O Mose ma le Laau Mumū, saunia e Harry Anderson

21–27 Mati

Esoto 1–6

“Ua Ou Manatua foi La’u Feagaiga”

Amata lau tapenapenaga e aoao atu i le faitauina o le Esoto 1–6. O le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga e mafai ona fesoasoani ia te oe ia malamalama i nei mataupu, ma e mafai ona avatu e lenei otootoga ia te oe ni manatu faafaiaoga.

Tusi Faamaumau Ou Lagona Uunai

Valaaulia le Fefaasoaai

Faaali atu ni mea faitino ia e fesootai i tala i nei mataupu—mo se faataitaiga, o se ato lapoa po o se pepe meataalo. Valaaulia ia tamaiti e faaaoga ia mea faitino nei e faasoa mai ai vaega e sili ona fiafia i ai o le tala ia Mose.

Aoao atu le Aoaoga Faavae: Tamaiti Laiti

Esoto 1–2

E mafai ona galue le Atua e ala atu ia te a’u e faataunuu ai Ona faamoemoega.

Sa i ai se matafaioi telē ia Mose i le faasaolotoina o Isaraelu mai le nofopologa. Peitai semanu e le mafai ona ia faataunuuina lenei mea pe ana le’i puipuia ma tausia o ia e lona tina, lona tuafafine, afafine o Farao, ma isi tamaitai faamaoni.

Gaoioiga e Mafai Ona Fai

• Faaaoga le itulau o lenei vaiaso ma “Miriama” (i Tala o le Feagaiga Tuai) e faamatala atu ai i tamaiti le auala na tausia ai e Iokapeta (tina o Mose), Miriama (lona tuafafine), ma le afafine o Farao ia Mose. Faamamafa atu faapea ona o nei ma isi tamaitai faamaoni, na tausia saogalemu ai Mose ma o le a taitaia i se aso le fanauga a Isaraelu i le saogalemu. Valaaulia tamaiti e tusi se ata o tagata na tausia i latou.

  

  Mose i le Laau Mumū, © Providence Collection/licensed from goodsalt.com

• Usu faatasi se pese e faatatau i le auaunaga, e pei o le“‘Foai,’ O Si Auvai Lea” (Tusipese a Tamaiti, 116). Fesoasoani i tamiti e mafaufau i ni mea faigofie e mafai ona latou faia e fesoasoani ai i isi i le fale, i le lotu, ma le aoga.

Esoto 3

O le a fesoasoani mai Iesu ia te a’u e faia mea lelei.

Sa popole Mose pe mafai ona ia laveaiina ia tagata Isaraelu mai Aikupito. Ae na folafola mai le Alii o le a Ia fesoasoani ia Mose. Fesoasoani i tamaiti ia maua le faatuatua o le a fesoasoani foi le Faaola ia i latou.

Gaoioiga e Mafai Ona Fai

• Taʻu i tamaiti le auala na tuu atu ai e le Alii ia Mose se galuega taua e fai. Faitau fuaiupu ua filifilia mai le Esoto e 3, pe faitau le “Mose le Perofeta” (i Tala o le Feagaiga Tuai). Faasoa atu lagona na oo ia Mose (tagai i le Esoto 3:6, 11) ma le mea na ta’u atu e le Alii ia te ia (tagai i fuaiupu e 12 ma le 14). Valaaulia tamaiti e toe fai faatasi ma oe le fasifuaitau “Ou te ia te oe lava,” ma faasoa atu i se taimi na faatasi ai le Alii ma oe ao e faia se mea taua mo Ia.

• Fesoasoani i tamaiti e mafaufau i ni tulaga ia atonu e talosaga ai i latou e fai se mea e foliga faigata. Ia faamalamalama atu e faapea, e pei lava ona sa fesoasoani Iesu ia Mose, o le a fesoasoani foi Iesu ia i latou. Usu se pese o le ala e fesoasoani ai Iesu ia i tatou, e pei o le “I Will Walk with Jesus” (ChurchofJesusChrist.org). Molimau atu o le a fesoasoani mai le Faaola ia i tatou pe a tatou popole pe fefefe.

• ‘Oti ese fatu pepa ma tusi ai i luga ni auala e fesoasoani mai ai le Alii i tamaiti. Faaū i lalo fatu i luga o le fola. Valaaulia tamaiti e auauai e filifili ni fatu, ma fesoasoani ia i latou e faitau mea o loo tusia ai i luga.

Esoto 3:1–5

E mafai ona ou migao i nofoaga paia.

Faaaoga le tala ia Mose ma le laau mumū e fesoasoani ai i tamaiti ia malamalama i le mafuaaga tatou te taulimaina ai ma le faaaloalo mea paia.

Gaoioiga e Mafai Ona Fai

• Faitau le Esoto 3:1–5, ma faamatala atu na faaali le faaaloalo o Mose i le aveeseina o ona seevae. O a mea tatou te faia e faaalia ai le faaaloalo i le lotu? Usu se pese e uiga i le faaaloalo, e pei o le “Faaaloalo o le Alofa Lea” (Tusipese a Tamaiti, 12). Fesoasoani i tamaiti e faailoa mai upu o i le pese o loo aoao mai ai ia i tatou le auala e faaalia ai le faaaloalo. Aisea e finagalo ai le Alii ia tatou faaaloalo?

• Faaali atu ni ata o tulaga ia e tatau ai ona tatou faaaloalo ma nisi mea tatou te le manaomia ai ona faaaloalo, e pei o se lotu faamanatuga, o se tatalo, o se paka, ma se pati o se aso fanau. Fai atu i tamaiti e faatulaga ata e faaali mai ai po o fea e tatau ona tatou faaaloalo ai.

• Valaaulia tamaiti e tusi ni ata o i latou lava, ma faasino i a latou ata a o e talanoa i ni auala e mafai ai ona latou faaaloalo i vaega eseese o o latou tino, e pei o o latou mata, taliga, gutu, lima, ma vae.

Aoao atu le Aoaoga Faavae: Tamaiti Matutua

Esoto 1–2

E galue le Atua e ala atu ia i tatou taitoatasi e faataunuu ai Ona faamoemoega.

E toatele tagata na fesoasoani e faataunuu faamoemoega a le Atua e ala i le faasaoina o le ola o le tamaitiiti o Mose. E mafai faapefea ona e fesoasoani i tamaiti o loo e aoaoina ia malamalama i le matafaioi taua o loo tatou faia uma i le faataunuuina o le finagalo o le Atua?

Gaoioiga e Mafai Ona Fai

• Valaaulia tamaiti e faasoa mai ni mea latou te iloa e uiga ia Mose a o pepe o ia. Faaaoga le itulau o gaoioiga o le vaiaso lenei ma le Esoto 1:22; 2:1–10 e aotele ai le tala i le taimi o laitiiti Mose. Faitau mau faasino o loo i le itulau o gaoioiga, ma fesili i tamaiti po o le a se mea na faia e tamaitai taitasi e faasao ai le ola o Mose.

• Faamatala atu i tamaiti e uiga i tagata e te faamemelo i ai ona o lo latou faamaoni i le auauna atu i le Atua ma i latou o siomia i latou, e tusa lava pe o latou auauna atu i ni auala itiiti. Valaaulia tamaiti e talanoa e uiga i tagata latou te iloa o e na auauna atu ma le faamaoni i le Atua ma isi. O le a le tatou vaega i le galuega a le Atua?

Esoto 3–4

O le a fesoasoani mai le Alii ia te a’u e faataunuu Lona finagalo.

Na lagona e Mose le le atoatoa i lona valaauga, peitai na folafola atu e le Alii o le a faatasi o Ia ma Mose ma fesoasoani ia te ia. E ono mafai faapefea ona musuia e lenei tala ia tamaiti o loo e aoaoina?

Gaoioiga e Mafai Ona Fai

• I le faaaoga ai o le tala o loo i le Esoto e 3; 4:1–17, tuu atu i tamaiti e auauai e faafoliga e pei o Mose. Afai e mafai, aumai ni mea faitino mo i latou e faaaoga, e pei o se moliuila ma se laau e suitulaga i le laau mumū.

• Fai atu i tamaiti e faitau le Esoto 3:11; 4:1, 10 ma saili po o a ni lagona o Mose e uiga i le talosaga atu ia Farao e tuu tagata Isaraelu e o. O le a se taimi na i ai ni o latou lagona faapena? O le a se fautuaga e mafai ona faasoa atu e tamaiti ia Mose e fesoasoani ai ia te ia? Fesoasoni ia i latou e faailoa mai le auala na faamalosiau ai le Alii ia Mose (tagai i le Esoto 3:12; 4:2–9, 11–12).

• Faasoa atu se aafiaga i se taimi na e lagonaina ai le fesoasoani a le Atua ia te oe e faataunuu se valaauga po o le auauna atu ia te Ia i nisi auala. Valaaulia tamaiti e faasoa mai i se taimi na fesoasoani ai le Alii ia i latou.

Esoto 3:1–5

E mafai ona ou faaaloalo i nofoaga paia.

Na fetalai atu le Alii ia Mose e aveese ona seevae i le laau mumū o se faailoga o le faaaloalo ma le migao. E mafai faapefea ona e faaaogaina lenei tala e aoao ai tamaiti e uiga i le faaaloalo?

Gaoioiga e Mafai Ona Fai

• Faitau le Esoto 3:1–5, mai fai atu i tamaiti e aotele nei fuaiupu i a latou lava upu. O a ni mea e mafai ona tatou faia e faaali ai le faaaloalo i nofoaga paia, e pei o le lotu po o totonu o le malumalu? Fesoasoani i tamaiti e fatu ni “ato faaaloalo” e ave i le fale lea e i ai ni fasi pepa o loo i ai ni manatu e uiga i auala e faaali ai le faaaloalo. Valaaulia i latou e faasoa atu nei manatu i o latou aiga.

• Usu faatasi se pese e uiga i le faaaloalo, e pei o le “Faaaloalo o le Alofa Lea” (Tusipese a Tamaiti, 12), ma fai atu i tamaiti taitasi e tusi ma faasoa atu se faauigaga o le faaaloalo e tusa ai ma upu [o le pese].

• Faaaoga le ata o Iesu o loo Faamamāina le Malumalu (Tusi Ata o le Talalelei, nu. 51) e faamatala atu ai le tala o loo i le Mataio 21:12–13. Na faapefea ona ese uiga faaalia o Mose o loo i le Esoto 3:1–5 mai i uiga faaalia o le au fefaatauai? Aisea e finagalo ai le Faaola ia tatou taulimaina mea paia ma le faaaloalo?

Uunaia le Aoaoina i le Aiga

Ina ia fesoasoani i tamaiti e faasoa mai mea sa latou aoaoina mai le Esoto 1–6, uunaia i latou e tusi se ata o se tasi o tagata sa latou aoao i ai i le vasega ma faasoa atu i o latou aiga.

Faaleleia o Lo Tatou Aoao Atu

E manuia tamaiti i le fai faafia. Aua le fefe e fai faafia ia gaoioiga, aemaise lava mo tamaiti laiti. O le a fesoasoani lenei mea i tamaiti e manatua ai mea sa e aoaoina atu.