Mose, Arona, ma Farao

Atatusi o Mose ma Arona i le fale faamasino o Farao, saunia e Robert T. Barrett

28 Mati–3 Aperila.

Esoto 7–13

“Ia Manatua Lenei Aso, ua Outou O Mai ai Nai Aikupito”

Ao e faitauina le Esoto 7–13, mafaufau pe faapefea e upumoni i nei mataupu ona faamalosia lou faatuatua ia Iesu Keriso. E mafai faapefea ona e fesoasoani i tamaiti o loo e aoaoina ia maua se aafiaga talitutusa?

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Tuu ni ata e suitulaga i mea o loo taua i totonu o le Esoto 7–13 (e pei o se lane, lago, ma se tamai mamoe) i lalo o se ie i luga o le laulau. Valaaulia ni tamaiti e ave se ata e tasi mai lalo o le ie, ma valaaulia le vasega e faasoa mai mea na latou aoaoina e uiga i lenei ata i le fale i lenei vaiaso.

aikona o le aoao atu

Aoao atu le Aoaoga Faavae: Tamaiti Laiti

Esoto 7–11

E i ai le mana o le Alii i luga o mea uma.

O tagata Isaraelu sa ave faatagataotaua ma sa le mafai ona latou faasaolotoina i latou lava, ae na faaalia e le Alii Lona mana ma laveai i latou. E faafefea ona e faaaogaina lenei tala e fesoasoani ai i tamaiti ia faatuatua i le Alii ma lona mana?

Gaoioiga e Mafai Ona Fai

• Faitau fuaiupu filifilia mai le Esoto 7–11 e aoao ai tamaiti e uiga i mala e sefulu na auina atu e le Alii i tagata Aikupito (tagai foi “Mose le Perofeta,” i Tala o le Feagaiga Tuai). Valaaulia tamaiti e tusi ni ata e faailoa ai nisi o mala. Fai i tamaiti e uu i luga a latou ata a o e toe iloiloina mala. Faitau ni fuaitau mai le Esoto 7:5 ma le 9:14 e faamatala ai pe aisea na auina atu ai e le Alii mala i Aikupito.

• Faasoa i tamaiti pe na faapefea ona faaali atu e le Alii ia te oe “e leai lava se tasi e tusa ma [Ia] i le lalolagi uma lava” (Esoto 9:14). Fai atu i tamaiti e faasoa mai pe faapefea ona latou iloa e mamana le Alii.

Esoto 12:1–13; 13:10

E mafai ona fesoasoani le faamanatuga ia te aʻu e manatua ai Iesu.

O le Paseka na aoao ai le fanauga a Isaraelu e uiga i le Faaola ma le taulaga o le a Ia faia i se aso mo i tatou. O aso nei, ua tatou tagofia le faamanatuga e manatua ai le taulaga a Iesu.

tagata o loo tagofia le faamanatuga

O le faamanatuga e fesoasoani tatou te manatua ai Iesu Keriso.

Gaoioiga e Mafai Ona Fai

• Ia faaaoga le Esoto 12:1–13, e faamatala atu ai i tamaiti le mea na tau atu e le Alii i tagata Isaraelu e fai o le a laveaiina ai i latou mai le mala mulimuli (tagai foi “O le Paseka,” i Tala o le Feagaiga Tuai). Faaali atu le ata o Iesu o loo Siiina se Mamoe na Leiloa (Tusi Ata o le Talalelei, nu. 64), ma faasino atu mea e tutusa i le va o le tamai mamoe na faaaoga i le Paseka ma Iesu Keriso, le Tamai Mamoe a le Atua.

• Fai i tamaiti e taʻu mai ni mea tatou te faia e manatua ai mea taua e tutupu e pei o aso fanau ma aso malolo. Faitau le Esoto 13:10, ma faamatala atu na fetalai atu le Alii i le fanauga a Isaraelu e faamanatu le Paseka i tausaga uma e fesoasoani ia latou manatua ai sa Ia laveaiina i latou mai tagata Aikupito. O a ni auala e mafai ona tatou manatua ai na laveaiina i tatou e Iesu mai le agasala ma le oti?

• Afai e mafai, asiasi i le laulau faamanatuga ma tamaiti, ma talanoa pe faapefea ona fesoasoani le faamanatuga ia i tatou e manatua ai Iesu Keriso. Usu faatasi le “The Sacrament” (Children’s Songbook, 72) po o se isi pese faaaloalo e faatatau ia Iesu Keriso. Fesoasoani i tamaiti ia maitau le lagona toafilemu latou te maua pe a latou mafaufau i le Faaola, ma valaaulia i latou e saili lena lagona pe a latou aai i le faamanatuga.

• Tuu atu i tamaiti ni fasipepa o loo tusia ai i le pito i luga upu “E mafai ona ou manatua Iesu Keriso i le taimi o le faamanatuga e ala i le …”. Valaaulia i latou e tusi ni ata e mafai ona latou vaavaai i ai i le taimi o le faamanatuga e fesoasoani latou te manatua ai Iesu.

aikona o le aoao atu

Aoao atu le Aoaoga Faavae: Tamaiti Matutua

Esoto 7–11

E i ai i le Alii le mana e laveai ai aʻu.

E feagai tamaiti ma luitau ma e manaomia le Alii e fesoasoani ia i latou. O le tala i mala e sefulu na auina atu e le Alii e faasaoloto ai le fanauga a Isaraelu e mafai ona fesoasoani i tamaiti ia malamalama ai, e i ai foi ia te Ia le mana e fesoasoani ai ia i latou.

Gaoioiga e Mafai Ona Fai

• Tuu atu i tamaiti taitoatasi se pepa ua vaevaeina i vaega e sefulu, ma valaaulia tamaiti e tusi ni ata o mala o loo faamatalaina mai i nei fuaiupu: Esoto 7:17–18; 8:1–4; 8:16–17; 8:20–22; 9:1–6; 9:8–9; 9:22–23; 10:4–5; 10:21–22; 11:4–7. O a ni mea o loo aoao mai e mala e uiga i le mana o le Atua? Aisea e taua ai le iloa e uiga i Lona mana?

• Fesili atu i tamaiti e uiga i taimi na latou lagona ai latou te manaomia le fesoasoani a le Alii. Pe mafai faapefea ona Ia fesoasoani mai ia i tatou i nei tulaga? Uunaia i latou e talanoa e uiga i ni taimi na latou lagonaina ai pe na lagona ai e o latou aiga le mana o le Alii i o latou olaga. Tuu atu lau molimau o loo i ai i le Alii le mana e fesoasoani ai ia i tatou.

Esoto 8:28–32; 9:7

E mafai ona fesoasoani mai le Alii ina ia ou maua se loto agamalu.

Na filifili Farao e faamaa’a lona loto ina ua fetalai atu le Alii ia te ia e tatala le fanauga a Isaraelu. E mafai faapefea ona e faaosofia tamaiti o loo e aoaoina ia filifili e maua se loto agamalu, ina ia latou naunau e auauna atu i le Alii ma faia Lona finagalo?

Gaoioiga e Mafai Ona Fai

• Aumai i le vasega se mea faitino malō se tasi, e pei o se maa, ma se isi mea e vaivai, e pei o se momi. Faitau faatasi ma tamaiti ni nai fuaiupu e faamatala ai le auala na tali atu ai Farao i mala na auina mai e le Alii (tagai i le Esoto 8:28–32; 9:7), ma fesili atu i tamaiti po o le fea o nei mea e sili ona faatusa i le loto po o uiga a Farao. O le a le uiga o le i ai o se loto agamalu? (tagai Mosaea 3:17).

• Faatasi ai ma le vasega, fai se lisi o nisi o gaoioiga e ono faaalia ai o tatou loto maa’a (mo se faataitaiga, tauaimisa ma se tei po o le le manao e tatalo). E faapefea ona tatou faaali atu i le Alii tatou te mananaʻ i ni loto agamalu?

Esoto 11:5–6; 12:1–13

O le Paseka o le faatusa lea o le mana togiola a Iesu Keriso.

O le Paseka na aoaoina ai le fanauga a Isaraelu na laveaiina i latou e le Alii mai Aikupito. O le Paseka o se faailoga foi o le taulaga togiola a Iesu Keriso, lea e laveai ai i tatou mai le agasala ma le oti. O aso nei, ua fesoasoani le faamanatuga tatou te manatua ai le taulaga a Iesu Keriso mo i tatou. O le aoaoina o tamaiti e uiga i le Paseka e mafai ona fesoasoani ia latou maua se aafiaga sili atu le anoa i le faamanatuga.

Gaoioiga e Mafai Ona Fai

• Fai atu i nisi o tamaiti e faitau le Esoto 11:5–6 e aoao ai e uiga i le mala mulimuli na auina atu e le Alii i tagata Aikupito. Fai atu i isi tamaiti e faitau le Esoto 12:3, 5–7, 13 e aoao ai e uiga i le ala na faasaoina ai le fanauga a Isaraelu mai lena mala.

• Ina ia fesoasoani i tamaiti ia malamalama o le Faaola o le Tamai Mamoe lea e laveaiina i tatou, faaali atu se ata o se tamai mamoe. Valaaulia tamaiti e faitau le Esoto 12:3–7 e saili ai po o le a le ituaiga tamai mamoe e finagalo le Atua e faaaoga e tagata mo le taumafataga o le Paseka. E faapefea ona pei lenei tamai mamoe o Iesu Keriso? (Mo se faataitaiga, na atoatoa Iesu, ma na faamaligi e Iesu Lona toto e faasao ai i tatou.) O a isi faailoga e fesoasoani tatou te mafaufau ai ia Iesu Keriso?

• Faitau faatasi tatalo o le faamanatuga (tagai Mataupu Faavae ma Feagaiga 20:77, 79), ma matamata le vitio “Always Remember Him” (ChurchofJesusChrist.org). E faapefea ona tutusa le faamanatuga ma le Paseka? O a mea e mafai ona tatou faia e mafaufau ai ia Iesu i le taimi o le faamanatuga?

• Faasoa atu i tamaiti se tasi o viiga o le faamanatuga e sili ona e fiafia i ai (tagai Viiga, nu. 95–112), ma talanoa pe faapefea ona fesoasoani ia te oe e manatua ai le taulaga a le Faaola. Valaaulia tamaiti e faasoa mai se viiga e faia foi lena mea e tasi ia i latou.

aikona o le aoaoina

Uunaia le Aoaoina i le Aiga

Valaaulia tamaiti e faasoa atu i o latou aiga se mea na latou aoaoina e uiga ia Iesu Keriso i le taimi o le Peraimeri i le asō.

Faaleleia o Lo Tatou Aoao Atu

Fesoasoani i tamaiti e vaai faalemafaufau i le tala. A i ai i tamaiti se ata vaaia o mea o loo latou aoaoina, o le a sili atu ona latou manatuaina. Saili ni auala e fesoasoani ai i tamaiti e vaai faalemafaufau i tala i tusitusiga paia e faaaoga ai fesoasoani vaaiga e pei o ata, ata tusi, vitio, papeti, po o tala faatino pupuu.

itulau o gaoioiga: E i ai i le Alii le mana i mea uma