Ata o Mose o loo faauuina Iosua, saunia e Darrell Thomas

23–29 Me

Iosua 1–8; 23–24

“Ia e Faamalosi ma Loto Tele”

A o e faitauina le Iosua 1–8 ma le 23–24, faamaumau uunaiga faaleagaga e te maua. O le a sau mea e fai e iloa ai mea e manaomia e tamaiti o loo e aoaoina mai nei mataupu?

Tusi Faamaumau Ou Lagona Uunaia

Valaaulia le Fefaasoaai

Tusi se ata i luga o le laupapa o se mea mai se tasi o tala i le Iosua 1–8; 23–24, ma vaai pe mateia e tamaiti le tala e mafua mai ai. Mo se faataitaiga, e mafai ona e tusia se vaitafe po o se pa o le aai.

Aoao atu le Aoaoga Faavae: Tamaiti Laiti

Iosua 1:8

E mafai ona ou mafaufau i tusitusiga paia i le ao ma le po.

Na taʻu atu e le Alii ia Iosua afai na te mafaufau loloto i tusitusiga paia ma mulimuli i le fautuaga o i ai, o le a manuia lona taitaiga o Isaraelu i le nuu folafolaina. O a ni mea e mafai ona e faia e aoao ai tamaiti i faamanuiaga silisili e maua mai i tusitusiga paia?

Gaoioiga e Mafai Ona Fai

• Tuu atu i tamaiti taitoatasi se ata poo se ata tusi o le la ma le masina. Faitau atu ia i latou mai le Iosua 1:8: “Mafaufau loloto [i tusitusiga paia] i le ao ma le po.” Faamatala atu o le mafaufau o lona uiga o le mafaufau loloto i se mea. Toe fai le fuaitau mo ni nai taimi, ma valaaulia tamaiti e uu i luga le la pe a e fai atu “ao” ma le masina pe a e fai atu “po.” Ia fai faatasi ma tamaiti le faaupuga.

• Fai atu i tamaiti e taʻu mai mea latou te faia i le ao ma mea latou te faia i le po. Taʻu atu ia i latou na tau atu ia Iosua e mafaufau e uiga i tusitusiga paia i le ao ma le po. Fesoasoani ia latou mafaufau i tala po o aoaoga mai tusitusiga paia e mafai ona latou mafaufau ai i le ao ma le po. Valaaulia i latou e tusi se ata o i latou lava po o latou aiga o suesueina tusitusiga paia. Aisea latou te fiafia ai e suesue i tusitusiga paia? E faapefea ona faamanuiaina i latou pe a latou faia?

Iosua 3

E tatau ona ou papatiso ina ia ou ulu atu ai i le malo o le lagi.

O le tala ia Iosua ma le taitaiina o le fanauga a Isaraelu i totonu o le Vaitafe o Ioritana i le nuu folafolaina, ua maua ai le avanoa e aoao ai i tamaiti, e tatau ona tatou papatiso e ulufale ai i le malo o le lagi.

Gaoioiga e Mafai Ona Fai

• Iloilo nisi o auiliiliga o le tala i le fanauga a Isaraelu na sopoia le Vaitafe o Ioritana e ulu atu i le nuu na folafolaina (tagai “Iosua le Perofeta” i Tala o le Feagaiga Tuai). Ona faaali atu lea o le ata o Iesu ua papatisoina, ma taʻu atu i tamaiti na papatisoina Iesu i le vaitafe lava lea. Valaaulia tamaiti e faasoa mai nisi mea latou te iloa e uiga i le papatisoga o Iesu.

• Usu faatasi ma tamaiti se pese e faatatau i le paptisoga, e pei o le “Papatisoga” (Tusipese a Tamaiti, 54). Fesoasoani ia i latou e faailoa mai mea ua aoao mai e lenei pese ia i tatou pe aisea na papatiso ai Iesu ma aisea e tatau ai ona tatou mulimuli i Ana faataitaiga. Valaaulia tamaiti e faasoa mai o latou lagona e uiga i le papatisoina. Talanoa e uiga i mea e mafai ona fai e tamaiti i le taimi nei e sauni ai e papatiso pe a valu o latou tausaga.

  

  E tatau ona papatisoina i tatou e ulu atu ai i le malo o le Atua.

Iosua 24:15

E mafai ona ou filifili e auauna ia Iesu Keriso.

O le savali mulimuli a Iosua i lona nuu o le latou filifiliga e faaauau pea ona auauna i le Alii pe lafoai ia te Ia. I le alofa lava e tasi sa ia Iosua mo ona tagata, e mafai ona e faamalosiau i tamaiti o loo e aoaoina e filifili e auauna i le Alii “i le aso.”

Gaoioiga e Mafai Ona Fai

• Fai i tamaiti e talanoa e uiga i nisi o filifiliga na latou faia i le aso. Faitau atu i tamaiti mai le Iosua 24:15: “Ina filifili ia outou i le aso nei po o ai tou te auauna i ai; … a o a’u nei ma lo’u aiga, matou te auauna ia Ieova.” E faapefea ona filifili tamaiti e auauna i le Alii i aso nei? O a nisi o auala e mafai ona tatou filifili ai e auauna ia te Ia i aso uma?

• Usu faatasi se pese e faatatau i le faia o filifiliga sa’o, e pei o le “Filifili Le Ala Sa’o” (Tusipese a Tamaiti, 82). O a ni o tatou lagona pe a tatou filifili e auauna ia Iesu Keriso? Valaaulia tamaiti e tusi se ata o i latou lava o loo faia se mea e auauna ai i le Alii. Faasoa atu se tala mai lou olaga pe mai se mekasini a le Ekalesia e uiga i le filifili e auauna i le Alii.

Aoao atu le Aoaoga Faavae: Tamaiti Matutua

Iosua 1–4; 6

“Ia e faamalosi, ma loto tele.”

Ina ua avea Iosua ma taitai o Isaraelu, sa faamalosiauina o ia e le Alii i lona faapea atu “Ia faamalosi ma loto tele” (Iosua 1:6). O a ni mea e mafai e tamaiti ona aoao mai ia Iosua e uiga i le faamalolosi ma le lototetele mo Keriso?

Gaoioiga e Mafai Ona Fai

• Valaaulia tamaiti e saili le fasifuaitau o loo toe taʻu mai i le Iosua 1:6, 9, ma le 18, ma tusi i luga o le laupapa (tagai foi i le fuaiupu 7). Fesoasoani i tamaiti e mafaufau i mafuaaga tatou te ono manaomia ai lenei savali, pei ona faia e Iosua. Iloilo o se vasega ni tala i le Iosua 1-4; 6 (tagai foi i le “Iosua le Perofeta” ma le “Raava ma Tagata Matavao Faalilolilo” i Tala o le Feagaiga Tuai), ma fai atu i tamaiti e faailoa mai pe na faapefea ona faaalia e tagata i nei tala le lototele ma le malosi.

• Valaaulia tamaiti e talanoa e uiga i se tasi latou te iloa o le e malosi ma lototoa mo Iesu Keriso. Uunaia i latou e tusi i lalo se mea latou te mananao e fai ia malosi atili atu ai ma sili atu le lototele mo Keriso.

Iosua 1:8

E mafai ona ou mafaufau loloto i tusitusiga paia i le ao ma le po.

O se tasi auala na fesoasoani ai le Alii ia Iosua e sauniuni mo luitau sa feagai ma ia o le faamalosiau atu lea ia te ia e “mafaufau loloto” i tusitusiga paia i le “ao ma le po.” E faapefea e lenei fautuaga ona faamanuiaina tamaiti o loo e aoaoina?

Gaoioiga e Mafai Ona Fai

• Ia valaaulia tamaiti e tusi i lalo le tele o le taimi latou te faaaluina i se aso i gaoioiga eseese. Ona valaaulia lea o i latou e faitau le Iosua 1:8, ma vaavaai mo se mea e tatau ona tatou faia uma i ao ma po. Fai atu ia i latou e saili upu ma fasifuaitau i lenei fuaiupu o loo aoao ai i tatou e uiga i faamanuiaga o le suesueina o tusitusiga paia. E faapefea e le mafaufau loloto i tusitusiga paia ona fesoasoani ia tatou maua le manuia i isi mea tatou te faia i aso uma?

• Valaaulia tamaiti e faitau faatasi mau nei: Iosua 1:8; 1 Nifae 15:23–24; 2 Nifae 31:20; 32:3; Iakopo 4:6; Helamana 3:29–30. Fai atu ia i latou e saili upu ma fasifuaitau i lenei fuaiupu o loo aoao ai i tatou e uiga i le mana o le suesueina o tusitusiga paia. O a ni sini e mafai ona latou setiina mo a latou lava suesuega o tusitusiga paia?

Iosua 24:15

E mafai ona ou filifili e auauna ia Iesu Keriso.

Faatasi ai ma upu faaiu a Iosua i le fanauga a Isaraelu o le aioi atu ia “filifili… i le aso nei po o ai tou te auauna i ai.” Mafaufau pe mafai foi faapefea e lenei fautuaga ona faamanuiaina tamaiti o loo e aoaoina.

Gaoioiga e Mafai Ona Fai

• Valaaulia tamaiti e fai se pepa lautele o i ai se savali e faaaoga ai ni upu taua ma fasifuaitau i le Iosua 24:15. Tuu i latou e faasoa atu a latou pepa lautele o i ai se savali ma faamatala pe aisea na latou filifilia ai na upu. E mafai faapefea ona tatou faaali atu i le Atua ua tatou filifili e auauna atu ia te Ia?

• Valaaulia tamaiti e faasoa mai ni auala atonu latou te ono filifili ai e filifili le Atua nai lo isi mea. Fai atu ia i latou e mafaufau po o le a le mea o le a latou faia. Aisea e taua ai le “filifili … i le aso nei” nai lo le faʻatali mo le tulaʻi mai o le mataupu? E faapefea ona faamanuiaina i tatou pe a tatou faia le filifiliga saʻo?

Uunaia le Aoaoina i le Aiga

Ia valaaulia tamaiti e filifili se mea na e talanoaina latou te mananao e faasoa atu ai i o latou aiga. Uunaia i latou e mafaufau i se auala e mafai ona latou faasoa atu ai lenei mea i le vaiaso a sau.

Faaleleia o Lo Tatou Aoao Atu

Fesoasoani i tamaiti ia avea ma tamaiti aoao sili atu. O lou faamoemoega i le aoao atu o tamaiti e le na o le avatu o le upumoni ia i latou. E ao foi ona e fesoasoani ia i latou e atinae i latou lava ia tutoatasi i le sailia o le upumoni.