Atatusi o Iosefa o Aikupito, na saunia e Robert T. Barrett

14–20 Mati

Kenese 42–50

“O Le Atua Na Finagalo Ia ia Iu i le Lelei”

O le faitauina o tusuitusiga paia e valaaulia ai le Agaga. Faalogologo mo Ana uunaiga a o e faitau, e tusa lava pe le foliga ma e fesootai tonu ma mea o loo e faitauina.

Tusifaamaumau Ou Lagona Uunai

Na tusa ma le 22 tausaga talu ona faatauina atu Iosefa i Aikupito e ona uso. Sa mafatia o ia i le tele o tofotofoga, e aofia ai le tuuaiseseina ma le faafalepuipuiina. Ae ina ua ia toe vaai i ona uso, ua avea Iosefa ma kovana o Aikupito atoa, e lona lua ia Farao. Sa faigofie lava ona ia tauimasui ia te i latou, pe a mafaufau atu i le mea na latou faia ia Iosefa, e ono foliga mai e malamalama gofie lava. Ae peitai na faamagalo e Iosefa ona uso. E le gata i lena, ae sa ia fesoasoani ia o latou iloa le faamoemoega paia o ona puapuaga. O le Atua na finagalo ia ia iu i le lelei” (Kenese 50:20), sa ia fai atu ai ia te i latou, aua na tuuina o ia i se tulaga e laveai ai “le aiga atoa uma o lona tamā” (Kenese 47:12) mai le oge.

E tele itu, na tutusa ai le olaga o Iosefa ma le [soifuaga] o Iesu Keriso. E ui lava o a tatou agasala na mafua ai Ona puapuaga e tele, ae na ofoina mai e le Faaola le faamagaloga, ma laveai ai i tatou uma mai se mala e sili atu le leaga nai le oge. Pe tatou te manaomia ona maua le faamagaloga po o le tuuina atu o le faamagaloga—e i ai le taimi tatou te manaomia uma ai mea e lua—o le faataitaiga a Iosefa ua faasino atu ai i tatou i le Faaola, o le afuaga moni lena o le faamalologa ma le faaleleiga.

Manatu mo Suesuega Faaletagata Lava Ia o Tusitusiga Paia

Kenese 45:1–8; 50:20

“Na auina mai foi au e le Atua e muamua ia te outou e faasaoina outou.”

E pei ona e faitau e uiga ia Iosefa, ua e maitauina ni mea e talitutusa i le va o lana tala ma le misiona togiola a Iesu Keriso? E mafai ona e mafaufau loloto pe faapefea ona tutusa le matafaioi a Iosefa i lona aiga i le matafaioi a le Faaola i le aiga o le Atua. O a ni mea o loo ogatasi i le va o aafiaga o Iosefa ma le misiona a le Faaola, o lē na auina mai “e faaola ia [i tatou] i le faaolataga tele” (Kenese 45:7).

Kenese 45; 50:15–21

O le faamagaloga e aumaia ai le faamalologa.

O le faitau e uiga i le faamagaloina e Iosefa o ona uso mo mea leaga na latou faia ia te ia, e ono faaosofia ai oe e te mafaufau e uiga i se tasi o loo faigata ona e faamagaloina. Pe masalo foi o se tofotofoga faigata o le faamagalo atu o loo i lou lumanai. Po o le a lava le itu, atonu e fesoasoani le mafaufau loloto pe aisea na mafai ai e Iosefa ona faamagalo atu. O a ni mea e faatatau i le tamalii’aga ma uiga o Iosefa e te maua i le Kenese 45; 50:15–21? Faamata na faapefea ona tosinaina o ia e ona aafiaga ina ia sili atu ona loto faamagalo? O le a se mea o fautua mai e le faataitaiga a Iosefa e uiga i le ala e mafai ona sili atu ai ona e loto faamagalo faatasi ma le fesoasoani mai le Faaola?

Maitau foi faamanuiaga na oo mai i le aiga o Iosefa ona o lona faamagalo atu. O a ni faamanuiaga na e vaaia mai le faamagalo atu? O e lagona le musuia e aapa atu i se isi na faia se mea sese ia te oe?.

Tagai foi i le Kenese 33:1–4; Mataupu ma Feagaiga 64:9–11; Larry J. Echo Hawk, “Faapei Ona Faamagalo mai Keriso ia te Outou, ia Faapea Foi Outou,” Liahona, Me 2018, 15–16.

Kenese 49

O le a le uiga o le faafaailoga o loo i le faamanuiaga o Iakopo?

O faamanuiaga a Iakopo i lana fanau o loo i ai ni ata manino, ae peitai e i ai nisi aufaitau e faigata ona latou malamalama i ai. O le mea e faafetai ai, ua aumai e le talalelei toefuataiina nisi malamalamaaga faaopoopo. A e faitau i le faamanuiaga na tuuina atu ia Iosefa o loo i le Kenese 49:22–26, faitau foi ma fuaiupu nei, ma vaai po o a ni malamalamaaga loloto o loo aumai ai: 1 Nifae 15:12; 2 Nifae 3:4–5; Iakopo 2:25; Mataupu Faavae ma Feagaiga 50:44.

A o e faitau i le faamanuiaga o Iuta o loo i le Kenese 49:8–12, ia manatua o le Tupu o Tavita ma Iesu Keriso o e e tupuga mai ia Iuta. O a upu ma fuaitau o loo i nei fuaiupu e faamanatu mai ai ia te oe le Faaola? Pe a e suesueina le faamanuiaga a Iuta, e fesosasoani foi lou faitau o le Faaaliga 5:5–6, 9; 1 Nifae 15:14–15; Mataupu Faavae ma Feagaiga 45:59; 133:46–50.

Afai e te fia aoao atili e uiga i atalii o Iakopo ma ituaiga o Isaraelu o e na tupuga mai ia i latou, o loo i ai ni faamatalaga mo i latou taitoatasi i le Guide to the Scriptures (scriptures.ChurchofJesusChrist.org).

Kenese 50:24-24; Faaliliuga a Iosefa Samita, Kenese 15:9–12 (i le faaopoopoga i le Tusi Paia)

“O le a faatu mai e le Alii loʼu Atua se tagatavāai.”

E ala mai i miti a Iosefa (tagai i le Kenese 37:5–11) ma lona faaliliuina o miti a isi (tagai i le Kenese 40–41), na faaali mai ai e le Alii mea o le a tutupu i aso po o tausaga i le lumanai. Ae na faaali mai foi e le Alii ia Iosefa mea o le a tutupu i seneturi o le a oo mai. Ae faapitoa lava, sa ia aoao ai e uiga i misiona faaperofeta a Mose ma Iosefa Samita. Ao e faitauina upu a Iosefa o loo i le Kenese 50:24–25 ma le Faaliliuga a Iosefa Samita, Kenese 50:24–38 (i le faaopoopoga i le Tusi Paia), fesili ifo ia te oe lava, pe na ono mafai faapefea e le iloaina o nei mea ona faamanuiaina ai Iosefa ma le fanauga a Isaraelu. Aisea e te manatu ai na taua i le Alii ona toefuatai mai lenei valoaga e tauala mai ia Iosefa Samita? (tagai foi i le 2 Nifae 3).

Sa faapefea ona faataunuuina e Iosefa Samita valoaga o loo i le Faaliliuga a Iosefa Samita, Kenese 50: 27–28, 30–33? (tagai i le Mataupu Faavae ma Feagaiga 1:17–23; 20:7–12; 39:11; 135:3).

Atatusi o Iosefa o Aikupito, na saunia e Paul Mann

Manatu mo Suesuega Faaleaiga o Tusitusiga Paia ma Afiafi Faaleaiga

Kenese 42–46.Atonu o le a fiafia lou aiga e faatino le tala o le toefaatasia o Iosefa ma ona uso. (Atonu o le a fesoasoani le “Iosefa ma le Oge,” i le Tala o le Feagaiga Tuai .) Ia fai mea fiafia ai—faaaoga teuga ma mea faatino pe a tou mananao ai. Faamalosiau i tagata o le aiga e taumafai ia malamalama i lagona ma manatu o tagata [o loo latou faatinoa]. Atonu tou te taulai faapitoa atu i lagona o Iosefa agai i ona uso ma pe faamata o a ni o latou lagaona ina ua ia faamagaloina i latou. O lenei mea e ono taitai atu ai i se talanoaga i auala e mafai ai e le faamagalo atu ona faamanuiaina lo outou aiga.

Ina ua toe feiloai Iosefa ma ona uso i le mavae ai o tausaga e tele, sa faapefea ona latou faailoa atu ua suia i latou talu mai le taimi mulimuli na ia vaai ai ia i latou? O le a se mea e mafai ona tatou aoao mai e uiga i le salamo mai lo latou aafiaga?

Kenese 45:3–11; 50:19–21.Na iloa e Iosefa e ui lava ina sa faigata lona aafiaga i Aikupito, ae “o le Atua na finagalo ia ia iu i le lelei” (Kenese 50:20). Pe na i ai se taimi na aafia ai lou aiga i ni tofotofoga lea sa faapea ona liliuina e le Atua e avea ma ni faamanuiaga?

O se viiga e uiga i le agalelei o le Atua i taimi o tofotofoga (e pei o le “Le Fa’avae Malosi” [Viiga, nu. 45]) e ono faaleleia atili ai le talanoaga lenei. O a faamatalaga auiliili mai le aafiaga o Iosefa o faaalia ai mea o loo aoao mai i le pese?

Kenese 49:9–11, 24–25.O a ni mea tatou te maua i nei fuaiupu e aoao ai i tatou e uiga i matafaioi ma le misiona a Iesu Keriso? (Mo se fesoasoani ina ia malamalama i fuaitau o loo i nei fuaiupu, vaai i anomea e uiga i le Kenese 49 i “Manatu mo Suesuega o Tusitusiga Paia a le Tagata lava Ia.”)

Mo nisi manatu mo le aoaoina o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Le Fa’avae Malosi,” Viiga, nu. 45.

Faaleleia o Lo Tatou Aoao Atu

Faaaoga musika. Fesoasoani i tagata o le aiga e saili upumoni o le talalelei i upu o viiga ma pese a le Paraimeri. Vaai mo ni auala e avea ai musika paia o se vaega faisoo o au suesuega o le talalelei.

Iakopo o Loo Faamanuia Ona Atalii, saunia e Harry Anderson