Tamaitiiti” (Tusipese a Tamaiti, 6--7).

1 Samuelu 2:1–10

E tele mea matagofie na faia e le Alii mo aʻu.

Sa faaalia e Hana lona agaga faafetai i le Alii i se solo matagofie o viiga. O lana faataitaiga e mafai ona fesoasoani i tamaiti e mafaufau ai i le tele o mea e mafai ona latou faafetai ai i le Tama Faalelagi.

Gaoioiga e Mafai Ona Fai

• Faitau atu i tamaiti nisi o mea na fai mai ai Hana ina ua uma ona faamanuia o ia e le Alii i se atalii (tagai 1 Samuelu 2:1–2). Faasoa i tamaiti se faamanuiaga ua e mauaina mai le Alii ma pe faapefea ou lagona i lena mea. Ona valaaulia lea o tamaiti e talanoa e uiga i faamanuiaga ua tuuina mai e le Alii ia i latou. E faapefea ona faaalia lo tatou agaga faafetai ia te Ia?

• Usu faatasi se pese e faamatala ai nisi o faamanuiaga e foai mai e le Alii, e pei o “E Alofa Lo’u Tama Faalelagi Ia Te A’u” (Tusipese a Tamaiti, 16). Ia valaaulia tamaiti e tusi ni ata o ni faamanuiaga ua latou mauaina mai le Alii.

Aoao atu le Aoaoga Faavae: Tamaiti Matutua

Ruta

E mafai ona ou faatuatua i le Alii.

Na faia e Ruta osigataulaga ia faamaoni i le Alii ma tumau faamaoni ia Naomi. E faapefea ona e fesoasoani i tamaiti e aoao mai i le gaoioiga o le faatuatua o Ruta?

Gaoioiga e Mafai Ona Fai

• Faaali atu se ata o Ruta ma Naomi (tagai i le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga). Ona tusi lea o ulutala e tolu i luga o le laupapa: Tofotofoga, Gaoioiga, Faamanuiaga. Valaaulia tamaiti e faitau le Ruta 1:3–5, 8, 16; 2:1–3, 8–12; 4:13–17, ma tusi i lalo o ulutala mea latou te mauaina i nei fuaiupu. Na faapefea ona faaalia e Ruta lona faatuatua i le Alii? Faasoa atu se faataitaiga o le faamanuiaga ua e maua ona o lou faatuatua ia Iesu Keriso, ma tuu le avanoa i tamaiti e faasoa mai ni o latou lava aafiaga.

• Usu faatasi se pese e faatatau i le faatuatua, e pei o le “O Iesu Lo‘u Sulu” (Viiga, nu. 49) or “Faatuatua” (Tusipese a Tamaiti, 50). O le a le mea ua aoao mai e le pese e uiga i le faatuatua i le Alii? E mafai faapefea ona tatou maua le faatuatua ia Iesu Keriso, e oo lava i taimi faigata?

1 Samuelu 1

E faafofoga ma tali mai le Tama Faalelagi i au tatalo.

O Hana ina “ua tiga lona loto,” sa ia liliu atu i le Tama Faalelagi i le tatalo (1 Samuelu 1:10). E faapefea ona e faamalosiau i tamaiti o loo e aoaoina ia latou faia foi lea mea?

Gaoioiga e Mafai Ona Fai

• Ina ia fesoasoani i tamaiti e aoao e uiga ia Hana mai le 1 Samuelu 1, tuu atu i tamaiti uma ni nai fuaiupu e faitau mai ai i le mataupu (pe faaali le vitio “Hannah’s Faith,” ChurchofJesusChrist.org). A maeʻa, togi se polo po o se mea faitino i se tasi tamaitiiti ma valaaulia o ia e faamatala se vaega o le tala ae leʻi pasi le polo i le isi tamaitiiti e faamatala se isi vaega o le tala. A uma le tala, fai i tamaiti e faasoa mai se mea na latou aoaoina mai le faataitaiga a Hana.

• Faitau faatasi le 1 Samuelu 1:15, ma talanoaina le uiga o le sasaa atu o o tatou agaga i luma o le Alii. Faatasi ma tamaiti, fai se lisi o mea e mafai ona tatou talanoa ai ma le Atua pe a tatou tatalo. Usu faatasi se pese e faatatau i le tatalo, e pei o le “O Le Tatalo A Le Tamaitiiti” (Tusipese a Tamaiti, 6--7). Ia molimau atu i le alofa o le Atua mo Lana fanau ma Lona finagalo e faafofoga ma tali mai ia latou tatalo.

• Fai atu i tamaiti e lisi (taitoatasi pe i ni vaega) ni faataitaiga o tagata i tusitusiga paia na tatalo i le Tama Faalelagi. (Afai latou te manaomia le fesoasoani, e mafai ona e faasino ia i latou fuaiupu nei Luka 22:41–43; Enosa 1:2–6; Talafaasolopito—Iosefa Samita 1:14–17.) Fai atu ia i latou e faasoa mai mea ua latou aoaoina mai nei tala.

1 Samuelu 3:1–10

E mafai ona ou lagonaina ma usitai i le siufofoga o le Alii.

A o tamaitiiti Samuelu, sa ia faalogo i le siufofoga o le Alii ae na te leʻi iloaina muamua. E faapefea ona e fesoasoani i tamaiti o loo e aoaoina ia faalogo ma faatino i musumusuga latou te mauaina?

Gaoioiga e Mafai Ona Fai

• Valaaulia se tamaitiiti e suitulaga e avea ma Samuelu ma se isi e suitulaga ia Eli ao e faitauina le 1 Samuelu 3:1-10 (pe faaali le vitio “Samuel and Eli,” ChurchofJesusChrist.org). O le a se mea e mafai ona tatou aoao mai ia Samuelu e uiga i le ala e faalogo ai i le siufofoga o le Alii? E faapefea ona faaalia lo tatou naunau e faalogo pe a fetalai mai le Alii ia i tatou?

• Fai i tamaiti e mafaufau pe faapefea ona latou faamatalaina i se tasi le ala e fetalai mai ai le Alii ia i latou. Valaaulia i latou e vaavaai mo tali i se tasi po o le sili atu o mau nei: Mataupu Faavae ma Feagaiga 6:22–23; 8:2–3; 9:7–9.

Uunaia le Aoaoina i le Aiga

Uunaia tamaiti e mafaufau i se tasi po o se mea e mafai ona latou tatalo ai i lenei vaiaso. Avatu ia i latou avanoa i le lumanai e faasoa mai ai pe faafefea ona taliina e le Tama Faalelagi a latou tatalo.

Faaleleia o Lo Tatou Aoao Atu

Fanau o i ai manaoga faapitoa. Faamolemole asiasi i le disability.ChurchofJesusChrist.org e saili ai pe faapefea ona e fesoasoani i manaoga o tamaiti o i ai manaoga faapitoa.