“18–24 Aperila. Esoto 18–20: ‘Matou te Faia Lava Mea uma ua Fetalai mai ai Ieova,’” Sau, Mulimuli Mai ia te A’u—Mo le Peraimeri: Feagaiga Tuai 2022 (2021)
“18–24 Aperila. Esoto 18–20,” Sau, Mulimuli Mai ia te A’u—Mo le Peraimeri: 2022
O se mauga i Aikupito na masani ona talitonuina o le Mauga o Sinai.
18–24 Aperila
Esoto 18–20
“Matou te Faia Lava Mea uma ua Fetalai mai ai Ieova”
Ao e faitauina le Esoto 18–20, mafaufau e uiga i mataupu faavae o le a sili ona anoa i tamaiti. E mafai ona musuia oe e faamamafa atu se mataupu faavae e ese mai i mataupu faavae o loo fautuaina i lalo.
Tusi Faamaumau Ou Lagona Uunai
Valaaulia le Fefaasoaai
Valaaulia tamaiti e faasoa mai se tasi o Tulafono e Sefulu (pe toe faamanatu ni nai tulafono ma i latou) ma pe aisea latou te manatu ai e taua le usitai i lena tulafono.
Aoao atu le Aoaoga Faavae: Tamaiti Laiti
O le faasoa atu o laʻu molimau e mafai ona manuia ai isi.
Sa fiafia Ietero ina ua faasoa atu e Mose mea na faia e le Alii mo le fanauga a Isaraelu. O lenei tala e mafai ona faaosofia ai tamaiti na e aoaoina ina ia faasoa atu i isi mea ua latou iloa e moni.
Gaoioiga e Mafai Ona Fai
-
Faitau i tamaiti upu ia mai le Esoto 18:8: “Ona talatala atu lea e Mose i le tama o lana ava o mea uma lava na faia e Ieova.” Fesili atu i tamaiti pe latou te manatua le mea na faia e le Alii e fesoasoani ai i le fanauga a Isaraelu e sosola ese mai i Aikupito. (Ina ia fesoasoani ia latou manatua, faaali ata po o itulau o gaoioiga mai lesona ua tuanai). O a ni mea na faia e le Alii e fesoasoani ai ia i tatou? Fesoasoani i tamaiti ia iloa e pei lava o Mose, e mafai ona tatou taʻu atu i isi tagata e uiga i mea maoae ua faia e le Alii mo i tatou.
-
O le vasega Peraimeri e mafai ona avea ma se nofoaga lelei mo tamaiti e faataitai ai le faasoa atu o se molimau faigofie. Faasoa atu lau molimau ia i latou, ma fesoasoani ia latou fefaasoaai o le tasi ma le isi i upumoni o le talalelei latou te talitonu i ai.
E aumai e le Atua poloaiga ona e finagalo o Ia ia ou fiafia.
O poloaiga o faatonuga a le Tama Faalelagi mo le mauaina o le filemu i lenei olaga ma le olioli i le faavavau. E faapefea ona e uunaia tamaiti ina ia usitai i poloaiga a le Atua?
Gaoioiga e Mafai Ona Fai
-
Faaali atu ata mai le “O Tulafono e Sefulu” (i Tala o le Feagaiga Tuai), ma valaaulia tamaiti e faasoa mai ni mea latou te iloa e uiga i le tala. Fesoasoani ia latou malamalama i soo se vaega o le tala latou te le o masani ai.
-
A o e faitauina nisi o tulafono mai le Esoto 20:3–17 i tamaiti, (pe faaupuina i ni upu e mafai ona latou malamalama i ai), valaaulia i latou e tuu i luga le limamatua pe afai o le tulafono e faatatau i se mea e tatau ona tatou faia, ae faaū i lalo le limamatua pe afai o se mea e le tatau ona tatou faia. Faasoa atu lau molimau i le fiafia e maua mai le usitaia o poloaiga a le Atua (tagai Mosaea 2:41).
-
Usu faatasi ma tamaiti se pese e uiga i le auala e faamanuia ai i tatou e le Tama Faalelagi pe a tatou usitai i poloaiga, pei o le “Tausi Poloaiga” (Tusipese a Tamaiti, 186). Valaaulia tamaiti e faalogologo i upu e sue ai po o a faamanuiaga e mafai ona tatou maua pe a tatou usiusitai.
E mafai ona ou ava i oʻu matua.
O le ava i matua e tele mea e aofia ai nai lo nao le usiusitai ia i latou. Fesoasoani i tamaiti ia malamalama i isi auala e mafai ai ona latou ava i o latou matua.
Gaoioiga e Mafai Ona Fai
-
Fesoasoani i tamaiti ia iloa le fuaitau “Ia e ava i lou tamā ma lou tina” (Esoto 20:12). Pe a manaomia, faamatala atu o le “ava” i se tasi o lona uiga o le faaalia o le faaaloalo ia i latou po o le aumaia ia i latou o le fiafia. O le a le mea na faia e Iesu e ava ai i Lona Tama Faalelagi? Na faapefea ona ava o Ia i Lona tina? (tagai Luka 2:48–51; Ioane 19:26–27). Fesoasoani i tamaiti e mafaufau i mea e mafai ona latou faia e ava ai i o latou matua, ma valaaulia i latou e faatino o latou manatu.
-
Fai i tamaiti e fai se kata faafetai mo o latou matua. E mafai ona latou tusia pe tusi se ata i totonu o le kata o se mea o le a latou faia e ava ai i o latou matua.
Aoao atu le Aoaoga Faavae: Tamaiti Matutua
E mafai ona ou fesoasoani e “tauave le avega” o le faia o le galuega a le Alii.
Sa iloa e Mose o le taumafai e taitai na o ia le fanauga a Isaraelu sa “le lelei” (Esoto 18:17). O le alofa ma auauna atu o le tasi i le isi e mafai ona fesoasoani e faamāmā i avega a o tatou taitai.
Gaoioiga e Mafai Ona Fai
-
Valaaulia tamaiti e tusi ni li’o se tele i luga o le laupapa e fai ma sui o tagata o le uarota. Tusi se li’o ma faaigoaina epikopo. Aisea o le a avea ai ma se faafitauli pe a na o le epikopo e fesoasoani i tagata uma? Faitau faatasi le Esoto 18:13–26 e saili ai le fautuaga na tuu atu e Ietero a o taumafai Mose na te faia nao ia mea uma. Fai atu i tamaiti e faaigoa isi li’o e fai ma sui o isi taitai o le uarota ma tagata o e fesoasoani i le epikopo e auauna atu i isi. E faafefea ona faamāmāina e isi taitai ma tagata o le uarota avega a le epikopo? E mafai faapefea ona tatou faia foi mo taitai o le uarota? mo o tatou matua i le fale?
-
Fesoasoani i tamaiti e fai se lisi o taitai o le tou uarota. I le avea ai o se vasega, filifili se tasi ma talanoa po o le a le mea a lenei tagata e fai e faataunuu ai le galuega a le Alii ma mea e mafai e tamaiti ona fai e fesoasoani ai.
Ataalii o loo faatalofa ma se tamaitaiO le auauna atu i isi o se tasi lea o auala e mafai ai ona tatou fesoasoani i le galuega a le Alii.
E taua le faamuamua o le Alii i loʻu olaga.
E tofu i tatou ma mea e ono faaosoosoina i tatou e faamuamua i o tatou olaga nai lo o le Atua. E mafai faapefea ona e fesoasoani i tamaiti ia malamalama i le uiga o le faamuamua o le Tama Faalelagi?
Gaoioiga e Mafai Ona Fai
-
Faitau faatasi le Esoto 20:1–7, ma faamatala atu soo se mea tatou te faamuamua i o tatou olaga nai lo o le Atua e mafai ona pei o “isi atua” ma “tupua ua ta” o loo taʻua i le fuaiupu 3–4. Fesili atu i tamaiti pe aisea e finagalo ai le Tama Faalelagi ia tatou faamuamua o Ia. O a faamanuiaga na Ia folafola mai ia i tatou pe a tatou faia? Fesili atu i tamaiti pe mafai faapefea ona tatou faaali atu i le Tama Faalelagi o Ia e sili atu le taua nai lo se isi lava mea i o tatou olaga.
-
Mafaufau i se galuega e i ai se sitepu taua muamua, e pei o le fufuluina o tatou lima ae tatou te leʻi aai po o le tuiina o totini aʻo leʻi faia seevae. O le a se mea e tupu pe a tatou le faia le mea taua muamua? E faapefea ona pei o le faamuamua o le Tama Faalelagi i o tatou olaga? Faasoa atu lau molimau i le auala na faamanuiaina ai oe ona na e faamuamuaina le Atua, ma fai i tamaiti e faasoa mai foi a latou molimau.
-
Usu faatasi ma tamaiti se pese e faatatau i le Tama Faalelagi, e pei o le “E Alofa Lo’u Tama Faalelagi Ia Te A’u” (Tusipese a Tamaiti, 16). O le a se mea tatou te aoaoina mai le pese i le mafuaaga e taua ai le faamuamua o le Tama Faalelagi i o tatou olaga?
E aumai e le Atua poloaiga ona e finagalo o Ia ia ou fiafia.
E masalo o le a sili atu ona tausia e tamaiti poloaiga pe afai latou te vaai i ai o ni faailoaga o le alofa o le Atua ma o ni avanoa e faaali atu ai lo latou alolofa ia te Ia.
Gaoioiga e Mafai Ona Fai
-
Saunia ni fasi pepa o loo tusia ai tulafono ia o loo maua i le Esoto 20: 3–17 . Tusi numera tasi e oo atu i le sefulu i luga o le laupapa, ma valaaulia tamaiti e tuu fasi pepa i le faatulagaga sao i luga o le laupapa. Talanoa e uiga i le auala tatou te mulimuli ai i nei poloaiga. Mo ni manatu, e mafai ona latou vaai i le tusiga o Autu o le Talalelei “Ten Commandments” (topics.ChurchofJesusChrist.org).
-
Valaaulia tamaiti e tusi ni ata o upu autu mai tulafono e fesoasoani ia latou manatua ai na mea.
-
Faamatala atu le tala e faatatau ia Chloe mai le savali a Sister Carole M. Stephen “Afai Tou te Alofa Mai ia te Au, Ia Outou Tausi i Au Poloaiga” (Liahona, Nov. 2015, 118–20). E faapefea ona fesoasoani le tala ina ia tatou malamalama ai i mafuaaga e aumai ai e le Alii poloaiga ia i tatou? E faapefea ona faaalia lo tatou alofa mo le Atua i le usiusitai?
Uunaia le Aoaoina i le Aiga
Valaaulia tamaiti e mafaufau i se mea latou te mananao e fai ona o mea na latou aoaoina i le vasega. Fesoasoani ia i latou e fai se faamanatu faigofie o le mea o le a latou faia e mafai ona latou ave i le fale.
Faaleleia o Lo Tatou Aoao Atu
Fesoasoani i tamaiti ia iloa le Agaga. E mafai ona iloa e tamaiti le uunaiga a le Agaga. Aoao i latou o lagona o le filemu, alofa, ma le mafanafana latou te mauaina pe a latou talanoa pe pepese e uiga ia Iesu Keriso ma Lana talalelei e mai le Agaga Paia.