Iosefa o Aikupito i le falepuipui

Atatusi o Iosefa o Aikupito i le falepuipui, saunia e Jeff Ward

7–13 Mati

Kenese 37–41

“Sa I Ai Ieova ia Iosefa”

O a upumoni mai le Kenese 37--41 e tatau ona malamalama atili ai tamaiti o lau vasega? Gauai atu i musumusuga e oo mai ia te oe a o e sauni e aoao atu.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Tuu atu i tamaiti ni nai minute e tusi ai se ata o se mea na latou aoaoina e uiga i le talalelei i le fale po o le lotu. Fai i tamaiti e faasoa ma talanoa e uiga ia latou ata na tusi.

aikona o le aoao atu

Aoao atu le Aoaoga Faavae: Tamaiti Laiti

Kenese 37

E mafai ona ou agalelei i lo’u aiga.

Sa lotoleaga uso o Iosefa ia te ia ma agaleaga ia te ia. E mafai faapefea ona e fesoasoani i tamaiti ia malamalama i le taua o le agalelei i isi, aemaise o tagata o lou aiga?

Gaoioiga e Mafai Ona Fai

• Ina ia faamatala le tala ia Iosefa ma ona uso mai le Kenese 37, e mafai ona e faaaogaina ata i le Sau, Mulimuli Mai ia te A’u—Mo Tagata Taitoatasi ma Aiga po o le “Iosefa i Aikupito” (i Tala o le Feagaiga Tuai). Tuu atu i tamaiti e fesoasoani e ala i le faasoaina atu o faamatalaga latou te iloa e uiga i le tala. Fai atu i ai ni fesili e pei o le, “Na faapefea ona agaleaga uso o Iosefa ia te ia?” Fesoasoani i tamaiti e mafaufau i mea na mafai ona faia e le au uso e faaali atu ai le alofa ia Iosefa. O le a se mea e tatau ona tatou faia pe a tatou lagona le ita i tagata o lo tatou aiga?

• Faaali atu se ata o se aiga (tagai Tusi Ata o le Talalelei, nu. 112), pe valaaulia tamaiti e tusi ata o o latou aiga. Fai atu ia i latou e faasoa mai ni auala e mafai ona latou agalelei ai i tagata o o latou aiga.

• Usu faatasi se pese e faatatau i le alofa i o tatou aiga, e pei o le “O Se Aiga Fiafia” (Tusipese a Tamaiti, 104). O le a se mea e mafai ona tatou faia ia fiafia ai o tatou aiga?

• Tuu i tamaiti e valivali le itulau o gaoioiga o lenei vaiaso ma, i le avanoa ua saunia, tusi ai se ata o tagata o le aiga o loo agalelei.

Kenese 37:18–28; 39:20–23

E mafai ona fesoasoani le Atua ia te aʻu pe a tutupu ni mea leaga.

E tele mea leaga na tutupu ia losefa, ae na filifili o ia e tausi ia poloaiga ma sa ia te ia le Alii. O tamaiti laiti e mafai ona aoao mai lenei mea e manao le Atua e fesoasoani ia i latou i taimi faigata o o latou olaga.

Gaoioiga e Mafai Ona Fai

• Faamatala nisi o mea faigata na tutupu ia losefa (tagai Kenese 37:23–28; 39:20; po o le “Iosefa ma Ana Miti” ma le “Iosefa i Aikupito,” i Tala o le Feagaiga Tuai). A uma ona e ta’u atu i tamaiti ia faigata taitasi na feagai ma Iosefa, valaaulia i latou e toe fai mai, “Sa i ai Ieova ia Iosefa” (Kenese 39:2).

• Faasoa atu ata o le Faaola o loo fesoasoani i tagata o e na feagai ma ni luitau (tagai Tusi Ata o le Talalelei, nu. 40–43). Valaaulia tamaiti e faasoa mai pe na faapefea ona fesoasoani atu le Faaola i tagata. Faasoa atu lau molimau e mafai ona fesoasoani mai le Alii ia i tatou pe a tutupu mea leaga ia i tatou.

• Usu se pese e faatatau i le tausiga alofa a le Faaola mo i tatou, e pei o le “Iesu O La Tatou Uo Pele” (Tusipese a Tamaiti,37). Faasoa atu se aafiaga na e lagonaina ai le alofa o le Atua i se taimi luitauina. Faaali atu se ata o Iesu, ma valaaulia tamaiti e faasoa mai o latou lagona e uiga ia te Ia.

Kenese 41:15–36, 47–57

E mafai ona lapataia au e le Atua i mea matautia.

Na fesoasoani le Atua ia Iosefa ia malamalama o miti a Farao o se lapataiga ia saunia mo taimi faigata e oo mai i le lumanai. Fesoasoani i tamaiti ia malamalama e mafai e le Atua ona lapataia i latou e uiga i tulaga lamatia, e aofia ai tulaga lamatia faaleagaga.

O Iosefa i le falepuipui o loo faamatalaina miti

Joseph Interpreting the Butler and Baker’s Dreams, saunia e François Gérard

Gaoioiga e Mafai Ona Fai

• Faasalalau ata o meaai i totonu o le potu, ma valaaulia ia tamaiti e ao mai ma “teu” i se koneteina. Faaaoga le gaoioiga lenei e ta’u atu ai i tamaiti e uiga i le auala na lapataia ai e le Atua ia Farao ina ia saunia mo se taimi o le a leai ai ni meaai (tagai Kenese 41:15–36, 47–57). Tuu atu i tamaiti e tusi ni ata o mea na miti i ai Farao ona faaaoga lea o a latou ata e aoao ai o latou aiga i le fale.

• Faaali atu se ata o le perofeta o loo i ai nei. Ta’u atu i tamaiti e uiga i aoaoga po o lapataiga ua tuuina mai e le Atua ia i tatou e ala mai ia te ia. Faamalamalama atu o le a faamanuiaina ma puipuia i tatou a o tatou mulimuli i le perofeta. Valaaulia tamaiti e faatino ni mea e mafai ona latou faia e mulimuli ai i fautuaga a le perofeta.

aikona o le aoao atu

Aoao atu le Aoaoga Faavae: Tamaiti Matutua

Kenese 39:1–3, 20–23; 41:38

Afai ou te faamaoni, o le a fesoasoani mai le Atua ia te au i taimi faigata.

E ui lava ina na tele tofotofoga faigata o Iosefa, ae sa tumau faamaoni pea o ia ma “ua ia te ia Ieova” (Kenese 39:3). O ona aafiaga e mafai ona fesoasoani i tamaiti ia lagona le mautinoa o le a fesoasoani le Atua ia i latou i taimi o tofotofoga.

Gaoioiga e Mafai Ona Fai

• Fai i tamaiti e saili ni upu po o ni fasifuaitau i le Kenese 39:1–3, 20–23; 41:38 o loo faaalia ai sa i ai le Atua faatasi ma Iosefa i ona taimi faigata. Afai e mafai, valaaulia tamaiti e fai se faailoilo laitiiti e faaalia ai se tasi o fuaitau na latou maua. Uunaia i latou e ave a latou faailoilo i le fale e faamanatu atu ai ia i latou o le a faatasi le Alii ma i latou i taimi o o latou tofotofoga.

• Valaaulia ia tamaiti e faasoa mai o latou manatu i le uiga o le fuaitau “sa i ai Ieova ia Iosefa” (Kenese 39:2). Valaaulia i latou e faasoa mai ni aafiaga na latou lagona ai le faatasi mai o le Alii ia i latou po o o latou aiga i se taimi faigata. Faasoa atu ni aafiaga talitutusa mai lou olaga.

Kenese 37:3–28

E mafai ona ou fiafia pe a tutupu ni mea lelei i isi.

O le lotoleaga na taitai atu ai uso o Iosefa e fai ni filifiliga leaga. O a latou filifiliga sese na tiga ai Iosefa ma nutimomoia ai le loto o lo latou tamā. O lenei tala e mafai ona fesoasoani i tamaiti e filifili ai ia fiafia pe a faamanuiaina isi e le Alii.

Gaoioiga e Mafai Ona Fai

• Valaaulia tamaiti e toe faamanatu le Kenese 37:3–11 ma tusi ni ata o le ofutele o Iosefa ma ana miti e lua. O a ni lagona o uso o Iosefa ia Iosefa? O a ni auala na ono mafai ona ese ai le latou tali atu? Talanoa pe aisea e taua ai le fiafia pe a tutupu ni mea lelei i isi tagata.

• Fai atu i tamaiti e faasoa mai nisi o tulaga e ono lagona ai e se tagata le lotoleaga i se isi tagata. Usu faatasi se pese e uiga i le faaalia o le alofa i isi, e pei o le “Ia Fealofani” (Tusipese a Tamaiti, 74) Faamamafa atu e mafai ona fesoasoani mai le Tama Faalelagi ia i tatou e suia lagona o le lotoleaga i lagona o le alofa.

Kenese 39:7–12

Faatasi ai ma le fesoasoani a le Alii, e mafai ai ona ou sola ese mai faaosoosoga.

A o feagai le fanau o loo e aoaoina ma faaosoosoga i o latou olaga, e mafai ona latou maua le malosi mai le faataitaiga a Iosefa o le sola ese mai faaosoosoga.

Gaoioiga e Mafai Ona Fai

• Faaali atu se ata o Iosefa ma le avā a Potifara (tagai Tusi Ata o le Talalelei, nu. 11), ma faasoa atu le tala i le Kenese 39:7–12. Na faapefea ona teena e Iosefa faaosoosoga? Fesoasoani i tamaiti e sue ni upu i le Kenese 39:7–12 e tali ai le fesili lenei—mo se faataitaiga, na iloa e Iosefa o le i ai faatasi ma le avā a Potifara o se “agasala i le Atua” (fuaiupu 9).

• Valaaulia tamaiti e mafaufau i ni tulaga e ono faaosoosoina ai tamaiti o le latou tupulaga e fai ni filifiliga sese. Fai atu ia i latou e faatino i se tala le auala e mafai ona latou mulimuli ai i le faataitaiga a Iosefa i nei tulaga—mo se faataitaiga, o a nisi o auala e mafai ona tatou manatua ai le Atua pe a faaosoosoina i tatou?

• Faaali atu ni maneta se lua, e faatusa i le Atua ma Satani, ma se mea faitino uamea itiiti e pei o se kilipa pepa, e faatusa ia i tatou. Faaaoga le maneta e faailoa ai o le tatou latalata atili atu i le Atua, o le malosi foi lena o lana faatosinaga o le a i ai ia i tatou, ma e faapena foi i le latalata atili atu ia Satani. O le a se mea e mafai ona tatou faia e latalata atu ai i le Atua? E mafai faapefea ona fesoasoani le Agaga Paia ia i tatou?

aikona o le aoaoina

Uunaia le Aoaoina i le Aiga

Valaaulia tamaiti e faasoa mai ni auala e faauma ai le fuaiupu lenei: “E mafai ona ou pei o Iosefa e ala i le .” Fai atu ia i latou e faasoa atu i o latou aiga pe na faapefea ona latou faaumaina le fuaiupu.

Faaleleia o Lo Tatou Aoao Atu

Valaaulia le fefaasoaai. A o outou talanoaina mataupu faavae o le talalelei, fai atu i tamaiti e faasoa mai o latou manatu, lagona, ma aafiaga. O le a e iloa ai e tele ni o latou malamalamaaga loloto o loo i ai.

itulau o gaoioiga: E mafai ona ou agalelei atu i lo’u aiga