2–8 Me

Esoto 35–40; Levitiko 1; 16; 19

“E Paia i le Alii”

A o e suesue ma le agaga tatalo i tusitusiga paia i lenei vaiaso, mafaufau i tamaiti o e aoaoina. E mafai ona fesoasoani le Agaga Paia ia te oe ia iloa po o a upumoni latou te manaomia ona aoao ma le auala e mafai ona e aoao atu ai na upumoni ia i latou.

Tusi Faamaumau Ou Lagona Uunaia

Valaaulia le Fefaasoaai

Tuu igoa o tamaiti taitoatasi i se koneteina. Fai atu i se tamaititi e piki se igoa se tasi, ma valaaulia lena tamaitiiti e faasoa mai se mea na ia aoaoina mai le Feagaiga Tuai talu ai nei. Talanoa ma tamaiti e uiga i mea ua latou aoaoina e fesoasoani ai ia latou latalata atili ia Iesu Keriso. Faaauau pea seia tofu maua e tamaiti taitoatasi se avanoa e faasoa mai ai.

Aoao atu le Aoaoga Faavae: Tamaiti Laiti

Esoto 36:1

E mafai ona ou fesoasoani i le galuega a le Alii.

E i ai i tamaiti laiti meaalofa e mafai ona latou faaaogaina e fesoasoani ai i le galuega a le Alii i le lalolagi. E faapefea ona e fesoasoani i tamaiti ia lagona le manao e faasoa mea ua foaiina mai e le Alii ia i latou?

Gaoioiga e Mafai Ona Fai

• Faitau le Esoto 36:1 i tamaiti, ma fai atu ia latou e faalogo po o le a le mea na tuuina atu e le Alii ia Pesaleli ma Aliavu e fesoasoani ai ia i latou e fausia le “malumalu” (falefetafai). Tau i tamaiti taitoatasi se meaalofa o ia te ia (atonu e fesoasoani le fesili i o latou matua). Ia molimau atu ua “tuuina” e le Atua meaalofa i Ana fanau uma.

• Tau i tamaiti le mafuaaga e te manao ai e fesoasoani i le galuega a le Alii. Fesoasoani ia latou mafaufau i ni auala e mafai ai foi ona latou auai (pei o le aoao e uiga i se tuaa, tau atu i se tasi e uiga ia Iesu, po o le auauna atu i se tagata o le aiga). Tusi o latou manatu i luga o fasipepa, tuu i totonu o se koneteina, ma valaaulia tamaiti taitoatasi e filifili se tasi ma faatino le taga i luga o le fasipepa.

Esoto 40:17–34

E mafai ona ou lagonaina le faatasi mai o le Atua i nofoaga paia.

Na poloaiina e le Alii le fanauga a Isaraelu e fausia le falefetafai ina ia mafai ona Ia “mau faatasi ma i latou” (Esoto 25:8). E mafai ona e fesoasoani i tamaiti e aoao e uiga i nofoaga paia ua foai mai e le Atua ia i tatou i aso nei e fesoasoani tatou te lagona ai Lona faatasi mai.

Gaoioiga e Mafai Ona Fai

• Faaali atu se ata o le falefetafai anamua (tagai i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga). Fai atu i tamaiti e saili ni vaega eseese o le fale fetafai i le ata, e pei o tuugalamepa po o fata faitaulaga, ma faamatala atu o nei mea na faia e fesoasoani ai ia Isaraelu e mafaufau e uiga i le Alii (mo nisi faamatalaga e uiga i le fale fetafai, tagai i le Esoto 40:17–34). O a ni nofoaga paia ua tatou maua i aso nei e fesoasoani tatou te mafaufau ai e uiga i le Alii?

• Faaali atu se ata o le malumalu, ma faitau le Esoto 25: 8 i tamaiti. Faamatala atu e faapea i o tatou aso, ua tuuina mai e le Atua ia i tatou nofoaga paia e mafai ona tatou latalata atu ai ia te Ia. Fesoasoani i tamaiti e lisi nisi o nofoaga nei. Fesili i tamaiti po o a ni o latou lagona pe a latou mafaufau i nei nofoaga paia. Faasoa atu ia i latou e mafai foi ona tatou lagona le latalata i le Atua pe a tatou tatalo, tusa lava po o fea tatou te i ai.

• Faamaea ma tamaiti le itulau o gaoioiga. A o e faia, usu faatasi ma i latou se pese e faatatau i le malumalu, e pei o le “Ou Te Fia Vaai i le Malumalu” (Tusipese a Tamaiti,99).

  

  Faapei o le fale fetafai anamua, o le malumalu e faasino atu i tatou i le Faaola.

Aoao atu le Aoaoga Faavae: Tamaiti Matutua

Esoto 35:20–29; 36:1

Ua foai mai e le Atua ia te au meaalofa e fesoasoani ai i Lana galuega.

E tofu uma le fanau a le Tama Faalelagi ma mea e saofaga i Lana galuega. Atonu e manaomia e tamaiti o loo e aoaoina lau fesoasoani e iloa ai pe faapefea ona latou faaaogaina a latou meaalofa e fesoasoani ai i le galuega a le Atua.

Gaoioiga e Mafai Ona Fai

• Faaali atu le ata o le fale fetafai (tagai i le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga). Fesili atu i tamaiti poo a ni mea e ono manaomia ina ia mafai ai ona fausia le fale fetafai. Faitau ma tamaiti le Esoto 35:20–29, ma fai atu ia i latou e vaavaai pe na faapefea ona saunia mea na manaomia. Ia molimau atu e tofu tamaiti uma ma mea e saofaga ai i le galuega a le Alii.

• Valaaulia tamaiti e faitau le Esoto 36:1 e iloa ai le mea na foai atu e le Alii ia i latou o e na valaauina e fesoasoani i le fausiaina o le fale fetafai. Ia valaaulia tamaiti e faasoa atu ni mea latou te lagona na tuuina atu e le Alii ia i latou e fesoasoani ai i le fausiaina o Lona malo (tuu atu ni manatu pe a manaomia). E mafai faapefea ona tatou faaaogaina nei mea e faamanuia ai isi?

Esoto 40:17–33

E mafai ona ou avea atili e pei o Iesu Keriso ma le Tama Faalelagi.

O le fale fetafai e le gata na faatagaina ai le fanauga a Isaraelu e i ai faatasi le Atua ma i latou, ae na aoaoina foi i latou i mea e mafai ona latou faia ia avea atili ai e pei o le Atua.

Gaoioiga e Mafai Ona Fai

• Valaaulia tamaiti e faaaoga le Esoto 40:17-33 e faailoa mai ai mea sa fai ma vaega o le fale fetafai ma maua nisi o ia mea i le ata ole fale fetafai anamua (tagai otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga). Valaaulia tamaiti e tusi ni a latou ata o le fale fetafai. Talanoa pe faapefea ona aoao vaega taitasi o le fale fetafai e uiga i le Faaola po o le Tama Faalelagi. Mo se faataitaiga, o le atolaau o molimau e mafai ona faamanatu mai ai ia i tatou poloaiga a le Atua, o le fatafaitaulaga e mafai ona faamanatu mai ai ia i tatou le taulaga a Iesu Keriso, o le tuugalamepa e mafai ona faamanatu mai ai ia i tatou o le Faaola o le Malamalama o le Lalolagi, ma isi.

• Fai atu i tamaiti e faitau le Esoto 25:8 e iloa ai pe aisea na finagalo ai le Alii i le fanauga a Isaraelu e fausia se “malutaga” (po o le fale fetafai). Fesoasoani i tamaiti e lisi ni nofoaga ma ni tulaga e mafai ai ona tatou lagonaina le faatasi mai o le Alii. E faapefea ona fesoasoani nei nofoaga ia i tatou ia avea atili e pei o le Tama Faalelagi ma Iesu Keriso?

Levitiko 1:1–4

E ala i le Togiola a Iesu Keriso, e mafai ai ona faamagaloina aʻu.

O taulaga i manu na faia i le Feagaiga Tuai na fuafuaina e aoao atu ai le fanauga a Isaraelu e uiga i le faamagaloga ua mafai ona o le Togiola a Iesu Keriso.

Gaoioiga e Mafai Ona Fai

• Faaali atu ata o Iesu Keriso i Ketesemane ma luga o le satauro (tagai Tusi Ata o le Talalelei, nu. 56, 57). Faamatala atu na poloaiina e le Alii le fanauga a Isaraelu e faia taulaga e aoao ai i latou e mafai ona faamagaloina a latou agasala e ala i le Togiola a Iesu Keriso. Faitau ma tamaiti le Levitiko 1:1-4, ma valaaulia i latou e vaavaai mo upu po o fasifuaitau e faamanatu ai ia i latou le taulaga a Iesu Keriso.

• Faaali atu ata o Iesu Keriso o loo asiasi i tagata i Amerika (tagai Tusi Ata o le Talalelei, nu. 82). Faamatala atu ina ua uma ona faasatauroina Iesu Keriso ma toetu mai, sa Ia aoao atu i tagata i Amerika le mafuaaga ua latou le toe manaomia ai ona osi taulaga i manu. Faitau faatasi le 3 Nifae 9:19-20, ma fesili atu i tamaiti po o le a le mea ua faatonuina i tatou e osi ai taulaga. O le a le uiga o le ofo atu o se taulaga o le loto momomo ma le agaga salamo? Fautua atu ia latou saili le “Loto Momomo” i totonu o le Taiala i Tusitusiga Paia (scriptures.ChurchofJesusChrist.org) mo se fesoasoani i le taliina o lenei fesili. Valaaulia i latou e mafaufau loloto pe faapefea ona latou ofoina atu se loto momomo ma se agaga salamo i le Alii.

Uunaia le Aoaoina i le Aiga

Valaaulia tamaiti e fesili i le Tama Faalelagi i lenei vaiaso pe faapefea ona Ia finagalo ia latou saofaga i Lana galuega i lo latou aiga.

Faaleleia o Lo Tatou Aoao Atu

Faasino atu tamaiti i le Tama Faalelagi ma Iesu Keriso. O lau sini autu o le fesoasoani lea i tamaiti o loo e aoaoina e atinae ai lo latou faatuatua i le Tama Faalelagi ma Iesu Keriso. O le a se mea e mafai ona e faia e fesoasoani ai ia latou malamalama i le ala o le a fesoasoani ai ia latou ola i upu moni o le talalelei ia latou avea atili ai e pei o le Tama ma le Alo?