Ua faaali atu Ieova ia Mose ma toeaiina o Isaraelu

Ata tusi o le faaali atu o Ieova ia Mose ma toeaiina e 70 o Isaraelu, saunia e Jerry Harston

25 Aperila–1 Me

Esoto 24; 31–34

“Ta Te o Atu Lava ma A’u”

A o sauni Mose e taitai le fanauga o Isaraelu e agai atu i le nuu folafolaina, na fetalai le Alii, “Ta Te o Atu Lava ma A’u” (Esoto 33:14). A o e sauniuni e aoao atu tamaiti i lau vasega, mafaufau pe mafai faapefea ona e valaaulia le Alii e “o atu ma [oe].”

Tusi Faamaumau Ou Lagona Uunaia

aikona o le fefaasoaai

Valaaulia le Fefaasoaai

Fai atu i tamaiti taitasi e filifili soo se fasi pepa ua faanumeraina. Faaaoga numera nei e fuafua ai le faasologa e mafai e tamaiti ona faasoa atu se mea ua latou aoaoina mai tusitusiga paia, i le fale po o le Peraimeri.

aikona o le aoao atu

Aoao atu le Aoaoga Faavae: Tamaiti Laiti

Esoto 31:13, 17

O le Faamamaluina o le Sapati o se faailoga o lo’u alofa mo le Alii.

Na taʻu atu e le Alii ia Mose a o tausia e le fanauga a Isaraelu le aso Sapati ia paia, na latou faaali atu ia te Ia latou te mananao e avea ma Ona tagata.

Gaoioiga e Mafai Ona Fai

• Tusi se fatu i luga o le laupapa, ma fesili i tamaiti po o le a le uiga o lenei faatusa. Fesoasoani ia latou mafaufau i isi mea e mafai ona avea ma faailoga mo le alofa, pei o se opo po o se faatinoga o auaunaga. Faitau atu ia i latou le Kenese 31:13. Fesoasoani ia latou malamalama afai tatou te tausia le aso Sapati ia paia, o se faailoga lea i le Alii tatou te alolofa ia te Ia.

• Tau atu i tamaiti nisi o auala e te taumafai ai e faaali atu lou alofa i le Alii i le Sapati. Tuu atu ia i latou e faasoa pe faapefea ona latou faia ma o latou aiga lenei mea. Valaaulia i latou e faaaoga le itulau o gaoioiga o lenei vaiaso e faasoa atili ai manatu.

  tamaiti ma matua i le fale

  I le faamamaluina o le Sapati, ua tatou faaalia ai lo tatou alolofa mo le Alii.

Esoto 32:1–8, 19–24

E mafai ona ou faamuamua le Alii i loʻu olaga.

A o i ai Mose i luga o le Mauga o Sinai e talanoa ma le Alii, na filifili le fanauga a Isaraelu e tapuai i se tupua auro nai lo o Ia. O lenei tala e mafai ona faamanatu ai i tamaiti o loo e aoaoina e le tatau ona tatou faatagaina isi mea ia sili atu le taua ia i tatou nai lo le Alii.

Gaoioiga e Mafai Ona Fai

• Toe faamanatu Tulafono e Sefulu ma tamaiti, faamamafa tulafono muamua e lua (tagai Esoto 20:3-6). Faaaoga “Tulafono e Sefulu” (i Tala o le Feagaiga Tuai) e faasoa atu ai ia i latou le tala mai i le Esoto 32:1–8, 19–24. Afai e mafai, tuu atu i tamaiti e fesoasoani ia te oe e faamatala le tala. Fesoasoani i tamaiti ia iloa le mea sese na faia e tagata Isaraelu i lenei tala (atonu e te manao e faamanatu i tamaiti tulafono muamua e lua o Tulafono e Sefulu). O le a le mea sa tatau ona faia e Isaraelu?

• Faaali se ata o Iesu Keriso, faatasi ai ma ata o isi mea e ono faaalu ai e tamaiti le taimi, e pei o meataalo, taaloga ma isi. Fai atu i tamaiti e saili le ata o loo faaalia ai le mea e tatau ona sili ona taua ia i tatou. Faasoa atu i tamaiti le auala ua faamanuiaina ai oe i le faamuamua o le Alii i lou olaga—e oo lava i isi mea e sili atu le lelei.

Esoto 33:11

Sa talanoa faafesagai le Alii ma Mose.

Ina ua uma ona faatamaʻia e Mose le tamai povi auro, “ua fetalai mai foi Ieova ia Mose, o loo fesagai lava, faapei o le tagata ona tautalatala ma lana uo.” O le iloaina o lenei mea e mafai ona fausia ai le faatuatua o tamaiti e faapea o le Alii o se tagata moni e alofa ia i latou.

Gaoioiga e Mafai Ona Fai

• Tau i tamaiti ou lagona pe a e talanoa ma sau uo lelei, ma fesili ia i latou po o a ni o latou lagona. Faitau atu ia i latou le fuaiupu muamua o le Esoto 33:11. Fesili atu i tamaiti pe o le a so latou manatu o le a se lagona atonu na oo i le perofeta o Mose. Tau atu i tamaiti e uiga i taimi na e lagona ai le latalata i le Alii, tusa lava pe na e le vaai ia te Ia i ou mata.

• Usu faatasi se pese e faamatala ai lagona o le Tama Faalelagi poo Iesu e uiga ia i tatou, pei o le “Iesu o La Tatou Uo Pele” (Tusipese a Tamaiti, 37). Faaali atu ata o le Faaola o loo faaali atu le alofa i isi (tagai Tusi Ata o le Talalelei, nu. 36, 41–43, 46–47). Uunai tamaiti e faasoa mai o latou lagona e uiga i le Tama Faalelagi ma Iesu.

aikona o le aoao atu

Aoao atu le Aoaoga Faavae: Tamaiti Matutua

Esoto 31:12–17

O le Faamamaluina o le Sapati o se faailoga o lo’u alofa mo le Alii.

O le tausia o le aso Sapati ia paia e mafai ona faigofie—ma sili atu le fiafia—mo tamaiti pe a latou iloaina o se faailoga o la latou tautinoga i le Alii.

Gaoioiga e Mafai Ona Fai

• Fesili i tamaiti i ni nai fesili e fesoasoani ai ia latou malamalama i le uiga o le faailoga—mo se faataitaiga, “O a faailoga e taʻu atu ai ia te oe o le a oo mai le tautotogo pe o le a e fulū?” Valaaulia i latou e faitau le Esoto 31:13, 16–17 ma saili le upu “faailoga.” O le a le fetalaiga a le Alii o se faailoga i le va o tatou ma Ia? Aisea ua matua taua ai lenei faailoga?

• Fai i tamaiti e auauai e faamatala pe aisea ua latou filifili ai e faamamalu le Sapati. E mafai ona fesoasoani vitio e pei o le “The Sabbath Is for You” po o le “Upon My Holy Day—Honoring the Sabbath” (ChurchofJesusChrist.org) .

• Fai i tamaiti e tusi i lalo mea uma e mafai ona latou mafaufau i ai e mafai ona latou faia i le Aso Sa e faaali ai i le Alii latou te alolofa ia te Ia. Uunaia i latou e faasoa ni nai mea mai a latou lisi. Valaaulia i latou e ave a latou lisi i le fale, fefaasoaaʻi ma o latou aiga, ma vaai i ai i soo se taimi latou te manaomia ai ni manatu e uiga i mea e fai i le aso Sapati.

Esoto 32:1–8, 19–24

E mafai ona ou faamuamua le Alii i loʻu olaga.

O le tasi o savali mai le tala i le Esoto 32 o le taua o le tausia o tulafono muamua e lua o Tulafono e Sefulu—aua le tapuaʻi i se tasi po o se isi lava mea nai lo le Alii.

Gaoioiga e Mafai Ona Fai

• Fai atu i tamaiti e fetufaai mai se mea latou te iloa e uiga i le tala ia Arona i le faia o se tamai povi auro mo tagata Isaraelu e tapuai i ai. Afai latou te manaomia se fesoasoani, faasino i latou i le Esoto 32:1–8, 19–24, pe faasoa ma i latou “O Tulafono e Sefulu” (i Tala o le Feagaiga Tuai). Aisea na sese ai mo Isaraelu ona ifo i se tupua? (Atonu e te faasino tamaiti i tulafono muamua e lua o Tulafono e Sefulu i le Esoto 20:3-6.)

• Fesoasoani i tamaiti e mafaufau i ni faataitaiga o mea atonu e faaosoosoina tagata e tapuai i ai nai lo le Alii—o mea e tosina ese ai o tatou mafaufau mai ia te Ia. Ona fai atu lea ia i latou e faasoa mai ni faataitaiga o mea e fesoasoani latou te taulai atu ai i le Faaola ma tapuai ia te Ia.

Esoto 32:1-5, 21–24

E mafai ona ou tu mo le amiotonu.

Ina ua taʻu atu e le fanauga a Isaraelu ia Arona e fai se tupua auro, na ia malie e faia, e ui lava e sese lea mea (tagai Teuteronome 9:20). Mafaufau pe faapefea ona e faamalosiau i tamaiti e tutu mo le amiotonu, e tusa pe faamalosi i latou e isi e aua.

Gaoioiga e Mafai Ona Fai

• Valaaulia tamaiti e faitau le Esoto 32:1–5, 21–24, taitoatasi pe taitoalua, ma faasoa atu mea ua latou manatu sa tatau ona faia e Arona ina ua fesiligia o ia e le fanauga a Isaraelu e fai se tamai povi auro. Faamata o le a se mea na ono fesoasoani ai Arona i tagata?

• Fesoasoani i tamaiti e mafaufau i ni tulaga latou te ono feagai pe a fai atu isi tagata latou te faia se mea latou te iloa e sese. Fai i tamaiti e fefaasoaai manatu ma isi e uiga i mea e fai i na tulaga.

aikona o le aoaoina

Uunaia le Aoaoina i le Aiga

Ia valaaulia tamaiti e faasoa atu ma o latou aiga ni manatu na latou faalogoina i le asō e uiga i le auala e tausia ai le aso Sapati ia paia.

Faaleleia o Lo Tatou Aoao Atu

Valaaulia tamaiti e molimau. O fesili e te fesili ai e mafai ona faamalosia ai tamaiti e faasoa mai ni o latou lagona e uiga i le Faaola ma pe na faapefea ona faamanuiaina i latou i le ola ai i le talalelei. A latou faia lea mea, o loo tuuina atu a latou molimau. (Tagai i le Aoao Atu i le Ala a le Faaola, 11, 32.)

itulau o gaoioiga: O le Faamamaluina o le Sapati o se faailoga o lo’u alofa mo le Alii