28 Fepuari–6 Mati.

Kenese 28–33

“E Moni Lava E I Ai Ieova i le Mea Nei”

A o e faitauina le Kenese 28–33, mafaufau pe mafai faapefea e tala ma mataupu faavae o loo i nei mataupu ona faamanuiaina tamaiti o loo e aoaoina.

Tusi Faamaumau Ou Lagona Uunai

Valaaulia le Fefaasoaai

Valaaulia tamaiti e togi pe faataavale le polo i le tasi ma le isi. A sapo e tamaiti le polo, fai atu ia i latou e faasoa mai se mea ua latou aoaoina mai le Feagaiga Tuai, i le fale po o le Peraimeri.

Aoao atu le Aoaoga Faavae: Tamaiti Laiti

Kenese 28:10–22

O feagaiga e fesoasoani ia te aʻu e toe foi atu i le Tama Faalelagi.

I se miti, na vaaia ai e Iakopo se apefai e tau atu i le lagi. O sitepu i luga o le apefai e mafai ona faatusa i feagaiga tatou te osia ma le Atua, aua o nei feagaiga e fesoasoani e saunia i tatou e toe foi atu i lona afioaga.

Gaoioiga e Mafai Ona Fai

• Faitau le Kenese 28:12–13 i tamaiti. Faamatala atu o sitepu i luga o le apefai e mafai ona faatusa i feagaiga e fesoasoani tatou te toe foi atu ai i le Tama Faalelagi. Valaaulia tamaiti e faafoliga o loo latou feaʻei i luga o le apefai ao e talanoa e uiga i taimi tatou te folafola atu ai e usitai i le Atua, e pei o le taimi tatou te papatiso ai, aai i le faamanatuga, pe o atu i le malumalu. Fesoasoani i tamaiti e mafaufau i auala e mafai ai ona latou saunia e osia feagaiga pe a latou papatiso.

• Faitau le Kenese 28:15 i tamaiti, faamamafa atu upu “Ou te i ai ia te oe” ma le “Ou te le tuua oe.” Faamatala atu ua folafola mai le Atua e faatasi pea ma i tatou a o tatou taumafai e filifili le mea saʻo. Fesoasoani i tamaiti e mafaufau i mea e mafai ona latou faia e lagona ai le latalata atili i le Tama Faalelagi ma Iesu Keriso.

Kenese 29:16–28

E tatau ona ou tausia i taimi uma a’u folafolaga.

Na malie Iakopo e faigaluega mo Lapana mo le fitu tausaga ina ia mafai ona ia faaipoipo ia Rasela le afafine o Lapana. Na tausia e Iakopo lenei maliega, ae sa leʻi tausia e Lapana. Mafaufau e faaaoga le tala lenei e aoao ai tamaiti i le taua o le tausia o a tatou folafolaga.

Gaoioiga e Mafai Ona Fai

• Faitau le Kenese 29:18, 20 i tamaiti, ma faamatala atu na tausia e Iakopo lana folafolaga e galue mo le fitu tausaga mo Lapana ina ia mafai ona ia faaipoipo atu ia Rasela, e ui o se taimi umi lea e faigaluega ai (tagai foi “Iakopo ma Lona Aiga,” i Tala o le Feagaiga Tuai). Fesoasoani i tamaiti e mafaufau i folafolaga atonu latou te faia i isi tagata. Aisea e taua ai le tausia o a tatou folafolaga? Fesoasoani ia latou malamalama o se feagaiga o se folafolaga paia i le va o le Atua ma i tatou taitoatasi. Tuu atu lau molimau o le Tama Faalelagi ma Iesu Keriso e tausia i taimi uma a Laua folafolaga.

• Usu faatasi ma talanoaina se pese e faatatau i le faamaoni, e pei o le “I Believe in Being Honest” po o le “Tu Mo Le Mea Tonu” (Tusipese a Tamaiti 149, 81).

Kenese 33:1–4

E mafai e le Tama Faalelagi ma Iesu Keriso ona fesoasoani ia te au ia ou alofa i lo’u aiga.

E toatele tamaiti e iloa lagona o le ita i se tei. O le tala ia Iakopo ma Esau ma le faatoilaloina o le ita o le tasi i le isi atonu e musuia ai i latou.

Atatusi o Iakopo ma Esau o loo feopoai, saunia e Robert T. Barrett

Gaoioiga e Mafai Ona Fai

• Fesoasoani i tamaiti ia manatua le mafuaaga na ita ai Esau ia Iakopo (tagai Kenese 27:41 po o le “Iakopo ma Esau,” i Tala o le Feagaiga Tuai). Fai atu i tamaiti e faaali atu ia te oe pe faapeī se foliga ita. Ia faamatala atu, i le mavae ai o le tele o tausaga, sa fefe Iakopo e asiasi ia Esau. Fai atu i tamaiti e faaali atu ia te oe pe faapeī se foliga fefe. O le a se mea e tatau ona tatou faia pe a tatou fefefe? Valaaulia tamaiti e faafoliga e tatalo ao e faitauina le mea na fai atu e Iakopo i lana tatalo (tagai Kenese 32:11). Ona faitau lea o le Kenese 33:4 mo le mea na tupu ina ua vaai Esau ia Iakopo. Fai i tamaiti e faaali atu ia te oe pe na faapeī foliga o Iakopo ma Esau ina ua toe vaai le tasi i le isi.

• Faaali atu le ata o Iakopo ma Esau o loo maua i lenei otootoga. Tuu atu i tamaiti e faamatala mai mea o latou vaaia i le ata. Taʻu atu ia i latou sa i ai le lagona leaga i le va o nei uso e toalua, ae na laʻua filifili e fefaamagaloai. Fesoasoani i tamaiti e mafaufau pe faapefea ona latou faaalia atili le alofa i se tasi i lo latou aiga, e pei lava ona faaalia le alofa o Iakopo ma Esau i le tasi ma le isi.

Aoao atu le Aoaoga Faavae: Tamaiti Matutua

Kenese 28:10–22

O feagaiga e fesoasoani ia te aʻu e toe foi atu ai i le Tama Faalelagi.

E mafai ona e faaaogaina le miti a Iakopo i se apefai alu aʻe i le lagi e aoao ai tamaiti, o le tausia o a tatou feagaiga e saunia ai i tatou e ulu atu i le afioaga o le Atua.

Gaoioiga e Mafai Ona Fai

• Valaaulia tamaiti e faitau le Kenese 28:10–15 ona tusi lea o se ata o le miti a Iakopo. Fai atu ia i latou e faasoa mai a latou ata. Faamatala atu, o le apefai na faatusaina i se auala mo Iakopo e toe foi atu ai i le Atua. O le a le mea ua foai mai e le Atua e fesoasoani ia tatou toe foi atu ai ia te Ia? (tagai i le itulau o gaoioiga o lenei vaiaso). Faamanatu atu i tamaiti a latou feagaiga o le papatisoga. E faapefea ona tatou latalata atili i le Atua pe a tatou ola i lenei feagaiga?

• Faaali se ata o se malumalu, ma tusi i luga o le laupapa ia fuaitau autu mai le Kenese 28: 15–17, e pei o le: “Ou te i ai ia te oe,” “E i ai Ieova i le mea nei,” “Le fale lava o le Atua,” po o le “O le faitotoa lava lenei o le lagi.” Valaaulia ia tamaiti e sue nei fuaitau. Tau atu i tamaiti le auala e fesoasoani ai le malumalu ma feagaiga o le malumalu ia te oe ia e latalata ai i le Alii.

Kenese 29:16–30

Ou te talitonu i le faamaoni.

Sa tausia e Iakopo lana folafolaga e auauna ia Lapana mo le fitu tausaga, ae sa faasee o ia e Lapana. E faapefea ona e faaaogaina lenei tala e fesoasoani ai i tamaiti ia malamalama i le taua o le faamaoni e tusa lava pe le faamaoni isi?

Gaoioiga e Mafai Ona Fai

• Faitau faatasi le Kenese 29:16–30, ma fesoasoani i tamaiti e aotele mea na tutupu i nei fuaiupu. Na faapefea ona tali atu Iakopo i le faaseeina [o ia]? O le a se mea e mafai ona tatou aoao mai i lenei tala?

• I luga o le laupapa tusi ai O le a le mea e tupu pe a tatou le faamaoni? ma le O le a le mea e tupu pe a tatou faamaoni? Valaaulia tamaiti e saili tali e ala i le faitauina o le “Faamaoni ma le Amiosao” (i le Mo Le Malosi o le Autalavou [2011], 19).

Kenese 32:6–11; 33:1–4

E mafai e le Tama Faalelagi ma Iesu Keriso ona fesoasoani ia te au e alofa i lo’u aiga.

Sa ita Esau ia Iakopo, ma sa fefe Iakopo e toe vaai ia Esau, e ui lava ina mavae le 20 tausaga talu ona valavala. Ae na tatalo Iakopo mo se fesoasoani, ma na mafai e Esau ona foia lona ita. E faapefea ona e faaaogaina lenei tala e aoao ai tamaiti i le taua o le alofa i o tatou aiga?

Gaoioiga e Mafai Ona Fai

• Fesili i tamaiti po o le a se mea latou te manatua i le sootaga i le va o Iakopo ma Esau (tagai Kenese 27:41 po o le “Iakopo ma Esau,” i Tala o le Feagaiga Tuai). Faamatala atu ina ua mavae le 20 tausaga o nofo ese, na toe alu atu Iakopo e feiloai ia Esau. Faitau faatasi le Kenese 32:6–11. Na faapeī lagona o Iakopo? O le a le mea sa ia faia ia maua ai le fesoasoani? Molimau atu e mafai ona tatou ole atu i le Tama Faalelagi mo se fesoasoani pe a faigata a tatou sootaga faaleaiga. Faitau faatasi le Kenese 33:1–4 e iloa ai le ala na tali mai ai le Alii i le tatalo a Iakopo.

• Faasoa atu se aafiaga patino po o se tala mai se mekasini a le Ekalesia i auala e faaalia ai le alofa sili atu i totonu o tatou aiga. Valaaulia tamaiti e faasoa mai foi a latou aafiaga. O le a se tatou mea e fai pe a ita se tagata o lo tatou aiga ia i tatou? Ina ia aoao i mea na aoao mai le Faaola tatou te faia, tagai i le Mataio 5:43–45.

Uunaia le Aoaoina i le Aiga

Valaaulia tamaiti e faasoa atu le itulau o gaoioiga o lenei vaiaso ma o latou aiga e fesoasoani latou te aoao mai ai ma manatua ai le miti a Iakopo.

Faaleleia o Lo Tatou Aoao Atu

Faaaoga ata e fesoasoani ai i tamaiti ia malamalama i tala o tusitusiga paia. E masani ona lelei le aoao a tamaiti pe a latou matamata i ata o tala mai tusitusiga paia po o aoaoga. Mo se faataitaiga, e mafai ona e faaali atu se ata mai le otootoga o le vaiaso lenei i le Sau, Mulimuli Mai ia te A’u—Mo Tagata Taitoatasi ma Aiga.