Sami Ulaula

O Le Sami Ulaula

4-10 Aperila

Esoto 14–17

“A ia Outou Laulau Tutu, ma Vaai Atu i le Olataga mai ia Ieova”

A o e faitauina le Esoto 14–17, faamaumau uunaiga faaleagaga e te maua. O nei uunaiga e mafai ona fesoasoani ia te oe e fuafua ai le aoaoina atu o mau ma upumoni e te aoaoina i tamaiti.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Ua tumu leEsoto 14–17 i tala e manatua pea. Valaaulia nisi o tamaiti e faasoa mai se tala latou te iloa mai nei mataupu, faatasi ai ma se mea sa latou aoaoina mai ai.

aikona o le aoao atu

Aoao atu le Aoaoga Faavae: Tamaiti Laiti

Esoto 14:5–22

Na laveai e le Alii ia Mose ma lona nuu.

O le vaeluaina o le Sami Ulaula o se vavega lea na faaali atu ai ia Mose ma tagata Isaraelu le mamana o le Alii. O le iloaina e uiga i Lona mana e mafai ona fesoasoai i tamaiti ia faalagolago ai ia te Ia.

Gaoioiga e Mafai Ona Fai

• Mafaufau i ni auala e faasoa atu ai le tala e uiga i tagata Isaraelu o loo sopoia le Sami Ulaula i se auala mataina ma manatuaina pea. Mo se faataitaiga, e mafai e oe ma se isi tagata o le uarota ona fai ni lavalava e pei o Mose e faamatala atu ai le tala mai le Esoto 14:5, 9–10, 13–16, 19–22. E mafai e tamaiti ona faafoliga faapea o nofoa, o le Sami Ulaula, ma e mafai ona latou mulimuli i le tagata o loo faataitaia Mose a o ia faia se auala i le va o nofoa. Pe e mafai foi e tamaiti ona faafoliga e fai ma vai ma me’i i itu eseese o le potu a o vaeluaina i latou e Mose. Faamamafa atu e faapea, na tuu atu e le Alii ia Mose le mana e vaelua ai le sami ina ia mafai ona laveaiina le fanauga a Isaraelu mai le faatagataotauaina.

• Valaaulia tamaiti e valivali le itulau o le gaoioiga a o tou toe faamanatuina faatasi le tala mai le Esoto 14:5–22. Ona latou galulue faatasi lea e faamatala le tala e faaaoga ai le itulau o le gaoioiga.

Esoto 15:23–25; 16:14–15; 17:1–6

O le a tuuina mai e le Alii mea ou te manaomia.

O tala e uiga i le tuuina atu e le Alii o meaai ma vai mo le fanauga a Isaraelu i le vao, o loo aoao mai ai ia i tatou e mafai ona Ia tuuina mai mea tatou te manaomia. Mafaufau loloto i mea e mafai ona e faia e faaaofia ai tamaiti i le aoaoina o nei tala.

o se tamaitai o loo aoina le manai

O le manai mai le Atua na fafagaina ai faaletino ia Isaraelu, tatou te manaomia foi le fafagaina faaleagaga i aso taitasi. Fresco na saunia e Leopold Bruckner

Gaoioiga e Mafai Ona Fai

• Fesoasoani i tamaiti e faatino mea na tutupu o loo i le Esoto 15:23–25; 16:14–15; 17:1–6, ma faafoliga e avea ma Mose po o le fanauga a Isaraelu. Afai e talafeagai, aumai se mea faitino e fesoasoani e faamatala ai ia tala taitasi, e pei o se lala laau (e faamalolo ai le vai i Mara), o se fagu po o se ulo (e faatumu i manai), ma se fasilaau ma se ma’a (mo le vai i Orepa). Na faapefea ona tausia e le Atua le fanauga a Isaraelu? E faapefea ona Ia tausia i tatou i aso taitasi?

• Faasoa faapuupuu atu tala o loo i le Esoto 15:23–25; 16:14–15; 17:1–6 (tagai foi i le “Moses Leads Israel,” i Tala o le Feagaiga Tuai). A o e faasoa atu, valaaulia tamaiti e tusi ni ata o tala taitasi. O le a se mea ua tatou iloa e uiga i le Atua mai i nei tala?

Esoto 17:8–16

E mafai ona ou lagolagoina lo tatou perofeta.

O le tala ia Arona ma Huro o loo uuina i luga lima o le perofeta o Mose e mafai ona faatusa i a tatou taumafaiga e lagolago lo tatou perofeta soifua.

Gaoioiga e Mafai Ona Fai

• Valaaulia ni tamaiti se toatolu e tutu i luma o le potu e suitulaga ia Mose, Arona, ma Huro ao e faamatalaina le tala mai le Esoto 17:8–16. O le a se mea e mafai ona tatou faia i lenei vaitaimi e fesoasoani ai i lo tatou perofeta, e pei lava ona fesoasoani Arona ma Huro i le perofeta o Mose?

• Faaali atu se ata o le perofeta soifua, ma fesili atu i tamaiti po o ai o ia. Fesoasoani i tamaiti ia manatua nisi o mea sa aoao mai ai i tatou e le perofeta talu ai nei. Fai atu i tamaiti e faasoa mai nisi o auala o loo latou mulimuli ai i le perofeta. Usu faatasi ni nai fuaiupu o le pese “Mulimuli i le Perofeta,” ia aofia ai le fuaiupu mulimuli (Tusipese a Tamaiti, 58).

aikona o le aoao atu

Aoao atu le Aoaoga Faavae: Tamaiti Matutua

Esoto 14:5–22

E mafai ona ou aoao e mulimuli i taimi uma i le Agaga.

Na iloa e Mose e ala i le faaaliga le auala e taitai ai le fanauga a Isaraelu ia sopoia le Sami Ulaula (tagai i le Mataupu Faavae ma Feagaiga 8:2–3). E mafai faapefea e lenei tala ona fesoasoani i tamaiti o loo e aoaoina ia aoao e faatino se faaaliga faaletagata lava ia?

Gaoioiga e Mafai Ona Fai

• Faaali atu le ata o Mose o loo vaeluaina le Sami Ulaula i le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga. Fai atu i tamaiti e toe iloilo le Esoto 14:5–22 ma faasoa mai se mea latou te iloa e uiga i le tala. O le a le mea ua faaopoopo e le Mataupu Faavae ma Feagaiga 8:2–3 i lo tatou malamalama e uiga i le tala? Faamatala atu e uiga i se aafiaga i le taimi na ta’u atu ai e le Agaga Paia ia te oe se mea i lou mafaufau po o lou loto, ma fai atu i tamaiti e talanoa mai e uiga i ni o latou aafiaga.

• Faamanatu atu i tamaiti le tala ia Nifae i le mulimuli i le Agaga ina ua ia alu e aumai papatusi apamemea (tagai i le 1 Nifae 4:1–6). Fesoasoani i tamaiti ia iloa na ao foi ia Mose ona mulimuli i le Agaga i le taimi na ia taitaia ai lona nuu e sopoia le Sami Ulaula. Fesoasoani i tamaiti e tusi se fuaiupu fou i le pese “Lototele o Nifae” (Tusipese a Tamaiti, 64) e uiga i le auala na saunia ai e le Alii se auala mo Mose ina ua ia faaalia le lototele ma mulimuli i le Agaga. Usu faatasi le fuaiupu fou.

Esoto 15:23–25; 16:14–15; 17:1–6

O le a tuuina mai e le Alii mea ou te manaomia.

Afai tatou te liliu atu ia Iesu Keriso, e mafai ona Ia fesoasoani mai ia i tatou i taimi faigata o o tatou olaga, e pei ona Ia fesoasoani i le fanauga a Isaraelu.

Gaoioiga e Mafai Ona Fai

• Vaevae le vasega i ni paga po o ni vaega laiti, ma tofi vaega taitasi e faitau se tasi o fasifuaitau nei: Esoto 15:23–25; 16:14–15; 17:1–6. Fai atu i tamaiti i vaega taitasi e tusi ni ata e suitulaga i mea sa latou faitauina i nei mau, ona fai atu lea i isi tagata o le vasega e mate mai mea sa latou tusiaina. Fesoasoani i tamaiti e faailoa mai po o a mea o loo aoao mai e nei tala e uiga ia Iesu Keriso. O a ni tofotofoga o i ai i tagata i lenei vaitaimi? E faapefea ona fesoasoani mai le Tama Faalelagi ma Iesu Keriso ia i tatou i o tatou tofotofoga po o luitau?

• A o e toe faamanatuina nei tala, fesili atu i tamaiti pe aisea e matua taua ai le areto ma le vai i tamaiti Isaraelu. Mata o le a le mea na semanu e tupu pe ana latou le mauaina nei mea? Fesoasoani i tamaiti ia malamalama o le areto ma le vai o le faamanatuga o se mea manaomia faaleagaga ia i tatou (tagai i le Ioane 4:13–14; 6:35, 48–51). Atonu e mafai ona e fai atu i tamaiti e faasoa mai o latou lagona e uiga i le faamanatuga.

Esoto 17:8–16

E faamanuiaina i tatou pe a tatou lagolagoina o tatou taitai o le Ekalesia.

Na manumalo le fanauga a Isaraelu i le taua e faasaga ia Amuleki pe afai lena e sii i luga e Mose ona lima i le ea. O le a se mea e mafai ona tatou aoaoina e uiga i le lagolagoina o o tatou taitai mai lenei tala?

Gaoioiga e Mafai Ona Fai

• Ina ia fesoasoani i tamaiti e toe faamanatu le tala o loo i le Esoto 17:8–16, tusi i luga o le laupapa: O ai na fesoasoani ia Mose i le taimi o le taua? O le a le mea na la faia? O le a le taunuuga? Fai atu i tamaiti e vaavaai i fuaiupu mo tali. O le a se mea o aoao mai e lenei tala e uiga i le auala e mafai ai ona tatou fesoasoani i le malo o le Atua ina ia faamanuiaina? O le a se mea e mafai ona tatou faia e fesoasoani, lagolago, ma mulimuli ai i o tatou taitai o le Ekalesia?

• Fai atu i tamaiti e faitau le Esoto 17:8–16 ma tusi se ata o mea sa latou faitauina. Faamalosiau ia i latou e tusi i luga o a latou ata se savali sa latou aoaoina mai le tala. Aisea e taua ai lenei savali mo i tatou i aso nei?

aikona o le aoaoina

Uunaia le Aoaoina i le Aiga

Valaaulia tamaiti e filifili se tasi o tala mai la outou talanoaga i le asō. Fesoasoani ia i latou e mafaufau i se mea e mafai ona latou faia i le aluga o le vaiaso a sau e faaaoga ai mea sa aoao mai e lena tala.

Faaleleia o Lo Tatou Aoao Atu

E fiafia tamaiti i tala. E sili atu ona malamalama tamaiti i mataupu faavae o le talalelei pe a mafai ona latou vaaia i olaga o tagata moni. A o e faasoaina atu tala o tusitusiga paia, mafaufau e faasoa atu ni aafiaga mai lou olaga lea e aoao atu ai ia lava mataupu faavae e tasi. E mafai foi ona e valaaulia tamaiti e faasoa mai o latou aafiaga.

itulau o gaoioiga: Na laveaiina e le Alii ia Mose ma lona nuu