28 Fepuari–6 Mati

Kenese 28–33

“E Moni Lava E i Ai Ieova i le Mea Nei”

A o e faitau i le Kenese 28–33, manatunatu loloto i mea e te aoao mai i faataitaiga a Iakopo ma lona aiga. Tusi i lalo ni lagona uunai e te maua.

Tusifaamaumau Ou Lagona Uunai

O le mataupu 28 ma le 32 o le Kenese o loo faamatala mai ai ni aafiaga faaleagaga se lua na maua e le perofeta o Iakopo. O nei mea uma e lua na tutupu i le togavao i lalo o ni tulaga e matuai eseese lava. O le aafiaga muamua, sa malaga atu Iakopo i le nuu o lona tina e saili sana avā, ma i le ala, na moe ai i le po ma aluga i se maa. Atonu sa leai sona manatu o le a i ai le Alii i se nofoaga tuufua faapea, ae na faaali atu e le Atua o Ia lava ia Iakopo i se miti na suia ai o lona olaga, ma na faapea ai Iakopo, “E moni lava e i ai Ieova i le mea nei; a e ou te lei iloa” (Kenese 28:16). I ni tausaga mulimuli ane , na toe i ai foi Iakopo i se togavao. I le taimi lea, sa toe foi atu o ia i Kanana, e feagai ma se feiloaiga faigata ma lona uso toatamai o Esau. Ae sa iloa e Iakopo pe a ia manaomia se faamanuiaga, e mafai ona ia saili atu i le Alii, e oo lava i le togavao (tagai i le Kenese 32).

Atonu e te oo foi i lau lava togavao e saili se faamanuiaga mai le Atua. E masalo o lou togavao o se mafutaga faigata faaleaiga, e pei ona sa i ai Iakopo. Atonu foi ua e lagona le taumamao ese mai ma le Atua pe ua e lagona lou manaomia o se faamanuiaga. O nisi taimi e oo mai ai se faamanuiaga ae lei mafaufauina; ae o isi taimi e muamua mai ai se tauiviga. Po o le a lava le mea e te manaomia, e mafai ona e iloa e oo lava i ou togavao, “e i ai Ieova i le mea nei.”

Manatu mo Suesuega Faaletagata Lava Ia o Tusitusiga Paia

Kenese 28; 29:1–18

Ua folafola mai ia te au faamanuiaga a Aperaamo i totonu o le malumalu.

A o agai atu o ia i Karana e saili sana avā, na miti Iakopo i se apefa’i e tu i le lalolagi ae alu atu e tau i le lagi, ma le Atua o loo tu ai i ona luga a’e. I lea miti, na toe faafou ai e le Atua ma Iakopo ia feagaiga lava ia e tasi na Ia faia ma Aperaamo ma Isaako (tagai i le Kenese 28:10–17; tagai foi Kenese 12:2–3; 26:1–4). Na faasoa mai e Peresitene Marion G. Romney le manatu lenei e uiga i le mea e mafai ona faatusa i ai le apefai: “na iloa e Iakopo o feagaiga na ia faia iina ma le Alii o vae ia o le apefai, ia o le a ia a’e ai ina ia maua faamanuiaga folafolaina—o faamanuiaga o le a mafai ai ona ia ulufale atu i le lagi ma faatasi ai ma le Alii. … O malumalu ia i tatou uma o Peteli lea ia Iakopo” (“Temples—The Gates to Heaven,” Ensign, Mar. 1971, 16).

O a nisi upu ma fuaitau i le Kenese 28:10–22 e ta’u mai ai ia te oe se sootaga i le va o le aafiaga a Iakopo ma faamanuiaga o le malumalu? A o e faitau i nei fuaiupu, mafaufau i feagaiga ua uma ona e faia; o a ni lagona uunai e oo atu ia te oe?

A o e faitau i le Kenese 29:1–18, mafaufau loloto pe o a ni auala na taua ai le faaipoipoga a Iakopo ia Rasela i le feagaiga na faafouina e le Atua ma Iakopo i Peteli (“fale o le Atua”; tagai i le Kenese 28:10–19). Ia manatua le aafiaga lenei a o faaauau ona e faitau e uiga i le olaga o Iakopo i le Kenese 29–33. O faapefea ona aumai oe e le maota o le Alii ia e latalata atili atu i le Atua?

Tagai foi i le Yoon Hwan Choi, “Aua le Vaavaai Solo, Vaai i Luga!” Liahona, Me 2017, 90–92.

Kenese 29:31–35; 30:1–24

E manatua e le Alii a’u i o’u tofotofoga.

E ui lava na ola Rasela ma Lea i se vaitaimi ma se aganuu e ese mai ia i tatou, ae e mafai ona tatou malamalama uma i ni lagona na i ai ia te i laua. A o e faitau i le Kenese 29:31–35 ma le 30:1–24, vaavaai mo ni upu po o fuaitau o loo faamatala ai le alofa mutimutivale o le Atua ia Rasela ma Lea. Mafaufau loloto pe sa faapefea ona “silasila mai [le Atua] i [ou] tiga” ma “manatua” oe (Kenese 29:32; 30:22).

E taua foi le manatua e ui lava ina faafofoga mai le Atua ia i tatou, ae i Lona poto, e le mafai ai i taimi uma ona Ia tuuina mai le mea tonu lava lea tatou te ole atu ai. Mafaufau e suesue i le savali a Elder Brook P. Hales “Tali i Tatalo” (Liahona, Me 2019, 11–14) e iloa ai auala eseese e tali mai ai le Tama Faalelagi ia i tatou.

Mo nisi faamatalaga faaleaganuu o lenei tala, tagai i le Tusi Lesona a le Tagata Aoga o le Feagaiga Tuai: Kenese–2 Samuelu (2003), 86–88.

Atatusi o Iakopo ma Esau o loo feopoa’i, na saunia e Robert T. Barrett

Kenese 32–33

E mafai e le Faaola ona fesoasoani e foia feeseeseaiga i totonu o o tatou aiga.

Ina ua toe foi atu Iakopo i Kanana, sa matuai “mata’u tele o ia ma atuatuvale” i le pe o le a faapefea ona talia o ia e Esau (Kenese 32:7). A o e faitau i le Kenese 32–33 e uiga i le feiloaiga a Iakopo ma Esau ma ona lagona i le agai atu i ai, e mafai ona e manatunatu loloto i ou lava sootaga faaleaiga—atonu o se sootaga e manaomia ona toe faaleleia. Atonu o le a musuia oe i le tala lenei e aapa atu ai i se isi tagata. O fesili faapenei e mafai ona fesoasoani e taiala ai lau faitau:

• Sa faapefea ona tapena Iakopo e feiloai ma Esau?

• O le a se mea na laualuga ia te oe e uiga i le tatalo a Iakopo o loo maua i le Kenese 32:9–12?

• O le a se mea ua e aoaoina e uiga i le faamagalo atu mai le faataitaiga a Esau?

• E faapefea ona fesoasoani le Faaola ia i tatou e faamalolo [manu’a] o se mafutaga faaleaiga?

Tagai foi i le Luka 15:11–32; Jeffrey R. Holland, “O le Galuega o le Faaleleiga,” Liahona, Nov. 2018, 77–79.

Manatu mo Suesuega Faaleaiga o Tusitusiga Paia ma Afiafi Faaleaiga

Kenese 28–33.Faaaoga le “Iakopo ma Lona Aiga” (i le Tala o le Feagaiga Tuai) e fesoasoani ai i tamaiti ia malamalama i mea na tutupu mai nei mataupu. Atonu e mafai e tagata o le aiga ona taofi i ata taitasi ma faailoa mai lea mea o loo aoaoina mai, e pei o le taua o faaipoipoga, feagaiga, galue, ma le faamagalo atu.

Kenese 28:10–22.E mafai ona tou faaaogaina se apefa’i (po o se ata o se apefa’i) e talanoa ai pe faapefea ona pei a tatou feagaiga o se apefa’i. O a ni feagaiga ua tatou faia, ma e faapefea ona latou aumaia i tatou ia latalata atu i le Atua? Atonu o le a fiafia tagata o le aiga e tusi le ata o le miti a Iakopo, e pei ona faamatala mai i le Kenese 28:10–22.

O le viiga “Ta Felata’i Nei, le Atua ma Oe” (Viiga, nu. 59) na musuia ona o le miti a Iakopo. E mafai ona usu e le tou aiga lenei pese ma talanoa po o a mea o loo aoao mai e fuaiupu taitasi.

Kenese 32:24–32.Atonu e i ai nisi o le tou aiga e fiafia e tauivi. Aisea e avea ai le “fagatua [tauivi]” o se auala lelei e faamatala ai le sailiga o faamanuiaga mai le Alii? O le a le mea ua fautua mai le Enosa 1:1–5; Alema 8:9–10 e faatatau i le uiga o le “fagatuaga … i luma o le Atua”?

Kenese 33:1–12.Ina ua mavae le tele o tausaga o le loto tiga, sa faapea ona toe faatasia Esau ma Iakopo. Afai e mafai ona talanoa mai Esau ma Iakopo ia i tatou i aso nei, faamata o le a se mea la te ono ta’u mai ia i tatou pe afai o loo i ai se finauga i lo tatou aiga?

Mo nisi manatu mo le aoaoina o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Fanau, ua Leoleo mai le Atua,” Viiga, nu. 180.

Faaleleia o Suesuega Faaletagata Lava Ia

Vaavaai mo Iesu Keriso. O loo molimau mai le Feagaiga Tuai e uiga ia Iesu Keriso e ala mai i tala ma faailoga. Mafaufau e faailoga pe tusi i lalo fuaiupu o loo faatatau atu i le Faaola ma e faapitoa ona anoa ia te oe.

O le Miti a Iakopo i Peteli, saunia e J. Ken Spencer