vanu i le toafa

9–15 Me

Numera 11–14; 20–24

“Aua Lava Ne’i Outou Fouvale ia Ieova, Aua Foi tou te Matatau”

O lenei otootoga e le o se tala. Nai lo lena, faaaoga e maua ai manatu ma musumusuga mo gaoioiga e aoao ai lea o le a faamanuiaina ai tamaiti i lau vasega.

Tusi Faamaumau Ou Lagona Uunaia

aikona o le fefaasoaai

Valaaulia le Fefaasoaai

Faaali atu i tamaiti se tasi o ata i lenei otootoga po o totonu o le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga. Tuu atu ia i latou e faasoa mai ia te oe se mea latou te iloa e uiga i le mea o loo tupu i le ata.

aikona o le aoao atu

Aoao atu le Aoaoga Faavae: Tamaiti Laiti

Numera 11:4–10

Ou te faafetai mo mea ua foai mai e le Atua ia te au.

E ui lava na faia e le Alii mea matagofie mo le fanauga a Isaraelu, ae e masani ona latou taulai i mea latou te leʻi mauaina. Fesoasoani i tamaiti ia iloa ona loto faafetai mo mea ua foai mai e le Atua ia i latou.

Gaoioiga e Mafai Ona Fai

• Fesili i tamaiti pe o latou manatuaina nisi o vavega na faia e le Alii e faamanuia ai Isaraelu i le vao. (Afai e manaomia e tamaiti le fesoasoani, faaali i ai ata mai le otootoga o le aso 4–10 o Aperila i le Sau, Mulimuli Mai ia te A’u; tagai foi Esoto 14:21–22; 15:23–25; 16:4.) Ona aotele lea mo i latou le Numera 11:4–10, ma faamamafa atu e faapea sa le fiafia le Alii ona sa faitio le fanauga a Isaraelu. Fesoasoani i tamaiti e mafaufau i ni auala e mafai ona latou faaali atu ai le loto faafetai i le Alii.

• Usu se pese e faatatau i le loto faafetai, e pei o le “Faitau ou Manuia” (Viiga, nu. 151). Valaaulia tamaiti taitasi e tusi ni ata o faamanuiaga ua tuuina mai e le Alii ia i latou po o latou aiga. Uunaia i latou e mafaufau e uiga i le, pe vaavaai i a latou ata i soo se taimi e faaosoosoina ai i latou e faitio e uiga i se mea latou te leʻi mauaina.

Numera 13:17–33; 14:6–9

E mafai ona fesoasoani le faatuatua ia te au ia aua le fefe.

Ina ua auina atu e Mose ni alii se 12 e saili le nuu folafolaina, e toa 10 na toe foi mai ma le fefefe ona o le malolosi o tagata sa nonofo ai iina. O le toalua o i latou, o Kalepo ma Iosua, sa leʻi fefefe, ona sa la faatuatua i le Alii.

Gaoioiga e Mafai Ona Fai

• Faaaoga ni ata poo ni ata tusi o vine, meli, tagata tino ese, ma se akerise e faamatala manino atu ai i tamaiti e uiga i alii e 12 na auina atu e Mose e sue le nuu folafolaina (tagai Numera 13:17–33; tagai foi “Fa Sefulu Tausaga i le Vao” i Tala o le Feagaiga Tuai). Faamatala atu na latou mauaina le tele o fualaau ‘aina ma isi meaai (valaaulia tamaiti e faafoliga o aai i meaai), ae na latou fefefe foi ona o tagata iina na tino ese ma malolosi (valaaulia tamaiti e faafoliga faapea ua fefefe). Faaali atu se ata o Iesu, ma faailoa atu o Isaraelu e toalua, o Kalepo ma Iosua, e leʻi fefefe aua na la faatuatua ia Iesu Keriso.

• Faitau le Numera 14:9 i tamaiti, ma talanoa e uiga i se taimi na e fefe ai ae o lou faatuatua ia Iesu Keriso na fesoasoani ia te oe e maua le lototele. Fesoasoani i tamaiti e mafaufau i ni aafiaga talitutusa na latou mauaina.

  alii o loo faaali atu ia Mose fualaau ‘aina

  Sa fefefe tagata faalilolilo o Isaraelu e toasefulu; sa faatuatua Iosua ma Kalepo. © Lifeway Collection/licensed from goodsalt.com

Numera 21:6–9

E mafai ona ou vaai atu ia Iesu Keriso.

E pei lava ona faamaloloina le fanauga a Isaraelu i le vaai atu i le gata apamemea, o tamaiti i lau vasega e maua le faaolataga e ala i le vaai atu i le Faaola.

Gaoioiga e Mafai Ona Fai

• I le faaaoga ai o le itulau o gaoioiga mo lenei vaiaso po o le ata i le otootoga o lenei vaiaso i le Sau Mulimuli Mai ia te A’u—Mo Tagata Taitoatasi ma Aiga, taʻu i tamaiti le mea na tupu ina ua o mai “gata uogo” i le tolauapiga a Isaraelu (tagai Numera 21:6–9). Fesoasoani ia latou iloa pe faapefea ona pei le gata apamemea o Iesu Keriso (tagai Ioane 3:14–15). Tuu atu i tamaiti e auauai i le faaaogaina o ata e faamatala ai le tala.

• Fai atu ia i latou e moeiini o latou mata a o e tuuina se ata o le Faaola i se mea i totonu o le potu. Ona valaaulia lea o tamaiti e pupula o latou mata, sue le ata, ma vaai i ai. Tuu atu ia i latou e auauai e nanā le ata. O taimi uma e maua ai e tamaiti le ata, fesoasoani ia i latou e mafaufau i se mea e mafai ona latou faia e vaai atu ai i le Faaola.

aikona o le aoao atu

Aoao atu le Aoaoga Faavae: Tamaiti Matutua

Numera 12

E finagalo le Alii ia ou mulimuli i Lana perofeta.

O leNumera 12 o loo i ai ni lesona taua e mafai ona fesoasoani i tamaiti pe a latou faalogo i tagata o fai mai ni tala le lelei e uiga i le perofeta a le Alii po o isi taitai o le Ekalesia.

Gaoioiga e Mafai Ona Fai

• Tau atu i tamaiti i se tasi taimi, sa le fiafia le Alii ia Arona ma Miriama, le uso ma le tuafafine o Mose. Valaaulia i latou e faitau le Numera 12:1–2 e sue pe aisea. E tusa ai ma fuaiupu 5-8, o le a le lagona o le Alii e uiga i le tetee a Arona ma Miriama i Lana perofeta?

• Fesoasoani i tamaiti e mafaufau i ni faataitaiga o tagata i tusitusiga paia o e na mulimuli i le perofeta ma na faamanuiaina (mo se faataitaiga, tagai Kenese 7:7; 1 Nifae 3:7). O a nisi o mea na aoao mai e lo tatou perofeta soifua ia i tatou? E faapefea ona faamanuiaina i tatou pe a tatou mulimuli i ana aoaoga?

Numera 21:4–9

E i ai ia Iesu Keriso le mana e faamalolo ai au faaleagaga.

E toatele tagata Isaraelu na maliliu ona latou te leʻi talitonu o le a faamaloloina i latou e le Alii pe a latou vaai atu i le gata apamemea (tagai Alema 33:18–20). E mafai faapefea ona e fesoasoani i tamaiti o loo e aoaoina ia maua le faatuatua i le mana faaola o Iesu Keriso?

Gaoioiga e Mafai Ona Fai

• Valaaulia tamaiti e tusi ni ata o mea o loo latou faitauina i le Numera 21:4–9. Tuu atu ia i latou e faaaoga a latou ata e faamatala ai le tala. Fai atu i tamaiti taitasi e filifili se tasi o mau nei ma faasoa mai mea o loo faaopoopo mai e mau nei i lo tatou malamalamaaga o le tala: Ioane 3:14–15; 1 Nifae 17:41; Alema 33:18–20; Helamana 8:13–15; Mataupu Faavae ma Feagaiga 6:36.

• Tusi i luga o le laupapa se fesili e pei o le O a mea e mafai ona tatou faia e “vaai atu ai i le Alo o le Atua ma le faatuatua”? (Helamana 8:15). Tuu atu i tamaiti taitasi se fasipepa, ma valaaulia i latou e tusi ni tali i le fesili e mafai ona latou mafaufau iai. Faaputuputu pepa, faitau leotele ni nai tali, ma valaaulia tamaiti e talanoa pe faapefea ona fesoasoani nei mea ia i tatou pe a tatou manaomia le mana faamalolo o le Faaola.

Numera 22–24

E mafai ona ou mulimuli i le finagalo o le Atua, tusa lava pe taumafai isi e tauanau aʻu e aua.

Na taumafai Palako e tauanau Palaamo e fetuu i tagata Isaraelu, ae na iloa e Palaamo e le tusa ma le finagalo o le Atua. O le faataitaiga a Palaamo e mafai ona fesoasoani i tamaiti pe a feagai ma uunaiga e le usitai ai i le Atua.

Gaoioiga e Mafai Ona Fai

• Aotele le Numera 22: 1–18 mo tamaiti, faamamafa le musu o Palaamo e fetuu tagata o le Atua, e ui lava o Palako, le tupu o Moapi, na ofoina atu ia te ia le mamalu ma oa. Fai atu i tamaiti e sailiili i fuaiupu nei mo fasifuaitau latou te manatu o faaalia ai le naunautai o Palaamo e mulimuli i le Atua: Numera 22:18; 23:26; 24:13. Valaaulia tamaiti e filifili se fuaitau se tasi latou te fiafia i ai ma tusi i luga o se kata e fesoasoani ai ia latou manatua e usitai i le Alii.

• Talanoa ma tamaiti e uiga i ni tulaga e ono taumafai ai uo po o isi e faatosina i latou e faia se mea sese, pei ona faia e Palako ia Palaamo. Na faapefea ona fesoasoani le tautinoga a Palaamo i le Alii e tetee atu ai i uunaiga mai ia Palako? Ia valaaulia tamaiti e faataitai ona tali atu i nei tulaga i le faaaogaina o upu e pei o Palaamo.

aikona o le aoaoina

Uunaia le Aoaoina i le Aiga

Ia valaaulia tamaiti e faasoa atu ni mea i o latou aiga, e pei o se ata, se mau, po o se pese e faaalia ai mea na latou aoaoina i le Peraimeri.

Faaleleia o Lo Tatou Aoao Atu

Ia nofouta i uunaiga mai le Agaga. “O le tele lava o avanoa sili ona lelei e aoao atu ai e faafuasei [le oo mai]—mo se faataitaiga, pe a faasoa mai e se tasi se aafiaga po o le fai atu o se fesili e taitai atu i se talanoaga anoa. … Ia e naunau e suia au fuafuaga pe a talafeagai e mulimuli ai i musumusuga na e mauaina” (Aoao Atu i le Ala a le Faaola, 10).

itulau o gaoioiga: E mafai ona ou vaai atu ia Iesu Keriso