tuugamau ua fulieseina le maa mai le faitotoa

Atatusi o le tuugamau avanoa na saunia e Maryna Kriuchenko

11–17 Aperila

Eseta

“E Faaumatia e Ia le Oti e Faavavau”

A o e sauni e aoao atu, mafaufau loloto pe mafai faapefea ona e fesoasoani i tamaiti ia maua se malamalama loloto atu ma se molimau i le Togiola a Iesu Keriso.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Fai atu i tamaiti pe o a mea e fai e o latou aiga e faamanatu ai le Eseta. O le a se mea latou te faia e manatua ai le Toetu o Iesu Keriso?

aikona o le aoao atu

Aoao atu le Aoaoga Faavae: Tamaiti Laiti

O Iesu Keriso o lo’u Faaola.

O le Aso Sa o le Eseta o se taimi lelei lea e aoao ai tamaiti e uiga i le Togiola a le Faaola i Ketesemane ma Lona maliu i luga o le satauro. O lenei mea e mafai ona fesoasoani latou te lagonaina ai le alofa o Iesu mo i latou.

Gaoioiga e Mafai Ona Fai

• Faaali atu le ata o le Faaola mai le otootoga mo lenei vaiaso i le Sau Mulimuli Mai ia te A’u—Mo Tagata Taitoatasi ma Aiga, po o isi ata o le taulaga a le Faaola (tagai Tusi Ata o le Talalelei, nu. 56, 57, 58), ma tuu atu i tamaiti latou te faasoa mai ni mea ua latou iloa e uiga i mea na tutupu o loo faaalia i ata. Faamatala atu i tamaiti e uiga imafatiaga o Iesu i Ketesemane ma luga o le satauro (tagai Mataio 26:36–46; 27:35–50; Luka 22:39–46; Ioane 19:16–30; “Mataupu 51: Sa Mafatia Iesu i le Faatoaga o Ketesemane,” i Tala o le Feagaiga Fou, 129–32). Tuu atu lau molimau o Iesu sa naunau e puapuagatia ma maliu mo i tatou ona e alofa o Ia ia i tatou. Valaaulia tamaiti e faasoa atu o latou lagona e uiga ia Iesu Keriso.

• Faitau le Ioane 10:9 i tamaiti, ia faamamafa atu upu a Iesu “O au nei o le faitotoa.” Ona sa puapuagatia Iesu mo a tatou agasala, maliu, ma na toetu mai, o Ia ua mafai ai e i tatou taitoatasi ona toe nonofo faatasi ma le Atua. Faaaoga le faitotoa o lou potuaoga e aoao atu ai o Iesu ua pei o se faitotoa e mafai ai ona tatou toe foi atu i le Tama Faalelagi.

• Faitau le Isaia 53:6 i tamaiti, ma faaali atu se ata po o se ata tusi o se mamoe. Tuu atu i se tasi o tamaiti e tuu le ata i se tulimanu mamao o le potu. Faamalamalama atu a tatou faia filifiliga sese, ua tatou se ese mai le Tama Faalelagi e pei o se mamoe ua se. Ona valaaulia lea o le tamaitiiti e toe aumai le mamoe ma tuu atu lau molimau, ona na puapuagatia ma maliu Iesu Keriso mo i tatou, e mafai ona Ia toe aumaia i tatou i le Tama Faalelagi. (Atonu e te faaali atu se ata o Iesu o se leoleo mamoe, e pei o le ata 64 i le Tusi Ata o le Talalelei.)

• Usu faatasi se pese e faatatau ia Iesu Keriso, e pei o le “Le Alofa o lou Faaola” (Tusipese a Tamaiti, 42). Fesoasoani ia latou matauina soo se lagona o le filemu ma le alofa latou te maua a o latou pepese. Ia faailoa atu foi upu o le pese o faamatala ai le alofa o le Faaola. E mafai faapefea ona tatou faasoa atu Lona alofa i isi?

Sa maliu Iesu ma toetu mo a’u.

E mafai faapefea ona e fesoasoani i tamaiti ia iloa ona o le Toetu o Iesu Keriso, o le a toetutu ai i tatou ma ē pele ia i tatou i se aso?

Keriso i luga o le satauro

Aso Faanoanoa o Kolokota, saunia e J. Kirk Richards

Gaoioiga e Mafai Ona Fai

• Tau atu i tamaiti le maliu ma le Toetu o Iesu (tagai Mareko 15–16). Faaaoga ata o loo i totonu o le otootoga o lenei vaiaso, ata 57–60 i le Tusi Ata o le Talelei, po o le “Mataupu 54: Ua Toetu Iesu” i Tala o le Feagaiga Fou (itulau 139–44) e fesoasoani i tamaiti e vaai faalemafaufau ai i le tala.

• Fesoasoani i tamaiti ia malamalama o le Toetu o lona uiga pe a tatou oti, o le a tatou toe ola e faavavau ma se tino faaletino atoatoa ma o le a le toe oti lava. Faasoa atu lau molimau e uiga i le Toetu, ma tuu atu i tamaiti e galulue i le itulau o le gaoioiga o lenei vaiaso. Valaaulia tamaiti e faaaoga e faasoa atu ai i o latou aiga le tala o le Toetu o Iesu.

• Faitau le Alema 40:23 i tamaiti. Faaali atu ia i latou ou lima i totonu o se totinilima. Ia faamatala atu o lou lima e pei o se agaga ma o le totinilima e pei o se tino faaletino. Aveese le totinilima e faailoa ai a tatou oti, o le a tuua e o tatou agaga o tatou tino. Toe tui le totinilima e sui i le Toetu.

• Usu se pese e faatatau i le Toetu, e pei o le “Pe Na Toe Soifua Moni Mai ea Iesu?” po o le “Ua Toe Tu mai o Ia” (Tusipese a Tamaiti, 45, 44). Tuu atu lau molimau e faapea, ona o Iesu Keriso, o le a tatou toe ola ai ma maua ni tino atoatoa pe a mavae le oti.

aikona o le aoao atu

Aoao atu le Aoaoga Faavae: Tamaiti Matutua

Na puapuagatia Iesu mo a’u.

A o e suesue i le Togiola a le Faaola, mafaufau loloto pe mafai faapefea ona e fesoasoani i tamaiti ia malamalama i le ala e mafai ai e le Faaola ona faamanuia ma faamalosia i latou.

Gaoioiga e Mafai Ona Fai

• Vaevae tamaiti i ni vaega se tolu, ma tuu atu i vaega taitasi se tasi o fuaitau o mau nei: Isaia 53:4–12; Alema 7:11–13; ma le Mataupu Faavae ma Feagaiga 19:16–19. Valaaulia ia tamaiti e vaavaai mo upu ma fasifuaitau o loo faamatala ai mea na puapuagatia ai Iesu Keriso mo i tatou. Fai atu ia i latou e tusi a latou tali i luga o le laupapa ma faasoa mai o latou lagona e uiga i le Faaola ina ua uma ona faitauina nei mau.

• Tapena ni fasi pepa. I le afa o fasi pepa, tusi ai mau o le Feagaiga Tuai o valoaga e uiga ia Iesu Keriso. I le isi afa, tusi ai ni mau faasino o le Feagaiga Fou e uiga i le auala na faataunuuina ai nei valoaga. (Ole otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga o loo lisiina ai nisi o faataitaiga.) Valaaulia tamaiti e faitau ia fuaiupu ma faafetaui valoaga i o latou faataunuuga.

• Fesoasoani i tamaiti e tauloto le mataupu faavae lona tolu o le faatuatua. O le a se mea ua aoao mai e lenei mau ia i tatou e uiga i le Togiola a Iesu Keriso ma le fuafuaga a le Tama Faalelagi mo Ana fanau?

• Fesili atu i tamaiti pe faapefea ona latou faamatalaina le Togiola a Iesu Keriso i se tasi. Uunaia i latou e faaaoga mau, viiga, po o ata e faailoa mai ai po o le a le uiga o le taulaga togiola a le Faaola ia i latou. O faapefea ona faamanuiaina i tatou ona o le Togiola a le Faaola?

Sa maliu Iesu ma toetu mo a’u.

O le moni o le Toetu o Iesu Keriso e mafai ona aumaia ai ia i tatou le faamoemoe ma le olioli tele—aemaise lava pe a tatou oo i le oti o se e pele. E mafai faapefea ona e fesoasoani i tamaiti ia maua le mafanafana i le toetu?

Gaoioiga e Mafai Ona Fai

• Faaali atu ata 57–59 i le Tusi Ata o le Talalelei. Fai atu i tamaiti e faafetaui ia ata i fuaitau nei: Mataio 27:29–38; Mataio 27:59–60; ma le Ioane 20:10–18. Ona valaaulia lea o tamaiti e faamatala mai le tala o le maliu o Iesu, falelauasiga, ma le Toetu i a latou lava upu.

• Faitau faatasi ma tamaiti le Iopu 14:14 . Valaaulia ia tamaiti e faasoa mai pe faapefea ona latou taliina le fesili a Iopu. Fesoasoani ia i latou e sue mau o loo molimau mai i le Toetu (tagai Taiala i Tusitusiga Paia, “Toetu,” scriptures.ChurchofJesusChrist.org).

• Faitau faatasi ma tamaiti le Mose 1:39 . Fesili atu pe latou te iloa le eseesega i le va o le “tino ola pea” ma le “ola e faavavau.” Valaaulia i latou e vaavaai mo tali i le parakalafa muamua o le “Eternal Life” (Gospel Topics, topics.ChurchofJesusChrist.org). O ai o le a mauaina le tino ola pea? O le a le mea e moomia ina ia maua ai le ola e faavavau? Tuu atu lau molimau e faapea, o nei meaalofa taua uma e mafai ona o le Togiola a Iesu Keriso.

• Usu faatasi se pese po o se viiga e faatatau i le Eseta, e pei o le “Na Ia Auina Mai Lona Alo” (Tusipese a Tamaiti, 20--21) po o le “Ua Toe Tu mai o Ia” (Viiga, nu. 111). Valaaulia ia tamaiti e faasoa mai o latou lagona pe a latou usuina nei pese. O le a le mea ua aoao mai e nei pese ia te i tatou e uiga i le Tama Faalelagi ma Iesu Keriso? Valaaulia ia tamaiti e tusi a latou molimau e uiga i le Faaola e faasoa atu i le fale ma o latou aiga.

aikona o le aoaoina

Uunaia le Aoaoina i le Aiga

Ina ia fesoasoani i tamaiti e faasoa ma o latou aiga mea na latou aoaoina i le vasega, uunaia i latou e usu se pese i le fale i le vaiaso lenei e uiga i le Togiola a Iesu Keriso.

Faaleleia o Lo Tatou Aoao Atu

E mafai ona iloa e tamaiti le uunaiga a le Agaga. Aoao atu i tamaiti o lagona latou te maua pe a latou talanoa pe pepese e uiga ia Iesu Keriso ma Lana talalelei e sau mai le Agaga Paia, ma e mafai e nei lagona ona fausia a latou molimau.

itulau o le gaoioiga: Na toetu mai Iesu mo a’u