Ata tusi o Tepora o loo taitaia autau a Isaraelu, © Lifeway Collection/licensed mai le goodsalt.com

30 Me–5 Iuni

Faamasino 2–4; 6–8; 13–16

“Ona Faatuina ai lea e Ieova o le Faaola”

E tele tala musuia o loo maua i le Faamasino 2–4; 6–8; 13–16. Mafaufau loloto pe faapefea ona e faaaogaina nei tala e fesoasoani ai i tamaiti e latalata atili atu ai i le Faaola ma naunau e mulimuli ia te Ia.

Tusi Faamaumau Ou Lagona Uunai

Valaaulia le Fefaasoaai

Ia valaaulia tamaiti uma e faasoa mai se tala mai tusitusiga paia na latou aoaoina talu ai nei. Fai atu ia i latou e faasoa mai mea ua latou aoaoina mai nei tala.

Aoao atu le Aoaoga Faavae: Tamaiti Laiti

Faamasino 3:9

O Iesu Keriso o lo’u Faaola.

Ina ua tatalo Isaraelu i le Alii, na Ia faatuina se faaola mo i latou. Fesoasoani i tamaiti ia latou iloa o Iesu Keriso o le Faaola na faatuina mai e le Atua mo i tatou.

Gaoioiga e Mafai Ona Fai

• Faamatala i tamaiti ina ua le tausia e Isaraelu tulafono a le Atua, na latou le maua Lana puipuiga ma sa faatoilaloina e o latou fili. Faitau mai le Faamasino 3:9 le fasifuaitau “ua alalaga atu le fanauga a Isaraelu ia Ieova.” O a mea sa fai e Isaraelu ina ua latou manaomia le fesoasoani? Faasoa atu se aafiaga ina ua tatalo mo se fesoasoani ma na tali mai le Atua i lau tatalo.

• Faitau mai le Faamasino 3:9 le fasifuaitau “ona faatuina ai lea e Ieova o le Faaola” ma valaaulia tamaiti tou te toe faia faatasi mo ni nai taimi. Faamatala atu o le faaola o se tasi na te laveaiina i tatou. Faaali atu i tamaiti ni ata o tagata, e aofia ai se ata o Iesu Keriso, ma faafao ia ata i luga o le foloa. Tuu atu i tamaiti e auauai e liliu i luga ia ata, saili le ata o Iesu, ma uu i luga. Ia molimau atu o Iesu Keriso o le Faaola na faatuina e le Atua e laveaiina i tatou mai le agasala ma le oti.

Na talitonu Kitiona i le Alii. © Lifeway Collection/licensed mai le goodsalt.com

Faamasino 6:11–16; 7:1–8

E mafai ona faaaoga e le Alii mea iti e fai ai galuega tetele.

Na manatu Kitiona o ia o se tagata mativa ma faatauvaa, ae na silasila le Atua ia te ia o se “toa malosi” (Faamasino 6:12). Fesoasoani i tamaiti ia latou iloa e tusa lava pe latou te lagona le faatauvaa, e mafai ona galue le Atua ia i latou e faia mea taua (tagai Alema 37:6–7).

Gaoioiga e Mafai Ona Fai

• Tau atu i tamaiti na manaomia e le Alii se tasi e fesoasoani ia te Ia e laveai Isaraelu mai o latou fili, o Mitiana, ma na Ia filifilia Kitiona. Faitau le Faamasino 6:15 i tamaiti, ma fesili atu ia te i latou pe aisea na le lagona ai e Kitiona na te mafai ona faia le mea na finagalo ai le Alii. Faitau le fuaiupu 16, ma fesili atu ia i latou po o ai na fetalai le Alii o le a fesoasoani ia Kitiona. Tau atu i tamaiti e uiga i se taimi na fai atu ai le Alii ia te oe e faia se mea faigata e auauna atu ai ia te Ia ma na e lagonaina na Ia faatasi ma oe.

• Faaali atu ni ata o tamaiti poo le autalavou o faia ni mea tetele i le galuega a le Atua (tagai Tusi Ata o le Talalelei, nu.19, 23, 90, 102), pe faamatala mai ni faataitaiga na e vaaia. Fesoasoani i tamaiti e mafaufau i ni auala e mafai ai ona latou auai i le galuega a le Atua, ma valaaulia i latou e tusi ni a latou ata o loo faia nei mea.

• Faaaoga le itulau o le gaoioiga o lenei vaiaso e aoao ai tamaiti e uiga i le auala na faaitiitia ai e le Alii le autau a Isaraelu ina ia iloa ai e tagata Isaraelu o Lona mana na laveaiina ai i latou mai o latou fili. Faasoa ni faataitaiga o mea faatauvaa e faia se galuega tele, pei o lagomeli e faaputuputu sua e fai ai le meli. Faasoa atu lau molimau e mafai e le Atua ona fesoasoani mai ia tatou faia se galuega sili, tusa lava pe tatou te lagona le faatauvaa.

Aoao atu le Aoaoga Faavae: Tamaiti Matutua

Faamasino 3:7–9, 12–15

O Iesu Keriso o lo’u Laveai.

O le Faamasino 3 o loo faamatalaina mai ai le faasologa e mafai ona e faaaogaina e aoao ai tamaiti, o le Atua na te laveaiina i tatou mai agasala e ala i le Faaola o Iesu Keriso.

Gaoioiga e Mafai Ona Fai

• Tusi faamatalaga nei i luga o le laupapa: “ua amioleaga,” “alalaga atu ia Ieova,” ma le “faatuina le faaola.” Valaaulia nisi o tamaiti e saili fasifuaitau nei i le Faamasino 3:7–9, ma valaaulia isi e saili i latou i le Faamasino 3:12–15. Faamatala atu i tamaiti e ta’ua soo i totonu o le tusi o Faamasino, “ua amioleaga” le fanauga a Isaraelu.” Ma, ina ua osofai e o latou fili, sa latou “alalaga atu ia Ieova,” ma na “faatuina [ai lea e Ieova] o le faaola” e fesoasoani ia i latou. O le a se mea ua tatou aoaoina e uiga i le Alii mai lenei faasologa?

• Usu faatasi se pese e fesoasoani ai i tamaiti ia malamalama o Iesu Keriso o lo latou Togiola ma le Laveai, e pei o le “Na Ia Auina Mai Lona Alo” (Tusipese a Tamaiti, 20--21). Ia valaaulia tamaiti e faasoa atu o latou lagona e uiga i mea na faia e le Faaola e faasaoina ai i tatou mai agasala, tofotofoga, faanoanoaga, ma le oti.

Faamasino 4:1–15

E mafai ona ou faamaoni i le Alii tusa lava pe le faamaoni isi.

E ui o le toatele o Isaraelu na paʻu’ū ese mai le Alii, o nisi na tumau faamaoni ia te Ia ma mafai ona fesoasoani i le tele o isi ia toe foi mai i le amiotonu. E faapefea ona e faamalosiau i tamaiti e tumau faamaoni i le Alii tusa lava poo a mea o fai e isi?

Gaoioiga e Mafai Ona Fai

• Tau atu i tamaiti i se taimi na amioleaga ai Isaraelu, o se fafine amiotonu e igoa ia Tepora ma le taitaiau o le autau a Isaraelu, o Parako, na laveaiina Isaraelu mai o latou fili (tagai i le Faamasino 4:1–15). Faitau faatasi le Faamasino 4:14, ma fai atu i tamaiti e saili se mea na fai mai ai Tepora na faaalia ai o lona faatuatua i le Alii e malosi. Ona fai atu lea ia te i latou e faitau le Mataupu Faavae ma Feagaiga 84:88 e sue ai se mataupu faavae o loo i ai foi i le Faamasino 4:14. Uunaia i latou e faasoa mai le uiga o le folafolaga a le Alii “o le a Ou alu muamua atu i o outou luma” ia i latou.

• Usu se pese e faatatau i le usitaia o tulafono, e pei o le “Filifili Tau o Mea Tonu” (Viiga, nu. 149) “Filifili Le Ala Sa’o” (Tusipese a Tamaiti, 82). E faapefea ona tatou tutu mo le amiotonu ma usitai i tulafono tusa lava pe le faia e isi o loo siomia i tatou?

Faamasino 7

O ala a le Atua e ese mai ala a le lalolagi.

Na fai atu le Alii ia Kitiona e fai ni mea atonu na te leʻi malamalama ai i lena taimi. O le a se mea e musuia ai oe e uiga i lana tala? O le a sou lagona pe faapefea ona faamanuiaina ai tamaiti o loo e aoaoina?

Gaoioiga e Mafai Ona Fai

• Fai atu i tamaiti e vaai faalemafaufau faapea latou te manaomia le faapotopoto faatasi o se autau e o atu i le taua. E toafia tagata latou te mananao e i ai i la latou autau? I le faaaogaina o le Faamasino 7: 4–7, valaaulia tamaiti e faatino le ala na fesoasoani ai le Alii ia Kitiona e filifili le autau e faasaoina Isaraelu mai Mitiana. Aisea na finagalo ai le Alii ia toaitiiti le autau a Kitiona? (tagai Faamasino 7:2). Aisea atonu na faigata ai ia Kitiona ma lana autau le mulimuli i le faatonuga a le Alii? Ia valaaulia tamaiti e fetufaai mai ni mea na latou oo i ai ina ua latou aoao e talitonu i le Alii e tusa lava pe na faigata.

• Valaaulia tamaiti e tusi ni ata o se pelu, talita, pu, moli ma se tui tele. Fesili i tamaiti po o fea o nei mea faitino latou te aveina ma latou i se taua. Valaaulia i latou e faitau le Faamasino 7:16 e aoao ai i mea na ave e le autau a Kitiona. Aisea na manaomia ai le lototele e faia ai lenei mea? Faitau faatasi le Faamasino 7:19-21 e aoao ai pe faapefea ona faaaoga e le autau pu ma tui e faatoilalo ai Mitiana. O le a se mea ua tatou aoaoina e uiga i le Alii mai lenei tala?

Uunaia le Aoaoina i le Aiga

Valaaulia tamaiti e faasoa atu i se tagata o le aiga se mea na latou aoaoina i le asō e mafua ai ona latou mananao e tausi tulafono.

Faaleleia o Lo Tatou Aoao Atu

Fetuunai ia gaoioiga ina ia fetaui ma manaoga. Aua e te vaai i nei otootoga o ni faatonuga e tatau ona e mulimuli ai. Nai lo lena, ia faaaogaina e avea o se punavai o manatu e faaalia ai au lava musumusuga a o e mafaufau loloto i manaoga o tamaiti o loo e aoaoina. Mo se faataitaiga, i nisi tulaga, atonu e te lagona le musuia e fetuunai se gaoioiga mo tamaiti laiti e aoao atu i tamaiti matutua, po o le isi itu.