Atatusi o Iosefa o Aikupito, saunia e Robert T. Barrett

14–20 Mati

Kenese 42–50

“A o le Atua, Na Finagalo Ia ia I’u i le Lelei”

E taua le iloa o mau o loo e aoaoina atu, ae e taua foi le iloa o tamaiti o loo e aoaoina. Faaalu se taimi e mafaufau loloto ma tatalo ai e uiga i ia mea uma e lua.

Tusi Faamaumau Ou Lagona Uunai

Valaaulia le Fefaasoaai

Ona o le tala i le Kenese 42–50 o se faaauauga o le tala i le lesona o le vaiaso ua tuanai, mai le Kenese 37–41, faaalu se taimi i le amataga o le vasega e tuu atu ai i tamaiti e faasoa mai se mea latou te manatua e uiga ia Iosefa, e aofia ai mea sa latou aoaoina i le Peraimeri ma le fale.

Aoao atu le Aoaoga Faavae: Tamaiti Laiti

Kenese 45:4–15

E mafai ona ou faaali atu le alofa i lo’u aiga.

Mo tamaiti laiti, atonu e te manao e faamamafa atu vaega o lenei tala lea na faaali atu ai e Iosefa le alofa i lona aiga.

Gaoioiga e Mafai Ona Fai

• O le faaaogaina o le “Joseph and the Famine” (i Tala o le Feagaiga Tuai) po o ata i le Sau, Mulimuli mai ia te A’u—Mo Tagata Taitoatasi ma Aiga, faamatala atu i tamaiti e uiga i le toe feiloaiga a Iosefa ma ona uso. Faamamafa atu le auala na faaali ai e Iosefa le alofa mo ona uso.

• Faitau fuaitau mai le Kenese 45:4–15 lea e faamatala mai ai mea na faia e Iosefa e faaalia ai sa alofa o ia i lona aiga. Fai atu i tamaiti e faafoliga o loo latou faia mea o loo faamatala mai i fuaiupu. Mo se faataitaiga, e mafai ona latou faafoliga e fai atu i se tagata o le aiga e “sōsō mai” (fuaiupu e 4) po o le tuu atu i se tagata o le aiga o se meaai (tagai i le fuaiupu e 11).

• Usu se pese e faatatau i le alofa, e pei o le “Ia Fealofani” (Tusipese a Tamaiti,74). Fesoasoani i tamaiti e tusi se auivi o o latou lima ma tusi i le auivi se mea e mafai ona latou faia e faaali atu ai le alofa i lo latou aiga.

Kenese 48:8–9

E fesoasoani faamanuiaga o le perisitua ia te a’u.

Na faamanuia e Iakopo ona atalii ma atalii a lana fanau (tagai i le Kenese 48–49). O aso nei, e mafai ona tatou maua faamanuiaga faaleperisitua lea e aumaia ia i tatou le mafanafana, faamalologa, taitaiga, ma le malosi faaleagaga.

E mafai ona tatou maua faamanuiaga mai ia i latou o e umia le perisitua.

Gaoioiga e Mafai Ona Fai

• Faaali atu i tamaiti se ata o Iakopo o loo faamanuiaina ona atalii po o nisi ata o faamanuiaga faaleperisitua (tagai i ata o lenei otootoga; tagai foi i le Tusi Ata o le Talalelei, nu. 12). Tuu atu i tamaiti e faamatala mai mea o loo tupu i totonu o ata.

• Faitau atu i tamaiti le Kenese 48:8–9. Faamatala atu o Isaraelu, ua ta’ua foi o Iakopo, o le tamā lea o Iosefa ma sa manao o ia e tuu atu i fanau a Iosefa se faamanuiaga faaleperisitua. Afai sa maua e se tasi o tamaiti se faamanuiaga faaleperisitua, valaaulia i latou e faamatala mai o latou aafiaga. Pe faasoa atu sou lava aafiaga.

• Fesoasoani i tamaiti e mafaufau i ni mafuaaga latou te ono talosaga atu ai mo se faamanuiaga faaleperisitua. Fesoasoani foi ia i latou e ta’u mai ni tagata e umia le perisitua e mafai ona latou talosaga atu i ai, e pei o se tamā, tamā matua, po o se uso o auaunaga.

Kenese 50:15–21

E mafai ona ou faamagalo atu.

O le a se mea e mafai ona aoao e tamaiti e uiga i le faamagalo atu mai le faataitaiga a Iosefa o le faamagaloina o ona uso?

Gaoioiga e Mafai Ona Fai

• Faaaoga le itulau o gaoioiga o le vaiaso lenei e fesoasoani ai i tamaiti ia manatua le auala na agaleaga ai uso o Iosefa ia te ia. Faitau i tamaiti le Kenese 50:17, ma faamamafa atu sa salamo le auuso mo le mea sa latou faia ma mananao ia faamagalo i latou e Iosefa. Faitau le fuaiupu e 21 e faaali atu ai na faamagalo e Iosefa ona uso—sa le’i toe ita o ia ia i latou.

• Usu faatasi le “Fesoasoani Mai Ia Te A‘u Tama Pele” (Tusipese a Tamaiti,52). Pe a tou pepese e uiga i le faamagalo atu, fai atu i tamaiti e faasino atu ia Iosefa i le itulau o gaoioiga. Pe a tou pepese e uiga i le salamo, valaaulia i latou e faasino atu i ona uso.

• Fesoaoani i tamaiti e mafaufau i ni tulaga lea atonu e manaomia ai ona latou faamagalo atu i se tagata. Valaaulia tamaiti e faataitai mea latou te ono fai atu ai pe faia e faaali atu ai le faamagalo atu i lena tagata.

Aoao atu le Aoaoga Faavae: Tamaiti Matutua

Kenese 42–44; 45:1–15

O le faamagaloga e aumai ai le filemu.

Sa faia e uso o Iosefa ni mea leaga ia te ia. Ae ui i lea sa faamagalo i latou e Iosefa ma aumaia ai le filemu i lona aiga.

Gaoioiga e Mafai Ona Fai

• Fesoasoani i tamaiti e faatino ni vaaiga mai le Kenese 42–44. A o latou faia, fesili atu ia i latou po o a ni o latou manatu i lagona atonu na i ai ia Iosefa i le toe vaai ai i ona uso pe faapeī foi ni lagona o le auuso ina ua latou iloaina mulimuli ane Iosefa.

• Fesili atu i tamaiti po o le a le uiga o le faamagalo o se tagata. Fesoasoani ia latou malamalama o le faamagaloina o se tagata e aofia ai le taulimaina o ia ma le alofa faaKeriso. Fesili atu i tamaiti po o le a se mea ua latou iloa e uiga i le tala o le faamagaloina e Iosefa o ona uso, po o le faitau ma tamaiti ia fuaiupu mai le Kenese 45:1–15. O le a se mea na faia pe na fai atu ai Iosefa e faailoa atu ai i ona uso ua ia faamagaloina i latou? O le a se mea tatou te fai atu ai pe faia pe a talosagaina i tatou e isi ia faamagalo i latou?

• Fai atu i tamaiti e mafaufau i se taimi na latou faamagaloina ai se tagata pe na faamagalo ai e se tagata i latou. Ina ia tuu atu ia i latou se taimi e mafaufau ai, faasoa atu sou lava aafiaga, ma molimau atu e uiga i faamanuiaga ia e oo mai mai le faamagalo atu. Valaaulia tamaiti e faasoa mai o latou aafiaga, pe a latou mananao ai. O a ni o latou lagona? O a ni mea ua tatou aoaoina e uiga i le faamagalo atu mai le faataitaiga a le Faaola? (tagai i le Luka 23:33–34).

Kenese 45:5–11

Na auina mai e le Tama Faalelagi ia Iesu Keriso e laveai a’u.

O le tala ia Iosefa na laveaiina lona aiga mai le oge e mafai ona aoaoina ai i tatou e uiga ia Iesu Keriso, o lē na laveaiina i tatou mai le agasala ma le oti.

Gaoioiga e Mafai Ona Fai

• Tusi i luga o le laupapa Iosefa ma Iesu Keriso. Fesoasoani i tamaiti e su’e pea o mau ma tusi i luga o le laupapa mea e tutusa ai Iosefa ma Iesu: Kenese 37:3 ma le Mataio 3:17; Kenese 37:26–28 ma le Mataio 26:14–16; Kenese 45:5–7 ma le Luka 4:18; ma le Kenese 47:12 ma le Ioane 6:35.

• Fesili atu i tamaiti po o le a le uiga o le laveai po o le faasaoina o se tagata. Afai e i ai se tasi o i latou na i ai se aafiaga o le laveaiina po o le faasaoina mai se tulaga lamatia, valaaulia i latou e faasoa mai. Na faapefea ona laveai e Iosefa ona uso? (tagai i le Kenese 42:1–3; 45:5–7). Faaali atu se ata o le Faaola. Na faapefea ona laveai i tatou e Iesu?

Faaliliuga a Iosefa Samita, Kenese 50:27–33 (i le faaopoopoga o le Tusi Paia)

Na saunia e le Tama Faalelagi ia Iosefa Samita e avea ma se perofeta i o tatou aso.

O le fia afe tausaga na muamua atu, na vaai ai Iosefa o Aikupito o le a valaauina e le Alii ia Iosefa Samita e faia se galuega maoae i aso e gata ai. Aoao atu tamaiti i le auala ua faamanuiaina ai i tatou e le Alii e ala mai i le Perofeta o Iosefa Samita.

Gaoioiga e Mafai Ona Fai

• Tuu atu i tamaiti ni faamatalaga faaiteite e uiga ia Iosefa Samita, ma valaaulia i latou e mate mai po o ai o loo e faamatalaina. Faaaofia ai ni faaiteitega mai le Faaliliuga a Iosefa Samita, Kenese 50:27–33 (i le faaopoopoga o le Tusi Paia), e pei o le “na ia aoao mai i matou e uiga i feagaiga” (tagai i le fuaiupu e 28), “na ia tuuina mai ia i matou le afioga a le Alii” (tagai i le fuaiupu e 30), ma le “na igoa foi o ia i lona tamā” (tagai i le fuaiupu e 33). Pe a uma ona mate sa’o mai e tamaiti, valaaulia i latou e su’e faaiteitega nei i totonu o fuaiupu. O le a se isi mea tatou te aoaoina mai e uiga ia Iosefa Samita mai le valoaga a Iosefa i Aikupito?

• Faaali atu i tamaiti ata ia e faatusa i mea taua na faia pe na aoao atu e Iosefa Samita (tagai, mo se faataitaiga, Tusi Ata o le Talalelei, nu. 89–95, 97, 98, 117, 118). Fesoasoani i tamaiti e mafaufau i faamanuiaga ua tatou maua ona o Iosefa Samita. Mo se faataitaiga, na faapefea ona fesoasoani lana galuega ia i tatou e faalatalata atili ai ia Iesu Keriso?

Uunaia le Aoaoina i le Aiga

Valaaulia tamaiti e faasoa atu le itulau o gaoioiga o lenei vaiaso i o latou aiga i le fale. E mafai ona latou faaaogaina e faamanatu ai le tala ia Iosefa ma ona uso ma talanoaina ai le taua o le alofa ma le faamagalo atu i totonu o o tatou aiga.

Faaleleia o Lo Tatou Aoao Atu

Molimau atu e uiga ia Iesu Keriso. E ui lava e le o ta’ua i le Feagaiga Tuai le suafa o Iesu Keriso, ae o loo faasino atu ia te Ia i isi suafa, ma molimau mai ia te Ia e ala i faailoga ma tala. Fesoasoani i tamaiti ia aoao e vaavaai mo upumoni e uiga i le Faaola i soo se taimi latou te faitau ai i tusitusiga paia.